Se, anggun Farisi nang ap, Musa sekamuk yupu peterena deiyok nang ap, anggunda, ‘Tonoknye babye ton, nun yupu kekebuka nun tam kipsutue’ tenen, tukwak bisik bobana ap, mekwen deice bobana ap umunce, mutuku-mutuku nirya peterepra balulume. Anggunda akunum malye nang ululum bukni, peterepra bamunyeba, yuk nang anggun yupu kekebikirye, anggun winimunye ning dobolbanyak deice arye, malye ning weik tonap winibikcopura, anang ara pia malye wininyake. Anggunce yuk ninye ati malye winililulume. Anggun babye, anggun peterepmunyeba, anggun yupu kekebuka dobolbanyak nang babye, Allah arye wenebuka uku din mutuku dopkwetepnamsile. Yesus arye nyabuk. Yesus arye ayupu ton dukdongobuka nyabuk.
Rasul 13:43 - Eipomek43 Morobikura, akekepmek nang nirya bindobikopura, Yahudi nang ap, yuk mutuku ninyebuk, Yahudi nang diba tenelamik ning nirya, sik babye, kel kibuka diba tenelamik nang ap, Paulus ap, Barnabas ap, neika biyik. Neika biyikopura, Paulus ap, Barnabas ap arye, anang ati ayupu nyaprik. “Wini talak Allah el mikip arye melisulul ning, el kanye aryuk bico tenepsilirye, talye arisilya deice arye ululume. Aning pia talibuka umunce, Allah ati pia kum batakanamlume,” nyabuka, anang sik talima ati kwa deiprik. အခန်းကိုကြည့်ပါ။ |
Rasul 13:43
39 ပူးပေါင်းရင်းမြစ်များ
Dopkwetebikura, Barnabas Antiokia mutuku biyukopura, Allah arye anang ati, bico tenyamukce, pia teleb kibuka melipmok ning eibukce, pia kanye deibuk. Barnabas kanye deibukce, anang ati nyabuk. “Anggun Yesus diba tenelulum ning ara, batakna kum, pia talibuka unamlulume. Tonda, anggun kanye teniltona kum arye, anggun kanye talima bokoltona kumce, anirya ansinibuka, nun ni Yesus pia arenamlume. El tibuk pia arenamlulume,” Barnabas arye anang ati, teleb yupu nyabuk akarye, sik talima kwa dibuk.
Bukni, aminyan talak, sik Yahudi yala deiyok nang arye, amutuku Yunani ulamik kilapu, sikda sisin kilapu ulamikce, Allah si erelamik kilapu ap, tonda, amutuku koprop sisinanye ap, ati ayupu nyabik. “Paulus ap, Barnabas ap, sik nong deice ikin ning deipnuyabe,” nyabuka yupu deice arye obyakik. Yupu deice arye obyakikura, amutuku nang arye Paulus ap, Barnabas ap, sik nong deice ikin ning deibikce, “Anggun anang berurume,” nyabuka, sik mutuku noutamak arye yakik.
Aminyan talak, amutuku winilye Listra mutuku ap, Ikonium mutuku ap, Antiokia mutuku ap, Yesus diba tenebik nang ati amutuku tamubuka peterepra balamrikce, anang kanye talima kwa dilamrik. Anang talima kwa dilamrik akarye, amutuku nang Yesus diba tenebuka pia talibik ning ara, atalibika atonun, ‘Pia kanye lamabuka unamak’ tenen, sik kanya talima kwa dilamrik. Winilamrikak arye ayupu nyaprik. “Nun diba tenenyap ninye Allah aryuk, pia talipnamsil talak ara, ikin ning pia weik ulamsilya noutamak arye Allah el dam weknamabe, talye parapkabuka kil-kil kanye bon deice aryuk kum wektibye,” nyaprik.
Paulus ap, Barnabas ap, sik peterelamrik talak nirya ara, Yahudi yala nang arye, yuk yala nang ati yu kililamik bukni, abitinye nang ara, ilil kum asa arye mikip aryuk sik abitinye nang arye, Yesus yupu peterelamrik. Sikce, “Yesus elda ninye nirya ati bico tenesilirye, talye melisululnye,” nyabuka yupu peterelamrik. Peterelamrik talak ara, ‘Ayupu kekelamik nang dib tenepnamak’ tenen, Yesus arye el mikip Paulus ap, Barnabas ap, sik anang nong deiceuk deibukura, sikce ninye kum winipmanto pil dolamrik. Tonda, amambul pil dolamrikopura, aning elilamik nang arye, ‘Se, dipkorop anang deice arye, Allah arye pia mambul pil donmasile’ tenen, bikamik.
Akekenmek kilapu noutamak ara, kil tonok, Tiatira mutuku arye yayuk kil, el si ara, Lidia, bukmokce kekenmok. Lidia ara, dekna weik mirin baju, yuk nang ati dekna deiyok kil ulamuk. Ulamuka anya arye, yuk nang arye, el dam abaju dekelyangalamik. Tonda, akil arye Allah el dib tenebuka si erelamuk. Akil ara, Paulus el nyabuk yupu kekenmokak, Yesus arye, ‘Akil diba teneplirye, kekepnamle’ tenen, el talima buplan kukdeibukura, dib tenebuk.
Aning ati ara, asum-asum nirya Yahudi yala nang sik Allah yupu peteren aik wekuk akarye, Yahudi yala ninye ap, Yunani ninye bukni, Allah si erelamik Yunani ninye ap ati, ‘Yesus arye lyesulule,’ nyabuka peterelamuk. Tonda, ‘Yata ning deknuyap do?’ tenen, amutuku ninye deklamikak talye dekelyangalamik ninye ati, Yesus yupu lak lebuka peterelamuk.
Anang ulamik noutamak arye ninye tonok-tonok Paulus nyanmok yupu kekebuka diba tenebikce, el tam kipdobikura, Yesus diba tenebikce Paulus ap, neika balamik. Adiba tenebik nang ulamika noutamakarye, kil tonok el si ara, Damaris ap, tonoknye, el si ara, Dionisius ap, diba teneprik. Dionisius ara, Arepagus nyalamik nang ara, eluk ara, Arepagus ulamuk. Sik, akil ap, anye ap, ton yuk ninye mitik weiktonun, dib tenebik.
Winibuka laka nyabuka, peterebukura, sik Yahudi yala nang tonok-tonok ap, tonda Yahudi yala kum nang bukni, Allah si erelamik nang Yunani nang weik ap, tonda amutuku weik kilapu mitika kum weik ap, dib tenebikce, Paulus ap, Silas ap, sik dib tenelamrikce, doproprik ning uk, ‘Nun babye dib tenepnamabe,’ tenebikce, sik kanye yuk punubik. Sik kanye yuk punubikce, Paulus ap, Silas ap, sik tamuk kiprobik.
Nyabikura, sik ap Paulus ap arye, “Ara asum arye bulubibyopura, yupu talipnamabe,” nyabik. Nyabik touk, asum akunum ubukopura, dana-dana tam nirya arye, Paulus unmok aik damak ninye weik bulubuka yanmek. Yayikopura, beren tam arye ubuka keting dukduk noutam ap, anoutam nirya peterenmoka ani, inibuk. Paulus arye peterenmok yupu ara, ani. Tonok ning ara, Allah arye ninye lyeplirye, sik kanye talima talipnamle yupu peterenmok. Tonda Musa arye sekamuk yupu noutamak ap, tonda Allah el yupu lak nyalamik nang nabi-nabi nang arye sekamik yupu ap, doprobukce, ‘Anggun kel kiplulume. Yesus ara, dipkoprop Ninye Lyena Deiyoknye ulule,’ nyabuka peterebuk. Ara, ‘Awekmek nang dib tenepnamak’ tenen, peterebuk.
Nyabikura, awekmek nang, Yesus dib tenebik nang nirya arye, ‘Winipnamabe, nyapmasiak yupu ara telebuk,’ tenebikce, kanye deibikce, ninye tekbarye nang weipdeibik. Ara, Stefanus wipdeibik. Stefanus ara, Yesus ati pia dipkoprop tenebukce, kanye talima lamapdongobuka ulamuk. Tonda Allah El Dib Kanye Stefanus talima noutamak wekamukce, langdibukura, diksukumuk winilamuk. Tonda, ninye si Pilipus ap, Pokorus ap, Nikanor ap, Timon ap, Parmenas ap, ton Antiokia deiamiknye, Nikolas ap wipdeibik. Nikolas ara, Yahudi yala kumnye bukni, Yahudi yala nang, Allah ati kibuka si erelamik ning, sik winilamik ning nirya ara Nikolas babye dobuka winilamuk.
Allah el kanye aryuk Israel ninye ati, bico tenyamsukce, urdem arye wiamsuka ara, teleb ubuka pil dolamupa deice arye kume. Nun apu yapu, Israel ninye babye, sik teleb ubuka pil dolamika deiceuk wipdeiamtopura, “Allah el kanye aryuk bico tenesilirye, wibuka delisulule,” kum nyaptibye. Bukni, el kanye aniryuk, bico tenyamsukce talye wiamsuka ara, nun teleb pil dolamupa deice arye kume, el kanye aniryuk bico tenyamsukce wiamsuke.
Tonda, Kristus el pil dopsuka deice arye, Allah bico tenesilirye, el kanye aniryuk melibuka tuba-tuba lyesiliba, nun lyen ning dopropbibirye, nun kanye talima bokoltona kumce, pia batakna kumce, aninguk talibuka unyabe. Yesus arye lyepsuka ara, kume kum dasutue. Aning babye, Yesus diba tenenyaba deice arye unyabe. Tonda, ‘Allah arye el pia teleb ulul ning nirya, arepsiliba, nun babye pia telebuk wininamap’ tenen, kintinibibirye, kanye deibuka dinauk unamabe.
Allah arye tukwak ninye ati, weika arye bico tenelamsuka deiyok ara, nyapnusine. Ninye im sirya, mutuku sirya nirya, malye winilamika deice arye dibinauk upra yangalamika ani, malye winina ap, dipna ap amu tam ulamik. Bukni, Allah bico tenenyamsukce, Allah el kanye aryuk, “Sikda diksukum un ninye,” nyabuka, teleb kibuka delisulule. Minop talak ara, malye winina ap, dibina ap mikip weik ulamuka anya arye, ninye nirya aning amu tam ulamik. Wini talak ara, Yesus pia diksukum ulamuka deice arye, kam una deiyok ning arisulul ati ara, Allah elcuk bico tenesilirye, talye melisulul ning amu tam unyabe. Nun Deiyoknye Yesus Kristus diksukum ulamukce, mambul pil dopsuka deice, Allah arye, “Sikda diksukum un ninye,” nyabuka, teleb kilisululba, pia kamuk unamabe.
Aning ati ara, Allah arye yupu lipsisikuka bokeipnamsil talak ara, ‘Malye winibupu ati wenepsilyak’ tenen, ilil una ara, usulula anya arye, nunce yuk ninye nirya ati, ‘Sik malye ning bataktingce, Yesus ati dib teneptinge’ tenen, pia pi dobuka peterenyabe. Nun winilamap ning ara, Allah el kele. Tonda, na patapnil ning ara, sik Korintus mutuku ninye, sik kanye talima noutamak ara, nun wininyap ning nirya laka upliba, ‘Kel biksutume’ tenen, patanulule. Nunda tenepce arye, talye yupu kum nyanyabe.
Nunda, Allah el pil nika melibuka donyap nang arye, anggun Korintus mutuku ninye ati mikip arye nyapsiyabe. “Allah el kanye aniryuk bico tenepsilirye, melibuka lyesulul ning ara, dib tenepmunce dopropmunyopura, talye-talye winina ap, talye tenena ap, malye winin ap kum wininamlulume. Allah arye tenyamsuk touk diksukumuk wininamlume,” nyapsiyabe.
Tapu kouamsuk ning noutamak arye, Kristus lyepsukce lopdeipsuke. Lyepsuka deiyok ara, ‘Musa sekamuk yupu mem yupu amu tam bukikirye, ayupu uk talibuka pia dobolbanamak’ tenen, kum lyepsuke. Aning kum bukni, ara, ‘Lyepnirye, mem pil dona kum arye, talye kanye bobuka diksukumuk unamak’ tenen, Kristus arye lyepsuke. Aning ati ara, yuk-yuk ning, mem yupu atonun ning tabakuka winina kum arye, dakeiyam asa mikip arye unamlulume. Yuk nang arye, “Aning-aning pil dopmunya deice aryuk, Allah el kanye deipnamsile,” nyasinyak yupu ara, kekena kume. Ara, ‘Tapu koubuka delilamaka atonun winisikirye, nun nong deice ikin ning tabakalinamsiyak’ tenen, moubuka kalikinamlulume. Ayupu atonun yupu ara kekebuka dobolbana meme.
Sikda, ‘Musa sekamuk yupu dobolbanyap deice aryuk, Allah arye nunti, “Anggunda diksukum un ninye,” nyabuka, teleb ulinamsile’ tenen, ululume. Aning tenena deice arye, anggunda, ‘Kristus arye pil dopsuka ara daupmalye’ tenen, bataklamak ninye winilamak touk, akunum winilulume. Anggunda pia yuk winilulume. Winimunya deice arye, Kristus el kanye aryuk bico tenepsukce, lyepsuka ara, akunum bataklumce, urasin tamubuka, yuk bisik akunum banmalume.
Allah el kanye aryuk lyepsuke nyapmasina ara, talye ati kum nyapmasine. Deiyok ara, ani. Anggunce, Allah ati dib tenelulum deice arye, Allah bico tenepsilirye, talyeuk lyesulule. Aning ara, anggun teleb pil dobuka, diksukum ululuma deice arye, kum lyesulule. El kanye aryuk bico tenepsukce, lyepsuke. El kanye aryuk lyesulula ara, ‘Talye dem aryuk dib tenena deiyok ning arepniba, aninye arye, dib teneptinge’ tenen, arepsilirye, kanye deibuka lyesulule.
Na kayapu. Na weit yapu atonun ninyeo, pia bico tenesunune. ‘Se, kanye eibratibye’ tenen, pia tenesunune. Anggun nirya ati, na kanye pia weik deipsine. Yesus arye dekna ning arepnamnil ning deiyok ara, anggun tia. Ara, Yesus el laka teleb yupu peterelamsisibuk, anggunda diba tenelamluma ati, dekna ning arenamnile. Yesus el weik mikip deice arye, nun nong talye nong dobuka, el nong pia teleb ulye touk, nun nong im deice ninguk kwepdeipnamsile. Aning ati ara, na arup nyapmasin touk, nun Deiyoknye Yesus talima dukdongobuka umunce, diksukumuk ubuka, kanye lamapdongobukauk unamlulume.
‘Nun ni Allah, kum bataksilirye, el teleb kibuka el dam boyanamsil’ tenen, patapsilyopura, unamlulume. Anggun adiparyuk, Allah el laka teleb yupu, ninye lyena yupu kekemunce, pia tuba-tuba diba tenebuka, batakana kumce, ayupu uk talibuka, pia kanye lamabuka unamlulume. Winipmunyopura, Allah arye pia teleb kipdeipsilirye, el dam boyanamsile. Tonda, Allah el laka teleb yupu, ninye lyena yupu noutamak ubuk ning nirya, peterelamsikbuk, akunum kekelamlum ning nirya ara, kanye bokoltona kum arye, ‘Dipkoprop winipnamsil’ tenen, anggun adiparyuk kintinibuka dinauk unamlulume. Ura, peterelamsikba, kekelalum yupu, Allah el laka teleb yupu ara, yuk mutuku nang babye, dolonyakce, ninye mutuk sirya nirya akunum peterepra banyake. Tonda, na Paulus arye Allah el laka teleb yupu, ninye lyena yupu ara, peterepra bana ati, apiluk pia donune.
Yatato ninye do, yata yala ninye do nirya, nunce anang-anang nirya ati, Kristus el yupu, ninye lyena yupu peterenyabe. Ara, ‘Mankau arye malye ubicak’ tenen, “Anggun kanye mouplulume,” nyabuka wenenyabe. Tonda, anang-anang nirya ati, weik kel arye Kristus el yupu pia moubuka peterenyabe. Wininyaba ara, urtalya ati kume. Deiyok ara, Kristus ap, kanye dukdongobuka unyak ninye nirya, Allah el dam welepnamak talak ara, ‘Sik kanye wisipliba, pia diksukum ninyeuk unamak’ tenen, el yupu moubuka peterenyabe.
Narye anti, “Wininamlam, winibuka peterenamlyame, anang adiparyuk wininamak,” nyabuka nyapmakin ara, talye ati kume. Deiyok aupmale. Aning ara, nyapnukine. Ara, Allah bico tenepsilirye, el kanye aryuk melisilya deice arye, nun malye winin ning kilipsilirye, lyesulule. Winisilya ara, akunum laka kipsuke. Yata mutuku nang do nirya, ninye mutuku-mutuku nirya ara, sik peteren nang arye, “Allah bico tenelamsuka ati, Yesus ara, nun malye ning pununa ati deipsuk akarye lyepsutue,” nyabuka lakak peterenyaka deice arye, ninye nirya moubuka kel biktinge. El kanye arepsukce, melisilya deice arye, aninye lyena yupu akunum laka kipdeipsukba, ninye mutuku nirya noutamak kekenyake.
Tonda, atalak noutamak nirya ara, anggun nirya arye, anggun neika ululum ninye ati, moubuka kalekelanamlulume. Ara, Allah arye nun lyena ati, bico tenesilirye, el kanye aniryuk talye melisilye ning akunum kekebuka kel kinyak bukni, lik upliba, ‘Dawaplye, tenebuka, batakicak’ tenen, moubuka kalekelanamlulume. Tonda, ‘Allah arye bataksilyak’ tenen, ton nang malye winibikiba, yuk nang weik yu upliba, adeice arye ninye weika arye tonap tabakuka, malye kanye bobuka malye winibikirye, ‘Sik nirya malye winipdeipdacak’ tenen, pia moubuka kalekelanamlulume. Ara, urdem ati kum nyapsine. Ton tam nang arye, yu weik upliba, yuk tam nang ton, aning eibuka kekebicopura, ninye weikia arye tonap, yu upliba, ‘Sik nirya malye winibicak’ tenen, nyapsine. ‘Winipsilyak’ tenen, moubuka kalekelanamlulume.
Ura, sik yuk nang arye, urasin yuk peterenyak yupu, talye yupu yala-yala nirya peteresikceba, kekemunya deice arye, ‘Yuk malye bisik bobisicak’ tenen, sik yupu kekena kume. Allah bico tenesilirye, el kanye aniryuk melisilyeba, nun kanye talima mikip kilisilirye, talima kwa disulul ara, telebe uka. Aninguk talibuka unamlulume. Bukni, yuk nang arye, sik bidamang kanye aryuk, ‘Winina meme,’ nyabuka, din ning ati, mem nyabikirye, mem pil dolamaka deice arye, nun kanye talima mikip kum kilisulule. Din ning ati, “Aning ara dina meme,” nyabuka mem nyabikirye, mem pil donyak nang babye, wininyaka deice arye, dipkoprop kum melilanyake. Anang arye talye piluk donyake.
Silas melipnuka deice arye, abumang surat ara, na Peterus arye sekeipsene. Na kwit Silas ara, diba tenebuknye anya arye, nati kum batakanululce, melinululba, nun ap, neikak neika pil donyame. Elda, na weit atonun unulule. Asurat sekeipsina deiyok ara, anggun talima barina ati sekeipsene. Tonda, Allah arye, ‘Na pil donamak’ tenen, talye arisilya pil dona deiyok ning ap, Allah el kanye aniryuk talye melisilye ning ap ara, ‘Dipkoprop ninguk, akunum laka nyapsile tenenamak’ tenen, asurat ara, sekeipsene. Anyapmasin yupu nirya ara, dipkoprop anya arye, ayupu talipmunce, tunim abuka unamlulume.
Aning ati ara, na kayapu, anyapmasin ning nirya ara, ‘Allah arye winamsil’ tenen, kanye deiplumce, kintinibuka dinauk ululuma anya arye, ‘Allah nyasilye touk, diksukumuk wininamap’ tenen, pia pi dobuka pirilenamlulume. Wininamluma deiyok ara, ani. Ara, ‘Allah arye ninye nirya ati wenebuka bokeipnamsil talak ara, dipdesilirye, “Aninye ara, malye un ning kum upmale. Sikda diksukumuk unyakce, na ap dukdongobuka, teleb-teleb ubuka neika unyabe,” nyabuka deipnamsil’ tenen, teleb ubuka unamlulume.
Yata nang do, nirya, sikce, Yesus Kristus elce peterelamuk yupu batakuka, elce kum peterelamuk ning bukni, yuk talye yupu dukdongobuka peterenyak ninye nirya ara, Allah sik talima ak kum ulule. Aning kumopura, yata nang do, nirya, Kristus peterelamuk yupu uk talibuka, dobolbanyak ninye nirya ara, nun ni Allah ap, el Mi Koprop Yesus ap, anggun talima ak ururake, nyapne.
ကြော်ငြာတွေ