Tonda, ‘Anye birye, el deipnamle mapu nirya ap, sikce deipnamak mapu nirya ap ati, “Allah el si Yahweh arye nyasilye yupu, pia moubuka talipmunce, el yupu uk dobolbanamlulume. Diksukumuk wininamlulume,” nyanamle’ tenen, nara Allah, na si Yahweh arye, Abraham akunum wipdeipse. Abraham arye nyapliba, el tam nang nirya arye aning atonun winibicopura, na Yahweh arye elti, ‘Winipnamkine,’ nyapdeipse yupu nirya dipkoprob winipnamne. Allah el si Yahweh arye Abraham biti tenebukce, ayupu nyabuk.
Mika 6:8 - Eipomek8 Kume, aning-aning nirya, akunum winiptibya babye, adeice arye, pia kum lyepnamsile. Bukni, nun ni Allah Yahweh arye, nun tukwak mutuku unyap ninye nirya ati tenesilya ara, ‘Na kanye delina ati ara, wininamake,’ tenesulule. Utenesilya ati, el minop talak akunum laka nyapdeiamsuk ara, ani. Yata ninye do nirya, pia diksukum teleb kibuka unyakce, yuk ninye nirya ati, bico tenelakirye, kanye talima, amu tam nimalyap asa kanye deibuka, telebuk unamake. Wininyakce, Allah el amu tamuk unyakce, kanye talima erena kumce, Allah ap, kanye talima dukdongobuka, neika ubicopura, Allah arye aninye ati, kanye delinamle. Aning ara, ‘Wininamake,’ tenesulule. အခန်းကိုကြည့်ပါ။ |
Mika 6:8
66 ပူးပေါင်းရင်းမြစ်များ
Allah arye wabukce, ikin ning areamuk deice arye, Hizkia ap, Yerusalem mutuku ulamik nang ap, sik nirya arye, aning ara moubuka bikikce, ‘Se, nunda dipkoprob malye ulampu ati, aning ara, ton kum wininamabe,’ tenebikce, kanye eren ning batakik. Winibikopura, sik kanye lamapdongobuka, namin arye diksukum telebuk ulamik. Winibika ati, Raja Hizkia birye, tuba taleamuk talak nirya ara, Allah arye wenena ati ikin ning ara, ton ap sik dam kum areamukba, sik dam ton kum yangalamuk.
Aning atonun, kanye imun weik uk dilamuk talak, ‘Allah arye melibuka kwetepnamnilʼ tenen, morobuk ning ap, tonda Allah kekebukce, bico tenebuka, dipkoprob el nong kwetebuk ning ap, abuku sejarah noutam akunum sekuka deiamik. Aninguk kum bukni, tonda Raja Manasye birye, Allah si yanilamukce, malye weik winilamuk ning ap, tonda Allah ati, diba tenena kumce, el yupu moubuka kum taleamukce, malye winilamuk ning ap, tonda isa si erena ati, yuk mesba kintinip deiamuk ning ap, isa ati, kam ning obuka, arelamuk ning ap, isa si Asyer si erena ati, weik cang yo ikuka, asukum arye morolamuk ning ap, talye ning bukni, ‘Nun ni ara, aniʼ tenen, ninye urasin atonun kibuka memebuka, patung-patung deiamukce, talye ning bukni si erelamuk ning ap, aning nirya malye ning yala-yala nirya kintinilamuk ning nirya ara, minop talak winilamuk ning sekna buku, el si ‘Buku Sejarah Aminyan Talak Upnamle Ning ati Dina Nangʼ noutam sekuka deiamik. Amalye ning nirya ara, el malye winilamuk talak noutam, el kanye amu tam kum ulamukce, ila tamubuka teleb kibuka, diksukumuk kum ulamuk talak, malye winilamuk ning ati nyababe. Aning nirya babye, Allah arye nyapneura, el yupu laka nyan nang, sik nabi-nabi nang arye nyalamik ning, ‘Minop talak winilamik nang arye, winilamik ning aniʼ tenen, sejarah buku noutam arye sekuka deiamik.
Bukni, el li koproba Raja Manasye bira, malye weik ulamuk bukni, ton talak ara, namin kanye bobuka, amu tam kibukce, ila tamubuka, Allah Yahweh dam yayukce, diksukumuk ulamuk. Manasye bira, aning winyamuk bukni, Amon bira, aning kum winibuk. El kanye amu tam kum kibukce, elda pia malye weik tuba ulamuk. Amon bira, el malye ning weik arye, ton tabakuka winilamuk.
Anda, ayupu kekepmalamce, ‘Se, Allah arye nun mutuku ap, nun malye ulamupu ning ap ati, yu ubuka anya arye, weik arye wenepnamsile. Ati, yata malye ning nirya mangkau arye malye weik ulamupu do?’ tenepmalamce, an talima amu tam kipmalamce, ‘Malye ning nirya bataknirye, Allah dam tamubuka yanirye, diksukumuk unamne,’ tenepmalame. ‘Allah arye nun Yerusalem mutuku nang ati, obuka wenepnamsile,’ tenepmalamce, aning ara akunum biklumce, talima lamabuka, an ongolyam baju kwilikuka bataklumce, na Allah dam engeplume. Awiniplum ning ara, narye akunum kekepkisirye, eipkise.
Tonda, an im deice arye koulukuka, Sinai mutuku deice tikilyanmalumce, Israel ninye kekenak ati nyapdeiamlume. Atalak arye, ance, “Aning ara wininamlume, aning ara kum wininamlume,” nyabuka, im deice arye diksukum yupu uk nyapdeiamsulume. Anyapdeiamsulum yupu nirya ara, dipkoprob teleb yupu uk ulule.
Raja Daud birye, Mazmur mot yupu sekuk. Daud birye nyabuk yupu ara, ani. Narye, na kwitcapu ap, na neika pil donyap nang ap ati, pia kum bataknamne. Tonda, narye Israel nang talibuka, ninye yupu lipsisikuka bokeipnamne talak nirya ara, talye yupu nyana kumce, pia diksukum ubuka, yupu lipsisikuka bokeipnamne. Ati, narye, na ni Allah, ‘Ance kekepnamnilam’ tenen, Mazmur yupu mot ara, anti nyanamkine.
Winipmanto ara, ninye arye, weik weisa ubikceba, dirina weik uplyeura, yuk nang dana-dana tam nirya, teleb kibuka eililamak touk, sik diksukumuk wininyak nang babye, sikti, teleb wininyaka deice arye, yuk nang weik arye melikinyake. Ara, sik diksukum wininyak ning, yuk nang eibikceura, ‘E, teleb winin ning ara ani,’ tenen, kel biklamaka atia. Tonda, sik diksukum telebuk wininyak nang arye, yuk nang ati, bico tenekirye, teleb kibuka melikinyake. Tonda, Allah arye, “Aning ara, wininamlume. Aning ara, pia kum wininamlume,” nyapdeiamsuk yupu moubuka talikirye, telebuk wininyake. Ati, yuk nang nirya ati ara, teleb kibuka wininyake.
Tonda, Allah ati diba tenebuka, pia teleb diksukumuk wininyak nang arye, yuk talye kankan nang, aning-aning nirya, kum talinyak nang ati, bico tenekirye, anang sik patan ning weik arye, talye lukdanuka melibuka arenyake. Allah arye, “Aning ara, wininamlume. Aning ara, pia kum wininamlume,” nyapdeipsuk yupu, aninguk talibikirye, sik diksukum telebuk wininyak nang ara, sik diksukum wininyak ning babye, pia min kum upnamle. Tuba aupnamle. Tonda, yuk nang nirya arye sikti, ‘E, aning ara, dipkoprob teleb nang unyake’ tenen, sikti, si erebikirye kinauk wininamake.”
Allah atibuk diba tenebuka, diksukumuk wininyak ninye arye, sik yuk nang ati, “Na ning tia ati, dopropmaminya ani, tamubuka arepnamnilyame,” nyabuka, weika arye arinyake. Tonda, sikce yuk nang ati, talye arinyak ning ara, mitik anun kum arinyak bukni, aning nirya tabakuka arinyake. Ati ara, sikce delinamak mapu ara, Allah meliplirye, amapu nirya ara, telebuk unamake.
Bukni, nara pia dipkoprop, na ni Allah, an dam anyuk unamne. Aninguk tenebuka ununa ara, teleb uka. Na kanye talima pum tam arye, akunum tenepse. Ara, Allah Yahweh arye, aning-aning deice tam talibuka ulirye, Weik Erena Deiyoknye ulirye, ‘Wininamne,’ tenelye touk, aning nirya dipkoprob winilulnye bira, ‘El dam anyuk unamne. El diparyuk melibuka lyelonamnile’ tenen, unamne. Na ni Allah, ancuk tuba kalikuka melinilyamnye winiminya ati ara, ance mambul pil dolyam ning nirya ara, yuk ninye, sik kekena ati, laka nyabuka peterelbanamne.
Dipkoprop winin ning ap, diksukum ubuka ninye yupu lipsisikuka bokolina ap ara, teleb kibuka ubibyopura, Allah Yahweh kanye delisulule. Awinina ati ara, pia weik arye kanye delisulule. Bukni, ninye arye, ‘Nun malye unyap ning namin kipnamsil’ tenen, kam ning obuka uku danyaka deice arye, mitik tonun aryuk kanye delisulule. Allah arye, ‘Aning ara pia weik mambule,’ tenesulula ara, diksukum unauka.
Wini talak ara, na tenyamse ning nirya ara, anggunti akunum laka nyapmasinba, akunum kekenmalume. Bukni, sirya nirya dakne ning ati, tonok tonap nyapnusine. Ayupu ara, ani. Abuku noutamak sekeiamsik ning nirya ara, ‘Weik ikin ning ara, dan do?’ tenen, tenilelamsirye, ‘Aning ara weik mambule,’ tenepse ning ara ani. Ara, Allah el tibuk ilil tenebuka unamabe. Winibuka ubirye, Allah arye nun tukwak ninye ati, ‘Aning wininamlulume, aning ara kum wininamlulume,’ nyapdeiamsuk yupu ara, aninguk moubuka talinamabe. Aninguk talibuka bobibirye dobolbanamnyabe. Anyapmasin ning ara, urdem ati kume. Deiyok ara, Allah arye, ninye tukwak mutuku unamak ninye arye, ‘Aning ara weik mambule, tenepnamak,’ tenesilye ning ara, akunuma. Elce nyasilye yupu moubuka kekebibirye, elce nyasilye touk kibuka, el amu tam unamabe. Weik mambul ning ara, akunuma.
Allah el si Yahweh arye, anggun Israel nang, el mapu koproba ati, nyapsile. Narye anggunti, ‘Aning ara, wininamlume, aning ara, pia kum wininamlume,’ nyapdeipsise yupu moubuka talipmunce, diksukumuk unamlume. Tonda, anggunce yuk nang nirya, yupu bokolina ara, ninye urasin maka meina kumce, yupu dipkoprob ninguk kibuka bokeipnamlume. Winibuka unamluma deiyok ara, ani. Minopce na yanirye, anggunti lyepropnamsine. Tonda anggun mal olan nang noutam ara, ‘Narye na mapu ati, lopdeipnirye, lak kipdeipnamsine,’ tenyamse ning ara, lak kipdeipniba, anggun nirya arye eipnamlume.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Na Allah Yahweh arye nyapsine. “Tukwak mutuku noutam ulul ning nirya ap, im noutam ulul ning nirya ap ara, na taruk koproba arye, kwepdeipsiba ulule. Kanye talima erena kum, ‘Se nun malye unyabe’ tenen, ilil upliba, nimalyap asa unyak ninye ati, na kanye delinune. Tonda, sik malye unyak ning batakikirye, narye, ‘Aning ara wininamlulume, aning ara, kum wininamlulume,’ nyalisinye yupu nirya ara, moubuka kekebikirye, talibuka unyak ninye ati, na kanye delinune.” Allah arye, Israel ninye ati nyabuk.
Yosia birye, yuk nang ati ara, teleb kililamukce, elce imun kanye bolamik nang ap, bona utotoa kum nang ap ati, aning-aning kum talilamik nang ap ati, teleb kibuka melilamukce, yupu lipsisikin talak ara, sik bona utotoa kum nang ati, elce teleb kililamuk. Ati ara, el winilamuk ning nirya ara, nong telebuk winilamuk. Ati, an babye, bita tenipdelyame. Na Allah ati, diba tenebuka, nati dipkoprob bikininyak nang ara, dipkoprob ninguk wininyakce, yuk ikin unyak nang ap, daunyak nang nirya ati, telebuk kilinyake. Sikce yuk nang ati, tilila yupu nyabuka, ikin ning sik nong deice kum delinyake.
Na Allah Yahweh arye, anggun nirya ati nyapsine. Anggunce, yuk nang sik dam ara, diksukum teleb piluk donamlume. Ara, narye, ‘Aning wininamlum. Aning ara, pia kum wininamlume,’ nyapdeipsise yupu atouk winibuka, pia diksukumuk wininamlume. Tonda, ninye yupu bokolin talak ara, dipkoprob sik winilamak touk bikmunce, teleb kibuka yupu nyapmunce, wenepnamlume. Talye-talye winina kume. Mikip unyak nang arye, anggun amu tamuk unyak nang ati, ikin ning, sik nong deice deibikcopura, anggun deiyok nang arye, aikin unyak nang ati, lobuka melipmunce, lyelinamlume. ‘Teleb mutuku noutamuk uptibyeʼ tenen, yuk mutuku arye, anggun mutuku yanuka, tikilyangan nang ap, tonda winiryuk nenmace nang ap, yuwak kilapu ati, ‘Sik ning alubuka doproptibyeʼ tenen, pia kum moronamlume. Tonda, ‘Anang ati, yanipdongobuka optibyeʼ tenen, sik dam ikin ning kum delinamlume. Tonda, yata nang do nirya, sikce deiyok kum ati, malye kum winipmace buk, anggun deiyok nang arye, anang ati, talye lukparabuka, kum opnamlume. Sikda, malye kum wininyak nang ati, amutuku noutam arye, ninye kum onamlume.
Allah arye ayupu nyabukopura, ayupu ton dukdongobuka nyabuk. Nara Allah Yahweh arye, nyapsine. Sik kel weik bikamik nang arye, ‘E, nunda kel weik bikupu ati, nunda mambul weik nang,’ tenena kume. Winibuka tenebikirye, sik talima babye erebuka, kwalina kume. Tonda aning atonun, anggun mikip weik nang ara, “E, nunda mikip weik nang unyaba, ati, nunda mambul weike,” nyabuka, maknya kintina kume. Aning atonun, sik bona weik talin nang babye, ‘E, nunda aning-aning yala-yala nirya talinyabe. Tonda, bona weik talin nang unyabe. Tonda, nunda mambul weik nang unyabe,’ tenebuka, maknya kintina ap, kwalina ap, pia meme.
Ati, narye anggun malye weik winilamlum ning ara, narye, ‘Teleb dauplye. Namin kibuka kilipnamsine,’ nyabuka, anggun malye winin ning kum kipdeipsinyopura, anggunce tuba tonap, ‘Se, nunda pia malye weik winilamupu,’ tenepmunce, alye weik dakdanalume. Anggun malye winilamlum ning ara, pia kum luba kipnamlum ati, anggunda pia ilil upsilyeba, alye dakdanamluma ati, aminyan doyanamle talak ara, yatato yupu do nirya, anggunce yupu ton, pia kum nyapnamlume. Aning nirya, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye unune. Ati ara, narye ayupu nirya nyapmasina ati, aning nirya ara, dipkoprob nong upnamle! Allah arye, sik Israel nang ati, nyabuk.
Bukni, narye, ‘Malye-malyeuk winilamlinye bira, wenepniba akunum dipnamle,’ nyapse ning ara, dipkoprob dipnamle! Bukni, amalyeuk winilamlanye bira, aminyan talak, el malye winilamlye ning nirya bataklirye, tamubuka na dam yalirye, na yupu nyalul touk, diksukumuk teleb winiplyopura, el anye bira, kam unamlarya.
“Ati ara, wini talak ara, na Nebukadnesar birye, im deice ulul ninye deiyoknye Raja ara, Allah el tonoke. El siuk erepnirye, unamne. Ara, urdem ati kume. El pil dolye ning nirya ap, el ulul ning nirya ap, pia dipkoprob diksukum ninguk winilule atia. Tonda, ninye kanye talima erepdakirye, kwalinyak ninye ati ara, Allah elce amu tam kililule,” Nebukadnesar birye nyabuk.
Ati anggun moubuka tenenamlulume. Dipkoprop na pataniliba teninun ning ara, ani. ‘Sikce yuk nang nirya ati, bico tenebikirye, teleb ubuka melinamake’ tenen, patanulule. Tonda, ‘Sik nirya arye, na Allah ati, na si erepnikirye, pia si erenamniyak’ tenen patanulule. ‘Winiptinge’ tenen, weik arye patanilye ning ara, aning uka. Bukni, anggunce aning nirya kum winipmunyopura, na arena ati, kam ulul ning dobuka deipmunce, arepmunba, sik imam nang arye, uku dalyanganyake. Tonda, ‘Nun malye winin ning, kum daneipsuturye, namin kipsilyopura, nunti talye mangkau kibuka opsutu bukni, nun pununa ati, kam ulul ning dobuka arepnuyabe’ tenen, kam ulul ning obuka arepmunyeba, sik imam-imam nang arye, arelyanganinyake. Bukni, ‘Aning-aning nirya ara, weik mambul kume,’ tenenune. Anggunce yuk ninye ati, bico tenebuka melilulumce, nati si erebuka, na si erepnumunyopura, narye anggunti, kanye deipsitinirye, ‘Aning ara, weik mambule,’ tenepsitinye. Bukni, aning kum winilulume. Allah arye, sik Israel ninye ati, nyabuk.
Tonda, anggun ap, anggun apu yapu nang ap, punun deiyok nang ap, malye weik winilamlumba, narye min talak ulamik nang ap, anggun wini talak ululum nang nirya ap, anggun wenena ati, lo arepsinyeba, yuk pera mutuku yu nang arye, malye kipsikirye, dobuka yuk pera mutuku delilbinamsiake. Winilamsikiba, sik mal olan nang ulamik mutuku ak daulamik. Winilamika ati, anggun apu yapu nirya ati, sikce deiamikba, dadeipdanin banamak nang nirya ara, atonun malye winina ap, na yupu malye kina ap, aninguk winilamik. Yuk pera mutuku ak daulamikce buk, aminyan talak ara, anang arye sik malye winilamik ning ap, na Allah arye nyapdeiamse yupu yanibuka, mandipna kanye bobuka ulamikce ning nirya ap, tamubuka tenebikirye, ‘Se, nunda dipkoprob malye winilamupu,’ tenebikirye, ‘Winida diksukum kibuka, wininamapʼ tenebikirye, ‘Winida moubuka unamapcaʼ tenen, na si erebikceura, narye ton, tamubuka tenenamsine.
Bukni, pia teleb ning ara, diksukum teleb ubuka winin ninguk talibuka unamlume. Na patapnil ning ara, weik mek mikip arye balamle atonun, teleb winin ninguk, diksukumuk winimumnyeura, kanye delinamsine. Tonda, mek lilun talyeuk balamle atonun, anggunce tilila yupu nyana kumce, ‘Malye winipmalinye bira, malye winipmale,’ nyabuka, yupu bokolinamlulume. Teleb wininmalinye biti ara, ‘Teleb wininmale,’ nyabuka, yupu lipsisikuka bokolinmalulume. Winipmunya deice arye, telebuk ubuka, pil donamlume. Aning ara, batakana kum bukni, mek lia bukuka balamle atonun unamlulume. Winipmunyopura, narye anggunti, kanye delinamsine. Na Allah arye nyapsine.
Anggun ululum ninye nirya ara, Allah Yahweh arye nyasilye yupu, moubuka kekenamlulume. Sik kel weik ninye ara, ‘Nun malye wininyap ning ati, Allah arye wenepsilyak’ tenen, Allah Yahweh ati, pia ilil usiliba, pia moubuka kum unyake. Ara, talye ati kum nyapsine. Sik asik dobuka, amutuku unyap nang nirya ati nyasulule. Ara, “Pia moubuka tenenamlume,” nyabuka nyasulule. Allah Yahweh arye, yu yin talin nang, yupa pia weik tonun akunum dopdeipmalba, nun wenena ati, olyanusiyake. Ati, nun amutuku noutam unyap ninye nirya, elce nyasilye yupu ara, moubuka kekepnamabe.
Se, anggun amutuku noutam ululum nang kan-kan arye, anggun kanye amu tam kibuka ululum nango, anggun adiparyuk, Allah Yahweh el dam tamubuka yalulume. Tonda Allah arye, ‘Aning ara, wininamlume, bukni aning ara, pia kum wininamlume,’ nyabuk ning, talibuka winilulum nang ara, tamubuka Allah dam yamunce, Allah elce tenelul touk, winipnamlume. Tonda, ‘Atalak ara, nun ni Allah arye, yata nyapnamsil do?’ tenen, Allah dam tamubuka yamumce, moubuka kekedenamlume. Ara, kanye lamapdongobuka, Allah dam yamunce, kanye erelana kum aryuk, namin kanye bonamlume. Tonda, Allah arye, ‘Wininamlume, wininamlume. Diksukum winin ning ara, ani, aninguk talibuka, telebuk wininamlume,’ nyabuka laka nyapdeiamsuk yupu kekebuka, aninguk talibuka, telebuk wininamlume. Winipmunyopura, Allah Yahweh el yu, ‘Anggun Israel nang deice deipnamsin,’ tenebuk sum ara, anggun telebuk winilulum nang deice, ‘Bico tenepsuturye, wenen ning kum arepnamsil do? Arepnamsil do?’ tenena atia. Bukni, el kanye ara, nun walwale.
Na Allah Yahweh ara, im deice yin talen malaikat nirya sik talepsirye, sik deiyoknye unune. Minop talak ara, narye ayupu akunum nyapdeiamsise. Ara, “Anggun nirya arye, anggun tam nang nirya ati, dipkoprob diksukum kibuka yupu bokdeipdanamlume. Tonda, anggunce anggun kayapu nang ap, anggun tam unyak nang ap ati, pia namin arye bico tenelamunce, kanye delilanamlulume. Adiparyuk yu ubuka wenelana kume,” nyapdeiamsise.
Sik kanye deibuka, telebuk un nang ara, ani. Ara, sik kanye talima erena kum aryuk, Allah arye, “Etekdopuk unamlulume,” nyasilya ara, ‘Nunda talima malye ninguk winiyaba, ati, nun bidamnye aryuk kum winiptibye. Allah el melisilya deice aryuk teleb unamabe,’ tenebikce ninye ara, Allah lyeplirye, sik kanye talima talibuka, el mapu kipliba, el ap neika unamake. Allah arye sik kanye talima taliliba, el tam nang unyaka ati, sik kanye deibuka telebuk unyaka atonun, apia unamake.
Sik kanye deibuka, telebuk winin nang ara, ani. Ara, yuk nang ikin uplye nang ati, talima arepliba, melibikce nang ara, Allah arye anang wenena kumce, melinauk unamle. Tonda, yuk nang arye anggunti, malye winipbikceba, adiparyuk yu upliba, kum kwang daknamlume. Sikti malye winipmace nang ati, ila tamubuka malye kum wininyak bukni, namin kibikirye, anang ati teleb ulinyake. Ati ara, anang sik kanye deibuka telebuk unyaka atonun, pia unamake.
Anggun Farisi nang ara, anggun talima noutamak malye ning aupmasilabuk, ‘Teleb nang tenepnamsiyak’ tenen, nong bol deice ninguk teleb winilulume. Anggun bicoe, Allah arye wenebuka opnamsila ati, ilil kanye bobuka unamlume. Anggun malye winimunye ning ara ani. ‘Aning-aning nirya ara, Allah elcuk aresulul’ tenen, pia mitik ning bukni kuma ap, babok ap, erica ap bokuka, Allah ati ton arilulume. Winilulum bukni, weik mambul winin ning ara, batakalulume. Anggun batakalalum ning ara, Allah arye ninye nirya bico tenepsilirye, melisulul touk, ninye bico tenebuka kanye talima arena ara, anggun batakalalume. Tonda, ninye awinipmakce touk yupu lipsisikuka nyana ap, yupu bokolina ap anirya ara, Allah yupu noutamak aubuka bukni, batakalulume. Amitik ning Allah ati arimunya ara, teleb bukni, aning batakna kum arye, weik mambul ning babye, winipnalulume.
Anggunda, Allah el mapu ulaluma anya arye, anggun ni Allah arye, ‘Malye nang ara, daupnyake,’ kum tenesilirye, kanye aresulul touk, tonda, talye melisulul touk, anggun babye, atonun wininamlulume. Elda pia telebnye ulula anya arye, teleb ninye babye, malye ninye babye, bico tenebuka kanye aresulule. Anggunda el mapu ulaluma ati, anggun babye, wininamlume. Yesus arye el mapu ati nyabuk.
Ara narye, ‘Awininun ning nirya ati, dipkoprop malye winin ninguk ulule,’ tenenune. ‘Aning nirya ara na like,’ tenenun bukni, aninguk tuba winipnyopura, adeice arye akunum lakak unulule. Musa birye sekamuk mem yupu ara, teleb ninguk ulule. Deiyok ara, ‘Amalye ning winibicak’ tenen, “Meme,” nyabuka, yupu sekisulula anya arye, ayupu ara telebuk ulul bukni, nauk ara kanye talima malinye unune.
Aning asipdenutum bukni, anggunti tamubuka nyapsine. “Kume, anggunda talye tukwak ninye ululuma anya arye, Allah ati yata wiribuka, asipdetumce, elti, wenena yupu nyaptum do?” Nabi Yesaya birye sekeiamuk touk, ayupu dobuka, anggunti nyapsine. Elce sekuk yupu ara ani. ‘Allah arye kwepdeibukba, talye aulul ning aning-aning nirya arye, aning-aning nirya kwepdeiamuka deiyoknye Allah ati, “Anda yata ati, na unye touk kwepdeiamnulm do?” nyabuka, weneptu do? Kume, aning ara kum winipmantoe.’ (Yesaya 29:16)
“Sik dib tenena kum kilapu ap, sal ap, kum batakdanamlume,” nyapmasina deiyok ara, anggun walwal bukni, anggun dib tenelulum ninye arye, diksukumuk winimunya deice arye, aninye eipsikirye, aminyan dib tenepnamak do, kum do? Aning ara, kum biktibye anya arye, akunum dopdanamunye ninye ara, batakalana kume nyapsine.
Amalye winin ning nirya akunum batakmunyopura, anggun nirya arye, yuk ninye nirya ati, bico tenebuka melilanauk unamlume. Wininamlum talak noutamak ara, yuk nang arye, anggunti,malye usinyak ning ati ara, ‘Dauplye,’ tenebuka, namin kinamlulume. Ara, Allah arye, anggun ap, Kristus ap, kanye talima dukdongopsuka deice arye, anggun malye winin ning nirya ara, kum kipdeipsukce, namin kisilya atonun, anggunce yuk nang ati, atonun wininamlulume. Na Paulus arye, nyapsine.
Ati ara, arup anggun ni koproba Allah, el si Yahweh elce, ‘Aning ara, wininamlume. Aning ara, pia kum wininamlume. Tonda, teleb winina ara ani,’ nyapdeipsuk yupu nirya, narye boyanuka, anggun dam akunum nyapmasin yupu ara, moubuka kekepmunce, diba tenepmunyopura, anyapdeipsuk touk, ubuka wininamlume.
Aning ati ara, Allah arye anggun nirya ati, bico tenenyamsukce, ‘Aninye ara, na tenen, ninye na mapu unamak’ tenen, wibuka deiamsuka anya arye, malye una pia kum aryuk, anggun teleb-teleb ubuka wininamlum ning ara, nyapnusine. Ara, winiryuk baju ongolamaka atonun, bico tenebuka melilana ap, yuk nang ati namin kibuka melina ap, yuk nang ati kanye talima lamabuka amu tam una ap, ting-tingana kumce, namin asa arye unamlulume.
Se, anggun walwal arye, kanye bona kum nang atonun ululume. Narye, diba tenen ning aupmatu bukni, dipkoprop diksukum winin ning ton kum uplyopura, dipna atonun ulule nyapmasine. Anyapmasin yupu ara, ‘Deiyok aubtubuk kekeptibye’ tenen, patapmasilbuk, diba kum tenepmanulum do? Ati ara, deiyok ning tonok ubuk ning ton, laka nyapnusine.
Nyabukopura, Yosua birye ayupu nyabuk. “Ati ara, nun ni koprop Allah, el si Yahweh ati, ilil tenebuka unamlume. Allah arye nyasilye yupu nirya, moubuka kekepmunce, aninguk talibuka unamlume. Tonok ning babye batakana kume. Minop talak arye, anggun ni yapu, pia pera mutuku Efrat mek koubuka, otam ulamik talak ara, talye ning Isa Mutuku Dongonye el siuk erelamik ning nirya ara, bataknamlume. Tonda, anggun ni yapu arye, Mesir mutuku noutamak ulamik talak arye, Isa Mutuku Dongonye si erelamik ning nirya ara, bataknamlume. Yata yuk ning do nirya ati, ‘Nun ni koprop,’ nyabuka, yuk talye ning si, pia kum erenamlume. Allah el si Yahweh, el tonok ati, el talibuka, el amu tam ulamunce, el siuk erenamlume. El tonoka.
Anyapmasin yupu sirya dakna ning ati nyapnusine. Anggun nirya ara, tonok kanye bobuka, talima dukdongobuka, teleb-telebuk ubuka neika unamlulume. Anggun weitcapu silip tonok kanye tenebuka, kanye delilanyakce, neika ulamak touk, anggunce yuk nang patalye ning ati, bico tenebuka melinamlume. Anggunce, yuk nang anggun ikin usilye ning ati, ‘Se aning ara, mambule,’ tenebuka bico tenelanamlulume. Tonda yuk nang sik amu tam umunce, nimalye arye neika unamlulume.
Tonda, narye wininamne ning ara, nyapnusine. Narye anggunti, Allah kum moropnyopura, pia malye uptinye. Amalye winin ning, pia kum winipnamne,’ tenenuna ati ara, narye pia kum bataknamsine. Narye anggunti, tuba-tuba Allah moronauk unamsine. Tonda ‘Israel ninye arye, teleb diksukum una bisik anye, tenebuka, kel kinamlum’ tenen, narye diksukum winin ning, tuba peterenamsine.
Nyabuk bukni, Samuel birye, tamubuka nyabuk. “Allah el birye, ‘Aning winiptinge,’ tenesilye ning ara, namin asa arye, el amu tam una teleb do? Akam ulul ning dobuka, Allah ati uku dalbana teleb do? Pia weik teleb ning ara, dan do? Allah arye nyasilye yupu, kekebuka dobolbana ara, pia teleb ning atie. Mitik teleb ning ara, anggun malye winin ning, namin kina ati, kam ning obuka, uku dalbana uka. Aning atonun, mitik teleb ning ara, domba basam meta dobuka, uku dalbana bukni, weik teleb ning ara, Allah arye nyasilye yupu kekebuka, dobolbana uka.
ကြော်ငြာတွေ