Yata nang do nirya ara, talye bona utotoa talina kum ukirye, aning-aning kum talinyak ninye ati, melinyak nang ara, Allah Yahweh ati, melilamaka atonun unyake. Winibuka melinyak ning ara, Allah arye luba kum kipnamle ati, yuk talak Allah Yahweh arye, el ‘Naʼ tenen, ning tamubuka, sikti, yamubuka arenamle.
Pilipi 4:17 - Eipomek17 Anyapmasin yupu ara, ‘Tuba-tuba arenamniak’ tenen, kum nyapsine. Aning kum bukni, na kanye deipnirye nyapmasina deiyok ara, anggunce melipnuluma anya arye, aminyan ara, ‘Allah arye dekna dolamak atonun ning arenamsile’ tenen, kel kipnulum tenena, ati nyapsine. အခန်းကိုကြည့်ပါ။ |
Pilipi 4:17
26 ပူးပေါင်းရင်းမြစ်များ
Nabi Mika birye, Israel ninye nirya ati nyabuk. Nara, imun kanye bonune. Winipmanto ara, yo duk moulamle li talak upliba, ayo duk mouamliba, dakuka dibikce talak ara, aminyan din patapliba, ‘Ayo ara, duk ton mouptuba dakuka diptibye,’ tenenyak bukni, yo duk nirya akunum kum upliba, kum dakuka dilamak atonunye, unune. Tonda, anggur tapu ap, kwarang yo ap, min yuma teleb duk moulamle ning nirya ara, dakuka dibikirye, malye ning ara, bataklamaka atonunye unune.
Ati ara, na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine. Teleb ning ara, anggun kan-kan noutamak, tonoknye mambul kanye bopturye, na si eren aik bublan ara, tirikdongoptuba, na kanye deiptinye. Ara, urdem ati kume. Akat bublan tirikdongoptuopura, anggunce kam ning malye ning bobuka, na arena ati, uku kum dongopmantonye ton upsutue. Bukni, na arena ati, pia malye ninguk arelyanganumunya ati, narye kanye kum deipsine. Anggun ti na lik unulule. Tonda, anggunce malye ning arelyanganumunye ning ara, pia kum dopropnamne.
Anggunce nati kum wipdeiamnulume. Aning kum bukni, narye anggunti, ‘Aninye ara melisiniba, pia teleb ubica deice arye, duk moupnamle ning ara, pia unamle’ tenen, wipdeiamsise. Ati anggunce anyapmasin touk akunum winipmunyopura, anggunce na si deice arye moropmunyopura, na ni koprop kekepsilirye, aning-aning moropmunye touk arenamsile.
Anggur tapu duk teleb ubuka moulamle atonun, na mapu anggunda, duk pia weik mounamsile. Teleb ubuka winimunya deice arye, yuk ninye nirya arye, ‘Kume anang ara, Yesus el mapu unyake’ tenen, kel kipnamake. Ninye weik akunum kel kibicopura, winimunya deice arye, na Ni Koprop Allah ati, ‘Allah ara pia telebe,’ nyabuka, el si erebikirye, elti, kinamake.
Ara, tuba tamubuka tonap nyapsine. Yatanye do nirya, ‘Paulus ara, talye walwalnye, kanye bona kumnye ulule,’ kum tenenamnulume. Nara, walwalnye kum bukni, winibuka tenepnutuma babye, ayupu kekepnululume. Ara, sik walwal nang arye talye yupu nyakiba, yuk ninye arye, ‘Dawaplye, ayupu ara, danyapnyake’ tenen, lamapdongobuka talye kekelamak touk, kekepnululume. Sikti lila yupu peteren nang arye kwalin yupu nyalamak touk, na mitik tonun kwalin yupu nyapnusine.
‘Alye upsilyak’ tenen, narye utenepse. ‘Teleb ning ara, nun du weit atonun nang, sik Korintus ninye dam dopdeipnibuk, ninye melina yo bok min kum arepmace talak, kintinina pil ati melibicopura, ayo bok bulubuka dipkoprop kintinipnamake,’ tenepsise. Ara anggunce, “Yo bok weik arye bulubuka arepnamabe,” nyabuka nyalina yupu nyapdeiyamlum touk, ‘Dipkoprop kintinipnamake’ tenen, anang dobuka anggun dam dopdeipnamsine. Winipniba, anggun dam yanuka melipsicopura, aminyan talak ara, ayo bok weik akunum kintinipdeipmamunye arye, kanye deibuka arepnamlume. Min kum yanmapye talak, kum kintinipmunyopura, ‘Aminyan talak ara, mikip arye nyabibya deice aryuk arepsikibuk, aminyan talak ara, lik kanye bobuka arebiyak,’ tenena ati, na Paulus arye nyapsine.
Atalak noutam nirya ara, anggun ap, Yesus Kristus ap, talima dukdongobuka neika ululumbuk, Kristus el mikip deice melisiliba, pia diksukumuk winilamlum ani, ‘Teleb winina ati, duk weik moupnamsile’ tenen, Allah morosunune. Diksukumuk winilamunyebuk, duk weik moupsilyopura, ninye nirya eipsikirye, “Allah elda pia telebe,” nyabuka, el si erebikibuk, Allah el si weik upnamle. Winiplyopura, ‘Ninye weik el si kel kibikirye, el siuk erepnamak’ tenen, Allah morosunune.
Tonda, Allah arye nun winilamap ning nirya kekebuka disulula anya arye, nun talye kum nyapnyabe. Anggun kele, nunce anggunti, ‘Teleb yupu nyaplopmabibuk, anang arye kanye deipnamsiak’ tenen, kum winilamubu. Tonda, ‘Bon ning weika arye doproptibye’ tenen, tenepce arye, tilila yupu kum nyalamubu. Tonda, ‘Anggun ning ubula doproptibye,’ tenenyaba ara, ‘Biksicak’ tenen, duknuna yupu pia kum nyalamsupu. Aning nirya ara, pia kum winilamubu.
Anyapmakin yupu ara, talye ati kume. El deiyok ara, yata ninye do nirya, ‘Se, bona weik talinanye utibye’ tenen, yo bok do, dengna weik ning do, weik arye patalyopura, adeice arye malye winin ning yala weik wininamake. Anyapmakin touk, ton nang ara, ‘Yo bok weik doproptibye’ tenen, patabuk deice arye, Allah dib tenelamak ning batakuka, talye yuk bisik balamakbuk, aminyan ara, weik kanye imun ning ap, ikin ning weik ap, kanye bokoltona ap, weik ulule. Sik ikin ulilalamik. Na Paulus arye nyapmakine.
Aning ara, talye ati kum nyapkine. Allah yupu peteren nang, sik melina deiyok nang ara, dib tenen nang, sik kanye melipdakirye dinamak anya arye, talye pil kum donyake. Sikda, Allah el pil talibuka donamaka ati, sik adiparyuk maknya kintinibuka dina ap, yuk nang yanina ap, kum winiptinge. Tonda, yuk ninye ati minop derelana ap, wenena ap, kanye wangalamak mek pia pataplibuk, weik arye dina ap, kum winiptinge. Tonda, yu weik ubuka, yuk nang oldana ap, bona talin ning yo bok ap, weik arye dolona ati, tenepce arye, minin yupu nyana ap, anirya ara, sik adiparyuk pia kum wininamake. Amalye-malye winin nang ara, ‘Allah ati diba tenen nang, sik melina deiyok nang unamak’ tenen, wibuka pia kum delinamlyame. Aning kum bukni, ‘Allah yupu peteren nang, sik melina deiyok nang unamak’ tenen, diksukum unyak nanguk, wibuka delinamlyame.
Nun diba tenenyap ninye nirya ara, yata teleb winin ning do nirya, aninguk pataliba, moubuka pil dona ati, adiparyuk bikinamabe. Ara, 'Allah akunum diba tenenyap ninye arye, yuk talye ning nirya batakibirye, teleb un ninguk pia pataliba, moubuka talibibirye, pia piribuka diksukumuk unamap' tenen, nyapkine. Wininamaba deiyok ara, 'Asum-asum nirya, nun patapsilye ning kintinibuka delina ap, yuk nang ati, melibuka arena ap, unamabe. Tonda 'Nunce teleb teleb ubuka kum wininyap' tenen, nyapsine. Tonda, talye-talye winina kumce, pil pia teleb ubuka dolamipya ani, 'Teleb winin ning weik winibipya deice arye, duk weik mounamsil' tenen, na Paulus arye, nyabuka sekeipkine.
Allah arye, nun teleb asa wininyap ning ati, tuba tenesilirye, nun wininyaba atonun, yupu lepsisikuka bogolisulule. Deiyok kum upmalibuk, talye ati, kum wenesulule. Ura, anggunce teleb pil dolulum ning nirya ara, kum luba kipnamsile. Sikce elti, diba tenyamik ninye, el mapu ati, bico tenebuka melilamlum ning ap, tuba melilulum ning ap, adeice arye el Allah ati, talima arilulum ning ara, tuba tenesulule.
Domba basam weina deiyok nang arye, sik domba basam ati bico tenebuka, teleb ubuka weilamak touk, anggun babye, Allah el mapu sik amutamak unyak ninye ati, bico tenebuka nimalye arye melinamlulume. Ara, sik amutamak unyak ninye ati, ‘Sik kanye malye ubicak’ tenen, melipmunce, ‘Kalikuka dilanamlulum’ tenen, nyapsine. Wininamluma ara, ‘Na lik,’ tenenun bukni, ‘Allah arye pia pi donilya ati, wininamne,’ tenena kume. Aning kum bukni, Allah arye, ‘Na mapu melina ati teniltona kum arye, kanye deibuka melinamak’ tenen, ‘Patalul ak tenesilye touk wininamlum’ tenen, nyapsine. Tonda, ‘Yo bok weik arepsiting ak, teleb ubuka utibye,’ tenena kum arye, kanye deibuka talye luba kibuka melilanamlulume.
Atilila yupu peteren nang arye, ‘Aning-aning nirya weik doproptibye’ tenen, patalye ninye unyaka anya arye, sik badamnye kanye arye tenenyak ning, talye yupu uk, peteresinyak deice arye, ‘Sik ning weik dolonamap’ tenen, yum yupu nyabuka, anggun ning ubula dolonamsiyake. Minop talak ara, Allah arye, ‘Atilila peteren nang ara, wenebuka oplopnamne,’ tenyamukce, akunum kentenlamuk anya arye, aning ara lubakiplirye, kum bataknamle. Dipkoprop aminyan talak ara, aninye oplopnamlarya.
Sik anang ara, pia bicoe, Allah arye anang wenepnamla ati, sik anang ikin upnamle. Sikda Kain arye Allah nyabuk yupu kum kekebukce, malye winibuk touk wininyake. Tonda, minop talak Bileam arye, ‘Ayupu ara, tilila yupu,’ akunum bikmokcuk, “Yo bok weik arepnukiabe,” nyabikura, kekebukce, ‘Yo bok weik doproptinye’ tenen, patabuka ati, tilila yupu peterebuk. Tilila yupu peterebuk touk, sik anang babye, ‘Yo bok weik dolonamap’ tenen, malye wininyake. Tonda, minop talak Korah arye, ‘Allah arye nyapdeibukura, Musa nyalamuk yupu kum kekepnuyap’ tenen, deiyok koubuka, el yanibuk touk, sik anang babye, Allah arye nyasulul yupu yaniltanyake.
ကြော်ငြာတွေ