Nehemia 10:30 - Eipomek

³⁰ Atalak ara, ayupu akunum nyabukopura, abulupka wekmek ninye nirya arye, ayupu ton nyabik. Nun Israel ninye nirya arye, nun ni koproba Allah ati, ‘Wininamabe,’ nyalin yupu ton dukdongobuka nyapnuyabe. Anyalin yupu ara ani. Ara, sik yuk-yuk yala ninye nun dana-dana tam unyak nang arye, delinamak kilmapu ara, nunce nun mapu kil dolana ati, kum donamabe. Tonda, nun mapu sik kilapu ati kum donamabe. Tonda, nun kilmapu ara, sik yuk-yuk yala ninye, sik mapu kil dolana ati ara, pia kum arenamabe.

Nehemia 10:30 ပူးပေါင်းရင်းမြစ်များ

2 Raja-Raja 23:25

Ura Yosia ninye deiyoknye birye, Allah ap, talima dukdongobuka ulamuk touk, yuk nang nirya ara, atonun kum ulamik. Elce, ‘Se, nun malye winilamupu ning nirya batakuka, Allah el tam tuba tonap kipdopnamabe,’ tenelamukce, winilamuk nirya ara, yuk nang arye, aning atonun kum winilamik. El min kam ulamuk talak babye, el dibukba, aminyan talak ulamik Raja nang babye, Raja Yosia ulamuk touk, yuk Raja nang ton kum winilamik. Raja Yosia, el kanye ap, talima ap, nong ap, mikip ap nirya ara, Allah el si Yahweh, el deice uk deibuk touk, yuk nang ton kum winilamik. Aning winilamuk ning nirya ara, Allah arye, ‘Wininamlume,’ nyapdeibukba, minop talak Musa kekebukce, sekeiamsuk atonun winilamuk. Raja Yosia elda Allah el yupu pia moubuka kekelamukce, aninguk winilamuk. El winilamuk atonye ton kum punubuk.

2 Raja-Raja 23:3

Yehuda yala ninye sik ninye deiyoknye Raja Yosia birye, abuku nirya akunum yinibukopura, winibuk. Elce, Allah el si eren aik pum tam bukni, weik cang ayukumna yo tikdeiamika dam tikukce, nyabuk. “Na ni Allah arye, nyapdeiamuk touk, dipkoprob narye, ayupu moubuka kekepnirya, pia talibuka dobolbanamne,” nyabuk. Raja birye, anyaik ayukumna dam binuka tikuka, ara Allah el dam atonun tikukce ayupu nyabuk. “Naie ance, ‘Aning ara wininamlume, aning ara ton kum wininamlume,’ nyapdeipsulum yupu, mem yupu nirya, na akanye ap, talima ap, dukdongobuka tonok kanye bobuka, Allah an yupu buku noutam nyabuka sekeipsulum atonun wininamne,” nyabuk. Nyabuka adeice arye, ara ‘Allah el dib yupu ara dipkoprob talibuka unamne,’ nyana atonun ati ayupu nyabuk. Nyabukopura, anyaka bulubuka wekmek nang nirya, sik Israel nang nirya arye, “Nun babye, dipkoprob Allah el yupu nirya moubuka kekebibirye, aninguk talibuka unamabe,” nyabik.

Nehemia 10:1

Hakailya el mi Gubenur Nehemia, elce minopce lak kilina ati, el si sekna ning deice sekuk. Ara, meterai delilamak ning deice tanda tangan kina ati, sekuka lak kililamaka atonun, akunum winipdeibuk. Winibukura, aminyan talak el dam bulubuka yayikce, dukdongobuka sekik nang sik si ara ani.

Nehemia 13:23

Atalak narye dinmasiba, Yahudi yala nang weik arye yuk mutuku Asdod mutuku kilapu ap, Amon mutuku kilapu ap, Moab mutuku kilapu ap, dolalamikba eipse. Allah arye, “Yuk mutuku kilapu ton bobuka kum dolanamlume. Israel yala kilapu uk dolanamlume,” nyapdeiamsuk bukni, yuk mutuku kilapu uk dolamika ak eipse.

Nehemia 13:25

Narye sik aninye ati wenebuka supse. Winipsirye ton tam nang ara kama arye deplopse. Ton tam nang ara, sik potong nirya kobuka batakse. Winipsopura, narye tamubuka nyapse, “Anggunda dipkoprob Allah el si deice nyalin yupu nyaplulume. ‘Nunda tuba tonap, nun kilmapu dobuka, sik yuk mutuku nang ati kum arenamabe. Tonda, nun mapu sik kil dona ati, yuk mutuku kilapu dobuka kum arenamabe. Tonda nun babye, yuk mutuku kilapu ton, pia kum dolbanamabe,’ nyalin yupu deice arye nyaplulume,” nyapse.

Nehemia 13:30

Winibuka Israel ninye ap, bai tam ninye ap, sikce ansinibuka malye winilamik ning nirya wibuka dopropse. Tonda, sik imam nang ap, Lewi yala nang ap arye, yuk mutuku ning dobuka talilamik ning nirya ara, dobukapsirye, kum kipdeipse. Winipsirye, Allah arye, ‘Anang teleb kilina ati, apil donamlume,’ nyapdeiamsuk touk, apil dopsiba sik nirya tuba tonap teleb kipdeipse. Apil nirya dobuka sirye daksopura, sik imam nang ap, sik Lewi yala nang ap ati, Allah arye, ‘Wininamlulume,’ nyapdeiamuk touk, ‘Sik yuk-yuk talibuka pil donamak’ tenen, pil dona deiyok ning yuk-yuk bokuka arepse.

Nehemia 5:12

Nyapse ning ati, sik amutuku noutamak talibuka ulamika deiyok nang arye, “Yo telebe. Anyapmasilam ning ara, wininamabe. Tonda, nunce dukdongobuka nyapnamabe. Winibibirye, sik taleamik ning nirya ara, tuba tamubuka arenamabe. Winibipyopura, nunce sik yuk Yehuda yala ninye ati, ‘Tonap tabakuka arenamsulume,’ nyabuka kum moronamabe,” nyabik. Nyabikopura, narye sik imam nang ap, amutuku talibuka ulamika deiyok nang ap, ‘Winipnuyabe,’ nyan deiyok nang ap ati, “Yalulume,” nyapsirye, sik amutuku noutam ninye deiyok nang ara, arup arye, ‘Winipnuyabe,’ nyapmangu ning ara, ‘Dipkoprop winipnamak’ tenen, “Nyalin yupu deice arye lak nyapdeipnululume,” nyapse.

Mazmur 119:106

Narye an damak, “Aning ara, pia dipkoprob wininamne,” nyabuka, nyalin yupu nyapse ning ara, kum bataknamne. Aninguk wininamne. Ara, ance nyapdeiamsulum yupu nirya ara, pia dipkoprob diksukum yupu anya arye, aninguk moubuka kekepnirye, talibuka binamne.

Keluaran 34:16

“Aning atonun, anggun Israel nang arye, anggun mapu kil dona ati, aminyan binamlum mutuku, tikilyangan nang sik kilmapu dopropmunce, anggun mapu arepmunba, dobikcopura, aminyan talak na bataknikirye, sik kilapu si erenyak Isa Mutuku Dongonye ninguk, ‘Sik ton erebikcak’ tenen, nyapsine. Ara anggun mapu, sik kilapu yupu kekebikirye, sik Isa Mutuku Dongonye si erebikirye, malye winibicak ati, moupnamlulume, nyapsine,” Allah arye nyabuk.

Ulangan 29:11

Tonda, anggun kilapu ap, anggun mapu nirya ap, anggun ululum mutuku noutam unyak ninye asik nang nirya ap, tonda anggun melina ati yo takun pil ap, mek kwen pil ap, dosinyak nang babye, asukumuk bulubuka awekmalume.

Ulangan 7:3

“Aning atonun, anggun amutuku unamlum talak ara, anggunce amutuku kilapu ton, pia kum dopdanamlulume. Tonda, anggun Israel wel kilapu ap, wel nang ap ati ara, anggunce, ‘Amutuku wel kilapu ap, wel nang ap, talye dopdanamabe’ tenena ara, pia meme.