Winibikiba, an mapu Israel nang arye, ‘Se, nun dipkoprob malye winibupa deice arye, Allah wenepmasilba awenen aik bukmabe’ tenen, sik bidamnye arye tenebikirye, talima noutam arye kel bikikirye wenen aik binuka deiamikce diparyuk, ‘Se nun dipkoprob malye winibupe. Nun ni Allah ati yanibupe. Pia malye-malye ulamupu ning ara, batakabe. Nun ni Allah lyepsilyame,’ nyabuka morobikcopura, ance kekenalam tenen, moropkine.”
Nehemia 9:2 - Eipomek2 Atalak ara, Israel yala ninye arye, ‘Nun malye ulamupu ning lak kibuka nyanamabe’ tenen, yuk mutuku yala nang ap, ansinibuka kum unmek. Yuk mutuku nang ara, bokuka wiliprobik. Atalak ara, Israel ninye nirya tikikce, sik malye winilamik ning ati, lak nyanmek. Tonda, sik apu yapu malye winilamik ning ap ati, lak kibuka laka lenmek. အခန်းကိုကြည့်ပါ။ |
Nehemia 9:2
24 ပူးပေါင်းရင်းမြစ်များ
Ati ara, malye umunye ning ara, duknuna kum bukni, lakakibuka, laka nyanamlume. Nun apu yapu, sikce si erelamik Allah, el si Yahweh dam aryuk, ‘Se, dipkoprob nun malye wininyabe,’ nyabuka, laka nyanamlume. Aninguk kum bukni, winipmunyopura, Allah elce, ‘Winipnamake,’ tenesilye ninguk, el kanye delin piluk talibuka donamlume. Ara, nun dana-dana tam unyak nang ap, nun mutuku noutam unyak ninye asik nang ap, sik Israel yala nang arye, yuk mutuku kilapu dobuka boyamunce, neika umunye kilapu nirya ap ara, yukak yakdonoknamlume. Anang nirya yakdonoknamlume,” Esra birye nyabuk.
Ura, minop talak, Persia mutuku nang arye, Israel yala ninye obikce, Israel ninye nirya Persia mutuku bobinuka deiamikba, daulamika ani, tuba tamubuka yayik nang arye, Kaplina Kwalina domba mi opmek ning dobuka dibik. Tonda, yuk talye Israel ninye nirya arye, ‘Nun meliamsuknye, nun ni koproba Allah, el si Yahweh ati, el siuk erenamabe,’ tenebik nang arye ton, Kaplina Kwalina domba mi opmek ning dibik. Anang ara, ‘Nun dana-dana tam yala yuk-yuk unyak ninye, Allah ati dib kum tenenyakce, malye-malye winilamik ning tuba kum wininamabe. Tonda Allah arye, ‘Aning ara, na like, aning ara kum wininamlulume,’ nyapdeiamsuk ning, tuba kum wininamabe’ tenen, akunum batakik. Aning batakik nang nirya ara, sik nirya arye Kaplina Kwalina domba mi opmek ning dibik.
Sik Israel nang arye, Allah arena ati, aning nirya akunum winibuka, seng abikopura, Israel mutuku noutam taleamik ninye deiyok-deiyok nang arye, na Esra dam yayik. Yayikopura, ayupu nyapnike. “Naio, nun Israel yala nang, talye daunyab nang ap, tonda imam-imam nang ap, tonda Lewi yala nang ap ara, nun nirya arye, malye upmabe. Ara, nun dana-dana tam unyak nang ara, Yahudi yala nang kum bukni, talye yuk yala nang, sikce talye-talye luparabuka malye wininyake. Allah arye, ‘Aning ara, na pia like, aning ara, pia kum wininamlume. Ara meme,’ nyapdeiamsuk ning bukni, nun ap, anang ap, yuk-yuk mutuku kum unyaba ati, sikce malye wininyak ning ara, nun babye, aning ton akunum wininyabe. Nun mutuku dana-dana tam wininyak nang ara, ani. Ara, Amon yala nang ap, Moab yala nang ap, Mesir mutuku nang ap, Kanaan noutam minop talak dipdongobuka wini talak tuba unyak nang ap, Het yala nang ap, Feris yala nang ap, Yebusi yala nang ap, tonda Amori yala nang ap ati nyababe. Sik amutuku nang arye, malye pil dopra unyak touk, nun babye apiluk talibuka donyabe,” nyabik.
Se, nun ni koproba, Allah Yahweh, anda pia dipkoprop, diksukum unanye ulyame. Diksukumuk uminya ati, nunda, ance ‘Naʼ tenen nang, nun Israel nang nirya ara, wenebuka kum opsulumce, mitik tonun ton lyepropsulumba, nunda amutuku noutam mitik tonun tuba kam unyabe. Ance nun aunmab nang ara, Babel mutuku arye boyanuka melipsulumba, mitik tonun ton tuba kam unamabe. Bukni, nunce nun malye winipmabye ning ara, kum duknunyabe. Nun malye wininyap ning ara, an dam yanuka, laka nyanyabe. Nun kele, malye weik winibupa ati, nunda an dam ara, pia yanuka kum tiktibye.
Aninguk kum bukni, nun Israel yala nang arye, nun dana-dana tam unyak nang, Yahudi yala kum nang bukni, nunce sik mutuku kilapu dolamupu. Atonun, sik yuk mutuku kilapu dobuka, nun mapu koproba ati, areamupuba, dolamik. Aning nirya winilamupu deice arye, Allah Yahweh, el mapu nun Israel nang, el ‘Naʼ tenen nang ap, sik yuk mutuku nang, malye unyak nang ap, ansinibuka unyabe. Winibupa deice arye, malye kililalamupu. Tonda, amalye uning minop deiyok bikik nang ara, nun Israel ninye deiyok-deiyok nang arye, deiyok kibuburye, sik talye Israel nang babye eibikce, sik babye, amalye ning winilamupu. Ati, nun nirya arye, Allah nyapdeipsuk yupu moubuka kum talibupe. Aning akunum batakuburye, yuk malye bisik akunum banmabe,” sik deiyok nang arye, na Esra ati, nyapnike.
Ati ara keting noutam babye, lukunyan babye, narye anti tuba morokunune. Nara an amu tam unirye, an piluk donune. Ara, an amu tam unyak ninye, Israel yala nang nirya ati morokunune. Na nio, ‘Anda adiparyuk kekena ap, dina ap umince nirya biknalam’ tenen, morokunune. Nun Israel nang nirya arye, anti malye unyabe. Ara, na ap, na ni yapu ap, na yala nang nirya ap arye, an dam nun malye wininyap ning atibuk, laka nyapne.
Ura, adeiyok nang nirya arye, asurat sekne ning deice, sik si akunum sekikopura, Nehemia birye nyabuk. Sik Israel ninye nirya arye, ‘Allah el yupu uk moubuka kekebibirye, aninguk talibuka diksukum unamap’ tenen, bikilina ati, sik si nirya kum seknuyak bukni, sik deiyok kouna ati, ninye deiyoknye, na Gubenur Nehemia birye, ‘Anyalin yupu dipkoprob wininamap’ tenen, na si akunum sekmane. Aning atonun, Allah ap, ninye ap, ansinilina deiyok nang, ara Allah el si eren aik pum tam pil dona deiyok nang, sik imam nang nirya, sik si ton sekmake. Tonda, Allah el si eren aik pum pil dona deiyok nang, sik amu tam pil melibuka don nang ara, sik Lewi yala nang ton, sik si sekmake. Tonda, Israel ninye, sik deiyok nang yupa weik 44 nang, sik si sekmake. Anang-anang nirya arye, ‘Nun dipkoprob anyalin yupu winipnamnyap’ tenen, lak kilina ati, sik si sekmake. Tonda, anggun Israel ninye weik arye, Nun ni Allah arye, ‘Aning ara wininamlume, aning ara ton kum wininamlume,’ nyabuka, areyamsulum mem yupu, ‘Aninguk talibuka unamap’ tenen, winipmake. Sik dana-dana tam ulamikce, Allah ati dib kum tenelamik ninye ulamikak batakuka, yuk tam kiprobik. Ara, ‘Yuk mutuku nang arye, sik malye wininyak ning, nun ton eibibirye, amalye winin ning nun ton winibibyak’ tenen, yukak libuka biyik. Yuk mutuku ninye ap, ansinibuka kum ulamik. Winibuka ulamik nang ara, Allah el si eren aik pum tam pil dolamika deiyok nang ap, sik amu tam pil melin nang, Lewi yala nang ap, anang sik amu tam bukni, anyaik talye pil melin nang ap, Allah mot nyalamik nang ap, Allah el si eren aik bublan dam kalikin deiyok nang ap, anang-anang nirya, sik kilapu ap, sik kilmapu ap, sik sal mapu ap, kanye akunum bomik mapu nirya ara, sik bidamnye arye, ‘Anyalin yupu ara, nun yuk arye, aninguk talibuka unamap’ tenen, nyalin yupu deice arye, akunum nyanmake.
Aninye nirya arye sik si sekik ninye ap, nyalin yupu deice arye nyapmek ninye ap, awinipmek ning deiyok ara ani. Ara, nun ni koprop Allah arye, ‘Aning ara wininamlume, aning ara kum wininamlume,’ nyabuka, el amu tam pil dolamuknye, bira ‘Nun apu koproba Musa biti arepsuk mem yupu nirya ara, moubuka talibibirye, aninguk kekebuka unamap’ tenen, sik si sekmake. Tonda nyalin yupu deice arye, “Wininamabe,” nyanmake. Tonda, sik aninye nirya arye, nyanmake. “Allah el si deice arye nyapmabe. Allah arye nyapdeiamsuk yupu kekebuka, aning dipkoprob kum winibipyopura, nun wenena ati, ‘Allah arye, kanye imun weik ning nun nong deice deipsutue,’ nyapmake. Tonda, ‘Nun yala Israel ninye deiyok nang yala-yala nirya arye, nun ni koprop Allah, el si Yahweh, nun weik deiyoknye usulula ati, Allah arye, ‘Aning ara wininamlume, aning ara kum wininamlume,’ nyapdeiamsuk yupu, el yupu uk moubuka kekebibirye, aninguk wininamabe,’ nyabuka, lak kilina ati sik si sekik touk, ‘Nun babye atonun wininamap’ tenen, sik nirya arye, ‘Winibuka unamabe,’ nyalin yupu deice arye nyapdeipmake.” Nehemia birye nyabuk.
Ati, Allah yupu buku yininmek talak ara, sik Israel ninye nirya arye ayupu kekebikce, adiparyuk Allah arye, “Ayala bitinye ninye ap neika pia kum unamabe,” nyapdeiamuk touk, “Atalak babye aninguk winipnuyabe,” nyapdeibik. Ati, asum aryuk, sik yuk mutuku yala nang nirya ap, yuk yala ninye deiamik mapu nirya ap ara, dobuka, sik Israel yala ninye kan-kan arye yukak dopdeibik. Winibikce, sik ap yuk yala ninye ap, neika kum ulamik.
Winibuka Israel ninye ap, bai tam ninye ap, sikce ansinibuka malye winilamik ning nirya wibuka dopropse. Tonda, sik imam nang ap, Lewi yala nang ap arye, yuk mutuku ning dobuka talilamik ning nirya ara, dobukapsirye, kum kipdeipse. Winipsirye, Allah arye, ‘Anang teleb kilina ati, apil donamlume,’ nyapdeiamsuk touk, apil dopsiba sik nirya tuba tonap teleb kipdeipse. Apil nirya dobuka sirye daksopura, sik imam nang ap, sik Lewi yala nang ap ati, Allah arye, ‘Wininamlulume,’ nyapdeiamuk touk, ‘Sik yuk-yuk talibuka pil donamak’ tenen, pil dona deiyok ning yuk-yuk bokuka arepse.
Winilyama ara, yu weik nang arye nati, ‘Parang bobinuka, ninye deiyoknye Raja Daud biti, oplopnuyap,’ teneninyak nang, sik dam arye, ‘Ancuk lopdeipnimince, lyepropnamnilam’ tenen, moropkine na nio! Sik aninye asik ning ara, sik sitang deice arye, talye yupu uk nyanyake. Sikda, ninye nirya kekenyakak arye, sik sirik taruk tam erebikirye, ‘Nunda dipkoprob yupu uk nyanyabe,’ nyabuka, nyalin yupu deice arye nyanyak bukni, dipkoprob yupu, pia kum nyanyake. Talye tilila yupu uk, nyasinyake.
Atonun, na ni Allaho, ‘Anda, im deice tam ulumak arye, an pia mikip weik taruk arye, nara adiparyuk, lopdeipnimince, lyepropnamnilam’ tenen, moropkine. Deiyok ara, ‘Na mal olan nang arye opnikcak’ tenen, moropkine na nio! Diba, na mutuku koprop nang arye, kum bukni, yuk pera mutuku arye, ninye asik nang, yu nang arye olyanamaniak nang, ‘Sik taruk arye opnikcak’ tenen, na ni ance, “Lobuka lyepdopnilyame!” nyabuka, moropkine na nio!
Yata ninye do nirya, ‘Nun malye ulamupu ning, yuk nang arye kel biksicak’ tenen, sik malye winilamice ning kum batakikirye, tuba malye winin ninguk dungnubuka ulamice ninye ara, aminyan talak teleb kum upnin banamake. Bukni yata ninye do nirya, sik malye ulamice ning nirya ati, ‘Na malye winipse ning ara ani,’ nyabuka, laka arye laka nyabikirye, amalye un ning bataklamaka ninye ara, Allah arye sik malye unyak ning ati, aninye adiparyuk wenebuka oplomtu bukni, bico teneplirye, sik malye unyak ning nirya kum kipdeiplirye, aninye ati melibuka teleb ulinamle.
Nabi Yesaya birye, nyabuk. Se, na ni Allah, Yakub elce deibukba, dadeipdanin yangakirye, wini talak aunyab nang, an mapu koproba Israel nang ara, ance akunum bataklume! Batakluma deiyok ara, nun Israel tam aunmab mutuku bukni, otam keting panalyangan tam arye unyak nang, sikce talye ning ati, ‘Dibʼ tenen, taleamikce, malye winilamik ning ara, nun babye aning talibuka dobolbanyabe. Tonda, sik Pilistin nang arye, ‘Aminyan talak, yata wiripnamsil do?’ tenen, isa ak aruklamik deice arye, ‘E, nunda aminyan wininamap ning ara, ani,’ tenepnarye unyake. Awininyaka atonun, nun Israel tam nang babye, atonun wininyabe. Tonda, sik atam unyak nang arye, an Allah ati pia dip kum bikikce, an si kum erekinyak nang ara, epdakirye, ‘E, nun ap, anggun ap, tonok neika unamabe,’ nyabuka, nyalin yupu deice arye, taruk talelalamak atonun, nun babye atonun unyabe. Ara, sik talye daunyak nang arye, amalye ning winilamik touk, nun Israel yala nang babye, atonun winipnyabe.
Ance moubuka, ‘Se, nara, Allah Yahweh dam malye winilamse,’ tenepnulyame. Tonda, Na ni koproba Allah arye nyapdeiamuk yupu, kum kekelamse,’ tenepmince, na damuk yanamlame. Tonda, an babye, ‘Se, na ni Allah ati, kum si erelamsirye batakuka, weik yo tikamuka amu tam balamsirye, yuk mutuku nang arye, si erelamik isa ati, “Na deiyok ning,” nyabuka, atalye ning si erelamsirye, na ni Allah ance nati, “Aning-aning wininamlyame,” nyapdeiamnulum ning ara, akunum yanyamse,’ tenepnalame. Ayupu ara, na Allah Yahweh arye, akunum nyapdeipmasina ati, aning nirya ara, dipkoprob upnamle.
Na malye winilamse ning ap, Israel ninye nirya, sik malye winilamik ning nirya ap ati, ‘Allah Yahweh arye, nun malye winin ning nirya kum daneipnamsilirye, nunti namin kibuka, lyepdopnamsil’ tenen, moronmase. Tonda, Allah wibukabukce, pia teleb kipdeibuk mutuku, Yerusalem mutuku ara, malye nang arye uluplopsik ning ara, ‘Allah arye punuabuka, tamubuka telebuk kipdeipnamsil’ tenen, moronmase. Aning nirya, tuba moronmase talak ara, malaikat el si Gabriel birye, na dam yayuk.
“Anggun Israel ninye ap, Yehuda tam ululum ninye ap, anggun nirya arye, na Allah Yahweh ati, kanye deibuka kum unululumce, batakanululume. Dipkoprop anggunce, diksukumuk kum ululume. Anggunce nati duknululumce, delilulum mapu nirya ara, dipkoprob na mapu kume. Aning ati ara, isa si erebikirye, wala tikilongon talak, aisa ati weik kwalina kwalibuka dilamice ning ara, sik bidamang ati malye ulinamake. Wini talak ara, sik wenena ati, sik ap, sik wa win mutuku ap nirya, malye kipdeipniba, kum kibuka sirya dakdanamne.” Allah arye nyabuk.
ကြော်ငြာတွေ