Pilipi 1:23 - Eipomek

²³ Na kam una babye, dipna babye, ara telebe anya arye, na kanye teniltonauk unune. Pia weik teleb ning ara, ‘Na diptinyeura, tukwak mutuku batakuka, Kristus ap, ansinibuka, nun neika unamtinimnye’ tenen, patanulule.

Pilipi 1:23 ပူးပေါင်းရင်းမြစ်များ

2 Samuel 24:14

Nyabukura, Raja Daud elce tamubuka nyabuk. “Se! Aning ara, na pia kanye ikin atia! Bukni, na kanye ara, ninye arye, na ikin ning delina ara, na like. Ati, na kanye ara, pia teleb ning ara, Allah Yahweh arye, nun Israel yala nang nirya unyap mutuku ap, na ap, ikin ning deipsutu. Deiyok ara, nun ni koproba Allah Yahweh aryuk, pia weik arye bico tenelamsuke. Bukni, weik kanye ikin ning ara, nun mal olan nang arye, nun Israel nang ati, weik yu arye opsicake. Ninye arye nunti, bico kum tenesinyake.” Daud birye nyabuk.

Mazmur 17:15

Bukni, na ati ara, malye winin ning talibuka kum wininuna ati, pia diksukumuk wininmanya ani, akunum winipnyopura, aminyan talak Allah, an urasin ton eipnamne. Tonda, aminyan akunum dipnyopura, daunmanya ani, tonap kam buknyak arye, an urasin ap, nong ap, eipnyopura, pia kanye deibuka unamne.

Mazmur 49:15

Winipmanto ara, ‘Talye domba basam dipnulʼ tenen, dibinakuk deibuka obikiba, adiparyuk dibilamak touk, tukwak mutuku unyakce, maknya kintinibuka, unyak nang nirya babye, dipkoprob dipnamake. Dibina deiyok ning ara, sik dobuka bobinamake. Winipmanto ara, domba basam weina deiyoknye birye, menekuka baliba, el domba basam ara, el balye tam balamak touk, sik bona talin nang babye, maknya kintinibuka kwalinyak nang babye, akunum dibikcopura, tuku dongopnamake. Tuku dongobikiba, sik nong tuku utam dawamlya ani, aminyan talak ara, sik nong ap, sik tup ap nirya ara, adiparyuk kum danin banamle! Winiplirye talye, tuku uk danamle. Akunum diamik nang unyakak ara, el si Sheol mutuku noutamuk daunamake.

Lukas 12:50

Nara, weik kanye imun ning upnamak ning ara, aupmala bukni, min sirya kum dakdongopman talak ara, pia kanye imun unulule.

Lukas 23:43

Nyabukopura, Yesus arye ateleb yupu nyanmoknye biti tamubuka nyabuk. “Na dipkoprop nyapkine. Arup aniryuk, na ni dam, pia teleb ak weknye talak ara, an ap na ap neika pia unaname,” Yesus arye nyabuk.

Lukas 8:38

Winibuka moronmeka ati, Yesus tuba tamubuka mek lia bukna yo deice biyukura, mek lia bukna yo deice bulbinuyuk talak ara, isa talyamukak, Yesus arye kwetebuknye birye, ‘Na ap, Yesus ap bitinimnye’ tenen, Yesus ati morobuk.

Yohanes 12:26

Yata ninye do nirya, na amu tam bukuka, na yupu kekebikirye, na pil ati dokcopura, na unye touk adiparyuk wininamake. Na ban bisikuk adiparyuk melinamniyake. Tonda, na unun mutuku nirya, na mapu unamake. Na amu tam bukuka, na yupu kekebikirye, na pil ati donilinye biti ara, na Ni Koprop Allah arye, anye erebuka teleb kipdeipnamle.” Yesus arye nyabuk.

Yohanes 13:1

Atalak ara, sik Yahudi yala ninye arye, Kaplina ati Kwalina ati, ambusumto yupnamek sum ubuk. Atalak ara, Yesus arye, ‘Tukwak mutuku bataknirye, na Ni Koprop Allah dam binamne’ tenen, akunum kel bikamuk. Yesus ara, tukwak mutuku ulamuk talak noutamak nirya ara, el wipdeiyamuk nang, sik 12 nang ati, bico tenebuka melilamuk bukni, el tukwak mutuku ulamuk talak sirya dakmanto ubuka anya arye, atalak ara, ‘Na mapu arye, nun ni Yesus pia weik arye bicoe tenepsilirye, talima arisulule, tenebikirye, kel kipnamak’ tenen, elce alukunyan winibuk ning deice arye peterebuk. Aning ara, ani.

Yohanes 14:3

Anggun asik kintinilbinamna anya arye, dipkoprop tuba tamubuka tonap dolyamsine. Ara, ‘Na ap, na mapu ap, tonok akuk neika pia unamap’ tenen, dolyasinirye, na unamnak dobinamsine.

Yohanes 17:24

Winibuka morobukopura, ayupu ton nyabuka morobuk. “Naio, ance aning-aning nirya ap, tukwak mutuku nirya ap, min kum kwepdeiplum talak ara, ance nati weik arye kanye talima areamnulume. Winibuka talima areamnuluma ati, weik mambulnye kipdeipnulumce erepdeipnulumba, na si weik arye kibuka si erenamake. ‘Aning nirya pia teleb kipdeipnulumnye bira, na mapu arye eipkitingce kel bikiting’ tenen, moropkine, naio. Ara, ‘Aning nirya eipnamak’ tenen, ance areamnulum ninye, ‘Na mapu nirya ap, na ap, na unamne mutuku neika unamap’ tenen, moropkine, naio.

Rasul 7:59

Sik Stefanus keil donokuka, tuba onmek talak ara, Stefanus arye Allah ati morobuk. “Na ni Yesus anda na ni koprop ulyama ati ance na kanya talima dopropnilyame,” nyabukopura, sakukabukce gutam tuku dipdongobukce, weik yupu arye ayupu nyabuk. “Naio, sik amalye unmak ning ati ara, ‘Ance kum wenepnamlyame’ tenen, moropkine,” nyabuk. Stefanus ayupu nyabukopura, adiparyuk dibuk.

2 Korintus 5:8

Arup nyapmasin touk, nun kanye teniltona kum aniryuk, dib tenebuka lamapdongobuka unyabe. Nun kanye patapsilye ning ara, tukwak ninye nong unyaba ara, dawaptubuk aning batakuka, nun Deiyoknye Yesus ulyak neika uptibyetoura, ‘Aning ara, pia telebe,’ tenenyabe.

2 Korintus 6:12

Nunce anggunti, telebe nyana ap, kanye delina ap, bico tenena ap weik arye winisinyap bukni, anggun Korintus mutuku ululum ninye ara nunti, aning atonun kum tenesulume. Tonda, nunti kanye deibuka, bico kum tenesulume.

Pilipi 1:24

Bukni, narye sikti, ‘Petereptinya deice arye, aninye tuba meliptinye’ tenen, dipkoprop patanmanil ati, tenenuna ning ati ara, ‘Na Paulus tuba kam utinyeba, anang ap, neika utibyeura, narye melipsitinye. Anggunti ara, aning ara, pia teleb,’ tenenune.

1 Tesalonika 2:1

Ara, Yesus elti, diba tenepluma ati, nun du weit atonun nango, anggun kele. Nunce anggun dam yanuka pil dolamubu talak ara, tilila ati kum yapu. Kume, nong akunum kibuk.

1 Tesalonika 2:13

Ara, nunce Allah el yupu peterelamsupubuk, anggunce kekelamlum talak ara, anggunce ayupu ati, utenelamlume. ‘Kume ayupu ara, talye tukwak ninye arye nyanyak yupu kumde. Ayupu ara, dipkoprop Allah el yupu uka’ tenen, dololamlume. Nunce peterelamsupu yupu ara, dipkoprop Allah el yupu anya arye, teleb winilamlume. Anggunce Allah ati, diba tenelulum ninye anggun talima noutamak arye, Allah el yupu arye pil dosulule. Anirya ati ara, nunce Allah ati, moronyap talak nirya ara, anggunti tenebibirye, Allah ati, “Telebe,” nyabuka morosenyabe.

1 Tesalonika 4:17

Im deice ei, tukwak du noutamak ara, sik min deiamik nang akunum welebicopura, sik kam tuba tukwak aunmace ninye ara, Allah arye aninye dobuka, erebuka deiplibuk, sik min diamik ninye ap, nun Deiyoknye Yesus ap, dua kan-kan noutamak adiparyuk eibdanamake. Anirya akunum winiplyopura, nun nirya Allah arye dobuka bisilibuk, im deice Allah ap neika pia unamabe.

2 Timotius 4:6

Ayupu nyapmakina ara, talye ati kum nyapkine. Deiyok ara, ani. Yahudi yala ninye arye, Allah el si erena ati, kam ning obuka arilyamik talak bukni, sirya dakana ati, anggur mek ton dobuka, aning deice dikilongolamik touk, na wininune. Ara, Allah tenyamnuk touk, pil dopra balamsa ani, sirya dakna talak dam upnila anya arye, na dipnamne talak dam upnile.

Wahyu 14:13

Amalaikat winilye dinmasiba, adiparyuk im deice tam arye, ninye yupu atonun yupu arye, ayupu ton nyabukba, kekepse. Ayupu ara, ani. “Ayupu seklyame. Wini talak arye dipdongobuka, aminyan yanamle talak noutamak nirya, Yesus ap talima dukdongobuka unyak bukni, aminyan talak dipnamak ninye nirya ati, Allah arye teleb updeipliba, kanye deibuka, pia telebuk unamake,” nyabuk. Nyabukura, Allah El Dib Kanye arye nyabuk. “Dipkoprop nyaplume. Sik pil teleb ubuka dolamikba, nong uamuk ning ara, Allah arye kel kilula ati ara, aninye dibikirye, el dam welebicopura, ikin ning, sik nong deice ulamukba, pil ikin arye dolamik ning nirya batakuka, dikdik sebikirye, teleb kanye deibuka unamake. Sik ikin tonap pia kum unamake.” Allah El Dib Kanye arye nyabukba, kekepse.