Ahas el ulamuka ara, minop talak Israel tam ulamik ninye nirya, talibuka ulamik Raja-Raja nang arye, sik malye ning talibuka winilamik touk, el babye aninguk winilamuk. Winilamukce, Ahas el mi koproba ton obukabukce, isa si erena ati arebukce, uku dongobukba, uku arye dibuk. Winibuka deice arye, malye weik ning winibuk. Ara, minop talak ara, Israel yala ninye, Kanaan mutuku binuyik talak ara, sik Kanaan mutuku ulamik ninye arye, Allah tenina kumce, pia malye pil dolamikba, Allah arye aninye wenebukabukce, amutuku noutam arye yakdonokamuk. Ayakdonokamuk ninye, pia malye pil dolamik touk, Ahas babye, el mi obuka, isa arebuka deice arye, malye winibuk.
Mika 6:7 - Eipomek7 Aning dopropsuturye, kanye kum deipsutuba, nun domba basam, pia kum nukmanto ning, beribu-ribu bobitibirye, el si erena ati, areptibye do? Aninguk kum bukni, aning ap, Zaitun yo duk teikukaptibirye, puruptibirye, nintong teleb mek, pia weik tonun deiptuba, kwebuka arelbitibyopura, Allah Yahweh arye, kanye deipnamsil do? Akumopura, nun mapu pia winiryuk mapu dobuka, Allah el si erena ati, amapu obuka areptibyeba, nun malye wininyap ning ara, Allah elce namin kipnamsil do? Ara, nunce malye wininyap ning wenen ati, pununa ara, nunce deilinyab mapu dobuka obibirye, Allah ati areptibiba, kanye delinamsil do? အခန်းကိုကြည့်ပါ။ |
Mika 6:7
29 ပူးပေါင်းရင်းမြစ်များ
Aning kum bukni, pia malye weik winibuk ning ara ani. Ara, mesba dobuka kintinip deiamikak ara, Manasye birye, el mi koproba obuka, isa si erena ati, yanuka uku dongamuk. Tonda, Manasye elcuk, doyanamle talak winipnamle ning ati, isa mikip deice arye, aning laka nyan ninye wibuka delina ap, apil donak ati, kintinilina ap, tonda diamne nang, sik kanye arye, yupu sisikin nang ap, yupu ara, el ulamle ninye, on ning ati, kir don pil ap, “Do talak winipnamle ning laka nyapsilyame,” nyabuka, moron nang ap, malye ulamik nang nirya ati, ‘Neika ubirye, na ton biknamneʼ tenen, memepdeiamuk. Winyamukce, Manasye elda, Allah el dam pia malye ulamuk. Adeice arye, Allah Yahweh arye, el Manasye biti, ‘Na dam kum yatue,’ tenelamukce, yu weik el deice delilamuk.
Tonda Raja Yosia birye, winibuk ning ton ani. Elce, isa si Molek, el si erena ati, domik ning babye, daklobukce malye kipdeibuk. Winibuka deiyok ara, ‘Ninye arye, delilamak mapu bobuka, uku dongolamikba, uku dipnopura, winina deice arye, isa si Molek erelamik ning ara, bataknamak’ tenen, winibuk. Ara, ‘Amalye winin ning nirya ap, akintinibik mutuku ap, kum danamle’ tenen, aning ton uluplobuk. Amutuku si ara, Topet bukni, mutuku si ton Ben-Hinom mutuku dam winibuke. Amutuku ara isa si Molek, el si erena ati domik ning ati daklobukce malye kipdeibuk.
Ati ara, ninye deiyoknye, Raja Moab birye, min yuma deiamuk mi ati, ‘Na pununa ati Moab mutuku ninye deiyoknye, Raja kipnamle,’ tenyamuk miuk doprobuk. Ami doprobukopura, Raja Moab birye, ‘Na mi opnirye, Allah ati arepnyopura, na mal pinang olyanganina kumce bataknitinge,’ tenebukce, mutuku si Kir-hareset mutuku, antanap dongobuka denyamik poka keil deice arye, ami obukabukce, uku dongobuk. Ara, el mutuku isa ati arebuk. Winilamuka ati ara, sik Israel ninye nirya ara, ‘Se, aning ara, pia malye weik ati, aning ara kum winipmanamtueʼ tenen, pia ilil weik ulamuk. Winilamuka ati, sik adiparyuk batakikce, amutuku arye tamubuka, sik mutuku Israel tamuk bendobik.
Na talibuka weilamse sapi basam ap, kambing basam ap arye, moum yung ara, weik purubuka delilamse. Tonda, narye zaitun yo duk weik dakamsirye, keil pala deice arye, aning weik tonun purubuka delilamse. Winipsopura, zaitun mek ara, akeil pala deice arye, balamukba, kwebuka dilamse. Winipmanto ara, talye mek balamle touk, akeil pala noutam arye, banauk ulamnuk.
Nara aning-aning nirya kwepdeipsisinye biti, aning nirya ara, naryuk akunum talipse. Aning nirya ara, na ninguk ulule. Ati ara, sik yala nang ap, sik tam nang ap arye, sapi basam do, kambing basam do, aning dobuka, yan arepdemunye babye, aning kum dopropnamne. Aning nirya ati, kanye pia kum delinamsine.
Diba na ni Allah, narye pia malye winipsa ati, na mal olan nang arye, na kwit Uria obikba dibuka ati, el ining ara, na deice unulule. Anye obika deiyoknye bira, nauk unune. Ati, ance nati lyelonamnilame. Lyepdopniminyopura, ance diksukum kibuka unyak ning atibuk, narye an si erena ati, “Na lyelonulul Allah ara, diksukumuk ulule,” nyabuka, mot nyana deice arye, an siuk erenamkine.
Ninye arye an si erena ati, asum-asum nirya, kam ning obuka, anti arekinyak ning ara, kum patakulule. ‘Kam ning obuka, na dam boyanganamlulume,’ nyapnutumba, aning obuka boyakitinye bukni, aning kum nyapnuluma ati, kam ning ap, yuk teleb ning ap, kum boyanganamkine. Aning atonun, nun malye ning kilina ati, kam ning obuka, uku dongolyanganyap ning ara, kum patakulule. Ati na babye, kam ning obuka, an si erena ati, uku kum dongolyanamkine. Aning ara, Allah an kum patakulula ati ara, aning dobuka, arepkitinya babye, ance, ‘Aning ara, telebe’ tenen, kanye deibuka kum dolonalame.
Allah Yahweh elda, malye winin ninye arye elti, morona ap, ‘Nun malye un ning kilipsilirye, namin kipnamsil’ tenen, teleb ning weik arye arena ap, wininyak ning nirya ara, el kanye deibuka kum dolonamle. Allah arye anang ati yu tenelule. Bukni, ninye ton Allah arye, “Wininamlulume, aning ara pia kum wininamlulume,” nyabuka, nyasilye touk kekebikirye, moubuka wininyak ninye nirya ara, el kanye delilule. Sikce Allah ati, arena ning pia teleb ning kum upmalya babye, sik aninye arye morobice ning ara, Allah kekebuka dopdoplirye, sikti, kanye delilule.
Dipkoprop winin ning ap, diksukum ubuka ninye yupu lipsisikuka bokolina ap ara, teleb kibuka ubibyopura, Allah Yahweh kanye delisulule. Awinina ati ara, pia weik arye kanye delisulule. Bukni, ninye arye, ‘Nun malye unyap ning namin kipnamsil’ tenen, kam ning obuka uku danyaka deice arye, mitik tonun aryuk kanye delisulule. Allah arye, ‘Aning ara pia weik mambule,’ tenesulula ara, diksukum unauka.
Abuku sekamuk ning deiyok ara, Yehuda yala ninye ap, Yerusalem mutuku ulamik ninye ap arye, winilamik ning ati, Allah arye el yupu lak lena deiyoknye, nabi Yesaya biti, nyabuk. Yesaya el li bira, el si Amos. Anyabuk ning ara, Yesaya lengdar malamuk ning ap, Allah arye el talima pum tam yupu nyalilamuk ning ap ati, Yesaya birye sekuk. Atalak ara, Yehuda yala ninye, sik ninye deiyok nang, sik si ara Uzia ap, Yotam ap, Ahaz ap, Hizkia ap, ulamik talak noutam, Allah arye Yesaya el talima pum tam, laka len yupu nyalilamukba, ayupu nirya kekelamukce seklamuk. Ayupu ara, Yehuda yala ninye ulamik ning ap, aminyan talak winipnamuk ning ap ati seklamuk.
Libanon mutuku noutamak ulul yo aning-aning nirya ara, pia weik aupmal bukni, ayo aning-aning nirya weptibirye, ‘Nun malye wininyap ning pununa ati, uku dapnamap’ tenen, kintinibuka areptipya babye, ayo sukdongoptibye. Aning atonun, Libanon mutuku noutamak ara, ninye arye weinyak domba ap, kambing ap, sapi ap ara, kum nukmanto, pia weike daunyak bukni, akam ulul ning nirya bulubuka optipya babye, aning babye suktalipsutue. Anyapmana ara, urdem ati kume. Israel ninye sik malye wininyak ning dekna ati, kum punupmanto. Yo nirya ap, kam ulul ning nirya ap kintinibuka, ‘Allah arye nun malye winin ning namin kepsetue’ tenen, Allah ati areptipya babye, aning nirya deice arye, nun malye wininyap ning kum punuptue.
Tonda, anggunce Isa Mutuku Dongonye, el si Bahal, el si erena ati, anggun mapu koproba bobuka, keil taplakuka yangabuka kintinip deibikirye, anggun mapu obuka boyangalulume. Anggun mapu koproba dobuka, isa si Bahal el si erena ati, uku dalyangalulume. Awinimunye ning ara, narye ton anggunti, ‘Aning wininamlume,’ kum nyapdeiamsise. Tonda, ‘Aning wininamake,’ kum teinyamse bukni, anggun kanye aryuk tenebuka, winiluluma deice arye, malye weik winilulume.
Yata winipnamaka ati, siltong teleb ning, el si ara kemenyan ara, weik pera mutuku el si ara, Syeba mutuku arye bobuka, na dam boyanganyak do? Tonda, pia teleb gwei ap, yuk-yuk bona ap, weik pera mutuku arye bobuka, na dam boyanganyak do? Tonda, kam ning obuka, ‘Nun malye winin ning kum daneipnamsil’ tenen, boyakirye, uku dongonyak do? Aning atouk, yuk teleb ning ayala-yala nirya, na si erena ati, arelyanganyaka ara, yata deiyok ati do? Aning-aning nirya boyakirye, nati areninyak bukni, sik talima ara, na dam pia kum ulule. Malye wininyak diparyuk aning areniyake. Ati, aning nirya ara, ‘Na like,’ nyapsine.”
Tonda, Isa Mutuku Dongonye, el si erena ati, tukwak ning ap, yuk din ning ap, arelbanak kintinibuka deibikak, amutuku si ara, Tofet mutuku sisinyak sukumak bikirye, Isa Mutuku Dongonye si tuba erenyake. Ara, ninye si, Hinom birye deibuk mi taleamuk mutuku bikirye, sik erenyak isa si, el si Tofet, el si erenyake. Amutuku bikirye, aisa si erena ap, arena ap ati, sik mapu koproba uk, obuka uku dalbanyake. Wininyak ning ara, na Allah arye, ‘Aning ara wininamake,’ kum nyapdeiamse bukni, sikcuk wininyake. Tonda, ‘Sikce na si erena ati, aning winiptinge,’ tenen, pia kum tenelamse. Tonda, ‘Anggun dawiniplulume,’ kum nyapdeiamse. Kume, sik yuk aryuk, tenebuka wininyake.
Sikti, ikin arye wenepnamne ara, talye ati kume. Deiyok ara, sikda akunum ninye yuk talye nang ap, neika manyake. Tonda, yuk kilapu akunum domik nang ap, neika malamika deice arye, ubula yolalamik. Tonda, ninye orurake. Tonda, na si erena kumce, na batakuka, yuk mutuku ninye ap, neika unyak arye, isa si ererudake. Adeice arye, nati mapu delininyak ning nirya ara, obuka batakarudake. Obuka batakrikce, mapu ara dobuka, sik si erenyak isa ati, ‘Nunce opmanam mapu ara, aisa arye dinamakeʼ tenen, arelbarurake.
Sik Yehuda tam ninye ap, Israel ninye arye, ‘Nun ni koprop Allah ati arenamap’ tenen, sikce kambing ap, domba ap, sapi ap bobuka, Allah arenak banyake. Sikce, ‘Akam ning nirya obibirye bobuka, Allah Yahweh ati arepipyopura, elce melinamsil’ tenen, arelbenamak bukni, na Allah arye, ‘Telebe,’ tenepsinirye, kum dinamsine. Atonun anggunce ton kum eipnamnulume. Anggunce, ‘Allah arye lyepnamsil’ tenen, kanye deibuka, pil donamluma babye, na kanye kum delinamsine. Narye anggun nirya ati, akunum bataksinirye, anggun dam ara, pia kum unamne. Leipdopnamsine.”
Ati anggun moubuka tenenamlulume. Dipkoprop na pataniliba teninun ning ara, ani. ‘Sikce yuk nang nirya ati, bico tenebikirye, teleb ubuka melinamake’ tenen, patanulule. Tonda, ‘Sik nirya arye, na Allah ati, na si erepnikirye, pia si erenamniyak’ tenen patanulule. ‘Winiptinge’ tenen, weik arye patanilye ning ara, aning uka. Bukni, anggunce aning nirya kum winipmunyopura, na arena ati, kam ulul ning dobuka deipmunce, arepmunba, sik imam nang arye, uku dalyanganyake. Tonda, ‘Nun malye winin ning, kum daneipsuturye, namin kipsilyopura, nunti talye mangkau kibuka opsutu bukni, nun pununa ati, kam ulul ning dobuka arepnuyabe’ tenen, kam ulul ning obuka arepmunyeba, sik imam-imam nang arye, arelyanganinyake. Bukni, ‘Aning-aning nirya ara, weik mambul kume,’ tenenune. Anggunce yuk ninye ati, bico tenebuka melilulumce, nati si erebuka, na si erepnumunyopura, narye anggunti, kanye deipsitinirye, ‘Aning ara, weik mambule,’ tenepsitinye. Bukni, aning kum winilulume. Allah arye, sik Israel ninye ati, nyabuk.
Ance deiaminye mi koproba ton bobuka, ‘Isa el si Molok si erena ati, binuka opnirye, arepnuneʼ tenen, bobuka kum arenamlyame. Utenebuka, an mi dobuka, isa Molok arepminya deice arye, an ni Allah, el si ati yanipmince, wininalame. ‘Aning winipminya deice arye, el si yanipminyakʼ tenen, “Aning ara, pia meme,” nyapne. Nara, Allah Yahweh arye, “Aning ara pia meme,” nyapsine.
Anggun malye weik tuba-tuba winilulum ninye ara, ‘Nun malye ning dekna ati, kam ning obuka uku dabibirye, Allah ati si erebibirye, moronamabe,’ nyamunce, kam ning domba basam ap, kambing basam ap, anggun wa wining gandum ap, yakong atonun ning ap, boyanganauk ululum bukni, aning nirya ara, na like. Anggunce, ‘Nun ni Allah arye lyepnamsilarya’ tenen, kam ning ap, gandum ap, na dam boyangalulum ning ara, kum dolosunune. Tonda, anggunce na arena ati, meta weik ning obuka boyamunce, tup sekdoba uku dongopmunce, ‘Nun malye wininyap ning ara, kum kipdeipsila ati, nun Allah ap epdanuyabe,’ tenelulum ning ara, kum epdanamabe. Aning nirya ara, talye atibuk tenebuka winilulume. Anggun malyeuk winimunyeba, aning boyanuka arenululuma anya arye, narye aning nirya, pia kum dolosunune. Aning na lik anya arye, kum dinamne.
Na tenepmana ara, Amon yala nang ati, mal pibinmanya ani, sik nirya obuka sirya daknirye, teleb aryuk tamubuka, na mutuku yanganibuk, yatanye do, nati, ‘Telebe nyapnunʼ tenen, na aik pum tam arye, minopce kutukuka yalinye bira, dipkoprob narye anye obukapnirye, Allah Yahweh an si erena ap, si kina ap ati, arepnamkine. Ara, kam ning obuka arelyangalamik touk, tonda opnarye, uku dongolamap atonun winipnamakine,” Yefta birye, Allah ati nyalin yupu deice arye nyabuk.
Awala bitinye nyamuk touk akunum ubukopura, tamubuka el li Yefta dam yayuk. Yayukopura, akilmu el li birye Allah Yahweh dam ati, ‘Winipnamne,’ nyabuka, nyalin yupu deice arye nyamuk touk, akilmu dobuka, Allah el si erena ati arebuk. Ati, el akilmu ara, ninye dona kumce, wel ulamuka ani obukba dibuk. Ati ara, sik Israel mutuku noutam ulamik kilapu nirya ara, akilmu arye aning winyamuka ati, sikce aning tenipnarye, aketing tamun, aketing tamun nirya, like dumbarye sum deice arye, sik Israel kilapu, ‘Aning tupa biknamapʼ tenen, iknapi tam bai mutuku binuka engelamikce, malamik.
Nyabuk bukni, Samuel birye, tamubuka nyabuk. “Allah el birye, ‘Aning winiptinge,’ tenesilye ning ara, namin asa arye, el amu tam una teleb do? Akam ulul ning dobuka, Allah ati uku dalbana teleb do? Pia weik teleb ning ara, dan do? Allah arye nyasilye yupu, kekebuka dobolbana ara, pia teleb ning atie. Mitik teleb ning ara, anggun malye winin ning, namin kina ati, kam ning obuka, uku dalbana uka. Aning atonun, mitik teleb ning ara, domba basam meta dobuka, uku dalbana bukni, weik teleb ning ara, Allah arye nyasilye yupu kekebuka, dobolbana uka.
ကြော်ငြာတွေ