Nehemia 7:2 - Eipomek2 Tonda, ‘Yerusalem mutuku nirya kalikuka dinamle’ tenen, na weit koproba Hanani wipdeipsiba, kalikna deiyoknye kibuk. Tonda, el melina ati, yuknye ton, el si Hanania ton wipdeipse. Anye bira, cang keil poka antanap dongobuka dolamikba, oldan nang kum yanmanto asik kalikna deiyoknye biti, ‘Benteng panglima, nyalamik atonun unamle’ tenen, wipdeipsiba, na weit koproba ati melilamuke. Ura Hanania wipdeipsa deiyok ara ani. Anye bira, Nun ni Koprop Allah ati, pia dib tenelamukce, Allah ati, ‘Elda pia mambule,’ tenelamukce, ilil ulamukba, dipkoprob diksukumnye ulamuk ati, wipdeipse. Yuk nang ara, mitik teleb ulamikce, Allah ati dib tenelamik bukni, elda pia dipkoprob dib tenebuka telebnye ulamuk. Ati el ap, na weit koproba ap arye, Yerusalem mutuku kalikna deiyok nang ulamdik. အခန်းကိုကြည့်ပါ။ |
Nehemia 7:2
21 ပူးပေါင်းရင်းမြစ်များ
Allah arye, Israel ninye ati, bico tenebuka meliamuknye bira, nati nyapnuke. Ara, mutuku yangan keil lelilamsil touk, Allah arye Israel ninye ati, pia melibuka kaliklamuk. Elce nyapdeipnuke. “Yatanye do, Allah ati, ilil ulya deice arye, ninye talina deiyoknye kina ati, malye winina kum aryuk, pia diksukum ulamlirye, Raja ululnye bira winilule.
Nyabukce ayupu ton dukdongobuka nyabuk. “Naie, winipmanto ‘Ninye deiyoknye dam nyapnun’ tenen, bisik tuba banmanye talak arye, Allah el si Yahweh, el Dib Kanye arye bobuka yuk mutuku delilbikiliba, ‘Tuba atikmala’ tenen, ninye deiyoknye Ahab dam binuka nyapniba, yalirye, yanuka dipdelamkiliba, kum eipkilyopura, ‘Ahab birye, ‘Tilila nyapmanilama,’ nyabuka na opnilyak’ tenen, nyapkine. Bukni na nio, na mitik talak arye Allah el si Yahweh ati, el siuk erepnin yangalamse, ani wini talak babye tuba si erenune. Ati biknilyame na nio. Nara an amu tam atonunye unye bukni, anyapmanilam ning ara, na ilile.
Ahab ninye deiyoknye birye, Obaja yukubukba el dam yayuk. Winibuk talak ara Ahab birye, ‘Na pia teleb aik kalikna deiyoknye ulirye, anyaik ap, na aik melin nang ap, deiyoknye upnamle’ tenen, min arye Obaja akunum wipdeiamuk. Anye Obaja bira, Allah el si Yahweh ati, pia moubuka dib tenyamukce, Allah el yupu moubuka taleamuknye ulamuk.
Na tamnye Hanani ap, el kwit capu yuk nang ap, Yehuda tam arye, na dam yayik. Yayikba sikti, asipdese. “Minop talak sik Persia mutuku nang arye, Israel ninye bukni, Yehuda tam noutamak ulamik nang nirya obuka sirya dakikce, Persia mutuku bobiyikba, keting tamun weik daulamika ani, ton nang diamik bukni, ton nang ara, tuba tamubuka Yerusalem mutuku biyik nang ara, yata wiribuka unyak do? Teleb unyak do? Tonda, nun weik asik Yerusalem mutuku domupu asik ara, teleb ulul do, malye do?” nyabuka asipdese.
Aning delin aik pum tam talibuka ukirye, ‘Aning nirya moubuka kalikinamak’ tenen, narye yuk nang ton, apil dona ati wipdeipse. Narye wipdeipse nang ara, Imam el si Selemya ap, Allah arye nyapdeiamuk yupu sekna weik kelnye el si Zadok ap, tonda Lewi yalanye tonok el si ara Pedaya ap, wipdeipse. Anang sik amu tam pil dona ati, ninye si Matanya birye deibuknye Zakur, el mi Hanan wipdeipse. ‘Sik anang melibuka pil donamak’ tenen, wipdeipsa deiyok ara ani. Ara, anang-anang nirya ara, pia diksukum winin ninguk talibuka telebuk ulamikba, amutuku ninye nirya arye, sik anang ati, “Sikda teleb nanguk unyake,” nyabuka si erelamik. Ati ara, anang wipdeipse. Anang wipdeipsirye nyapse. “Anggunda Israel ninye nirya arye, Allah el arena ati, aning-aning ayala-yala nirya boyacopura, anggunce aning dobuka Allah ati arenamlume. Tonda, Allah el si eren aik pum tam pil melibuka don nang, sik Lewi yala nang ati, mitik tonun bokuka anang ati arenamlulume,” nyapdeipsiba, apil talibuka dolamik.
Nyapsirye ayupu ton nyapse. “Tonda amutuku yo kan-kan talibuka ulinye, el si Asaf biti surat ton arepnutumba, asurat bobuka, elti, arepnyopura, elce weik yo webuka arepnutue. Winipminba, elce yo ton nuknilyopura, dobukapnirye, Yerusalem mutuku noutam aik lipsisikuka dopnamne. Ara, amutuku noutam keil aik domikba, ninye mal olan nang kum yanmanto aik, anyaik buru tam poka bublan moubuka dopnamne. Anyasik ara Allah ati arelbalamak aik, el si eren aik dam, ulul mambul aik dopnamne nyapne. Tonda, na un aik moubuka dopnamne,” nyabuka moropse. Moropsebuk, dipkoprob Allah arye melipnuka deice arye, Raja arye, na moropse ning nirya kekepnukce, aning nirya ara, “Telebe,” nyapnukce, aning nirya arepnuke.
Na weiknye Gubenur min kum wipdeiamnik talak ara, yuk ninye deiyok nang amutuku taleamik. Aninye deiyok nang arye, amutuku ulamik ninye nirya ati, sik nong deice ikin weik ning delilamikce, “Sik uang perak yupa tonok keba obarye, empat puluh (40) arenamsulume,” nyabuka ubula dolamik. Tonda, “Din ning aning-aning nirya ap, anggur mek ap tabakuka arenamsulume,” nyabuka ubula dolamik. Nara, Gubenur min kum ulamse talak ara, amutuku talibuka ulamik ninye deiyok nang ap, sik amu tam pil melibuka dolamik nang, pegawai nang ap arye, winilamik bukni, nara aning atonun ton pia kum winilamse. Aning nirya kum winilamsa ara, talye ati kume. Teleb ubuka ulamse deiyok ara, na ni koproba Allah ati, pia ilil tenelamse ati ara, ato ning malye winin ning ton pia kum winilamse.
Ati, narye sikti, nyapse. “Yerusalem mutuku aik wekelbana ati, winiryuk memebik bisik bublan ara, keting kum deipmalirye buppu kum piripmalye talak ara, bublan kukultakna meme. Keting deiplirye, buppu piriplye talak arye, abublan kukulinamlulume. Winipmamunya ani, akunum iniplyopura, tuba tamubuka bublan tirikilongonamlulume. Ara, sik abublan kalikin nang arye sik tuba kalikinmakce talak ara, anang aryuk abublan tirikdongobikirye, bisik kin-kin botopdeiamika arye, besi arye dongopdongobuka tirikilongonamake. Ara, kanam inipnin banmalye talak arye tirikinamake. Tonda, Yerusalem mutuku unyak ninye sik kaliknak atibuk, ninye wibuka kintinip deipnamlume. Ara, anggun aik dam bisik bublan ap, keil poka dobuka botopdeiamupu bublan ap, yuk bisik bublan dam kalikinamakak ap ati, kintinip deipnamlume,” nyapse.
Bukni, sik telebuk wininyakce, sik ap neika unyak nang ati, pia kum malye kinyak nang ara, kanye deipnirye, anang ati melinamne. Winipnyopura, anang ap, na ap kanye deipdabirye, neika pia unamabe. Ati, yata nang do nirya, sikce malye winin ning nirya batakikirye, pia diksukumuk wininyak nang ara, narye anang ati, erepdeipnirye, ninye deiyok ning arepniba, sikda ninye deiyok nang kibikirye, talibuka na amu tam ukirye, na pil melibuka donamniake.
Bukni, wininamlam talak nirya ara, ‘Na yupu nyan pil ati, na melin nang unamakʼ tenen, ance dipdebuka, ninye ara, yata wiribuka nang do? Ninye ton wipdeipnulyame. Sik anang ara, kanye moubuka tenebikirye, yupu nyapmanto nanguk wipnamlame. Ara, ‘Teleb arye pil dopmanto nang ara, anye tenepmince, ananguk wipdeipminba, yupu lipsisikin pil talibuka unamake. Ara, sik anang noutam arye bokdeipminba, ton deiyok nang arye, ninye yupa ara, pia weik seribu (1.000) nang ati, yupu lipsisikuka talinamake. Ton deiyok nang arye, ninye yupa ara, 100 nang ati, yupu lipsisikuka talibuka unamake. Atonun, ton deiyok nang arye, 50 nang melina ati talinamake. Ton deiyok nang arye, ninye 10 nang melina ati, yupu lipsisikuka talibuka unamake. Ance, ‘Yupu lipsisikin pil talibuka donamakʼ tenen, adeiyok nang wipdeipnamlyame. Tonda, ance awipdeipnalam nang ara, talye nang kum wipdeipnamlyame. Anang ara, ‘Malye ubibya ati, Allah arye wenepsilyakʼ tenen, Allah ati, ilil kanye bobuka, elti, dib tenibuka unyakce, tilila yupu talye kum nyalamak nang ap, tonda ‘Sikda, yo bok weik dopropnamapʼ tenen, namin kin yo bok ton, pia kum dolonyakce, telebuk unyak nanguk wipdeipnamlyame. Tonda, yuk nang arye, sik anang ati ara, ‘Sikda, telebuk unyak nang ati, anang ati dipkoprob tenepnamap,’ tenenyak nanguk wipdeipnamlyame.
Utenebukba, sik Gubenur nang ap, yuk kalikna deiyok nang ap nirya arye, Daniel biti, ‘El aulul talak ara, yata malye winin ning ton uptuba, eiptibirye, kel biktibye do?’ tenen, dilnililamik. Pia dilnililamik bukni, el malye winin ning ton, pia kum ulamukba, ton kum eibik. Ara, Daniel el weiknye kina ati, dolamuk pil ara, pia teleb asa arye dolamuk. Malye pil ton kum dolamuk.
Bukni, na amu tam pil donanye Musa ulul atonun, yuk nang ton kum unyake. Ara, na amu tam ubuka, na pil donilinye Musa ara, na nyanye yupu nirya, teleb-teleb ubuka pil donulule. ‘Winipnulyam,’ nyanye ning nirya, tonok babye ton kum batakalule. Na mapu Israel ninye, sik unyakak noutamak ara, ‘Musa el tonoknye birye, na mapu nirya, sik kalikna deiyoknye unamle’ tenen, akunum wipdeipse. Na tenen ninye pia moubuka talilul deiyoknye ulule.
Weik kel arye pil batakna kum diparyuk, teleb pil melin nang ulamaka atonun, yata nang ton, anang atonun wininamak do? Aik deiyoknye tonok arye, yuk mutuku binuyuk talak ara, el pil donanye tonok ati, “Pil winibuka donamlyame. Na pil melin nang nirya ati, sik din patalye talak ara, bokuka arenamlyame,” nyabuka bokeibuk.
Nyabukopura, el deiyoknye birye tamubuka nyabuk. “Telebe, anda pil pia batakna kumce, teleb ubuka dolamnulume. Na mitik anunuk areamkisibuk, pil batakna kumce, teleb ubuka pil dolamnuluma ati, wini talak na talyamse ning weik arye arepnukine. Na ap, an ap, kanye deipdanimirye, teleb ubuka neika unamname,” nyabuk.
Ara, ‘Weik mambul ning talibuka, deiyok nang unamak’ tenen, pil dona deiyok ning arinmakibuk, apil deiyok nang arye, weik mambul kanye bobuka wininamak ning ara, nyapnusine. Ara, malye winina ap, pil batakana ap kum aryuk, pia dib tenepmanto ninyeuk unamake. Sikce, ‘Wininamap,’ nyanamak touk, aning batakana kumce, dipkoprop wininamake. Sik pil don talak nirya ara, weik mambul kanye bobuka unamaka ara, na Paulus arye, akunum nyapmasine.
Tonda, narye yuk nang kekelamik mutuku peterepra balamsibuk, ance kekelamlum yupu nirya ara, an babye ayupu dobuka, yuk teleb nang ati peterenamlyame. Peterelbinamlam nang ara, talye nang kum bukni, sikce “Wininamabe,” nyabuka nyanamak touk, aninguk dipkoprop unyakce, diba tenepmanto nang ati peterenamlyame. Tonda, anang arye yuk nang ati, teleb ubuka peterepting nanguk wibuka peterenamlyame. Talya-talya daunyak nang ara, kume.
ကြော်ငြာတွေ