Aninye nirya arye sik si sekik ninye ap, nyalin yupu deice arye nyapmek ninye ap, awinipmek ning deiyok ara ani. Ara, nun ni koprop Allah arye, ‘Aning ara wininamlume, aning ara kum wininamlume,’ nyabuka, el amu tam pil dolamuknye, bira ‘Nun apu koproba Musa biti arepsuk mem yupu nirya ara, moubuka talibibirye, aninguk kekebuka unamap’ tenen, sik si sekmake. Tonda nyalin yupu deice arye, “Wininamabe,” nyanmake. Tonda, sik aninye nirya arye, nyanmake. “Allah el si deice arye nyapmabe. Allah arye nyapdeiamsuk yupu kekebuka, aning dipkoprob kum winibipyopura, nun wenena ati, ‘Allah arye, kanye imun weik ning nun nong deice deipsutue,’ nyapmake. Tonda, ‘Nun yala Israel ninye deiyok nang yala-yala nirya arye, nun ni koprop Allah, el si Yahweh, nun weik deiyoknye usulula ati, Allah arye, ‘Aning ara wininamlume, aning ara kum wininamlume,’ nyapdeiamsuk yupu, el yupu uk moubuka kekebibirye, aninguk wininamabe,’ nyabuka, lak kilina ati sik si sekik touk, ‘Nun babye atonun wininamap’ tenen, sik nirya arye, ‘Winibuka unamabe,’ nyalin yupu deice arye nyapdeipmake.” Nehemia birye nyabuk.
Nehemia 8:3 - Eipomek3 Awala akunum ubukopura, Allah el si eren aik pil donanye Esra birye, mek kwelbalamik bisik bublan dam tikukce, Mem Yupu buku yinibuk. Esra birye yininmok talak ara, Israel ninye sal ap, kilapu ap, mapu ap nirya, tonda ayupu kekepmanto nang nirya ap, abublan damuk bulubuka wekmekce, pia moubuka kekenmek. Esra birye yininmok talak ara, beren tam talak arye yininmoka ani, keting duk-duk akunum ubukopura, akunum sirya dakukce, batakuk. Abuku Mem Yupu buku yinibuka nyanmok talak ara, sik sal ap, kilapu ap, mapu ap nirya, tunim abuka bukmekce, moubuka kekenmek. ‘Ayupu ara mambule’ tenen, pia moubuka kekenmek. အခန်းကိုကြည့်ပါ။ |
Nehemia 8:3
25 ပူးပေါင်းရင်းမြစ်များ
Allah el si erena ati, Israel ninye weik Yerusalem mutuku bulubuka yayik sum ara, sik deiyoknye Nehemia birye, “Winipnulume,” nyapdeibukba, Allah arye nyapdeiamuk yupu yinibikba, aninye nirya kekebik. Ara, Allah arye, “Aning ara wininamlume, aning ara pia kum wininamlume,” nyabuka lak nyapdeibukba, Musa birye sekiamuk yupu, yininmekba awekmek ninye nirya kekenmek. Allah yupu kekenmek talak ara, Allah yupu noutam sekeibuk ning ton kekebuka kel bikik. Ara, Allah arye nyapdeibuk. “Moab yala ninye ap, Amon yala ninye nirya ara, asum-asum nirya ara, sik ayala ninye bitinye ap, neika dukdongobuka pia kum unamlume. Anggun Israel yala ninye unamlum mutuku nirya ara, abitinye yala kili sal ton, anggun dam kum yanganamyake. Aning ara pia meme,” Allah arye nyabuk. Aning ara, Allah yupu buku noutam eibuka kel bikik.
Yerusalem mutuku noutam ara, mek kwelbalamik bublan dam bukni, weik lo uamukce, dalalamuk sukumuk Israel ninye nirya bulubik. Bulubukabikce, sikce Esra biti nyabik. “Naio, Allah el si Yahweh arye, nun Israel ninye ati, ‘Aning ara wininamlume, aning ara ton kum wininamlume,’ nyapdeipsuk yupu, kekenamaba ati, Allah arye nyapdeiamukba, Musa birye sekeiamsuk buku, Mem Yupu buku boyamince, yinipnamsilame,” nyabik. Esra bira, Allah nyalamuk yupu lak nyana ap, peterena ap deiyoknye ulamuk.
Aunmek talak noutam, like tekbarye sum deice ara, Esra bira, Allah arye nyalamuk yupu, Mem Yupu noutam arye yinibuka peterenmok. Ara, Allah arye, Israel nang ati, ‘Wininamlume, aning ara ton kum wininamlume,’ nyapdeiamuk yupu, Mem Yupu buku yokuka yininmok. Atalak noutamak nirya, akwalya kwalilamikce, pin-pin asa arye unmek. Min yuma sum arye dipdongobuka, tekbarye sum ubukopura, sirya sum upnopura, sirya dakalongolamik. Dakalongon sum akunum ubukopura, Allah yupu deice nyalamuk touk, sik nirya tonokak uk bulubukabikce, yupu talipmek.
‘Esra bira Allah arye nyalamuk Mem Yupu, buku yininamal’ tenen, cang yo dobuka deipmekak, welebinuka tikukce ayupu yinibuk. El binuka tikuk talak ara, el sirik tam ara, ninye ton tikik. Sik si ara, Matica ap, Sema ap, Anaya ap, Uria ap, Hilkia ap, tonda Maseya ap, neika tikmek. Aning atonun, el kwanim tam neika yanuka tikmek nang sik si ara, Pedaya ap, Misael ap, Malkia ap, Hasum ap, Hasbadana ap, Zakaria ap, tonda Mesulam ap tikmek.
Winibik talak ara, Esra birye, asum kintinep deipmek cang yo moropdeipmek deice, welebuka tikmoka ati, sik Israel ninye nirya, bulubuka wekmek nang nirya arye, tukwak bukuka Esra biti dinmek. Esra birye, ‘Abuku yinipnun’ tenen, yokeibuk talak ara, abulupmek nang nirya arye, ‘Si erepnamap’ tenen, tikmekce dinmek.
“Daud ayupu nyabuka deice arye, tukwak ninye lyenanye Mesias yanamuknye ati, ‘Mesiasnye bira, na ni kopropa ulule,’ nyabuk. Nyabuka ati, Mesiasnye bira, Daud el mi koprop kum ulule. Daud elce deibukura, dadeipdanin, yangalamuka ani, el yalanye birye deibuk mi ulul bukni, elda dipkoprop im deice yalanye, weiknye ulule. Ninye lyena Mesiasnye bira, talye tukwaknye kum ulule.” Yesus arye anyaik dam wekmek nang nirya ati nyabuk. Weika arye abulubuka wekmek nang nirya, Yesus arye kanye lon yupu nyanmokbuk, kekenmekce, kanye pia deibuka pin-pin ubuk.
Aning ati ara, na peterepsin yupu ara, talye amul deice arye kum kekenamlulume. ‘Talya amul arye kekeltakanyap do, moubuka kekenyap do?’ tenen, moubuka tenenamlulume. Na yupu peteresinibuk kekemunce, ‘Deiyok anye,’ tenenepmunce talibuka unamlume. Ara talye ati kume. Allah yupu kekena ati, Allah arye kel kina deiyok ning arisilyeura, moubuka kekekirye, aninguk batakna kum arye, talibuka unyak nang ara, Allah arye kel kina deiyok ning weik arye tabakuka arilibuk, weik arye kel biknin banamake. Bukni, yata nang do nirya, lik ati, amul deice kekeltakanyakce, Allah yupu kum talibuka wininyak nang ara, sik min arye mitik anunuk kel bikamice ning babye, kum upnamle,” Yesus arye nyabuk.
Bukibuk, yuk nang arye, Allah arye, “Aning wininamlulume, aning kum wininamlulume,” nyapdeibukura, Musa sekamuk yupu mem yupu ap, tonda Allah nyapdeibukura, el yupu lak lena deiyok nang, sik nabi-nabi nang sekamik yupu ap, anyasik nang arye nyabikopura, sik Yahudi yala deiyok nang Allah yupu keken aik, deiyok nang arye yuk nang ati yupu nyabikura, anang arye Paulus ap, Barnabas ap, ati nyabik. “Nun kayapu, talima kwa din yupu ton aupmasilyeura, nun nyapsuturume,” nyabuka morobik.
Sik Yerusalem mutuku nang ap, sik deiyok nang ap arye, ‘Yesus ara, nun lyesululnye ani,’ kum tenelamik bukni, sik Yesus obik talak ara, Allah yupu laka nyalamik nabi nang arye, “Winipnamake,” nyabuka sekamik yupu atonun winibik. Allah yupu laka peteren nang arye sekamik yupu ara, nun Sabat sum deice nirya arye Allah yupu peteren nang arye nyasinyake.
“Nunce, ‘Aning-aning kum wininamlulume,’ nyabuka surat sekuka nyanamap yupu ara, urdem ati kume. Ayupu nirya ara, Musa sekamuk yupu ulul atia. Minop talak arye wini talak nirya ara, Musa sekamuk yupu peterelamikura, nun mutuku-mutuku nirya nun yahudi yala nang Allah yupu peterenyap aik noutamak, sabat sum nirya deice arye tuba peteresikibuk, ayupu tuba kekenyapa ati nyapne,” Yakobus arye nyabuk
Akekenmek kilapu noutamak ara, kil tonok, Tiatira mutuku arye yayuk kil, el si ara, Lidia, bukmokce kekenmok. Lidia ara, dekna weik mirin baju, yuk nang ati dekna deiyok kil ulamuk. Ulamuka anya arye, yuk nang arye, el dam abaju dekelyangalamik. Tonda, akil arye Allah el dib tenebuka si erelamuk. Akil ara, Paulus el nyabuk yupu kekenmokak, Yesus arye, ‘Akil diba teneplirye, kekepnamle’ tenen, el talima buplan kukdeibukura, dib tenebuk.
Berea mutuku ninye ara, sik Tesalonika ninye mitik teleb ulamika atonun kum ulamik. Sik Berea mutuku ninye ara, Pia telebuk ulamik. Sik talima kintinibuka deililamikce, Paulus arye laka peterebuk yupu teleb kibuka kekelamik. Pia kanye deibuka kekelamikce, ‘Paulus nyanmasil yupu ara, pia dipkoprop do, kum do?’ tenelamikce, asum-asum nirya sik Allah yupu buku doprobik akarye wibuka deililamik.
Teroas mutuku aunmapua ani, naku barye sum akunum ubukopura, anaku barye sum inibukopura, ‘Nun nirya dina neika dipnuyap’ tenen, bulubuka tonok aikuk wekupu. Wekupubuk, Paulus arye, ‘Ambusum akunum binamane,’ tenebuka ati, Paulus arye amutuku diba tenebik nang ati, kibukce, Allah yupu pia peterenmoka ani, lukunyan dukduk kibuk.
Nyabikura, sik ap Paulus ap arye, “Ara asum arye bulubibyopura, yupu talipnamabe,” nyabik. Nyabik touk, asum akunum ubukopura, dana-dana tam nirya arye, Paulus unmok aik damak ninye weik bulubuka yanmek. Yayikopura, beren tam arye ubuka keting dukduk noutam ap, anoutam nirya peterenmoka ani, inibuk. Paulus arye peterenmok yupu ara, ani. Tonok ning ara, Allah arye ninye lyeplirye, sik kanye talima talipnamle yupu peterenmok. Tonda Musa arye sekamuk yupu noutamak ap, tonda Allah el yupu lak nyalamik nang nabi-nabi nang arye sekamik yupu ap, doprobukce, ‘Anggun kel kiplulume. Yesus ara, dipkoprop Ninye Lyena Deiyoknye ulule,’ nyabuka peterebuk. Ara, ‘Awekmek nang dib tenepnamak’ tenen, peterebuk.
Allah arye, “Aning wininamlulume. Aning ara, kum wininamlulume,” nyapdeibuk yupu nirya ara, Musa birye ayupu akunum sekukopura, Allah el si eren aik pum tam pil dona deiyok nang, sik Allah ap, ninye ap, ansinilina deiyok nang ati, ayupu nyabuk. Ura, anang ara, Allah el si erena deiyok nang ara, Lewi yala nang arye delilamikba, Lewi yala nang ulamik. Tonda, anang ara, Allah el si Yahweh arye, “Wininamsine,” nyabuka, Israel ninye ati nyalilamuk yupu libuka, bobalamik yo marikna, el si ton bobalamik. Tonda, Israel ninye sik wisi-wisi nang, yupu lipsisikuka bokolina deiyok nang ati arebuk.
Ara, nunce Allah el yupu peterelamsupubuk, anggunce kekelamlum talak ara, anggunce ayupu ati, utenelamlume. ‘Kume ayupu ara, talye tukwak ninye arye nyanyak yupu kumde. Ayupu ara, dipkoprop Allah el yupu uka’ tenen, dololamlume. Nunce peterelamsupu yupu ara, dipkoprop Allah el yupu anya arye, teleb winilamlume. Anggunce Allah ati, diba tenelulum ninye anggun talima noutamak arye, Allah el yupu arye pil dosulule. Anirya ati ara, nunce Allah ati, moronyap talak nirya ara, anggunti tenebibirye, Allah ati, “Telebe,” nyabuka morosenyabe.
Akaren noutam ara, Musa birye sekdeiamuk yupu nirya ara, Yosua elce dobuka, el mapu koproba, Israel nang bulubuka wekmeka kan-kan, sik kekena ati nukuk. Tonok yupu babye kum batakuk, aning nirya nukuk. Ara, sal ap, kilapu ap, mapu ap, yuk mutuku nang sik ap, sik nirya neika bukuka wekmek nang kan-kan arye, sik kekena ati abuku ara, Yosua birye dobuka, nukukura, kekebik.
Ati, anggun amul aupmasiliba, anyapmasin yupu ati, ‘Deiyok ani’ tenen, kekepmanto ululum ninye ara, Allah El Dib Kanye arye, anggun diba tenelulum ninye ati nyasilye yupu ara, moubuka kekenamlulume. “Ayupu nirya ara, Tiatira mutuku unyakce, diba tenena ninye ati nyapnamlyame,” nyapnuke. Allah arye, na Yohanes ati nyapnuke.
Amul aupmasiliba, anyapmasin yupu ati, ‘Deiyok ani’ tenen, kekepmanto ululum ninye ara, Allah El Dib Kanye arye, anggun diba tenelulum ninye nirya ati nyasilye yupu ara, moubuka kekenamlulume, nyapsine.” Ninye Mi Koprop Atonunye birye, na Yohanes ati, nyapnuke. Anye birye nyapnuk touk, na Yohanes arye sekuka nyapsine.