Semaya birye nyapnuk yupu kekepsirye, kel bikse. ‘Kume anye birye nyapmanil yupu ara, elcuk tenibuka kum nyapmanile. Tonda Allah arye, anye biti, “Ayupu bobuka Nehemia dam lak nyalbinulame,” kum nyapdeibuk. Ayupu nyapnuk ning nirya ara, sik yuk nang Sanbalat ap, el kwit Tobia ap, sik kayapu ap arye, ‘Ayupu nyapminba, uang yo bok arepnamkiyabe,’ nyabika deice arye, tilila yupu uk yanuka nyapmanile. Ati Semaya birye nati talye minin yupu deice arye, na dam yanuka nyapdeipmanile,’ tenepsirye kel bikse.
Nehemia 6:13 - Eipomek13 Sik anang Sanbalat ap, Tobia ap arye, tenepmarik ning ara ani. Sikce nati aning winipnimiba, el ilil upliba, Allah el si eren aik dungnul bilyopura, malye winin ning wininamle. Amalye winin ning akunum winiplyopura, nunce yuk ninye kekenak ati, ‘Nehemia bira, dungnul binmala ara, pia malye upnamle,’ nyabibyeba, kekebikirye, dib tenebicopura, ‘Nehemia bira nun like,’ nyanamake. Sik anang bitinye arye, ‘Anye bira malye kipdeipnanam’ tenen nyanmanirike. Utenepsirye kel bikse. အခန်းကိုကြည့်ပါ။ |
Nehemia 6:13
24 ပူးပေါင်းရင်းမြစ်များ
Asekne ning noutam ara, Sanbalat birye sekuka liamuk yupu ara ani. Amutuku noutam unyak ninye nirya arye, anggun Israel ninye ati nyasinyak yupu ara, na akunum kekenune. Na ka Gesyem birye, ‘Yo, sik aninye arye nyanyak yupu ara, dib nyanyake,’ nyapnuka ara, nyapnukine. Ara, an ap, an kwit capu sik Yahudi yala ninye ap, amutuku unyak ninye ati, yu kanye uk tenibuka ulyama anya arye, amutuku talina deiyok nang ati, ‘Obuka sirya daknamabe’ tenen, winipdenamsulume. Ati ara, Nehemia ap, el kwit capu nirya ap arye, ‘Nun mal olan nang arye, weik asik Yerusalem yanuka weksicak’ tenen, ‘Amutuku antanap dongobuka, cang keil poka donmake,’ nyakinyake. Aninguk kum bukni, ayupu ton nyakinyake. “Kume, Nehemia elda, ‘Israel yala nang, sik ninye deiyoknye unamne’ tenen, kintinipmale,” tenebuka nyakinyake. Tonda ayupu nyakinyake.
An bon-bona ning pia weika arye deiaminba, bona weik talinanye ulaminyopura, aning ara mitik teleb bukni, teleb ubuka diksukumuk ulaminye bukni, yuk nang eibikirye anti, “Anye bira pia diksukum ubuka ulula ati, telebnye ulule,” nyabuka anti kipkicopura, ara pia weik telebe. Aning atouk, yuk ninye nirya arye, anti, ‘Elda teleb ululnye’ tenen, anti erepkikcopura, ara pia telebe. Urasin teleb ap, dekna weik ap ulul ning el si ara emas ap, perak ap aupmatua babye, ara mitik teleb uka. Weik teleb ning ara, yuk nang arye, anti kisal donyake.
Yatanye do, el kayapu nang, sik neika unamak ninye ati malye ubiceura, wenena kumce, ‘Yo dauplye’ tenen, teleb yupu uk nyalulnye bira, dipkoprob el kayapu nang, sik nong youna ati, elce tapu wena atonun webuka kintinililule. Elce wenena yupu ap, lipsisikuka nyana yupu ap, kum nyaplyopura, el kayapu nang arye, tuba malyeuk upnin balamica ani, aminyan talak ara, ikin weik upnamle.
Nun tukwak nang unyap talak nirya ara, yuk nang arye, ‘E, anye bira, pia dipkoprob, diksukum unanye ulule,’ nyabuka, si erepsikirye aning nyapsikcopura, “Aning ara pia telebe,” teneptibye. Winipmanto ara minyak mek, dengna pia weik ning, aupmatopura, Aning ara mitik teleb teneptibye bukni, yuk nang arye, nunti, Elda pia diksukum unanye ulule,’ nyapsitingopura, Aning ara pia teleb teneptibye. Tonda, na kanye ara, nun nin yapu arye deipsik sum ara, mitik teleb sum bukni, aminyan talak nun dipnamap sum ara, weik teleb sum ulule, teneptibye,’ tenepne. Tonda aning atonun, nun delisinyak talak ara, mitik teleb bukni, nun dibinyap talak ara pia telebe, tenepne.
“Anggunda moubuka kekepnululume! Anggunce, ‘Se, diksukum winina ara, weik tonun patasululeʼ tenen, moubuka kel biklum nang ati nyapsine. Ara, narye, ‘Aning ara wininamlume, aning ara pia kum wininamlume. Teleb una ara ani,’ nyabuka peterelamsise yupu akunum taliplumce, anggun kanye talima noutam boplumce, aninguk talibuka ululum nang ati nyapsine. Anggunce na yupu kekepnululume! Sik yuk talye unyak nang, tukwak mutuku unyak nang arye, talye-talye yupu nyabuka, nalisinyak yupu ap, nalibuka ik-ik nyasinyak yupu ap, minin yupu nyasinyaka ap nirya babye, ilil una pia kume. Tonda, talye nang arye anggunti ara, ‘Sikda malye unyake. Sikda talye ning ati, diba tenenyake,’ nyapsikirye, malye yupu anggun deice nyasinyak nang ati ara, anggunce, ilil una kumce, ‘Se, yata ning deiyok ati ayupu nyasinyak do?’ tenen, kanye teniltona pia kum unamlume. Atalye nang arye, anggunti, malye yupu nyapnamsiyak bukni, anggunda ilil una ap, mikip mitang una ap ara pia kum unamlume. Deiyok ara, ani.
Allah arye nyabuk. “Se, anggun Israel yala nango. Anggunda, yata isa ati, ilil weik upsuka deice arye, nati minin yupu ap, tilila yupu ap nyalamlumce, nati akunum bataknulum do? Sik aisa ara, yatato wininyaka ati, anggun nirya arye, ilil upsukba, anggunce, nati tilila yupu nyalamnulum do? Winilamluma deice, na Allah arye anggunti weik tonun melilamsise ning nirya ara, pia luba kipnulumce, nati diba tenebuka, pia tuba kum tenenululume do? Tonda, narye anggunti, wenen yupu weik tonun ton kum nyalamsise. Kum wenelamsirye, anggun malye ululum ning ati el lina kumce, biklamsesa ati, anggun ning ara, ‘Elda yata ton winipsutu do? Elce yata wiripnamsil do, kume?’ tenelamlumce, nati tonap ilil kum usulul do? Anggunda, ‘Kume, nunce yuk talye si erenyaba ara, tuba wininamap,’ tenelulum do?
“Ati ara, Yeremia an adiparyuk kintinipnamlyame. Aninye sik unyakak bimince, na nyapmakin yupu nirya binuka laka nyapnulyame. Ance sikti, ilil una kume. An baju ongopdopmince, yaribuka, ayupu nirya sik kekena ak binuka nyapnulyame. Abinuka nyapnuminye talak ara, na mikip weik an deice arepkiniba, binuka nyanamlyame. Bukni, ance sik aninye ati, ilil upkilyeura, narye alye un deiyok ning arepkiniba, amutuku ninye elinamakak arye, alye dakanamlyame. Ati, sik Yerusalem mutuku unyak ninye ati, ilil tenena kume.
Allah arye, Yeremia biti nyabuk yupu dobuka, sik un dam laka nyalbiyukopura, sik Israel ninye, Yudea mutuku noutamak ulamik ninye arye, ayupu talinmek. Sikce sik kayapu yuk nang ati, “Anggun nirya yangalulume. Nun nirya arye, Yeremia biti binuka wenebibirye, opnuyaba ati, yupu talinamabe,” nyabuka, yuk nang nirya yukubik. Tonda, ayupu ton nyabik. “Yeremia elcuk, Allah yupu laka nyalya ati do? Kume, nun dam ara, Allah el si eren aik pum tam, pil don deiyok nang, imam-iman ap, Allah yupu laka lena deiyok nang, nabi-nabi ap, tonda, nun mutuku weik kel bikamik nang ap, tuba aunyak nang aryuk, ‘Wininamsile,’ nyabuka, sik yupu yanuka nyapsitinge. Yeremia bira, el talinye bukni, nyasulula anya arye, nun mutuku yupu bokolina deiyok nang arye, ‘El nong dobuka, wenena aik dongolbinamak’ tenen, Yeremia biti, ‘El malye nyalul yupu ara, anye,’ nyabuka, malye yupu nyapnamabe. Ati, Yeremia birye nyasulul yupu, ton kum kekenamabe.” Sik Israel ninye arye, Yeremia biti, nyabik.
Tonda, amutuku ninye nirya arye, natibuk, yupu mur-mur ana deice arye, yupu talenmakiba kekenune. Sikce natibuk, nyanyake. “Anye bira, ‘Ikin ninguk yanamsile,’ tuba tenelirye ulule. Elda nun lik anya arye, tomobibirye, nun mutuku weik deiyok nang dam bobibirye, ‘Anye bira, malye yupu nyalule,’ nyabibibuk, sikce wenepnamake,” nyaninyake. Tonda, na kayapu nang babye, ‘Malye winipnul do?’ tenen, pia kalikuka dininyake. Tonda, ‘Malye winipliba, eiptibirye, tapu koubibirye, wenebuka optibye,’ teneninyake. Ara, yuk nang aryuk, aning kum teneninyak bukni, pia na tam nang koprop babye, ayupu nyaninyake. “Winibibya deice arye, ‘El ti obuka bisipnamabe,’ tenenyap ning ara, akunum winipnamabe,” nyaninyake.
Nyabuka nyanamlam bukni, mandipna kanye bobuka, kum kekepkicopura, anda ninye arye deipkiknye ulyama anya arye, sikti, eipmince, ilil una kume. An yupu kekebuka batakica babye, sikce anti, ‘Anda nun like,’ nyabuka, malye yupu nyanamkiyaka babye, ilil una kume. An yupu ati, bisipnamkiyak ninye unyaka atie. Ati sik ulamaka noutamak talye kanye bobuka, na piluk donamlyame. Winipmanto ning ara, ninye ara, sik unyak mutuku ara, tace ning ap, mumundik ninye si tolamle ning ap, ninye on ning aning-aning ap, weik aulula noutamak ulamice talak arye, ilil ulamle touk, anda aning atonun, ilil kum unalame. Aninye ap, ikin ning an nong deice deipnamkiyaka ati, ilil una kume. Pin-pin asa arye kanye deibuka, ilil una kum diparyuk unalame. Luba kilongona kume, sik Israel yala ninye ara, yupu bisipnin yangan ninye unyaka ati nyapkine.
Ninye kanya kum opsitinge bukni, nong ara opnamsiyak nang ati, ilil una kume. Bukni, ninye malye-malye weik unyakba, weneplirye, uku din mutuku dongoplirye, ninye nong ap, kanya ap, obuka sirya daknamsilanye, elti, ilil unamsile. Ara urdem ati, kum nyapsine, ‘Allah arye wenebuka opsilyak’ tenen, elti, ilil unamsile.
Yupu lipsisikuka bokolina deiyok nang, Sandeheren nyalamik nanguk bukni, noutamak bokuka, Allah arena ati deiyok nang nirya ap, anang nirya arye, min arye, ‘Yesus opnamabe’ tenelamika ati, atalak babye, aninguk tuba tenenmek. Sikda, yuk nang arye, “Yesus el malye winilye ning ara, ani-ani,” nyabuka, minina yupu arye nyaptingba, kekeptibyeura, ‘Ayupu deice arye, Yesus optibye’ tenen, teninmek.
Tonda, anang aryuk, “Ayupu-ayupu nirya talye binuka kisipdeipnalyame,” nyabikura, yuk nang akunum kekebikopura, atilila yupu nyapnamik nang bobuka Sandeheren nang dam bobiyik. Bobiyikura, atilila yupu nyan nang arye nyabik. “Amalinye Stefanus bira, nun malye wininyap ning dekna ati, Allah arinyap aik, ara Allah arye el si erena ati, wipdeibupu aik ara, anye Stefanus nyalye yupu deice arye yanisulule. Tonda Allah arye, ‘Aning wininamlume, aning kum wininamlume,’ nyabukura, Musa arye sekeiyamsuk yupu mem yupu ati Stefanus nyalye yupu deice arye yanisulule. Aning ara, pia kum batakasulule. Abitinye ning tuba-tuba yaninauk usulule.
Na mince winilamse atonun tuba wininamne. Ara, na peterena pil ati, dekna ning kum moronamne. Winipnyopura, siktilila yupu peteren nang arye, sik bidamang kanye, weik erepdakirye, “Kume, Paulus arye peterepra winilamle atonun wininyabe,” nyabuka kum kwaliptinge. Na wininun ning yuk, sik wininyak ning yuk ati nyapsine.
Anyapmakin touk wininyaka anya arye, anirya ati ara, na kanye ara, youwak kilapubuk, wise kum deiamikirye kam kilapu atonun ninye ati, nyabuka peterenune. Sik adiparyuk ninye dobikirye, mapu deibuka, sik wininyak ning nirya ati, bita dilakirye teleb ubuka unamake. Winibikcopura, yuk ninye, Allah dib kum tenenyak ninye arye sikti, “Akilapu sik malye winin ning ara, ani,” nyabuka, lulupsitinge. Deiyok ton kum atia. Malye kum winipmabibuk deiyok ton kum upnamla ati ayupu kum nyaptinge.
Mikip arye pil donamlyame nyapmakina deiyok ara, Allah El Dib Kanye mikip arisilye ning ara, ‘Ilil asa unamak’ tenen, kum arepsuke, aning kum bukni, mikip una ap, yuk ninye nirya ati bico tenena ap, ‘Talye luba kibuka kum unune’ tenen, kanye kalikildana ap, ‘Ateleb ning nirya wininamak’ tenen, El Dib Kanye mikip arisulula ati nyapkine. Allah arye, ilil una ap, teniltona ap, tenen ning ara, kum arisulule. Talima darapdongobuka, mikip arye talye luba kibuka un ning arisulule.
Amalye winina kum arye, pia moubuka teleb ninguk peterepminyopura, yuk nang kekebikirye, “Anye Titus bira, malye yupu tenepce arye nyalule,” kum nyapkitinge. Moubuka peterenamlam ning ara, tilila ati kume. Deiyok ara, winipminyopura, an yupu sekdongokikirye, yanikinyak ninye ara, dipkoprop deiyok kum uptopura, malye yupu kum nyapsitingce, alyeuk dakanamsiake.
“Bukni, weik uku buk dilamukce, tin ap, kumasan bol keil el si ara belerang ap, ara uku tin weika arye dipliba, keil but-buta tong ara, sikin tong atonun, weik lelamle ning nyalamukce deiyamse mekwen, uku din mutuku noutamak dopwketepniba, asukumuk pia daunamak ninye ara nyapnune. Sikda, diba tenena kum ninye ap, ‘Yu nang arye opsicak’ tenen, ilil upliba, nati batakaninyak nang ap, kir dona ninye ap, ninye bai mal ona nang ap, amalye pil donyak ninye nirya ap, talye ning ati, ‘Nun ni kopropa’ tenen, si erenyak nang ap, tilila yupu nyanyak ninye ap, aninye nirya ara, uku din mutuku, noutamak dopwketepniba, apia unamake. Uku din mutuku unamaka ara, Dipna Bitinye ning ati nyapkine.” Allah arye nyapnukba, na Yohanes arye kekepse.
ကြော်ငြာတွေ