Daud Raja ulamukce, yupu nyalamuk talak ara, keting tamun winilye deice arye, kwaning pia weik patana li yayuk. Winilamukba, Daud birye Allah Yahweh ati, “Aning ara, yata deiyok ati, kwaning patana li yanmasil do? Aning deiyok ara, laka nyapnilyame,” nyabuka morobuk. Moropbukba, Allah Yahweh arye nyabuk, “Aweik din patana an dam upmakil deiyok ara, ani. Ara, minop talak Saul ap, el mapu silip ap nirya arye, Gibeon mutuku noutam ulamik nang omik deice arye winipmasile,” nyabuk.
Mika 6:9 - Eipomek9 Anggun ululum ninye nirya ara, Allah Yahweh arye nyasilye yupu, moubuka kekenamlulume. Sik kel weik ninye ara, ‘Nun malye wininyap ning ati, Allah arye wenepsilyak’ tenen, Allah Yahweh ati, pia ilil usiliba, pia moubuka kum unyake. Ara, talye ati kum nyapsine. Sik asik dobuka, amutuku unyap nang nirya ati nyasulule. Ara, “Pia moubuka tenenamlume,” nyabuka nyasulule. Allah Yahweh arye, yu yin talin nang, yupa pia weik tonun akunum dopdeipmalba, nun wenena ati, olyanusiyake. Ati, nun amutuku noutam unyap ninye nirya, elce nyasilye yupu ara, moubuka kekepnamabe. အခန်းကိုကြည့်ပါ။ |
Mika 6:9
43 ပူးပေါင်းရင်းမြစ်များ
Ati, na ni Allah ati, “Se, na ni Allah, ance nati, ‘Adibaryuk wenebuka kum opnamnilamʼ tenen, moropkine. Tonda, ance nati, wenen yupu ap, ikin ning arena ap, wininamnilam ning ara, ‘Lak nyan yupu deice arye, “Anda malye uplum ning ara ani,” nyabuka, laka nyapnutumʼ tenen, moropkine. Se, yata deiyok ati, ance na yupu ati kum kekenilyame.
Aning atonun ton, Allah arye nati, ‘Anye biti aning winipnamne. Narye melipnyeba, anye birye wininamleʼ tenen, akunum kintinipnuk ning ara, dipkoprob aninguk, elce na deice wininulule. Aninguk kum bukni, Allah elce na deice ati, ‘Aning winiptinye, aning winipnamne,’ tenelul ning ara, pia weik ulule.
Allah ara, aning-aning nirya deice tam ulirye, Weik Erena Deiyoknye, mikip weiknye ulule. Malye winibibyeba, Allah el si Yahweh arye, ikin ning nun nong deice deibuka wenesilya ara, ‘Aning ara, teleb uka, dipkoprob teleb updeipmanile,’ tenenamabe. Deiyok ara, ‘Na mapu teleb updeipnamne’ tenen, wenesulula ati, elce wenepsilyopura, ‘Teleb ulinmanile,’ tenepnamabe. Wenena deice arye, nun un ning nirya teleb kipnamsila ati, ‘Se yata ati wenepmasil do? Wenena ara, nun like’ tenena kume. Dipkoprop pia, Allah ara aning-aning deice tam ulirye, mikip pia weik ulule. Elda Pia Weik Erenanye ulula anya arye, el tibuk kanye deibibirye dobolbanamabe.
Yatanye do, weik kel bikna deice arye, pia moubuka kel kipmantonye bira, anyapman yupu nirya teneplirye, moubuka kel kipnamle. Tonda, el anye birye, ‘Allah ara, dipkoprob aulule. Allah Yahweh arye, nun tukwak ninye ati, weik arye bico tenesilya ara, pia kum kum danamle’ tenen, moubuka tenenamle. Daud birye, ayupu nyabuk.
Na ni Allah, narye moropkin ning ara, ani. Ance sik anang ati, wenebuka opminyeura, sik nirya ara, alye weik daknamake. Tonda, ance arepminyeura, ‘Sik kanye boktopyeba, kanye teniltonauk unamake’ tenen, moropkine na nio. Allah ance anang opminyeba, akunum dibikceura, aminyan talak yuk-yuk mutuku nang nirya arye, anang nirya ati, ‘Sikda daupye, sikda malye nang ulamik,’ tenenamake. Utenena ati moropkine na nio.
Sik mutuku sirya, im sirya nirya, yala yuk-yuk unyak nang nirya ara, ‘Ninye opnamap’ tenen, kintinibik ning ara, aning sik nong deiceuk tamubuka yanamle. Winipmanto ara, ninye arye ‘Kam ning opnuyap’ tenen, tuku palyamikca pum tam bukni, mangkau kanye bobuka, banmalya ani, sik mining lukamice tuku pum tamuk sakuka olanyake. Atonun, ninye arye ton, ‘Bai basam do? Yua basam do? Youpnamleʼ tenen, tapu dungnubuka welamak touk, ayu nang babye, sikce yuk nang ati, malye ning dobuka deilinyak nang ara, tamubuka yalirye, sik nong deiceuk upnamle!
Pia moubuka tenena kanye teleb tenelinye bira, malye un ning el binmalyak aupmalebuk, moubuka eiplirye kel biklyopura, adiparyuk leilolule. ‘Amalye un ning dam kum unamne’ tenen, memebuka yukak balule. Bukni, walwal ninye ara, moubuka kum tenebikirye, ‘Abisik ara talye parapkabuka banamane’ tenen, balamak kili sal ara, pia weik ikin ning dolonyake.
Se, na ni Allah Yahweh, ance sik malye weik unyak nang ati, yu tenipmince, ‘Anang wenepnamneʼ tenen, kintinip deipmalam ning ara, pia kum tenebikirye, kel bikuka kum elinyake. Ance an mapu ati, ‘Bicoe, sikda dipkoprob melibuka kalikinamne,’ tenipmince, melinamlam ning ara, sik amalye wininyak nang kum eilinyaka anya arye, ance aning lak kipdeipminba, eiptingopura, aminyan ara sikce, ‘Se, nun malye wininyabe,’ tenen, ilil upliba, alye dakanamake. Ance sik malyeuk wininyak nang ati, yu weik upkiliba, ance wenebuka opnamalam nang ara, akunum kintinip deipmalam ning ara, sikti, wenebuka opmince, uku buk dilamle touk, anang kum kipdeipnalame.
Tonda, ‘Olan nang yakcakʼ tenen, cang keil poka dobuka antanap dongongamik weik asik noutam nirya ara, ninye nirya akunum bindobika anya arye, anyasik ara oldemuk ulule. Tonda anyasik ara, sal ap, kilapu ap nirya, pia akunum dinbulang nyabuka anya arye, winipliba ninye una kumak, pia kum mutuku atonun ubuke. Ninye nirya kum dayuka anya arye, bai tam kam ulye ning, sapi do, kambing do, aning nirya ara, amutuku ukirye, mitik yo taruk bilikuka bilirye, bok unamle ning ap, yo mutmuta ap nirya ara, dilonauk unyake. Tonda, asukumuk manyakce, dikdik senyake.
Ura anggun nirya dilulume! Allah Yahweh el mikip weik ap, el yu weik ulye ning ap ara, pia pere sukum arye lak kibuka yanamle. Allah El weik yu ara, weik uku buk dilamle touk upliba, tulum weik tonun panaplirye welelamle touk ubuka panapliba eilinyabe. Tonda, Allah elce nyapnamle yupu deice arye, malye unyak nang nirya obuka dipnamla ati, winipmanto ara, weik uku arye aning-aning dilamle touk upnamle.
Tonda anggun nirya pia moubuka kekepnamlume! Amutuku weik asik donyakak noutam arye, weik lelim nyanamake! Tonda, Allah el si eren aik domika pum tam arye, Allah Yahweh aryuk, weik yupu deice arye nyapmale! Aning ara, Allah Yahweh ati, “Nun like, elce, ‘Winipnamlume,’ nyapdeipsuk yupu ara, nun like! El tam kum kipdopnamabe,” nyabuka, Allah ati, sikce mal pinyak nang ati ara, Allah arye sikti, nyapmale. Ara elce, “Amalye weik wininyak nang ati ara, anggun kwang dana ati, weik tonun wenepnamsine, winipnamsine,” nyanmala deice arye, lelim weik kekenmabe.
Aning kum tenebika ati, Allah Yahweh arye, tonok talak aryuk, winipmanto, sik kisok tam ap, sik der tam ap ara sekuka, mitik-mitik kiplobuk. Ara, sik Israel mutuku noutam talibuka ulamik ninye deiyok nang ap, sik amu tam kibuka, yuk mambul pil talibuka dolamik deiyok nang ap nirya ara, tonok sum aryuk, obuka kum danaibuk.
Minop talak, Yehuda yala ninye ati, ninye deiyoknye kibuka taleamsuknye, el si ara Hizkia, elce taleamsuk talak noutamak ara, Allah yupu nyapdeipliba, laka nyananye, el si Mika, mutuku si Moresyet mutukunye birye, nyabuk. Atalak ara, nabi Mika birye, amutuku ulamik ninye ati, nyamuk. “Allah Yahweh, aning-aning nirya deice tam, weik erebuka ululnye birye, el yupu nyapdeipnukba, yanuka nyapsine. Allah Yahweh ara, aning-aning nirya talilule. Im deice yin talin malaikat nirya, sik weik deiyoknye ulule. Allah arye nyapdeipnuk yupu ara, ani. ‘Sion mutuku ara, wa win dam atonun upnamake. Tonda Yerusalem mutuku asik dobik ning ara, yu nang arye yanuka, uluplobikiba, asik oldemuk upnamle. Tonda, Allah el si erena ati domik aik, uluplobikiba, dauamlya ani, aminyan talak ara, amutuku dupak, talye palamle yo noutamak tiknamle. Anyasik uluplobikiba, talye aikuk upnamle atia.’ Allah arye nyapdeipnuk yupu nyapsine,” nabi Mika birye, nyabuk.
Anggunda, Allah el yupu kum kekepmunce, pia mandipna uk winipmunyopura, Allah weik arye wenepnamsile. Ara, minop talak Silo mutuku ulamik ninye, wenebuka oplomse touk, anggun atalak ululum Israel yala ninye nirya babye, anggun malye winimunya dekna ati, opnamsine. Tonda, anggunce anyasik-anyasik nirya, Yerusalem mutuku domlum aik nirya ara, anggun wenena ati, malye kipdeipniba, yuk mutuku ninye mutuku-mutuku unyak ninye nirya arye, “Se, Yerusalem mutuku ara, malyeuk winilamikba, Allah arye malye nyabuka, supdongobuk mutuku ani,” nyanamsiyake. “Allah arye nyaipmanil yupu akunum nyapsine,” nyabuka, laka nyapnalyame. Allah arye Yeremia biti, nyabuk.
Bukni, Allah el yu parang arye, pia tunim abuka kum unamla deiyok ara, na Allah Yahweh arye, akunum ayu parang ya ati, Askelon mutuku ap, weik laut mekwen lilun tam unyak nang ap, anggun nirya ati ara, narye, “Anang nirya ara, akunum olbinamlume,” nyapdeipse ati, “Anggun Pilistin mutuku noutam ululum nang, olyanganamaka ara, mikip pia unamle. Mitang dem kum upnamle,” nyapsine. Kume, na Allah Yahweh arye, “Sik Pilistin nang unyak mutuku noutam unyak nang nirya ara, olbilulume,” nyabuka, akunum nyapdeipsa ati, sik olana ara, dipkoprob nong upnamlarya!
Dipkoprop sik Israel yala nang nirya ati, narye, ‘Pia bico kum tenepnamne. Anang ara, pia ikin ning, sik nong deice kum deipnamneʼ tenen, kanye kum tenepnamsine. Tonda, kanye talima kum arepnamsina ati, ‘Sik daupmalyeʼ tenen, anggun malye winilulum ning ati, dipkoprob kum bataknamsine. Aning kum bukni, narye dipkoprob, anggun malye winilamlum ning, akunum eibuka kel bikamsisa ati, awinilamluma atonun, dekna dolona atonun wenebuka opnamasine. Tonda, narye, ‘Awinin ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenebuka opnamsine. Winibuka wenepsinya deice arye, anggun damnye, ‘Se, Allah Yahweh ara, elcuk nun wenena ati, akanye imun ning, akunum arepmasileʼ tenen, bikinamnulume.
Allah Yahweh arye, sik Samaria tam noutam ulamik ninye nirya ati nyabuk. “Samaria tam unyak ninye wenepnamne deiyok ara, sikce na Allah ati, ‘Nun like’ tenen, mandipna kanye bobuka, malye-malye weik winilamikce, batakamnika ati, aminyan talak ara, weik arye wenepnamsine. Ara, lo arepneba, yu nang arye anggun dam mal olyakirye, ninye weik arye oplopnamake. Ara, amutuku unyak ninye nirya ap, sikce delinyak mapu nirya ap ara, opnamake. Winipnamne talak ara, lo areneba, yuk mutuku yu weik nang yakirye, mal olanmace talak ara, mi bomice kilapu nirya ara, sik mi mun pum tam opodongobikiba dipnamake. Kam tuba unamak mapu nirya ara, sik yan bulbul talibuka keil deice pouklobikiba, kisok yung lubuka dipnamake,” Allah arye nyabuk.
Yatanye do nirya, sik weik kel bikinyak nang ara, aning nirya, weik kel bikna arye, nong noutam ning babye, tenebuka kel kinyak nang ap, anyapnusin yupu akunum moubuka tenenyake. Ara, na Allah Yahweh arye wininun ning nirya ara, pia diksukumuk unune. Ati, yata ninye do nirya, ‘Nunce teleb bisikuk binamabe’ tenen, pataliba, na Allah arye, “Aning wininamlulume, aning kum wininamlulume,” nyalisunun yupu ara, moubuka talinyakce, dobolbanyake. Bukni, sik yuk nang ara, mandipna kanye bobuka unyakce, na nyasinye yupu amul deice aryuk kekenyak bukni, moubuka kum talinyake. Aninye ara, pol-pol asa bakibuk, yan dum dukliba, sakuka tukwak punyak touk, ubuka sakanyake. Na Allah arye, dipkoprob nyapsine.
Sikce amalye ning weik winilamika ati, na Allah arye uku dopkwetepniba, Yehuda mutuku ap, amutuku unyak ninye ap, uku arye dibuka sirya daknamle. Tonda, sik Yerusalem mutuku ninye arye, ‘Nun olan ninye arye yanuka opsicak’ tenen, weik keil poka dobuka, antanap dongamik ning nirya ara, uku dopkwetepniba, apoka ap, sikce domik aik nirya ap, uku diplirye, sirya daknamle.” Allah arye nyapdeibukba, Amos kekebuk.
Allah arye nyabukba, Amos birye kekebuka sekuk yupu. Se, Sion mutuku noutam umunce, ‘Nunda telebuk ubuka unyabe’ tenen, talye kanye bobuka ululum ninye ara, bicoe nyapsine. Tonda, sik Samaria mutuku deice ukirye, ‘Ikin ning nun dam kum yatue’ tenen, teleb kanye bobuka, umunye ninye babye, anggun bicoe. Anggun nirya ara, malye umunye bukni, ‘Nunda teleb unyabe,’ tenelulum ning ara, Allah arye wenepsilirye, anggun deice ikin ning deipnamsila ati, anggunda bicoe. Sik Samaria mutuku nang ara, talye nang kume. Israel ninye nirya arye, sik si akunum kel bikamik. Tonda, Israel ninye nirya arye, ‘Nun ni yapu arye, kalikuka melinamsiyak’ tenen, sikti, kanye deibuka dikirye, ‘Nun melipsilyame,’ nyabuka moronyake. Bukni, sik nirya ara, bicoe nyapne.
Ati, na nabi Mika birye nyapsine. Anggun weik malye winimunye ati, Sion mutuku ara, tuku palibuka, wa win dam atonun upnamle. Ara, Allah arye lo arepliba, Yerusalem mutuku noutam asik domik ning nirya ara, yuk mutuku nang arye yanuka, uluplobikiba, asik oldem upnamle. Winibikirye, Yerusalem mutuku noutam ulul asik nirya ara, uluplobikiba, sice butbuta atonun upnamle. Amutuku noutam dolamik asik nirya ara, kum danamle. Winiplyopura, aminyan talak yo mutmuta paplirye tiklyopura, talye bai mutuku atonun upnamle. Allah Yahweh, el si eren aik amutuku deice ulul bukni, aminyan talak, anyaik babye uluplobikiba, kum danamle. Amutuku deice ara, talye yo mutmuta palamla atonun upnamle. Na nabi Mika birye, anggun amutuku deiyok nang ati nyapsine.
Allah arye nyasulule. Anggun malye ning weik winilulum ninye nirya ara, anggun ululum aik pum noutam ara, tilila yupu nyaluluma deice arye, ubula dololulum bonauk, bululyalulume. Winipmanto ara, anggun din ning el si ara, gandum ap, yakong ap, libuka yuk ninye dekna ati, tilila yupu deice arye, “E, aning ara, winibuka arepnusilyame,” nyabuka, tilila yupu nyabuka, yo bok weik tonun dololulum ning nirya ara, na kum elisunun do? Tilila yupu nyaluluma deice arye, bon-bona weik tonun, duknubuka delilulum ning ara, ‘Luba kipnamle,’ tenenululum do? Kume, narye aninye wininyak ning nirya ati, yu kanye bonune. Ati, sik anang ara, narye wenebuka opnamsine.
Kume, aning-aning nirya, akunum winiptibya babye, adeice arye, pia kum lyepnamsile. Bukni, nun ni Allah Yahweh arye, nun tukwak mutuku unyap ninye nirya ati tenesilya ara, ‘Na kanye delina ati ara, wininamake,’ tenesulule. Utenesilya ati, el minop talak akunum laka nyapdeiamsuk ara, ani. Yata ninye do nirya, pia diksukum teleb kibuka unyakce, yuk ninye nirya ati, bico tenelakirye, kanye talima, amu tam nimalyap asa kanye deibuka, telebuk unamake. Wininyakce, Allah el amu tamuk unyakce, kanye talima erena kumce, Allah ap, kanye talima dukdongobuka, neika ubicopura, Allah arye aninye ati, kanye delinamle. Aning ara, ‘Wininamake,’ tenesulule.
Aweik asik donyakak unyak nang nirya ara, Allah arye do, ninye arye do, ‘Aning ara, wininamlume Aning ara, pia kum wininamlume,’ nyabuka, wenena yupu nyaptinga babye, amutuku ninye arye, ayupu pia kum kekenyake. Atonun, Allah arye, ‘Aning ara, malye wininmaluma ati, aning ara, pia bataknulume,’ nyaptua babye, mandipna ubikirye, ‘Dauplye,’ tenen, pia kum kekebikirye, kum bikmanto unyake. Tonda, amutuku noutam unyak nang ara, sik kanye nirya dobuka, Allah el deice pia kum delinyake. Tonda, sikce, ‘Allah Yahweh aryuk, melibuka lyepropnamsileʼ tenen, diba kum tenenyaka ati, elti kum moronyake. Tonda, sikce, ‘Nun si erenyap Allah, el dam ton tamubuka yanamabe,’ pia kum tenenyake.
ကြော်ငြာတွေ