Rasul 16:6 - Eipomek

⁶ Paulus ap, el neika balamik nang ap arye, ‘Asia tam noutamak Yesus yupu peterelbinamap,’ tenelamik bukni, Allah El Dib Kanye arye yupu sekelongolamuka ati, Asia tam kum balamik bukni, Pirgia tam noutamak ap, Galatia tam noutamak ap, amutuku uk nyalbalamik.

Rasul 16:6 ပူးပေါင်းရင်းမြစ်များ

Yesaya 30:21

Atalak noutam ara, anggun nirya ara, bisik banmamunce, walwalapdamunye talak ara, anggun balye tam arye do, anggun urasin tam arye do, dibuka kekepmunyopura, Allah arye anggunti, “Teleb banumunye bisik ara atia, abisikuk melibuka banamlume,” nyabuka lak nyapnamsile. Ati el yupu nyapliba, kekenamlume.

Lukas 1:2

Aning nirya elilamik ning ara, Yesus ara, el pil winiryuk deiya koubuk talak arye, sik asing elilamik nang ap, tonda, el ap, melibuka Allah yupu pil dopra balamik nang ap arye, laka nyalilamsik touk anang arye sekdeibik.

Rasul 10:19

Asipdeyik talak ara, Peterus arye el lengdar atonun dinmok ning ati, tuba tenenmokbuk, Allah El Dib Kanye arye Peterus ati nyabuk. “Simono, ninye winilye nang arye anti enmakiake.

Rasul 11:12

Tikilyayikura, Allah El Dib Kanye arye, “Anang ara, yuk mutuku ninye anya arye ‘Na ap neika kum binamabe,’ tenena bataklyame. Ur talye neika ansinibuka bilulume,” nyapnuk. Tonda, anaku barye diba tenebik nang ap, neika beipue. Biburye Yahudi yala kumnye, el si ara, Kornelius aik wekupu.

Rasul 16:7

Balamikce Misia atam, Bitinia otam noutamak ara, wilyamukak biyikura, ‘Bitinia tam binuyap,’ tenebik bukni, Yesus el Dib Kanye arye, ‘Amutuku noutamak kum binamlume,’ nyabuka yupu sekdongobuk.

Rasul 18:23

Antiokia mutuku biyukopura, amutuku uk mitik tonun ulamuka ani, Antiokia mutuku anirye, otam mutuku, Galatia tam noutamak ap, Pirgia tam noutamak ap, amutuku-amutuku noutamak yuk-yuk peterepra balamuk. Peterepra banmuk, talak ara, Paulus el peterelamuk yupu arye, amutuku ulamik anye Yesus ulamuk ning piribuka kel kibuka ulamik nang ati, sik talima mikip kibuka kwa deipnin balamuk.

Rasul 19:10

Yupu talipdanuka, laka nyabuka, ulamika ani, keting tamun ara, bitinye. Apia ulamika ati, Yahudi yala nang ap, Yunani yala nang ap, Asia tam noutamak ulamik nang ara, nun deiyoknye Yesus, el laka teleb yupu kekelamik.

Rasul 20:16

Paulus arye weik sum Pentakosta tuba upmal talak anyuk ara, ‘Yerusalem mutuku bitinyopura, ara, pia telebe’ tenen, patabuk ati, witenebuk. ‘Asia tam noutamak binyopura, na Pentakosta sum, Yerusalem binamne, tenepse sum dam kiplyak ati, Efesus mutuku ara, kirikuka binamne,’ tenebuk. Witenebuk ati, Miletus mutuku uk beipu.

Rasul 20:28

‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.

Rasul 20:4

Tenebukce amutuku biyuk talak ara, el ap, neika biyik nang si ara, ani. Berea mutukunye Pirus el mi Sopater ap, Tesalonika mutuku nang bitinye nang ara, Aristarkus ap, Sekundus ap, Derebe mutukunye Gaius ap, tonda, Timotius ap, ton Asia tam bitinye nang ara, Tikikus ap, Teropimus ap, anang ap, Saulus ap, sik nirya neika Makedonia tam noutamak mapnin balamik.

Rasul 21:27

Ura, ‘Allah arye, nun malye winina ning kilipsute’ tenen, Allah ati arelamik sum, tekbarye sum dam akunum ubukopura, Yahudi yala nang tonok-tonok, Asia tam arye yayik. Yayikce, Paulus ara, Yahudi yala nang, sik malye ning dekna ati, Allah arilbalamik aik dam unmoka eibik. Eibikce, anyaik dam wekmek nang nirya arye, “Opnuyabe,” nyabuka, sik yupu nyabika deice arye anang kekebikce, yu ubukura, anang nirya arye, “Anye bira opnuyabe,” nyabuka Paulus talibik.

Rasul 6:9

Apil dolamuk bukni, aminyan talak ara, Yahudi yala nang Allah si erelamik aik si ara, Lipertini nang nyalamik aik weklamik nang arye Stefanus el yupu deiyok koubuka yanibik. Anyaik weklamik nang ara, Yahudi yala nang bukni, Kirene mutuku ap, Aleksandia mutuku ap, tonda Provinsi Kilikia ap, Provinsi Asia ap, atam nang arye el yupu yanibik akarye yupu weik nyanmek.

Rasul 8:29

Yininmok anyak, Allah El Dib Kanye arye Pilipus ati nyabuk. “Anda atuku deice banmal ning dam bimince neika ansinibuka banurume,” nyabuk.

Roma 16:5

Tonda, anggun Roma mutuku diba tenelulum ninye arye, Periskila ap, Akwila ap, sik aik pum, ‘Allah yupu kekenamap’ tenen, buluyak ninye, sik diba tenenyak ninye ati, “Paulus arye telebe nyapsuke,” nyabuka laka nyapnamnulume. Tonye el si ara, Epenetus, elda Asia tam noutamak unyak ninye kan-kan arye, minyuma deiyok koubuka diba tenyamuknye anya arye, elda na kanye delinanye ulule. El ti, “Paulus arye telebe nyapdeipmakile,” nyabuka nyapnamnulume.

1 Korintus 12:11

Allah el mikip arye, el pil dona deiyok ning areselilye ning ara, yala yuk-yuk ulul bukni, anirya ara, Allah El Dib Kanye aryuk aresulule. Tonda, dib tenen ninye nirya ton batakana kum anggun nirya ati, el kanye aniryuk tenesilye touk bokuka yuk-yuk arisulule.

1 Korintus 16:1

Winira, yuk yupu ton nyapnusine. Sikce nati, “Allah dib tenebik ninye, talye bona utotowa talina kum ninye unyak nang, sik melina ati, yo bok bulubuka deibupu ning ara, yata wiripnamap do?” nyabuka, asipdenulum ning ati, nyapnusine. Sik Galatia mutuku unyak ninye, Allah dib tenenyak ninye ati, ‘Winipnamlume,’ nyabuka laka nyapse touk, anggun Korintus mutuku ninye babye, aning atonun wininamlume.

1 Korintus 16:19

Ara, Asia tam dib tenebuka unyak ninye nirya arye, anggun Korintus mutuku ululum ninye ati, “Nun kayapu, telebe,” nyalisinyake. Aning atonun, Akwila ap, el kil Pereskila ap, nun nirya ap, Yesus ap talima dukdongobuka neika unyaba anya arye, sikce, anggun Korintus mutuku ululum ninye ati kanye deibuka, “Telebe,” nyalisururake. Tonda, sik aik pum wekuka Allah yupu kekenyak ninye arye, anggunti, “Telebe,” nyalisinyake.

2 Korintus 1:8

Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Nunda, Provinsi Asia tam ulamnumu talak ara, ikin ulamsuk ning ati, ‘Kel bikna kumce, walwal asa upmunyak’ tenen, ayupu ton nyapnusine. Atalak ara, weik ikin ning weik ulamsukba, kanye imun kanye bomnumua ani, ‘Se, pil tuba kum doptinimnye. Nun pia kum winipmanto upsile’ tenen, ikin weik ulamsuk bukni, nunce ilil kanye bobuka, ‘Kume, nun dipnamnamca,’ tenelamnumu.

Galatia 3:1

Se, anggun Galatia mutuku ninyeo, anggunda pia walwal nang atonun unmalume. Yata nang arye, tilila yupu peterelamsika deice arye, yupu dipkoprop ning moubuka kum kel bikamlum do? Kume, narye peterelamsisiba, elilamnulum talak ara, “Yesus Kristus wanwanun yo deice obikbuk, dipsuka deice arye lyesulule,” nyabuka laka nyabuka peterelamsise.

2 Timotius 1:15

Timotius, an kele. Asia tam diba tenyamik nang nirya arye, nati akunum bataknike. Aninye kan-kan, sik Pigelus ap, Hermegenes ap, sik bitinye nang babye, bataknirike.

2 Timotius 4:10

Deiyok ara, na melipnuknye Demas ara, talye tukwak mutuku ulul ning nirya ati, ‘Aning ara ilil ulul. Na doproptinye’ tenen, kanye engelamuka ati, akunum bataknukce, Tesalonika mutuku biyuk. Kereskes ara, Galatia tam biyuk touk, Titus ara, Dalmatia mutuku akunum biyuk.

Ibrani 11:8

Ura, minop talak Allah arye Abraham ati, “Auminye mutuku batakuka, na arepnamkin mutuku binamlyame,” nyabuka, yukubukba, Abraham kekebukce biyuk. Elda, ‘Na binamne mutuku anye’ tenen, moubuka kum tenebuk bukni, el diba tenelamuka deice aryuk kekebukce adiparyuk biyuk.

1 Peterus 1:1

Na Peterus arye asurat sekeipsene. Yesus Kristus arye, ‘Na yupu dobuka peterepra banamle’ tenen, wibuka deipnukba, Rasulnye unune. Anggun mutuku si ara, Pontus ap, Galatia ap, Kapadokia ap, Asia tam ap, Bitinia ap bokuka, yuk-yuk ululum ninye ati asurat sekeipsene. Allah arye, ‘Na mapu unamak’ tenen, tenyamsuk touk, anggunce akunum diba teneluluma anya arye, tukwak mutuku ara, tia talakuk ululume. Allah el mapu ululuma anya arye, tukwak mutuku noutamak ara, ninye asik nang atonun ululume. Nun mutuku sirika ara, im deice uka.

Wahyu 1:11

Kekepsiba, Allah arye nyapnuk. “An kekepnulam ning ap, eipnulam ning ap nirya ara, moubuka seklyame. Surat sekminyopopura, Asia tam noutamak diba tenenyak ninye ati, mutuku si tekbarye dopdeipnulyame. Amutuku si ara, ani. Efesus ap, Semirna ap, Pergamus ap, Tiatira ap, Sardis ap, Piladelpia ap, Laodikia ap, ulule,” nyabuk.

Wahyu 1:4

Amapo, na Yohanes arye, anggun Asia tam noutamak bukni, Allah diba tenebuka, tekbarye mutuku ululum ninye ati, “Telebe,” nyapsince, abuku sekeipsene. Na Yohanes arye, anggun Asia tam ululum ninye ati tenenirye, Allah morosunun ning ara, nyapnusine. Ara, Allah el kanye aryuk bico tenesilirye, melisilye ning ap, kanye imun kanye bona kumce, kanye deibuka teleb una ati arisilya deiyok ning ap, ‘Weika arye arenamsile’ tenen, Allah morosunune. Anyapmasin ning arenamsiak ninye ara nyapnusine. Allah ara, minop talak akunum ulamuka ani, anoutam talak ulirye, aminyan sirya talak ara, yanamlanye birye arenamsile. Tonda, aning-aning deice tam ulirye, weik Ninye Deiyoknye una ati, weik buna ning deice bukliba, el urasin tam ara, Allah el melina dib kanye tekbarye bunyake. Sik adip kanye arye ton arenamsiake.