Pilipi 2:15 - Eipomek

¹⁵ Winibuka wininamluma deiyok ara, nyapnusine. Ara, winipmunyopura, Allah el mapu kipsilyeba, umunce, malye winina pia kum upmunyopura, ‘Yuk nang, malye yupu anggun deice kum deipsitinge’ tenen, nyapsine. Wini talak unyak ninye ara, pia malye ning talibuka, malye ninguk tenebuka, malye-malye unyak bukni, na nyapmasin touk diksukumuk upmunyopura, yuk nang, sik malye wininyak ning ara, anggunak bol kum doupnamsile. Im deice noutamak kurya tiklirye, dirina weik ulamle atonun, anggunce Allah el kam una yupu talibuka, peterena ap, el yupu dobolbana ap, umunye ning ara, wini talak pia malye wininyak ninye kan-kan noutamak, dirina atonun unamlume.

Pilipi 2:15 ပူးပေါင်းရင်းမြစ်များ

Mazmur 122:5

Yerusalem mutuku noutam ara, Daud el yala nanguk, ninye deiyok nang kibuka ukirye, sik bana teleb ning deice bukuka, Israel nang nirya ati, yupu bokolinamake. Ara, Daud el yala nanguk, apil talibuka donamake.

Keluaran 34:35

Yata talak do nirya, Musa bira Allah unmokak arye, tamubuka buru tam yayuk talak nirya ara, Israel ninye arye, Musa el nong bol deice dinmekopura, el urasin dirina ara, keting deipna arye, dirina ulamle touk, winipmokba eilamik. Akunum eibikopura, Musa adiparyuk, ila tuba el baju bol arye, el urasin lelipdongolamuk. Daulamuka ani, el ap, Allah el si Yahweh ap, yupu sisikinurik talak nirya ara, ila tuba ton, el urasin lelipdongopmok baju kwiribukabukce, Allah dam biyukba, sik yupu talilamdik.

Amsal 4:18

Wininyak bukni, sik diksukumuk unyak ninye ara, beren tam keting yalye talak ara, sika arye dawaplya ani, keting deiplirye, dirin ulamle touk unyake. Sik dib tenen ninye ara, tonok sum berekna deice arye, keting deiplirye, dirina weik ulamle touk unyake.

Amsal 8:8

Aning atonun, na si pum bisik arye nyasunun yupu nirya ara, diksukum kibuka un ning ati, dipkoprob yupu nyasunune. Malye yupu tonok babye ton, kum nyasunune. Kwalin yupu ap, tenepce arye malye nyaltakana yupu ap, ton pia kum peteresunune.

Yesaya 60:1

Allah arye Israel ninye ati nyabuk. Yerusalem mutuku ululum ninyeo, anggunda mikip kipdopmunce, kanye deibuka telebuk unamlume. Anyapmasin ning ara urdem ati kum nyapsine. Allah el weik dirina dobuka anggun deice deipsiliba dirina kipmasile. Allah arye kanye deipsilirye, teleb kilinamsila ati, bukmunce, lak koprop kibuka winipmunyopura, yuk nang nirya arye sik dirina atonun ning, sik lyena ati akunum yanamal ning ara, eipnamake.

Daniel 6:4

Utenebukba, sik Gubenur nang ap, yuk kalikna deiyok nang ap nirya arye, Daniel biti, ‘El aulul talak ara, yata malye winin ning ton uptuba, eiptibirye, kel biktibye do?’ tenen, dilnililamik. Pia dilnililamik bukni, el malye winin ning ton, pia kum ulamukba, ton kum eibik. Ara, Daniel el weiknye kina ati, dolamuk pil ara, pia teleb asa arye dolamuk. Malye pil ton kum dolamuk.

Matius 10:16

Domba basam tonok bai kam weik ulamice kan-kan ulyopura, bai kam arye domba basam opmanto ulye touk, narye dopdeipsiniba, na yupu bobuka peterelbimunyopura, kanye talima malye kanye bobikirye, yu ulul nang arye, na mapu anggun nong deice ikin ning deibuka, opmanto unamsiake. Aning ati ara, ninye ton kwatima arye, kanye wisibuka ulamle touk, anggunce aning-aning nirya ati weik kel kipmunce, kanye pia moubuka unamlulume. Tonda, yu upsiliba, yu asa una kum bukni, yalma maka talima namin asa ulirye, ninye kum opmanto ulamle touk, anggunce talima namin asa ubuka telebuk unamlulume.

Matius 17:17

Nyabukura, Yesus ayupu kekebukce, atikmek nang nirya ati lik ubukba, ayupu nyabuk. “Anggun atalak umunye ninye ara, dib kum tenelulum ninye anya arye, pia malye winilulume. Na lik ati, ‘Yata barye talak arye anggun dam tuba unamne do?’ Tonda, ‘Teleb unamak do?’ tenen, batakna kumce, yata barye talak arye pia dinamsin do? Ati, isa talyamuk mi ara, dobuka na dam boyalulume,” Yesus arye nyabuk.

Matius 5:45

Wininamlum ning ara, anggun ni Allah, im deicanye, ‘El mapu unamak’ tenen, wininamlyame. Allah ara, pia telebnye ulula anya arye, teleb ninye babye, malye ninye babye, bico tenebuka, kanye talima aresulule. Anggunda, el mapu ululuma ati, anggun babye atonun unamlulume. Allah el keting ara, elce nyaplyeba, malye nang dam babye, teleb nang dam babye, delilule. Mok ababye, Allah elce nyaplyeba, malye nang dam babye, teleb nang dam babye, mok celule.

Matius 5:48

Aning ati ara, anggun ni Allah im deice ululnye birye, ninye nirya ati, bico tenebuka kanye talima talibuka melilul touk, anggun babye ninye nirya ati, kanye talima arenamsile. Anggunda, Allah el mapu ululuma anya arye, anggun ni Allah malye una kum, diparyuk diksukumuk ulye touk, anggun babye atonun, malye winina kum, diparyuk diksukumuk wininamlulume. Yesus arye nyabuk.

Lukas 1:6

Zakaria ap, el kil Elisabet ap, Allah yupu nyalilye atouk ubuka diksukumuk ulamrikce, Allah arye, “Wininamlulume, aning kum wininamlulume,” nyapdeiamuk yupu, moubuka talyamrikce, dolbalamrik. Ayupu nyalul touk ning nirya atonun, sirya dakuka pil dolamdik, malye una deice tenebuk ning ababye, kum winilamrik ara, Allah arye sikti, kanye deiamuk.

Lukas 6:35

Wininyak bukni, narye nyapsin yupu ara, yuke. Sikce, ‘Anang optibye,’ tenelamsikce nang ati, bico tenebuka, teleb updeipmunce, ‘Aning tamubuka arenamsiake,’ tenena kum aryuk, talye urdemuk arenamlulume. Aning ati ara, anggun ni Allah im deice ululnye birye, pia malye ninye ap, teleb ubuka melilule, sikce tamubuka, ‘Naio telebe,’ pia kum nyanyak ninye ap nirya ati, bico tenebuka kanye arelul touk, anggun babye, yuk ninye nirya ati, bico tenebuka kanye delinamlulume. Anggunce winipmunyopura, Allah el mapu koprop kipdeipnamsile. Tonda aminyan ara, Allah arye im deice teleb ning weika arye arenamsile.

Yohanes 5:35

Yohanes ara, winipmantonye ulamsuke. Elda, weisa updeibiceura, dirina yiplya arye ninye elilamak touk ulamuk. Winilamukce, el nyalamuk yupu, dirina atonun kibukba, anggunce kanye deibuka, el yupu ara, tia talak ati kekelamlume, nyapsine. Yesus arye nyabuk.

Rasul 2:40

Nyabukce, wenena ap, laka lena ap, weik nyabuk deice arye anang ati nyabuk. “Anggunda anang atalak pia malye wininyak ninye kan-kan arye, lyepdamunce, Allah dam banamlume.” Nyabuk ning ara, ‘Allah arye oplyak’ tenen, yupu sekuk.

Rasul 20:30

Ara, yukak anyuk kume. Tonda, anggun umunya noutamak nang arye ton, erebuka tikikirye, Yesus el yupu kekenyak ninye, ‘Nunti dobolyanganamsiake,’ tenebikirye, dipkoprop Allah yupu dobikirye, talye wamlibuka talye-talye kiplopsikcopura, telila yupu kwalibuka peterenamsiake.

Roma 16:19

Bukni, amapo, anggun Roma mutuku tam umunye ninye ara, Allah el yupu nyasilye touk, diba tenebuka, diksukumuk umunyopura, yuk mutuku nang nirya arye eibuka kel bikisinyakce, laka nyanyakba, nun ton kekenyabe. Ati narye anggunti kanye delisunune. Narye anggunti, ‘Se, winibuka unamak’ tenen, patapnile. Aning ara nyapnusine. Tonok ning ara, ‘Weik arye kel kibikcopura, teleb winin ninguk wininamak,’ tenesunune. Bitinye ning ara, ‘Malye winin ning aning-aning nirya ati ara, kum wininamake,’ tenenune. Tonda, amalye winin ninguk kel kibikirye, malye kum wininamak’ tenen, se tenenune. Ara, ‘Malye winin ning tonok ning babye kum wininamak’ tenen, se tenenune.

1 Korintus 1:8

Tonda, Allah arye anggunti, ‘Aminyan sirya talak ara, anggun malye winin ning tonok ning babye kum upnamle’ tenen, anggun kanye kwa diprongobuka melisilye talak ara, anggun dib tenelulum ning ara, pia darapdongobuka mikip unamsile. Winibuka daulamunye ani, aminyan talak ara, nun Weik Deiyoknye Yesus Kristus tukwak mutuku tamubuka yalyopura, anggunda diksukumuk unamlume. Ati yata nang do nirya, ‘Aninye ara, malye wininyak,’ nyabuka anggunti kum nyapmanto unamake.

2 Korintus 6:17

Allah arye nyabuk. “Aning ati ara, talye ninye, dib kum tenenyak ninye kan-kan una batakuka, yukak kilonamlulume. Amalye wininyak nang ap, anggun ap neika ansinibuka una pia malye weik ati, anggun yuk-yuk unamlume. Na Allah arye nyapsine. Narye anggunti, ‘Aning ara, malye ning anya arye, talina meme,’ nyapdeiamsise ning, tonok ning babye kum talibuka winimunyopura, nara anggun dam yanuka dopdopsinirye neika unamabe. (Yesaya 52:11; Yehezkiel 20:34, 41)

Efesus 5:27

Yesus Kristus arye, winipsuka deiyok ara, ani. Aning tenebuk. ‘Sik malye winin ning nirya kum kipdeipniba, malye ning tonok ning babye kum upliba, nati dib tenenamniyak ninye ara, pia diksukumuk unamak ninye kipdeipnirye, na tenen ninye una ati, aninye dobuka deipnamne’ tenen, Yesus Kristus tenyamsukce winipsuke. Ara, Yesus arye, nunti, ‘Na ti dib tenenyak ninye ara, malye ning tonok ning babye, kum upliba, pia diksukumuk unamak’ tenen, lyepsukce, teleb kipdeipsuke.

Ulangan 32:5

Winilul bukni, wini talak ninye ara, el dam malye ning wininyak nang ara, el mapu tuba kum unyake anya arye, alye weik asa unamake. Wini talak unyak ninye ara, Allah kum tenelye bisik, kwalin bisikuk yakce ninye arye, malye weik wininyake.

Pilipi 1:10

‘Wininamlum’ tenen, Allah morosununa ara, deiyok ara, ani. Ara, dipkoprop teleb winin ning, ‘Pia teleb ning ani’ tenen, moubuka tenepmunce, teleb ninguk wipnamlulume. Winipmunyeura, ‘Malye winina kum arye, diksukumuk wininamlum’ tenen, Allah morosunune. Winibuka pia daulamunyebuk, yuk ninye nirya anggunti, ‘Sik malye wininyak ning ara, ani’ tenen, kum nyapmanto unamake. Winilamunya ani, anoutam talak nirya ap, Kristus arye, tukwak ninye nirya yupu bokolina ati, sirya yanamle talak ap, ‘Atouk telebuk wininamlum’ tenen, Allah morosunune.

Pilipi 3:6

Narye aninguk diba tenelamsirye, ‘Yuk ninye arye, talye dib tenenyak ning, nong kum upnamle ning nirya kum daturye, nun tenenyap ninguk weik upnamle,’ tenelamse. Utenelamsirye, Yesus ati min dib kum tenyamse talak ara, Yesus dipkoprop akunum tenelamik ninye ati, sik nong deice ikin ning weik delilamse. Tonda, ‘Allah arye nyamukba, Musa seklamuk yupu, mem yupu talibuka, diksukumuk dobolbabyopura, adeice aryuk Allah arye nunti, teleb nang tenepnamsile’ tenen, Yahudi yala nang arye, wininyak ning nirya ara, na babye talibuka diksukumuk winilamse. Malye winin ning ara, tonok babye, ton kum winilamse.

1 Tesalonika 5:23

Ninye oldana ap, walana ap kum aniryuk, kanye deibuka nimalye arye teleb ubuka neika una ati ara, nun ni Allah, el pil dosilya deice aryuk unyabe. Allah, elce anggunti, ‘Nauk talinamniak’ tenen, anggun nong ap, anggun kanye talima ap, anggun winin ning nirya ap, ‘Pia teleb ulinamsile’ tenen, Allah morosunune. Aning pia winibuka daulamsilye bukni, nun Deiyoknye Yesus Kristus tukwak tamubuka yanamle talak ara, anggun sambala ap, anggun kanye talima ap, anggun nong nirya ap ara, ‘Malye ning tonok ning babye, kum upsiliba, pia diksukumuk wininamak’ tenen, Allah morosunune.

1 Timotius 3:10

Allah el mapu melina deiyok nang kina ati, anang wipdeipnamunye talak ara, minop yuk nang arye sik unyak ning ati, pia moubuka dipdekibuk, malye winin ning kum wininyak nang ara, pia diksukum wininyak nang ara, anang dobuka erepdeiptume. Kumopura, Allah mapu melina deiyok nang pil kum doptinge.

1 Timotius 3:2

Ara, Allah yupu peteren nang. Sik deiyok talibuka pil dopmanto ninye adiparyuk wininyak ning lak nyapnukine. Sikda, malye winina pia kum winilamikibuk, yuk nang arye, “Anang wininyak ning ara, ani-ani,” kum nyapmanto nanguk, wibuka delina telebe. Sikda, kilapu tonokuk dobuka unyakce, ‘Talye kanye bobuka unune,’ tenena kum aryuk, sik bidamnye ati bita dilakirye, teleb winina ap, ninye minop wana ap, yu pola una kumce, nimalye arye una ap, anirya wininamak nang ara, apil dopnamtinge. Ato nang ati ara, yuk ninye arye, “Anang ara, dipkoprop teleb wininyake,” nyabuka, tenelamak nanguk apil dopnamtinge. Tonda, yuk ninye do, ninye asik nang do, sik aik buplan kukulinyak nang wibuka delina telebe. Tonda, yuk nang bikna ati, teleb kibuka peterepting nang wilina telebe. Winilamice ninye uka. Yuk unyak ninye ara, wilina kume.

1 Timotius 5:14

Anyapmakin touk wininyaka anya arye, anirya ati ara, na kanye ara, youwak kilapubuk, wise kum deiamikirye kam kilapu atonun ninye ati, nyabuka peterenune. Sik adiparyuk ninye dobikirye, mapu deibuka, sik wininyak ning nirya ati, bita dilakirye teleb ubuka unamake. Winibikcopura, yuk ninye, Allah dib kum tenenyak ninye arye sikti, “Akilapu sik malye winin ning ara, ani,” nyabuka, lulupsitinge. Deiyok ton kum atia. Malye kum winipmabibuk deiyok ton kum upnamla ati ayupu kum nyaptinge.

1 Timotius 5:20

Allah dib tenen ninye, sik deiyok nang kan-kan arye, dipkoprop tuba malye winibikcopura, anang ati yuk ninye nirya lak kekenmacak arye, malinye nyanamlulume. Wininamluma deiyok ara, sik yuk deiyok nang kekebikirye, ‘Se, nun babye, talye arye malye winibibyak’ tenen, ‘Moubuka dilanamabe, tenepnamak’ tenen, wininamlulume.

1 Timotius 5:7

Aning ati ara, yata nang do nirya, ‘Mankau kanye bobuka malye winibikcak’ tenen, anyapnukin yupu bobuka ninye nirya ati peterenalyame. Ara, ani.

Titus 1:6

Ara, Allah yupu aik deiyok nang, dib tenen nang, sik deiyok nang ara, anyapnukin ning wininyak nanguk wipnamlyame. Sik adiparyuk wininamake. Sik malye winina pia kum arye, telebuk unyakbuk, yuk ninye arye, “Anye bira malye winilule,” nyapmanto kum nanguk, wipnalyame. Tonda, sik kil weik arye dona kum, tonok kiluk dobuka, telebuk unamake. Sik mapu ara, dipkoprop Allah dib tenebikirye, telebuk wininyakbuk, yuk ninye arye, “Kume, sik mapu ara, sik kanye pia malye ninguk pataplibuk, malye-malye wininyake. Kanye pi dobuka, sik ni yapu nyanyak yupu ara, pia kum kekenyake,” nyapmanto kum nanguk, wipnalyame. Teleb ning ara, sik nyapu teleb ubuka winin nanguk, wipnalyame.

Titus 2:10

Tonda, aurdemuk pil donyak nang arye, sik deiyok nang bona ubula dolona kume. Aning kum bukni, pil dona do, yo bok dolona do, yupu nyana do, anirya ara, pia telebuk winibice nang ara, sik deiyok nang arye, ‘E, anang ara, pia dipkoprop teneptibye. Sik tenepce arye winin ninye kume,’ tenenamsiyake. Anyapmasin touk winibikce nang ara, telebuk winibicopura, adeice arye sik deiyok nang arye, nun Lyena Deiyoknye Allah el yupu ati, ‘E, ayupu ara, pia teleb yupu,’ tenepnamake.

Titus 2:15

Winipsuka ati ara, arup akunum nyapmakin yupu nirya ara, yuk ninye nirya ati, pia moubuka peterenalyame. Ninye kanye barina ap, malye winin ning lipsisikuka peterena ap, Allah arye pil deiyok ning aribkuka deice arye, mikip arye pil donalyame. Yuk nang arye, ‘Titus bira, talinye ulule’ tenen, kum kekebikirye, sik amutamuk kipkicopura, ance, ‘Se, yupu tonap kum nyapnamne’ tenen, anyapmakice ning ati, kekebuka batakana meme. Winipkiki bukni, aninye nirya ati, ‘Ayupu bataklulume,’ nyabuka, wenenamlyame. Aning yan yanibuka peterenamlyame. Na Paulus arye sekeibkine.

Ibrani 7:26

Ura, nun malye winin ninye kum melipdanmanto unyaba ati, nun patasilye touk, anye birye melibuka lyesulule. Allah ap, ninye ap dana-dana ansinilina deiyoknye, nun deiyoknye Yesus ulul ning ara ani. Elda, pia malye una kumnye ulul ati, malye winin ning tonok babye kum winilule. Elda pia malye una kumnye ulya ati, sik malye winin ninye yuk, el pia yuk ulule. Aning-aning nirya outam aubuk bukni, Allah arye Yesus dobuka, im deice tam erebuka deibukba, weik mambulnye ulule.

1 Peterus 2:12

Sik dib kum tenenyak ninye kan-kan ululum talak ara, anang arye anggunti, “Anang ara, malye ninye,” nyabuka lululinamsiak bukni, anggun pia dipkoprop diksukumuk ulamunyopura, anggun teleb ululum ning eipsikirye, Allah dolyanamsil talak ara, anang arye lopdeipsikirye, Allah el si ereipnamake.

1 Peterus 2:9

Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.

2 Peterus 3:14

Aning ati ara, na kayapu, anyapmasin ning nirya ara, ‘Allah arye winamsil’ tenen, kanye deiplumce, kintinibuka dinauk ululuma anya arye, ‘Allah nyasilye touk, diksukumuk wininamap’ tenen, pia pi dobuka pirilenamlulume. Wininamluma deiyok ara, ani. Ara, ‘Allah arye ninye nirya ati wenebuka bokeipnamsil talak ara, dipdesilirye, “Aninye ara, malye un ning kum upmale. Sikda diksukumuk unyakce, na ap dukdongobuka, teleb-teleb ubuka neika unyabe,” nyabuka deipnamsil’ tenen, teleb ubuka unamlulume.

Wahyu 2:5

Ati, anggun moubuka tenenamlulume. Minop talak nati kanye deiyamnulum ning ara, pia teleb bukni, wini talak ululuma ara, pia yuk tenebuka ululume. Mitika aryuk kanye delinululume. Amalye winiplum ning ati, batakmunce, urasin tamubuka, minop tam pia teleb ulamlum touk, ila tuba tonap winipmunyopura, telebe nyapsitinye. Wini talak anggun malye winiplum ning ati, kum batakmunyopura, narye anggun dam yanirye, anggun weisa delina deiyok ning deipsa ara, dopnamsine.

Wahyu 3:9

Sik yuk nang arye, “Nunda, dipkoprop Yahudi yala ninye, Allah el mapu kopropa unyabe,” nyabuka, talye nyaltakalamak bukni, dipkoprop ara, anang ara, Isa Mutuku Dongonye arye talilulba, el siuk erenyake. Aninye ara, tilila yupu nyana ninyeuk unyaka anya arye, na mikip deice nyapniba, amalye nang arye, sik yan dam gutam tuku dipdongobuka bunamake. Winibicopura, anggun Piladelpia mutuku diba tenelulum ninye ati, “Kume, anggun Piladelpia nang ati ara, dipkoprop Allah weik arye bico tenebuka melisulule,” nyabuka lakak nyapnamake.