Mika 7:17 - Eipomek17 Sik aninye nirya ara, Allah arye donamle pil eibikirye, ‘Se, elda weik mambulnye ulul bukni, nun nirya ara, pia malye ninye uk unyabe. Nunda mambul pia kume,’ tenebikirye, ilil weik upliba, alye dakdanamake. Winipmanto ara, kwatima talye tuku deice balamlarye, mundip lilibuka balamle ning, pia amu tam ulamle touk kibuka, mambul kanye bobuka unamake. Atonun ubikirye banmakibuk, Allah Yahweh elce mambul weik pil dolul ning eibikirye, lukdanuka ilil weik unamle. Winibikirye, ‘Allah arye yata wiripnamsil do?’ tenen, el dam kekelyanganamake. Allah ati ilil weik unamle. Nabi Mika birye nyabuk. အခန်းကိုကြည့်ပါ။ |
Mika 7:17
27 ပူးပေါင်းရင်းမြစ်များ
Allah Yahweh arye Yehuda mutuku noutam nirya ara, mikip weik kibukce, sik dana-dana tam yuk mutuku nang ati, ilil deiyok ning weik arebukba, atam nang nirya ap, sik ninye deiyok nang nirya arye, Yehuda tam nang ati ilil weik ubuk. Ilil weik ubuka ati, sik yuk mutuku dana-dana tam ulamik nang ap, sik deiyok nang Raja-Raja arye, Yudea tam ninye deiyoknye Yosafat biti, ilil ubuka ati, sikce Yudea mutuku noutam ninye ati mal pi yangana ara, batakamik. Batakamikce teleb aryuk, talima lamabuka ulamik.
Anang ara, narye, “Winipnamlume,” nyabuka, nyalamse yupu kekelamikce, adiparyuk na yupu nyalamse touk, na amu tam piluk dopra ulamik. Yuk mutuku nang, ninye asik nang arye, na dam yanuka, ‘Derepnamsil do? Wenepnamsil do? Yata yupu nyapnamsil do?’ tenen, nati ilil weik ubukba, sik nong nirya sirim talinauk ulamuk.
Tonda, mek mitik tonun ulul mutuku, pata mutuku noutamak, daunyak ninye ayala-ayala nirya ara, tonokakuk kum unyakce, amutuku unmana batakuka, omutuku unmana kinyakce, banauk unyake. Awininyak ninye ara, nun ninye deiyoknye Raja dam yakirye, el si erena ati, yanuka gutam tuku dipdongobuka, kanupdongobuka, si erenamake. Aning atonun, el mal olan nang babye, el dam yakirye, el si erena ati, yanuka gutam tuku dipdongobuka, kanulongonamake. Aning atonun, aninye nirya arye yanuka, el si erebuka, el yan amu tamuk unamake.
Ati ara, nun ni Allah Yahweh anti moropkiabe. Ara, ‘Talye tukwak mutuku, im sirya, mutuku sirya nirya unyak nang arye, ‘Winipnamabe,’ tenenyak ning arye, ‘Yuk ning nirya ara, bisiplyak’ tenen, an Yahweh arye, anang wenepmince, sikti, yupu sekenalame. Tonda, yala yuk-yuk nang nirya ara, mutuku sirya, im sirya nirya, yuk-yuk daunyak nang ara, an dam yakcopura, an Allah aryuk sikti, yupu lipsisikuka bokeipmince, wenepnalame.
Winipmunya ati ara, mikip weik nang, yuk-yuk mutuku daunyak nang nirya ara, Allah anti si erepkikirye, “Se, elda mambul weiknye ulule,’ nyabuka, si erenamkiyake. Tonda yu weik ap, malye kina ap unyak nang ara, sik mal olan nang, talye kanye bobuka olbanyak bukni, an tonok ati ara, weik tonun ilil upmalibuk, unamake.
Yuk mutuku ninye arye, sik mapu ap, sik kilmapu ap dobuka delilyanganamak talak ara, yuk pera mutuku, sik ninye deiyok kibuka taleamik Raja nang arye, Israel yala ninye sik mapu ati, melibuka kalikinamake. Tonda, aRaja nang sik kilapu, weik deiyok kilapu kibuka ulamik bukni, wini talak ara akilapu arye, Israel yala ninye sik mapu ati, melibuka kalikinamake. Sik yuk mutuku Raja nang ap, sik kilapu ap, sik Israel yala ninye sik amutuku tam uk unamake. Winipsikirye anggun, Israel ninye si erena ati, anggun dam yakirye kanupdongobuka si erenamsiake. Sik yuk mutuku weik deiyok ninye, mambul nang ulamik bukni, wini talak ara, talye ninye uk unamake. Anggun Israel ninye dam yakirye, anggun si erena ati, kisok kanupdongobuka tuku deice mabikiba, anggun yan deice upmalye tuku butbuta sik sitang deice palinamle. Sik ninye deiyok nang arye anggun Israel ninye ati, anggun amu tam ubikirye, si erenamsiake. Aning winipsikca deice arye, anggun Israel ninye ara kel biknamnulume. Ara, na si Allah Yahweh nati kel biknumunce, ‘Se, dipkoprob Allah el dem arye apil dopmasile,’ tenenamnulume. Tonda, ‘Allah elcuk melinamsile,’ tenen, natibuk moropnikirye, na si ereninyak ninye ara, malye kanye kum bonamake. Narye aninye ati, dipkoprob melipnamna anya arye, alye kum dakdanamake.
Tukwak nang mutuku sirya, im sirya nirya ara, Allah arye sik malye winilamik ning ati, wenebuka opnamle. Akunum winiplyopura, keting kumulban tam unyak nang arye, aning eibuka, kel bikikcopura, Allah Yahweh el mikip weik nyalul si ap, el ap ati ara, ilil weik unamake. Aning atonun, sik keting panalyangan tam unyak nang nirya ara, Allah Yahweh, el pia teleb ulye ning ap, el weik dirina ap ulya ara, eibikirye, ilil weik unamake. Allah Yahweh, el bikbik abuka yanamla ara, winipmanto, weik balamle mek deice, weik kum mikip yalirye, yanuka lontik abliba, mek silong bukuka welelamle touk ubuka, mikip arye bikbik abuka yanamle. Aning nirya ati ara, tukwak nang mutuku sirya im sirya nirya ara, elti, ilil weik unamake.
Minop talak ara, anggun obuka sirya daksikce, anggun nong deice ikin ning delilamsik nang, sikce deibikba dadeipdanin yanganamak mapu nirya ara, anggun dam yakirye, anggun tibuk si erena ati, kisok kanupdongobuka kinamsiyake. Tonda anggunti malya nyabuka yep-yep alamsik nang nirya ara, anggun damuk yanuka kekebuka weknamake. Winipsikirye anggun mutuku Yerusalem mutuku ati nyanamake. “Se, amutuku ara dipkoprob Allah Yahweh elce wipdeiamuk mutuku, el ‘Naʼ tenen, mutuku ulule,” nyabuka nyanamkiyake. Tonda, “Se, Sion mutuku ara, malye ning tonok ning kum ulirye, Pia Lyena Deiyoknye Allah ara, Israel ninye kalikuka melilulnye, el amutuku ati kanye delilule,” nyabuka, Yerusalem mutuku ati nyanamake.
Winipmanto ara, ninye arye yo uku dongobikiba, uku diplirye sirya dakuka dilamle touk, winipnamle. Tonda, uku dinmalya deice arye, mek buppu opliba yaruk-yaruk alamle atonun, Allah an yanamlam talak ara, atonun winipliba, anti yu tenekinyak nang, ninye mutuku-mutuku nirya eipkikirye, ilil weik upliba, sik nong nirya ara sirim talipnamle. An yanamlam talak ara, anti, ‘Allah ara nun like,’ tenekinyak ninye nirya, ila tamubuka mikip weik ning ap, weik mambul si ap ukilye ning ara, moubuka kel biknamake.
Yerusalem mutuku winiryuk ning kwepdeipnye talak ara, domba mi ap, weik kuse atonun yu ning el si singa kus ap, sik neika maning bok dinamdake. Tonda sapi basam maning bok dilamle touk, pia yu weik kuse el si singa kus babye, yuk kam ning obuka kum dinamle bukni, el babye maning wa bun mutmuta dinamle. Ton ning ara, ninye opliba, kulanyak kwatima nirya ara, tukwak mutuku aubuk kel-kel an tuku uk dinamake. Abal nirya ati, mikip ara mitang kipniba, yu kum unamake. Ara, na Allah Yahweh mikip weiknye unamne mutuku deice nirya ara, na dam arye yu ulamle ning ayala-yala nirya ap, ninye ati malye ulul ning nirya ara, mitanguk kipdeipnamne. Pia malye ning ton, tonok babye, kum unamla anya arye, pia teleb ninguk unamle,” Allah arye nyabuk.
Ayu nang dopdeipniba, anggun umunye mutuku noutam, akunum yakirye, yupa weik bulubuka weknamaka ara, winipmanto ara, arulongonak ap, keil pum bisik ap, kot dam ap, mutmuta pabuka tililamleak ap, mekwen delilulak nirya ap, deibum weik amulamle touk, anang ara weik tonun, anggun mutuku yakiba, langdipnamle.
Bukni, wini talak ara, na Allah arye winipmanto ning nyapsine. Ikan tomon nang arye, ikan weik tomolamak touk, ninye yukupniba, yakirye, amutuku nang yanuka tomopnamake. Tonda, narye bai kam ulamle ning, olban nang arye, aning dobonmakirye, olamak touk, ninye nyapniba, amutuku deice unyak nang ap, amutuku kon deice unyak nang ap, keil deiya dungnubuka unyak nang nirya ara, yanuka epra binamake. Eibikcopura, yakuka opnamake.
Teleb kipdeipsinyopura, amutuku weik asik dolamlum ning, Yerusalem mutuku ati, narye ‘Pia telebe,’ tenepnirye kanye deipnamsine. Winipnyopura, amutuku ap, amutuku unamlum nang ara, sik yuk-yuk mutuku im sirya, mutuku sirya nirya unamak nang arye eibikirye, ‘Seʼ tenen, ilil upliba, sik nong sirim talipnamake. Tonda, na Allah ati, sikce si erenamniake. Deiyok ara, aminyan talak, sik Yerusalem mutuku unamak nang ati, narye teleb kipdeipnirye, sik amutuku noutam unamak nang ati, tuba tamubuka, pia teleb kipdeipnyopura, sikce talibuka wininamak ning ara, pia telebuk unamle.
Ura, nun talima amu tam kibuka unyapce, ikin weik unyap talak ara, winipmanto, nun tuku deice mabibirye, si bam bol ara, butbuta deiceuk deiptibirye, ‘Kume, aminyan talak ara, Allah aryuk yanuka, melibuka lyepdopnamsile,’ tenenauk unamabe. Ara, nunce, ‘Aning nirya ara, Allah aryuk winiptu ati, elcuk melinamsile,’ tenebuka, tenenauk unamabe.
Ati ara, Zaitun mutuku nirya adiparyuk toplirye, keting panalyangan tam arye, otam keting kumulban tam lipdopnamle. Liplyeura, amutuku noutam ara, weik lu ara, lak kipnamla ati, anggunce adiparyuk alu mutuku noutam bikbik abuka binamlume. Bikbik abuka binamlumak ara, Asal mutuku dam binamlume. Ura, minop talak, ninye deiyoknye Raja Usia birye Yehuda mutuku talibuka ulamuk talak, sik mutuku noutam ara, weik mutuku lulukna lulukukba, anggun apu yapu nang arye minopce, bibik abuka binamik touk, Zaitun mutuku topnamle talak ara, anggun amutuku unamlum nang babye, atonun bibik abuka binamlume. Ati ara, na Zakaria birye si erenun Allah, na ni koproba Allah Yahweh ap, el im deice pil don nang, sik pia teleb lek malaikat nirya ap, sik neika yanamake.
Winilamunya ani, narye arepneba, wa win dam kipmanto ning kum kiplyopura, sik din pataplya deice arye, sik nong mitang upliba, uk diplya deice arye dibinamake. Tonda, narye arepneba, weik kanye imun uk talilamlye buk, narye batakniba, dibinamake. Tonda, narye arepneba, yuk-yuk ning, bai mutuku unyak ning arye, anang obuka dipnamake. Tonda na arepneba, kel-kel an tuku deice balamle yu kwatima arye, si topliba, ninye weika arye dibinamake.
Nyabukura, anang arye tamubuka nyabik. “Nun awinibupu ning deiyok ara, ani. Nun kekelamupuba, nun ni koproba, an si erelyam Allah, el si Yahweh, elce el pil donanye, Musa biti nyapdeiamuk ning ara, ani. ‘Amutuku noutam nirya ara, anggun Israel nang ati arepnamsine. Winipsiniba, wekelbimunyopura, sik amutuku minop talak akunum aunyak ninye ara, obuka sirya dakmunce, alubuka dopropnamlume,’ nyapdeiamuk. Ati, ayupu kekebupurye, ‘Se, winibikirye, nun ton obuka kum kipdeipsikcakʼ tenen, nun ikin kanye bobuka, ilil upsukba, nunce tilila yupu nyapsupe. Dipkoprob aning deiyok ati, nunce winibupe.
Sik yuk nang arye, “Nunda, dipkoprop Yahudi yala ninye, Allah el mapu kopropa unyabe,” nyabuka, talye nyaltakalamak bukni, dipkoprop ara, anang ara, Isa Mutuku Dongonye arye talilulba, el siuk erenyake. Aninye ara, tilila yupu nyana ninyeuk unyaka anya arye, na mikip deice nyapniba, amalye nang arye, sik yan dam gutam tuku dipdongobuka bunamake. Winibicopura, anggun Piladelpia mutuku diba tenelulum ninye ati, “Kume, anggun Piladelpia nang ati ara, dipkoprop Allah weik arye bico tenebuka melisulule,” nyabuka lakak nyapnamake.
Ati ara, atalak Yonatan ap, akamnye el yin talibuka, melipmoknye ap, otam adiparyuk Pilistin nang, sik asik domikce, kaliklamika dam binuka, lake tikilbirik. Winipdikura, sik Pilistin nang, anang bitinye eibikce nyapdayik, “Anggun nirya, moubuka dipdelulume. Wini talak, sik Ibrani yala nang bitinye ara, mutuku dam duknulyanmaraka ani, kutukukapdakce, laka yanganmarake,” nyabuka nalibik.
ကြော်ငြာတွေ