Mika 7:8 - Eipomek8 Nabi Mika birye, Israel ninye ati, tenebukce nyabuk yupu ani. Na mal olan nang arye, malye kum nyanamnulume. Tonda, na mal olan nang arye, anggunce, ‘Bita merekuka obuka, kum danaipmakiyake’ tenen, weik kanye deibuka, kum lyek-lyek anamnulume. Deiyok ara ani. Dipkoprop na saktinya babye, aminyan talak tuba tamubuka erepdeipniliba, tiknirye teleb unamne. Tonda, wini talak ara, na kunuknak atonun unun bukni, aminyan talak ara, na ni Allah Yahweh, elce dobuka, weik dirina ak deipnamnile. အခန်းကိုကြည့်ပါ။ |
Mika 7:8
46 ပူးပေါင်းရင်းမြစ်များ
Winipmanto ara, ninye arye, weik weisa ubikceba, dirina weik uplyeura, yuk nang dana-dana tam nirya, teleb kibuka eililamak touk, sik diksukumuk wininyak nang babye, sikti, teleb wininyaka deice arye, yuk nang weik arye melikinyake. Ara, sik diksukum wininyak ning, yuk nang eibikceura, ‘E, teleb winin ning ara ani,’ tenen, kel biklamaka atia. Tonda, sik diksukum telebuk wininyak nang arye, yuk nang ati, bico tenekirye, teleb kibuka melikinyake. Tonda, Allah arye, “Aning ara, wininamlume. Aning ara, pia kum wininamlume,” nyapdeiamsuk yupu moubuka talikirye, telebuk wininyake. Ati, yuk nang nirya ati ara, teleb kibuka wininyake.
Na nio, kekepnilyame! Nati, ‘Anye bira, nun lik,’ teneninyak nang ara, ikin weik ning, na deice delininyake. Wininyaka deice arye, nara imun kanye bobuka, ikin weik unune. Imun kanye bobuka ununa ati, winipmanto ara, tuku deice sakukabikirye, pia kuna sukum ulamak touk unune. Ara, minop talak akunum diamikba, akunum tuku lukamik nang atonun ununa ati, nyapne.
Ton talye nang ara, sik ninye mal olana ati, tuku deice balamle ning, el si kereta perang ati, weik tonun kanye delinyake. Ton nang ara, sik kuda basam ati, weik tonun kanye delinyake. Sik ato nang ara, ‘Aning arye, nunce yuk nang nirya ati, optibirye, sirya daktibye,’ tenenyake. Bukni, nun Israel yala nang arye, aning atonun kum teninyabe. Nunda, nun ni koproba Allah Yahweh ap, el si ati, weik tonun kanye delinyabe. Elce melisilya deice aryuk, nun mal olan nang obuka, sirya dakanamabe!
Ati na ni Allah, deiyok kum upmalibuk, sik yu nang arye, nati, ‘Anye bira opnamabe,’ tenen, pirininyak nang ara, ‘Sikce opnikirye, akutubuka kanye deipnikcak’ tenen, ‘Ancuk, nati, lyepropnamnilam’ tenen, moropkine. Diba, na deiyok ton kum upmalibuk, sik yu nang arye nati, ‘Anye bira, nun lik ati, opnamabe,’ teneninyak ning nirya ara, ‘An Allah aryuk, sik yupu sekminba, sikce winipmanto kum unamak’ tenen, moropkine na nio.
Malye ninguk, talibuka wininyak ninye arye, yuk nang sik ning ati, ‘Na kwit, an ning ton areamniminyeba, aminyan talak, na ning dobuka, an ning punupnamkine,’ nyabuka, tilila yupu nyaltakanyak bukni, dipkoprop, sikce tia talak ati, dolonyak ning nirya ara, tamubuka kum arinyake. Bukni, sik diksukum wininyak nang ara, sik kayapu nang arye pataplyopura, sik patan ning kanye teleb arye, tabakuka arinyake. Bico tenebuka arinyak ning ara, mitik tonun arye, kum arinyak bukni, weika arye tabakuka arinyake.
Ati ara, narye an Allah ati, morokunune. Ara, na ikin upniliba, yu nang arye opnikcopura, nara winipmanto kum unulul talak ara, ton nang arye aning eibuka, akutubuka nalipnikirye, kanye deilinyake. Ati narye, se, na ni Allah, ‘Ato nang arye, na yanuka opnikirye, sice buklopnikcak’ tenen, narye anti “Melipnilyame,” nyabuka, morokunune na nio!
Teleb weik ning ara, tonok sum Allah an si eren aik dam yanuka eipkitinyeura, telebe teneptinye. Bukni, yupa weik seribu sum ara, talye yukak daunmatinye babye, telebe kume. Tonda, na ara, an si eren aik bublan dam kalikna pil doptinye babye, pia telebe. Bukni, malye wininyak nang, sik teleb aik binuka uptinye babye, aning telebe kume.
Yata nang do nirya, Allah arye nyasulul yupu moubuka talibikirye, dipkoprob uk wininyak nang ara, Allah arye sikti, lyepdoplirye, dirina deiyok ning arelula deice arye, moubuka bikinyake. Tonda, yata nang do nirya arye, teleb diksukumuk unyak nang ati ara, sik dam ara, pia kanye deibuka, kil-kil una ati, sik anang dam unamle.
Ninye wenebuka dongolamak aik bunyak nang ara, lopdeipnirye, ‘Bai tam bilulume,’ nyapniba binamake. Tonda kunuknak unyak ninye ara, dirin dam dobuka deipnamne. Winipnirye sik aninye ara, dobuka yo pata mutuku aning-aning nirya teleb kibuka pana kum mutuku deipniba, unamak bukni, sik unamakak nirya ara, din ton pia kum patapnamle. Auna uk upnamle. Sik weinyak ning babye, bisik lilunak palamle maning ap, mutuku kon palamle maning ap, talye lukparabuka dinamake.
“Anggun noutamak noutam ara, yata nang arye Allah Yahweh ati, ‘Se el weik mambulnye’ tenen, el si erelulum do? Tonda Allah arye wipdeibukba, el pil dolulnye nyalul yupu ara, anggun noutamak arye, yata ninye arye ayupu kekebuka diksukumuk ululum do? Yata ninye do nirya, kunukna bisikuk bamunyeba, dirina kum usilye ninye ara, Allah el si Yahweh ati diba tenebuka unamlume. Tonda, ‘Nun ni koproba Allah elcuk melinamsil’ tenen, anggun kanye nirya el deice uk delinamlulume.
Minop talak, ikin ning weik ulamukba, pia imun kanye bobuka unyakakuk ulamik ninye ara, atalak noutam, dirin weik ulul ning akunum eipmake. Ikin ning ap, ninye dipna ap, weik ulamuk mutuku noutam ulamik ninye ara, wini talak ara, weik dirina ning akunum eipmake. Ara, beren tam talak keting panaplirye, dirina weik ulamle touk, aninye arye dirina atonun ning, weik mambul ning akunum elinmake.
Aninguk kum bukni, minop talak ara, anggun Moab mutuku nang arye, Israel mutuku ulamik nang ati, akutulamlume. Tonda, sik Israel nang arye, ubula kum dolamikce, ubula don nang ap, neika kum ulamik bukni, sik Moab mutuku nang arye, Israel nang ati, akutulamlumce, malye yupu nyana ap, yep-yep ana yupu ap, minin yupu ap, nyalamlume.
Allah arye, ayupu ton nyabuk. Se anggun Babel mutuku nango, anggunda bicoe. Deiyok ara, anggunda na mapu koproba, ‘Naʼ tenyamse nang, sik Israel yala nang nirya ara, angguncuk oplumce, alubuka doproplum ning ara, ikin ning weik, anggun nong deice delilalume. Winiplum talak ara, sapi basam mi arye, bikbik abuka merkabang dolirye, kanye deibuka, maning kapu dam binuka dilamle touk, winilamlume. Aning atonun, anggunda yim basam kuda arye, teleb kanye boplirye, orbinuka, ayanuka, talye bikbik abuka balamle touk, winilamlume.
Allah Yahweh arye, na Yeremia biti, “Ance na mapu Israel nang, sik dam nyalbinalam yupu ara, ani,” nyapnuke. Ara, “Anggun ton tenenipdelulume! Nong cebuka tukwak saklinye bira, ila tamubuka bululul do, kum do? Tonda, bisik balamnak talak arye, tamubuka yuk bisik bilyeba, bisik walwala ululnye bira, akunum biklirye, adiparyuk ila tamubuka, min banmalye teleb bisikuk yangalul do, kum do? Kume, dipkoprob min arye banmalye bisik telebuk banyake.
Aning nirya ara, talye ati kum nyapsine. Deiyok ara, na Allah Yahweh, aning-aning nirya deice tam erebuka, Pia Mikip Weik Deiyoknye ununye birye nyapsine. Minop talak babye, wini talak babye, anggun atam ululum nang arye, Israel noutam unyak nang nirya ati, ‘Sikda talye nang uka, dauplye,’ tenelulumce, yaniltakalulume. Anggunce, Israel tam nang ati, ikin ning, sik dam yalyopura, sik Amon tam ulamik nang nirya ara, ‘Merekleʼ tenen, kanye deipmunce, taruk bokuka, mot nyalulume.
Ara, anggun kwang dakna ati, winipnamsine. Anggun Edom mutuku nang arye, Israel yala nang talilamik ning nirya ati, ‘Kume nuncuk aning alubuka dopropbibirye, nuncuk aning talibibyakarye, kanye deibuka unamabe,’ tenelamlume. Aning nirya ara, na Allah arye, anggun Israel nang ap, Yehuda yala nang ati, bokuka arepsirye, ‘Aning ara, sikcuk pia talinamake. Amutuku ara, sik ning diamuk unamleʼ tenen, arepse. Bukni, anggun Edom mutuku nang arye, na mapu Israel nang, sik mutuku alubuka doproplumba, akunum tunim anauk ubukopura, anggunce kanye deiamlume. Ati, Israel nang ap, sik mutuku ap, pia tunim anauk uamuk touk, narye anggun Edom mutuku nang ati, wenebuka opsinyopura, anggun babye, anggun mutuku noutam babye, pia kum kipdeipsinyopura, asik oldemuk upnamle. Tunim abuka, oldemuk upnamlarya! Narye, kum kipdeipsiniba, tunim anauk upsilyopura, Seir mutuku noutam ap, Edom mutuku noutam ap, unyak nang nirya arye, ‘Se, dipkoprob Allah Yahweh ara, eluk Pia Mikip Weik Deiyoknye ululaʼ tenen, na siuk Yahweh biknamake.
Ati, na Allah Yahweh, aning-aning nirya talibuka deice tam, Pia Mikip Weik Deiyoknye birye, nyapnusin yupu kekeplulume. Ara, na weik arye, yu upniliba, sik Israel mutuku dana-dana unyak ninye nirya ap, tonda Edom mutuku unyak ninye nirya ap, anggun nirya ati, yu kanye bobuka nyapsine. Ara, anggun nirya wenebuka opnamsine. Derebuka opnamana deiyok ara, ani. Amutuku ninye nirya ap, Edom mutuku ninye ap arye, ‘Israel yala ninye talinyak mutuku nirya ara, maning teleb ubuka, palamle mutuku anya arye, nun kambing ap, nun domba ap arye, aning dinamaka ati, sik Israel ninye malye kibuka obibyopura, nuncuk amutuku nirya, dobuka talipnamabe’ tenen, kanye deiamikce, yupu sirikamika ani, Israel ninye taleamik mutuku, dalubuka dopromik.
Allah arye nyabuk. “Na tenepse talak akunum uplyopura, Daud el taruk deice arye taleamuk ninye ap, taleamuk ning ap, taleamuk mutuku ap ara, narye tuba tamubuka, teleb kipdeipnamne. Winipmanto ara, Daud el domuk aik, abilinga nirya pun dayukce, daksakuk ning ara, tuba tamubuka punupnirye, dukdongopnirye, dobukapnirye, teleb kipdeipnamne. Wini talak ara, amutuku noutam aik ap, keil poka ap, aning nirya domik ning ara, yuk mutuku nang arye yanuka, ulubuka bataknamake. Winipnamak bukni, aminyan talak ara, na Allah arye, cang keil poka domik ning ap, sik aik ap, aning-aning nirya, pia teleb uamuk touk, tonap tuba tamubuka, teleb kipdeipnamne. Winipniba, minop talak, pia teleb uamuk touk unamle.
Anggun kayapu nang, sik Yehuda tam ulamik nang, ikin ning sik deice yayukba, dorobik talak ara, anggun Edom tam ululum nang arye, ‘Nun kanye ara, pia deibabe. Ikin doprobik ning ara, pia kum tenenamabe,’ tenyamlumce, anggunce nalibuka akutulamlume. Tonda, anggun kayapu nang, Yehuda nang, ikin ning dorobik talak ara, anggunce, ‘Merekuka ikin ning dopropmakeʼ tenen, kanye ara, pia kum deipnamtum bukni, anggunce kanye deiamlume. Tonda, anggun kayapu nang, sik Yehuda yala nang, ikin ning dobukabikce, kanye imun ubukaura, sik Edom mutuku nang arye, ‘Nun dam ara, ikin ning ton kum usilyeba, dolonyabe. Sikuk ikin ning nirya ara, yalyeba dolonyakʼ tenen, kanye erebuka, maknya kum kwalilamtum bukni, aning wilinlamlume.
Se, anggun Yerusalem mutuku ululum ninye, malye-malye weik winilamluma deice arye, mi bomice kilapu arye, ikin kanye bobuka, ngalukuka ulamak atonun, anggun babye akunum winilulume. Talye ati, engebuka kum ngalukululume. Wini talak ara, anggun umunye mutuku arye batakuka, pata mutuku binuka, tia talak ati, unamlume. Unmamunya ani, Babel mutuku ninye arye anggunti, malye kipsikirye, anggun nirya tapu koubuka, adiparyuk Babel mutuku bobinamsiyake. Bobinuka dadeiamsikiba, daulamunye bukni, aminyan talak ara, na anggun ni koproba, Allah Yahweh arye, apera mutuku dabinuka ulamunye buk, anoutamak narye lyebuka dopropnamsine. Ara, anggun mal olan ninye noutam arye, lobuka bataksinirye, lyepropnamsina ati, nyapsine.
Minop talak ara, nun mal olan nang anggun taleamsikce, nyalamsike. “Anggun ni Allah ara, dan sukum ulul do? Allah arye melibuka kum lyepdopnamsil do?” nyabuka asilamsikce, nalilamsike. Bukni aminyan talak, Allah Yahweh arye nunti lyepsilirye, nunti teleb kipdeipnamle ning ara, sik eibikirye, alye dakdanamake. Tonda aminyan talak, Allah arye nun mal olan nang ati, yaniplirye, aninye obuka kum kipdeipnamle. Winiplyopura, winipmanto ara, ninye bisik balamicak, bental yanibuka balamak touk, Allah arye nun mal olan ninye nirya ati, yaniplirye, obuka sirya daknamlarya. Nun nirya aning eibibirye, biknamabe. Nabi Mika birye, Israel ninye nirya ati, aminyan winipnamuk ning tenebukce nyabuk.
Atalak ara, ‘Yuk mutuku nang arye, na mapu Yerusalem mutuku unyak nang obikcakʼ tenen, narye Yerusalem mutuku unyak nang ati, melibuka kalikinamne. Tonda, sik nirya ati, na mikip arepnyeura, sik amutuku noutam arye mitang kibuka unyak nang nirya babye, melinya deice arye, mikip weik nang unamake. Ara, minop talak Raja Daud el mikip weik ulamuk touk unamake. Atalak ara, sik Yehuda tam unyak nang nirya ati, Daud elce deibukba, deipdanin yangalamik nang kan-kan noutam, el tam nang arye, ninye deiyok kibuka, anang nirya pia teleb kibuka talipnamake. Winipmanto ara, na Yahweh arye, na im deice pil don nang malaikat dopkwtepnyeba, amalaikat arye, anang melibuka kaliklamak touk, Daud tam nang arye, pia teleb kibuka anang talipnamake. Tonda, winipmanto, naryuk anang sik Raja uptinirye, anang pia teleb kibuka taliptinye touk, Daud tam nang arye, pia teleb kibuka, anang talinamake.
Bukni, anggunce nati, ‘Allah elda weik mambule,’ tenebuka, na si erenululumce, na nyapdeiamse yupu uk, moubuka talipmunce, ululum ninye nirya ati, na mikip ara, anggun deice deipsiniba, keting delilamle touk upsilyopura, teleb kipdeipsinirye, lyepnamsine. Winipsinya deice arye, anggun ikin usilye ning nirya, kum daneipnamsine. Winipmanto ara, sapi basam mi poka pum tam dongamica ani, apoka pum bisik arye kubuka, bai tam bilirye, weik kanye delilamle touk upmunce, kanye delinamlume.
Anggun kanye talima kunuknak atonun ulamak bukni, wini talak ara, weik dirina atonun ning akunum eipmake. Sik aunyak nang, talima kanye dipna atonun unyamukba, kunuknak atonun ulamak bukni, wini talak ara, weik dirina atonun ning eipmaka ati, bereklirye, keting deililamle touk unamake,’ Yesaya arye, domon yupu nyabuk. (Yesaya 9:1-2)
Dipkoprop nyapsine. Sik diba tenena kum, talye unyak ninye mutuku-mutuku nirya kanye deibuka pin-pin arye unamak talak noutamak arye, anggun na mapu ara mambul kanye bobuka engenamlume. Anggunda, imun kanye bobuka engenamlum bukni, aminyan ara anggun engenamlum ning ara, kum daliba, kanye deibuka pin-pin asauk unamlume.
Aminyan talak ara, Yesus arye amutuku ninye ati nyabuk. “Nara, tukwak mutuku im sirya, mutuku sirya unyak ninye ati, dirina deiyoknye unune. Na nyasinye yupu kekeplirye, talibuka dobolbalinye bira, kunuknak pia kum unamle. Aning kum bukni, kam una deiyok dirina ara, el talima ak unamle.” Yesus arye nyabuk.
Narye aning ati dopkwetepnamkin deiyok ara, ‘Sik asing laipnalama’ tenen, dopdeipnamkine. Tonda, ‘Sik kanye talima yuk punubiceura, sik kanye talima kuna atonun unyaka ati, dirinak tamubuka dobuka, delilyanganalam’ tenen, dopkwetepnamkine. Tonda, Isa Mutuku Dongonye, el mikip arye talibukak arye tamubuka, ‘Allah el mikip arye talipnamle ati dobuka, delilyanganalama’ tenen, dopkwetepnamkine. Ara, yata deiyok ati kume. Ance anang ati aning nirya akunum winipminyeura, nati diba tenebikca deice arye, sik talima ak malye tenenyak ning ap, sik malye unyak ning ap, Allah arye meliplirye, aning kum kipdeipnamle. Tonda, na Yesus ati diba tenepnika deice arye, Allah arye akunum wipdeiamuk ninye ap, ansinibuka unamake. Allah arye aning ati winipnamle. Yesus arye na Paulus ati nyapnuke, Paulus arye nyabuk.
Allah arye, “Kuna noutamak arye, dirina unamle,” nyabuk. Ayupu nyabuknye Allah, elcuk nunti pia mambul ning arepsuke. Ara, nun kanye talima noutamak, el dirina ning arepsuka deice arye, Allah el pia teleb ulul ning ap, pia teleb winilul ning ap ara, bikinyabe. Allah el pia teleb ulula ara, Yesus Kristus el winilamuk ning kel kibibya deice arye, laka usilibuk, bikinyabe.
Aning atonun, keting dirin ap, wala dirin ap, ‘Adirina lapsutuba eiptibye’ tenen, patalyeba, pia kum tenenyake. Allah el bidamang dirina ara, pia weik ulula ati ara, im deice unamak ninye ara, yuk dirin ning ton kum patalule. Tonda, Domba Mi Atonye birye, el bidamang dirin weik ululba, anyasik noutamak weik dirin atonun unamla ati ara, keting ap, wala ap ara, winiryuk im deice mutuku kum ulule.
Dotalak yanamle keting tamun nirya noutamak ara, lukunyan malamap atonun kum upnamle. Pia berekeltaknauk upnamle. Tonda, Yerusalem Winiryuk mutuku (Yerusalem Baru nyalamiknye) noutamak unamak ninye ara, weisa dirin ap, keting dirin ap ati, pia kum patanamle. Nun Weik Deiyoknye Allah arye, el dirin deice aryuk, dilamikirye banamake. Dotalak yanamle keting tamun nirya noutamak ara, Allah arye talilulba, amutuku noutamak unamak ninye nirya ara, el ap aning-aning nirya talibuka, deiyok ninye pia unamake.
ကြော်ငြာတွေ