Ati ara, sik Israel yala nang arye, Yerusalem mutuku weik aik ara, lipsisikuka tuba dopbikirye, acang keil poka ton akunum lepsisikirye, antanap dongobuka dobikcopura, sik amutuku unamak nang arye, Raja anti, si erena ati yo bok ap, ninye pil dona ati yo bok ap, sik tuku talina ati yo bok ap, aning nirya ara, el si pajak yo bok, tonap pia kum arenamake. Anang nirya arye, ayo bok bulubuka, an dam kum arelyanganamake. Tonda, nun ni Raja, ance dololyam yo bok, mitik kipnin banamkile. ‘Aning ara, pia malye,’ tenenyaba ati, aning nirya laka nyapkiabe.
Nehemia 9:37 - Eipomek37 Ara, nun kele. Nun pia malye weik winilamupa deice arye, wenesilyame. Atuku deice wa winyaka nirya ara, weik paplirye, weik arye nong uliba linyap bukni, nun talisinyak deiyok nang, yuk mutuku deiyok nang aryuk alubuka dolonyake. Nun wenena ati, ance adeiyok nang dobuka, nun deice nyapdeamsulume. Anang arye, sik tenebikce touk, nun ap, nun weinyap ning ap ati, mikip arye talisinyakce, ikin ning nun nong deice deilisinyake. Ati Nun ni Allah, aning-aning nirya ara, nun pia kanye imun usulule. Sik Lewi yala deiyok nang arye, ayupu nirya nyabikce, Allah ati morobik. အခန်းကိုကြည့်ပါ။ |
Nehemia 9:37
11 ပူးပေါင်းရင်းမြစ်များ
Tonda, anyapmasin yupu ara, ‘Akunuma,’ tenena kume. Aninguk kum bukni, narye anggun na amu tam deiyok nang ati, nyapniba, anggunce Israel ninye sik patalye ning ati, melibuka arenamlum ning ati nyapnusine. Ara, Yahudi yala ninye, sik deiyok nang, wisi nang arye Allah el aik pil donamaka ati, melibuka arenamlum ning ara, nyapnusine. Na talinun mutuku noutamak bulubuka delinyak uang yo bok, pajak bokuka arenamabe. Ara, anggun ululum mutuku noutamak arye, Efrat mek dam mutuku bukni, otam mutuku keting wekelban tam delinyak uang yo bok uk dobukapmunce, auang yo bok bokuka, sik Israel deiyok nang ati arenamlulume. Aning arenamaba deiyok ara, urdem ati kume. Ara, sik donamak pil batakna kumce, ‘Tuba pil dopnin banamak’ tenen, aning bulubuka arenamabe.
Tonda, na Raja deiyoknye birye, na amu tam deiyok nang nirya ati nyapsine. Anggunce, Israel ninye nirya ara, uang yo bok dona kume. Ara, anggun deiyok nang si erena ati, tonda pemerintah uang yo bok buluna ati, pajak nyalamak ning ara, aning nirya dona kume nyapsine. Ara, Israel nang, Allah el aik pum tam pil melibuka dona deiyok nang, imam nang ap, sik amu tam pil melin nang, Lewi yala nang ap, Allah el si eren mot sena deiyok nang ap, Allah aik bublan dam tikna arye kalikne nang ap, Allah el si eren aik ati, melibuka pil don nang nirya ap, pajak uang yo bok ton pia kum dolonamlume.
Narye ayupu tonap dukdongobuka mikip asa arye nyapse. “Minop talak ara, yuk pera mutuku ninye, Yahudi yala kum nang arye, nun mapu weik dekuka bobinamsik bukni, wini talak ara, nunce nun dam aupmasin touk, nun mapu tuba tamubuka dekuka boyangalamupu. Bukni, anggunda Yahudi yala ninye ululum bukni, anggun bidamang arye anggun mapu ati, dekelulume. Winimunya ara, yata deiyok ati do? Dan talak arye, tuba tamubuka nun mapu dekdopnamab do?” nyabuka wenepse. Nyabuka wenepsiba sik amutuku noutam talina deiyok nang ap, ‘Winipnuyabe,’ nyan deiyok nang ap arye, yupu tamubuka nyapmanto kum ubukce, sik alye ubuk ati, yupu tunim abuka bukik.
Nunda sapi basam dobuka, el un dam bukni, balye tam deice, ikin yo dobuka, ngang dam tapu kirikdongobikiba, ikin pil dolamle touk unyabe. Ara, yuk mutuku nang arye nunti, “Anggunda, nun piluk talye dopsululume,” nyabuka, ikin pil dinauk usinyake. Pil dipmasikiba, pil donmapyeura, pia mitang kilamsil touk, sikce nunti, “Pil donauk unamlulume. Didik sena pia meme,” nyasinyake.
Aning atonun, narye anggunti ‘Anang ara, na like,’ tenepnirye, anggun wenena ati winipnamsine. Anggun mal olan nang dobuka deipneba yakirye, yanuka obukapsikirye, sirya daksikirye, sikcuk yanuka talipsikiba, unamlume. Tonda, anang ara, anggunti, ‘Nun like,’ tenesinyak nang aryuk, talinamsiake. Sikce, anggun kan-kan ton nang ara, obuka sirya dakicak arye, oplobikceba dipnamake. Ton nang ati, obuka sirya dakicak arye, talipsikcopura, sik amu tamuk, ikin kanye bobuka unamlume. Anggun Israel nang arye, ayu mal olan nang ati, ilil usilirye, anggun mutuku batakmunce, bai sakuka bindopnalume. Tonda, ilil weik upnamsila ati, yuk talak ara, yu nang arye kum dobonmasice babye, anggun kanye aryuk, ‘Se olyanganamsiak do?’ tenen, ilil upsiliba, bai sakuka bikbik abuka bindopnalume.
Nyabukba, sik Yahudi yala deiyok ninye arye, Yesus ati tamubuka nyabik. “Kume, nun apu Abraham arye deibukura, dadeipdanin yangalamik nang arye deipsike. Ati, Abraham el mapu unyabe. Yuk nang arye nunti, yo bok deice deksikce, kum talisinyak anya arye, anda yata deiyok ati, ‘Lopdeipsinyopura, telebuk unamlume,’ nyapmasilam do?” nyabik.
Tonda, anggunce deibuka, pil domunce, tuku deice koulalum ning nirya ara, anggun kum bikamlum nang, yuk pera mutuku arye yangan nang yakirye, yanuka anggun wa tuku nirya doropnamsiake. Bukni, anggun ning ara, ton kum dopropnalume. Tonda, yuk nang arye yu uplyeura, anggun dam tuba-tuba ikin ning delinamsiake. Anggun ti, olbisinauk wininamsiake.
Ati ara, Allah Yahweh elce, anggun on nang dopdeipliba, anggun olyanamsiyak nang arye, sikce obuka, sirya daksicak arye, sik talipsiceura, sik anang amu tam umunyak arye, sik piluk talye donamlume. Adeice arye, anggunda dina ap, mek ap, patanauk ulamsiliba, unamlume. Tonda, anggun ongon baju kum upliba, nong banang dem unamlume. Aning atouk, anggunda aning yala-yala nirya ara, kum dasiliba, urdemuk unamlume. Allah el yu upliba, adiparyuk anggun wenena ati, ikin ning anggun nong deice deipsiliba, imun kanye bobuka ulamunya ani, kum kipnin banamsile. Winipmanto ning ara, malye winibice nang ati, rantai tapu arye koubiceura, wenen aik pum tam dongalamak atonun, ikin ning pia weik, anggun deice delinamsile. Winipnamsila deice arye, anggunda mitik tonun kipnin balamsilyopura, amenda talak anggunda, kum kipnamsile.
Tonda, ayu nang arye, mal olyanamsiyak talak ara, anggun domba basam do, sapi do, maka do, anggun weilulum ning yala-yala nirya ap, tonda anggun koululum ning nirya ap ara, kum kipdeipnamsiake. Winibikirye, daupnin balamica ani, anggun din ning yala-yala nirya kum kipdeipsicopura, anggun babye ton, obuka kum daneipnamsiake. Ara, anggun gandum duk nirya ap, tonda anggur duk ap, anggur mek ap, minyak zaitun mek ap, tonda anggun weilulum sapi basam ap, kambing basam ap, domba basam ap, aning nirya kum kipdeipsikiba, aning nirya ara, kum dalirye, anggun nirya babye dipnalume.
ကြော်ငြာတွေ