Tonda, nun moubuka tenepnamnyabe. Allah el si Yahweh ululnye bira, Allah tonok ulule. Allah elcuk, nun tukwak mutuku ninye nirya kweipdeipsuk. Kwepdeipsukce, nun nirya ara, Allah el ninguk unyaba ati, elcuk moubuka talisulule. Domba deiyok nang arye, sik domba basam bobuka, mutmuta palamle mutuku, telebak deibikirye, kalikuka dilamak touk, Allah Yahweh arye, nunti, bico tenepsilirye, melibuka kalikisulule.
Mika 7:14 - Eipomek14 Nabi Mika birye, Allah ati morobuk. Se, na ni Allah Yahweh, ance an mapu koproba, Israel ninye nirya ati, wibuka deiamlumce, an mapu atonun ulamupu. Ati, ance sikti, bico tenebuka, pia moubuka kalikinamlame. Winipmanto ara, domba basam weina deiyok nang arye, sik domba basam pia teleb kibuka kaliklamak touk, ance nunti, kalikuka melinamsilame. Ara, ‘Nun Israel ninye ara, pia bai mutuku noutam atonun unyap bukni, ance lyepsimince, pia telebak deipnamsilam’ tenen, moropkine. ‘Lyepsimince, nun unamap sukum ara, pia sukulamle tuku ubuk mutuku binuka, talibuka uptibye’ tenen, moropkine. Tonda minop talak, Allah ance pia teleb mutuku, Gilead mutuku ap, Basan mutuku ap, nun Israel ninye nun apu yapu ati areamlumba, ulamik mutuku atonun, pia telebak arepsiminyeba, ‘Pia teleb mutuku noutamak unamap’ tenen, moropkine. ‘Pia teleb mutuku arepsiminyeba, nun din ning ara, weika arye dobuka dinamap’ tenen, moropkine. အခန်းကိုကြည့်ပါ။ |
Mika 7:14
35 ပူးပေါင်းရင်းမြစ်များ
Ati ara, na ni koproba Allah, anti moropkine. Ance, ‘Na tenen nang unamak’ tenen, ‘Wipdeiamsulum Israel nang nirya ati, lyepdopnamsilam’ tenen, moropkine. Tonda, nun Israel nang ara, ance minop talak akunum wiamsuluma ati, an tenen nanguk, pia unamaba ati, ‘Pia teleb kilinamsilamʼ tenen, moropkine. Winipmanto ara, sik domba basam weina deiyok nang arye, sik domba basam pia teleb kubuka weilamikirye, mitang ulamle basam tomobuka, bobalamak touk, ‘Ance nun Israel nang ati, melibuka bobinamsilamʼ tenen, moropkine na nio.
Deiyok ara, talye ati kume. Nun ni koprop Allah elda, nun deiyoknye ulule. Nunda, el amu tamuk ulamepebuk, elce nunti, moubuka kalikisulule. Winipmanto ara, domba basam weina deiyok nang arye, sik domba basam moubuka kalikinmakirye, sik din ning ati, mutmuta maning telebak deibikirye, teleb ubuka weilamak touk, nun ni Allah arye, nun Israel yala ninye nirya ati, ‘Na tenena ninye’ tenen, melibuka kalikisulule.
“An ap, nun ap, neika kum bibyopura, yata wiribipya deice arye, yuk ninye eipsikirye, ‘E Musa ap, sik Israel ninye ap ara, Allah el kanye sik deice delilule’ tenen, kel kipsiting do? Aning atonun, na ap Israel nang ap, an ap, neika kum bibyopura, yata wiribuka yuk ninye nirya arye, ‘E sik Israel ninye ara, dipkoprob Allah el ‘Naʼ tenen, nang unyake’ tenen, kel kipsiting do? Sikce nun nirya ati, ‘Kume, anang babye talye ninye dem uka. Sikda, tukwak unyak ninye, yuk yala ninye nirya atonun unyake. Sikda ninye unyak noutamak arye, weik mambul ninye dipkoprob kum unyake. Sikda talye ninye uka,’ tenepnamsiyake.” Musa birye nyabuk.
Se narye dopnamkin kilo! Anda dipkoprob urasin pia teleb kil ulyame! Narye anti weik tonun, bico tenekununa ati, narye anti kanye deilikunune. Winipmanto ara, yalma maka el asing ara, pia teleb ulamle touk, an asing babye, pia telebuk ukulule. Anda, ‘Talye nang arye eipnikcakʼ tenen, an urasin ap, kisok ap ara, teleb baju arye lelipdongopmince, balyam bukni, an asing lak tuba ulula ati, an pia teleb asing eipnyopura, kanye delikunune. Tonda, an cang kisok potong ara, miriplirye, pia teleb ulula ati, ance banminye talak ara, an kisok potong ara welepmana, koulukmana kilalule. Winipmanto ara, kambing basam yupa arye, weik mutuku kon el si Gilead mutuku deice tam arye, koulukuka yanukce talak ara, kanye deibuka, im kuruknin yangalamak touk, ance banminye talak ara, an kisok potong ara, welepmana, koulukmana kikulule. Aning babye, pia teleb tenepne.
Atalak ara, weik lelim nyalamle ning, el si terompet, lelim weik tonun pong-pong nyaplirye, yukupliba, sik Israel nang, minop talak Asyur mutuku noutam bobinamikba, daulamika ani, sik bisik wangamuk nang ap, tonda Israel mutuku noutam, Allah arye sik apu yapu malye ulamik ning ati, inibuka donokamukba, bindomikce, Mesir mutuku noutam binuka ulamik nang ap, sik anang nirya ara, terompet lelim kekepnamake. Kekebikirye, adiparyuk tuba tonap tamubuka, Yerusalem mutuku weik asikuk yakirye, pia teleb lek aikuk, Yerusalem mutuku deice tamubuka yakirye, sik ni koproba Allah Yahweh, el siuk yanuka erenamake.
Amutuku noutamak nirya, keta on ning weika arye onamle. Winiplyopura, amutuku unamak ninye ara, kanye deibuka mot senamake. Amutuku nirya ara, Allah arye tuba tamubuka teleb kipdeipliba, Libanon mutuku pia teleb ulamuk touk, urasin pia teleb mutuku upnamle. Amutuku pia teleb upliba, Karmel mutuku ap, Saron mutuku ap, pia teleb ulamle touk unamle. Winiplyopura, ninye nirya arye Allah el dirina eibikirye, el mikip weik ulul ning eibuka kel biknamake. ‘Nun ni Allah ara, Dirina Deiyoknye, si Weik Erenanye ulule,’ nyanamake.
Ance ninye dopdeiamlumba, mok yupu nyalyanmika deice arye, na Allah Yahweh, aning nirya talenirye, mikip weiknye ulunua bukni, nati nalibuka akutunmanik. Ance nyapdeiamlume. Ance, “Nara ninye bukuka olban ning ati, el si kereta perang ara, yupa weik tonun deipsirye, weik mutuku dup welepsirye, iknapye tam Libanon mutuku noutam babye, weik mutuku deice tam welepse. Libanon mutuku noutam nirya ara, na patan ning talye alubuka dopropse!” nyaplume. Ara, ayupu deice an kanye erepdalumce, maknya kintinimince,” Urasin pia teleb kat wa mutmuta yo, pia teleb cang arye tiklamuk ning nirya ara, webuka sirya dakamse. Tonda, pia teleb wa mutmuta cang yo palpal tikamuk weik mutuku dup, ninye kum binmanto mutuku babye, narye amutuku welepsirye ayo webuka sirya dakamse,” nyaplume.
Tonda ninye tonok basam weina deiyoknye birye, el domba basam nirya bulubuka tonokak delilamle touk, Allah el mapu sirika nirya ara bulubuka telebak deipnamsile. Tonda, domba weina deiyoknye birye, domba basam mapu bico tenen, iribuka bobalamle touk, Allah arye el mapu koproba dobuka iribuka bobinamsile. Tonda domba basam mapu nirya sik nin birye, ‘Na mapu na dam nimalyap asa yanamal’ tenen, ‘Yalulume,’ nyapnin balibuk, sik nin yupu kekebuka balamak touk, Allah arye el mapu koproba ati atonun wininamle.
Sik aninye ara, din ap, mek ap, ton kum patapnamle. Tonda, mek kumak, pia pata mutuku unamak bukni, sik nong deice keting kum dinamle. Ara, narye sikti, bico tenebuka lyepromsinye, na Allah arye sikti, pia tuba kalikuka melinamne. Pata mutuku noutam unamak bukni, narye sik aninye bobukapnirye mek pu dam delilbanamne.
“Bukni, narye Raja Nebukadnesar biti nyapne. Kume, anda, ‘Aminyan talakʼ tenena kume. Adiparyuk, sik Hasor mutuku unyak nang ati, minop olbinulyame! Sik Hasor mutuku nang ara, sik namin asa arye, talye kanye deibuka unyake. Tonda, sikce domik weik asik ara, keil poka ton kum domika ati, caknam aryuk, sik mutuku wekmince, opnamtume. Tonda, sik melipmanto nang ara, dam kum unyake. Sik Hasor mutuku ara, yukakuk ulule. Tonda, sik mutuku wekna ati, bisik bublan kat ning, besi arye deibuka, kum domikce, pia kum lelibika ati, caknam aryuk olbitume.
Atalak ikin ning akunum arepliba, sik malye kanye bobicopura, Yerusalem minop dorapce ulamikce, tenelamik ninguk tenenyake. Utenenyakce, sik aninye ara, ‘Bona pia weik taleptibye,’ tenenyake. Ati ara, amutuku unyak ninye nirya, sik mal olan nang, taruk deiceuk dobuka, binamake. Winibikiba, ninye tonoknye birye, ton bico nyabuka, kum lyepdeipnamle. Sik mal olan nang nirya arye, sik sakuka opmaliba dinmakirye, akutunauk unamake.
Amutuku-amutuku nirya ap, amutuku kon ap, noutamak nirya ara, ninye weik yanuka unamake. Tonda, sikce weinamak kam un ning, ayala-ayala nirya ara, narye tonap tabakuka arepneba, pia weik upra banamle. Winipniba, ninye ap, sikce weinamak ning ap, pia weik upra banamake. Minop talak, mitik teleb ulamlum bukni, aminyan talak ara, aning atonun bukni, weik tonap pia teleb upra banamlume. Ara, ninye arye, mapu deibikiba, weik upra banamake. Aning atonun, sikce weinamak ning babye, pia tabakuka arepre baniba, weik upra banamake. Aning nirya akunum winipnyopura, ninye yuk nang nirya arye, kel kibikirye, ‘Se, sik ni koproba Allah, el si Yahweh ara, dipkopropnye ulule’ tenen, kel biknamniyake.
Ura, yuk ning ton nyapnusine. Anggunce talibuka weilamlum kam ning nirya ara, sapi basam do, domba basam do, kambing basam do, keledai basam do, ura, ayam maka do, aning nirya nukunmamunya ani, danoutam arye, toupne barye (9) nukmunce, aning ara anggun ninguk upnamle bukni, takubarye (10) ning ara, ‘Aning ara, Allah Yahweh el ‘Naʼ tenen ningʼ tenena ati, Allah ati arepnamlume. Ara, abasam nirya ara, basam weina deiyok nang nukikirye, sik kama talibikirye dam banmalye ning ara, sembilan (9) talye dabanmalye ning bukni, nukunmaca ani, sepuluh kiplye ning (10) ara, ‘Allah Yahweh el ‘Naʼ tenen ning, el ninguk ulule,’ tenena ati, aning dobuka, Allah ati arenamnyake. Aning ara, mingne teleb lek ning atonun upnamle.
Allah arye nyabuk. “Na tenepse talak akunum uplyopura, Daud el taruk deice arye taleamuk ninye ap, taleamuk ning ap, taleamuk mutuku ap ara, narye tuba tamubuka, teleb kipdeipnamne. Winipmanto ara, Daud el domuk aik, abilinga nirya pun dayukce, daksakuk ning ara, tuba tamubuka punupnirye, dukdongopnirye, dobukapnirye, teleb kipdeipnamne. Wini talak ara, amutuku noutam aik ap, keil poka ap, aning nirya domik ning ara, yuk mutuku nang arye yanuka, ulubuka bataknamake. Winipnamak bukni, aminyan talak ara, na Allah arye, cang keil poka domik ning ap, sik aik ap, aning-aning nirya, pia teleb uamuk touk, tonap tuba tamubuka, teleb kipdeipnamne. Winipniba, minop talak, pia teleb uamuk touk unamle.
Aning nirya akunum winiplyeura, atalak ara, Yehuda mutuku noutam unyak nang bukni, iknapye dam tam, (arah selatan tam) unyak nang arye, Edom mutuku dobuka unamake. Tonda, keting kumulban tam mutuku, weik Laut Tengah kup-kup mutuku taleamik nang ara, Pilistin nang ulamik bukni, Israel yala nang arye, sik Pilistin nang ati, obuka sirya dakiceura, amutuku tuku talinamake. Winibikceura, na mapu koproba, sik Israel nanguk, iknapye mutuku nirya ara, doprobikirye, sik kipdopnamake. Ara, Efraim mutuku nirya bukni, dipdongobuka, weik asik Samaria mutuku nirya babye, amutuku tuku nirya ara, sikuk doprobikirye, sik kipdobikceura, amutuku talibuka unamake. Winipnamak talak ara, sik Benyamin yala nang ara, Gilead mutuku talibuka unamake.
Tonda, Asyur mutuku ninye arye, ‘Israel ninye malye kibibirye, opnamabe’ tenen, nun mutuku noutam yanuka weksetingce, nun mutuku tuku yanuka yanipsitingopura, Israel ninye nirya mikip kibikirye, sik tekbarye kalikna deiyok nang ton, wibuka tekeipnamake. Sikda, gembala atonun nang kibuka, Israel yala nang melinamake. Aning atonun, anggunti, ‘Teleb bisik ara ani, teleb winin ning wininamlum ning ara ani,’ nyabuka peterenamsiaka ati, weik deiyok nang pinbarye arye, ton wibuka deipnamake. Winibicopura, apinbarye deiyok nang arye, Israel ninye talibikirye, kalikinamake.
Tukwak mutuku sirya, im sirya nirya noutam, malye un ninguk talibuka, wininyak nang ati, yu weik arye wenebuka opnirye, sirya daknamne. Bukni, anggun tuba kam unamlum Israel nang ara, mitik tonun tuba aunmace nang ara, tonap tamubuka, malye un ning, kum wininamlume. Yata nang do, sik aninye arye, tonap tilila yupu nyana kumce, malye kum kilinamake. Tonda, sikce talye yupu nyana ap, tenepce nyan yupu ap, kwinisa don yupu ap ara, sikce pia kum nyanamake. Sik teleb unamak Israel nang ara, yuk nang ap kanye deibuka, neika teleb aryuk, tunim abuka unamake. Wini talak arye dipdongobuka, doyanamle talak nirya ara, sikda yuk nang ati ton, ilil pia kum unamle.
Sikda Mesir mutuku ap, Asyur mutuku ap, noutam arye dobukapnirye, tamubuka sik mutuku koproba boyanamne. Tonda, anang uk bukni, ton ninye bokukapnirye, sik unamakak ati, Gilead mutuku ap, Libanon mutuku ap, boyanuka deipniba, aunamake. Winipnyopura, sik min arye ulamik mutuku ara, ninye weik langdipliba, minop talak ulamik touk unamake.
Nara, nabi Zakaria, sik domba basam dekenyak nang arye dekna arepnikiba, domba basam opnamak ning nirya ara, naryuk weinamne. Ati ara, na kama ara bitinye akunum bopmane. Tonok kama ara, narye si dopse ning ara, ‘Bicoe tenepnirye melipnamne,’ nyabuka, si dopse. Tonda, kama bitinye talipse ning ara, el si ati, “Tonok kanye dukdongobuka un ning,’ nyabuka, si dopse. Aning nirya akunum winipsopura, adiparyuk deiyok koubuka, adomba basam kalikuka wein pil talibuka dopmase.
Sik akunum teleb kipdeipniba, minop talak Yehuda yala ninye ap, Yerusalem mutuku ulamik ninye ap, sikce na Allah Yahweh ati, arin ning boyangalamikce, uku dongolamik touk, aminyan talak babye, na arena ati, teleb ning arelyanganamniake. Winibuka arelyangalamnicopura, narye sikti, kanye delinamne. Ati, minop talak Allah ap dukdongobuka, teleb ulamik touk, aminyan talak tamubuka batakdongopnyopura, sik ap, na ap, teleb kibuka neika unamabe.
Israel ninye ara, na amutuku dup binuka welebuka weik keil deice tikna arye dinmanabuk, sik Israel ninye ounmakbuk eipne. Narye eipman ning ara, sik Israel ninye ara, sik yuk unyake. Yuk mutuku ninye ap ansinibuka neika kum unyake. Israel ninye sik kanye ara, ‘Nunda pia yuk ninye unyaba anya arye, im sirya, mutuku sirya nirya talye unyak ninye atonun kum unyabe,’ tenenyaka ati, sik yuk unyake. Aning nirya eipmane.
Ura, sik Ruben yala nang ap, Gad yala nang ap, sikce weilamik kam ning ara, pia weike uamuk. Pia weik ubuka ati, sikce Yaezer mutuku ap, Gilead mutuku ap, eibikce utenebik. ‘Se, amutuku bitinye ara, sapi basam weinak ati, amutuku ara, pia teleb mutuku ati, nunce weinyap ning ara, amutuku noutam arye weitibyeura, pia teleb uptue,’ tenebik.
‘Allah arye Betlehem mutuku ati nyabuk. “Yudea tam noutamak aubuk mutuku nirya ara, mitik mambul mutuku bukni, Betlehem mutuku ara, pia weik mambule. Ara, Betlehem mutuku noutamak unyak ninye kan-kan arye, weik ninye deiyok unamlanye deipnamake. Anye bira, domba basam teleb ubuka weilamlanye atonun, Allah el mapu Israel ninye ati, bico tenebuka, ‘Wininmale’ nyabuka, pia talinamle. Aning ati ara, Betlehem mutuku ara, weik mambul mutuku nyapne,” Allah arye nyabuk.’ (Mika 5:2)
Ati ara, Israel ninye nirya ara, sik yuk teleb touk unamake anya arye, Yakub el deipkirikdop nang nirya ara, kanye deibuka, telebuk unamake. Malye nang arye sikti, yanuka kum opnamake. Amutuku ara, din ning weik aupnamle. Ara, mok purwu im deice arye saklirye, sik unak teleb kipdeipliba, gandum ap, anggur mek ap, weik unamle. Sik mutuku noutamak ara, telebuk unamake.
ကြော်ငြာတွေ