Mika 7:10 - Eipomek10 Minop talak ara, nun mal olan nang anggun taleamsikce, nyalamsike. “Anggun ni Allah ara, dan sukum ulul do? Allah arye melibuka kum lyepdopnamsil do?” nyabuka asilamsikce, nalilamsike. Bukni aminyan talak, Allah Yahweh arye nunti lyepsilirye, nunti teleb kipdeipnamle ning ara, sik eibikirye, alye dakdanamake. Tonda aminyan talak, Allah arye nun mal olan nang ati, yaniplirye, aninye obuka kum kipdeipnamle. Winiplyopura, winipmanto ara, ninye bisik balamicak, bental yanibuka balamak touk, Allah arye nun mal olan ninye nirya ati, yaniplirye, obuka sirya daknamlarya. Nun nirya aning eibibirye, biknamabe. Nabi Mika birye, Israel ninye nirya ati, aminyan winipnamuk ning tenebukce nyabuk. အခန်းကိုကြည့်ပါ။ |
Mika 7:10
42 ပူးပေါင်းရင်းမြစ်များ
Tonda, nati talye minin yupu ap, malye yupu ap, nyaninyak nang ara, ance wenepmince, sikti, ikin ning arepminyeura, Sikda alye weik dakdanamake. Tonda, yuk nang arye anang ati, ‘Sikda dipkoprob malye nang unyake,’ tenebikirye, kel bikikceura, anang ati batakikirye, tuba si kum erenamake. Winipmanto ara, ninye arye moul li talak, deice tam ongolamak baju, el si jaket kiniklamak touk kibuka, sik alye dakdanamak ning ara, weik kiplyeba, sik nong nirya deice, siknilongonamle. ‘Ance anang ati, winibuka wenepnamlam’ tenen ati, moropkine, na ni Allah.
Anang ara, na ap, sik ap olanmabu talak ara, sikce, ‘Se, yatanye birye yalirye, melibuka lyepsutu do?’ tenen, an Allah ati morobik bukni, ance sikti, bataknauk winiplume. Diba, na mal olan nang ara, ‘Allah Yahweh arye yanuka melipsutu do?’ tenen, anti weik yupu deice morolamik bukni, an Yahweh ara, anang arye morolamkik yupu pia kum kekelamlume.
Diba na ni Allah, yata nang do nirya, sikce nati, “El ikin weik unmala ara, nunce kanye deipmabe,” nyabuka, akutuninyak nang nirya ara, ‘Ance anang wenebuka opminyopura, sikda kanye teninauk ukirye, alye weik dakanamak’ tenen, moropkine na nio. Tonda na ni Allah, yata nang do nirya, sikce nati, “Anye obuka, nun amu tam kipdeiptibirye, nunuk ara, erepdabirye, amutuku nirya nuncuk talibuka, ninye deiyok nang unamabe,” nyabuka, nati, ‘Lik’ teneninyak nang nirya ara, ‘Ance anang wenebuka opminyopura, sikda alye weik dakikiba, yuk nang nirya eibikirye, anang ati, ‘Dauaplye, sikda pia malye nang uka,’ tenebikirye, ‘Anang ati, tonap si erebuka, kum kinamak’ tenen, moropkine na nio.
Ikin weik unulula ati, narye na ni Allah ati, nyanune. Anda weik keil bulamle atonunye melinilyame. Engena deice arye, ‘Se, na ni Allah, yata deiyok ati, lubakipmanilam do?’ nyabuka morokunune. Yata deiyok ati, ance bataknulumba, na mal olan nang arye ikin ning, na deice delininyak do? ‘Sikce opmanto uninyaka ati ara, pia imun kanye bobuka, tuba engena deiceuk unamne do?’ tenen, morokunune.
Tonda, winipmanto ara, mitik yun mek makau ara, weik uku dinmalya deice deibikiba, pia minopce buppu ulamle touk, ‘Ance amalye una deiyok nang ati, minopce obuka sice buklopnalam’ tenen, moropkine na nio. Tonda, weik uku arye, maning nirya minopce diplyeba, kum danalamle touk, ‘Ance amalye winina deiyok nang ati, minopce wenebuka opminyopura, kum danamak’ tenen, moropkine na nio.
Tonda, sik yuk-yuk mutuku yala nang nirya arye, nunti, “Se, sik Israel nang arye, si erenyak Allah ara, dan sukum unmalce, kum melibuka lyesulul do?” nyabuka, ‘Anti malye yupu nyapkicak’ tenen, moropkiabe na nio. Ati, ‘Winibuka malye nyapkicak,’ tenen ati, ‘Naio, sik yuk-yuk mutuku nang arye, an amu tam ulamupu Israel nang, weik tonun oltaklamikba, sik ining weik balamuka ati, aning kwang dakana ati, ‘Ance ayu nang obuka, sice buklopnalam’ tenen, moropkiabe. Sik yala yuk-yuk nang obuka, sirya dakminyopura, nun wini talak kam tuba unamap Israel nang nirya ara, aning nirya eipnamabe. Tonda, sik yuk-yuk mutuku nang nirya arye, aning eibuka biknamkiake.
Tonda, nati, ‘Nun lik’ teneninyak nang ara, ance sikti, obuka amu tam akunum deiplum nang ara, na asing arye akunum eibuka bikamse. Tonda, yuk nang arye, na dam yanuka nyapnike. ‘An opnamap tenelamkik ati, Allah arye akunum wenebuka obukba, pia engebuka ngalukunyake,’ nyabuka, laka nyapnikba, akunum kekepse.
Se, na ni Allah Yahweh, ance sik malye weik unyak nang ati, yu tenipmince, ‘Anang wenepnamneʼ tenen, kintinip deipmalam ning ara, pia kum tenebikirye, kel bikuka kum elinyake. Ance an mapu ati, ‘Bicoe, sikda dipkoprob melibuka kalikinamne,’ tenipmince, melinamlam ning ara, sik amalye wininyak nang kum eilinyaka anya arye, ance aning lak kipdeipminba, eiptingopura, aminyan ara sikce, ‘Se, nun malye wininyabe,’ tenen, ilil upliba, alye dakanamake. Ance sik malyeuk wininyak nang ati, yu weik upkiliba, ance wenebuka opnamalam nang ara, akunum kintinip deipmalam ning ara, sikti, wenebuka opmince, uku buk dilamle touk, anang kum kipdeipnalame.
Anggun Israel ninye ara, malye weik winimunya ati, narye anggun wenena ati, anggun ululum mutuku arye dipdongobuka outam mutuku ululnye, yu weiknye ati yukupniba, yanamlarya. Nyapnyopura, elda keting panalyangan tam arye yanamlarya. Anye birye, ‘Winipnamlulume,’ nyapnamle yupu noutamak ara, na si ton nyapnamle. Anye bira, yuk yala ninye nirya obuka malye kipnamlanye ulula anya arye, winipmanto ara, kel nang arye kira tuku yanibikirye bental upliba dobuka sik tenebice ning memenyak touk, ayu deiyoknye birye, yuk mutuku deiyok nang ap, Raja nang ap ati, yanibuka darapsiliba, sirya daknamsile. El tenelye touk talye lukparabuka winipnamlarya.
Tonda, Allah Yahweh arye, anggun Edom tam ululum nang ati, ayupu ton nyapsuke. Na Allah arye, sik Edom yala nang ati, anggun mikip ara, mitang kilin ning arepsinyeba, amu tamuk deipnamsine. Winipsinyeura, yuk mutuku nang arye, anggunti, ‘Kume, sik Edom tam nang nirya ati, lik upsiliba, nun lik,’ tenenyabe,” nyabuka malye yupu nyanamsiake.
Allah Yahweh arye nyabuk. “Ara narye Babel mutuku noutam unyak nang, sik malye weik winilamik touk, dengna ati opnamne ning ara, anggun babye biknamlume. Tonda, sik Kasdim mutuku ulamik nang aryuk, Yerusalem mutuku noutam ulamik nang ati, malye kililamikce, olamik. Sik Babel mutuku nang arye winilamika ati ara, sikti, wenepnirye opnamne. Na Allah Yahweh arye nyapmasina ati, aning ara dipkoprob nong upnamlarya!
Nyabukura, sik Israel yala nang arye, tamubuka nyabik. “Se, sik Babel mutuku nang arye, nunti, ‘Aning ara, nun pia like,’ tenyamsikce, nunti malye yupu weik nyalamsikba, alye dakdapu. Tonda, nun mutuku koproba nang kum bukni, yuk karin mutuku ninye asik nang arye, nun ni koproba Allah Yahweh, el si eren aik pum tam, anyaik noutam pia teleb lek aik nirya, talye luparabuka wekikce, malye kipdeibikirye, anyaik nirya uluplopsikba, nun Israel tam nang nirya ara, alye dakdaburye, engenauk ulamupu.” Sik Israel yala nang arye nyabik.
Winibikirye, sik Israel nang ulamak touk, sik nirya ara, ‘Se, pia ikin unamsilʼ tenen, lak kina ati, malye baju si, kain karung aryuk ongonamake. Tonda, sik nirya, ilil pia weik upliba, sik nong nirya ara, sirim talipnamle. Tonda, sik wininamak talak ara, alye weik dakdanamaka anya arye, sik urasin ara, pia alye upnamle. Tonda, sik Israel nang, pia imun kanye bobikirye, talima daksaknamle talak atonun, sik talima daksaknamle talak babye, sik kisok potong nirya ara, koubikiba, delo copnamle.
Wini talak ara, anggunce aning si erena ati, kintinipmalum do? Pong-pong ana, aning-aning nirya arye, lelim weik taplyopura, anggun nirya arye, aning si erena ati, akunum kintinipmalum do? Kintinipmamunce, aning ati si erepmunyopura, teleb uka. Bukni, anggunce, ‘Aning nun kum si erepnuyabe,’ tenepmunce, si kum erepmunyopura, anggun tapu koubuka, weik uku buk pakanmalyak noutam dongopnamsine. Uku buk pakanmalyak noutamak dongopmasinye talak ara, yata minop kwemdina ning ton aulamtopura, yanuka lyepsutu do? Pia kume.” Nebukadnesar birye, Daniel ap, el kwit capu, sik bitinye nang ap ati, nyabuk.
Tonda imam-imam nang, Allah Yahweh el si eren aik talibuka, pil donyak nang ati nyapnamalyame. “Anggun nirya arye, Allah el yupu nyan aik koproba noutamak ap, bai tam atolonga lalinak ap, wekmunce engebuka, Allah el tibuk moronamlulume. Ara, ‘Se, na ni Allah, an tenen ninye oltakana kume. Nun ti bico tenepsimince, melibuka lyepsilyame,’ nyabuka moronamlulume. Tonda, anggunce anggun ni Allah Yahweh ati, nyabuka moronamlulume. ‘Nunda an mapu koproba unyabe. Ance nun nirya opsiminyopura, yuk mutuku ninye nirya eibikirye, ‘Sik ni koproba Allah ara, dan mutuku ulul do? Yata ati aninye kum melilul do?’ nyabuka, malye nyapsikirye, yep-yep anamsiyake,’ nyabuka, Allah ati moronamlulume. ‘Yuk mutuku ninye nirya arye, malye nyapsicak’ tenen, Allah moronamlulume,” nyabuka, Yoel birye nyapdeibuk.
Na Allah arye, anggun Edom nang ati, yupu tonap nyapsine. Anggun apu koproba, Esau birye deiamukba, dadeipdanin yangalamika ani, wini talak ululum nang, anggun apu koproba, Esau el weit koproba, el si Yakub bira, elce deiamukba, dadeipdanin yangalamik nang ati, anggun Edom mutuku nang, anggun kayapu nang koproba bukni, anggunce anggun kayapu Yakub, el yala nang arye deiamik nang ati, pia malya kibuka, ikin ninguk, sik nong deice delilulume. Tonda, Yakub el yala nang weika arye olamlume. Ati ara, yuk mutuku yu nang yakirye, anggun Edom tam ululum nang ati, mal pibuka yap-yap apnamsiake. Winipsikceura, anggun Edom tam nang ara, imun kanye bobuka, alye weik dakdanamlume. Tonda sirya ara, na Allah arye, anggun Edom mutuku nang ara, pia kum kipdeipnamsine.
Anggun kayapu nang, sik Yehuda tam ulamik nang, ikin ning sik deice yayukba, dorobik talak ara, anggun Edom tam ululum nang arye, ‘Nun kanye ara, pia deibabe. Ikin doprobik ning ara, pia kum tenenamabe,’ tenyamlumce, anggunce nalibuka akutulamlume. Tonda, anggun kayapu nang, Yehuda nang, ikin ning dorobik talak ara, anggunce, ‘Merekuka ikin ning dopropmakeʼ tenen, kanye ara, pia kum deipnamtum bukni, anggunce kanye deiamlume. Tonda, anggun kayapu nang, sik Yehuda yala nang, ikin ning dobukabikce, kanye imun ubukaura, sik Edom mutuku nang arye, ‘Nun dam ara, ikin ning ton kum usilyeba, dolonyabe. Sikuk ikin ning nirya ara, yalyeba dolonyakʼ tenen, kanye erebuka, maknya kum kwalilamtum bukni, aning wilinlamlume.
Dipkoprop wini talak ara, yuk pera im sirya, mutuku sirya nirya, daunyak ninye arye, bulubuka, Yerusalem mutuku yakirye, ‘Aninye nirya opnamabe’ tenen, yanuka warikinamsiyake. Anggunda, amalye wininyak ninye arye, ‘Se, Sion mutuku ara, weik mambul mutuku nyanyak bukni, nunce amutuku nirya ap, amutuku noutam ulul ning nirya ara, malye kipdeipnamabe. Israel ninye arye, ‘Aning weik mambule’ tenen, Sion mutuku noutam duknubuka deiamik ning ap, Allah el si eren aik ap ara, nun asing koproba arye, mining dam elinamabe,’ tenenyake.
Nabi Mika birye, Israel ninye ati, tenebukce nyabuk yupu ani. Na mal olan nang arye, malye kum nyanamnulume. Tonda, na mal olan nang arye, anggunce, ‘Bita merekuka obuka, kum danaipmakiyake’ tenen, weik kanye deibuka, kum lyek-lyek anamnulume. Deiyok ara ani. Dipkoprop na saktinya babye, aminyan talak tuba tamubuka erepdeipniliba, tiknirye teleb unamne. Tonda, wini talak ara, na kunuknak atonun unun bukni, aminyan talak ara, na ni Allah Yahweh, elce dobuka, weik dirina ak deipnamnile.
Aning ara, talye ati kum bukni, deiyok ara, ani. Ara, Allah Yahweh arye, anggun malye winin ning nirya ati, anggun wenena ning ap, anggun malye winin ning ati, menenga ning arena ap ara, tonap kum arenamsile. Aning kum bukni, Allah arye namin kilinauk, wininamsila atia. Tonda, Allah elce anggunti, yu upliba, osenyak nang nirya ati, ‘Kume, daupmalye! Israel yala nang ton, kum olbinamlume,’ nyabuka, anggun mal olan nang ara, yaknamle atia. Wini talak ara, anggun weik deiyoknye, Allah Yahweh ara, anggun Israel yala nang nirya ati, pia kaliknauk unamsile. Ara, nara Allah ap, anggun unamlum noutamuk, pia neika unamabe. Ati ara, Allah Yahweh elcuk anggunti, pia kalikinamsile. Ati, wini talak arye, dipdongobuka, dounamlum talak nirya ara, anggunce, ‘Se, yata kanye mun ning nun dam yasiliba, ikin weik unamsil do?’ tenen, anggun ilil winin ning ton, kum unamsile.
Yehuda yala nang wipdeipnirye, mikip arepneba, sikda mal olan deiyoknye birye deiyok kiplirye, yuk nang ap mal olalamica ani, ninye nirya obuka, sirya daknamake. Aoplobice nang, sik nong deice ara, talye bental deice yanibuka balamak touk wininamake. Ara, na Allah Yahweh arye sik Yehuda yala nang ati melipniba, sik mal olan nang ati, nirya obuka sirya dakanamake. Aning atonun, yuk mutuku ninye, sik yin talin nang arye, kuda basam balye deice bukuka yanganmace nang babye, ayin talin nang ara, nirya obuka, sirya dakanamake.
Aning nirya winipniba, anggun Israel ninye nirya, anggun bidamnye asing arye ipmunce, nyapnamlume, “Se, dipkoprop, Allah Yahweh elda mikip weik arye Israel ninye unyap mutuku ap, yuk pera mutuku noutamak nirya ap, weik mambul pil dolule. Nun kum unyap mutuku noutamak babye, elce talibuka, mambul piluk dolule,” nyabuka nyanamlume.
Winipnamsen talak ara, narye tenepse touk, dipkoprob winipnamne. Adeice narye sik malye wininyak ninye nirya obuka sirya daknamne. Sik amalye winina ninye nirya obuka batakniba, sik anang deice ara, tuku butbuta deice yanibuka balamlum touk ubuka, sik nong deice arye, yanibuka banamlume. Nara Allah Yahweh, im deice yin talin malaikat nirya, sik weik deiyoknye birye nyapsina ati ara, aning nirya dipkoprob winipnamle.
Tonda, atam nang arye, laka nyabiceura, sik Kanaan mutuku tam unyak nang ap, tonda yuk nang amutuku noutam yanuka unyak nang nirya ara, anyapnamak yupu ati, kekebikirye, sikce biknamake. Bikikirye, sik Kanaan ninye arye yanuka wariksikirye, nun nirya obuka, sirya daknamsiyake! Amutuku noutam nirya ara, nun si kum danamsile. Ati ara, Allah Yahweh, amutuku nang nirya arye, an mambul weik si ati, ‘Dauplye, elda talinye tenepkicakʼ tenen, anti weik arye si erena ati, yata wiripnalam do?” Yosua birye nyabuk.
Ati ara, amalaikat arye ayupu ton nyabuk. “Allah arye, Babel mutuku ulamik ninye sik wenena ati, akunum oplopmala ati ara, anggun im deice tam ululum ninye nirya arye, kanye deibuka pin-pin asa arye unamlume. Tonda, Allah arye wiamsukba, elti, diba tenebuka ululum nang ap, el yupu dobuka peterelbana ati, deiyok kouna nang, dopkwetepsuk Rasul nang ap, el yupu laka nyalamlum nabi-nabi nang ap, anggun nirya babye kanye deibuka pin-pin asa arye unamlume. Deiyok ara, sik Babel mutuku ulamik ninye arye, anggun nong deice ikin ning weika arye delilamsika ati ara, Allah arye sik Babel mutuku unyak ninye ati, akunum wenebuka oplopmala atia. Ati anggun nirya arye kanye deibuka unamlulume.”
ကြော်ငြာတွေ