Singa mi ara, mikip weik uplirye ilil kum asa weik ulamle touk, Yehuda, an babye atonun ilil asa kumce mikip weik ulyame. Singa arye ‘Aning obuka dipnun’ tenen, kaliknin banmalya ani, oplirye diplyopura, el kanye deibuka asik teleb arye tamubuka yangalamle touk, an babye atonun winilyame. Singa din eiplirye kalikuka pipmalya arye, erebuka odilamle touk winilyame. Yu singa mapmalyak, ninye kum kam kamulamak touk, yata ninye arye anti yanuka kam kamupketing do?
Mika 5:8 - Eipomek8 Atalak ara, Allah pia weik arye, el mikip dobuka Israel ninye deice deiplyopura, Israel ninye arye, sik mal olan nang nirya obuka, sirya daknamake. Winibikirye, sik mal olan ninye nirya ati, malye kibikirye, pia kum kipdeipnamake. အခန်းကိုကြည့်ပါ။ |
Mika 5:8
29 ပူးပေါင်းရင်းမြစ်များ
Anggunce na Allah ati, ‘Elda bataknyabe. El ti kum tenenamabe’ tenen, pia lubakipnulum nang nirya ara, moubuka kekepnululume! Narye akunum nyapsise yupu ap, wini talak nyapsin yupu ap, moubuka kum kekepmunce, aninguk talibuka kum wininamlum nang nirya ara, wenebuka opsinirye, sice buklopnamsine! Winipyeura, yuknye tonok babye, anggun melina ati, yanuka kum lyepsitinge.
Tonok ning ara, bai tam ulamle yu weik kus, el si ara singa, elda bisina weik ap, yu weik ap ulul ning anya arye, aning ayala-yala nirya, banmaca noutamak arye, mikip dobuka balule. Elda ilil una kum diparyuk, yata ning do nirya, yuk kam ning aupmalye babye, talye mangkau kibuka mikip dobuka balule. Ilil pia kum tenelule. Elda, yuk bai tam kam ulamle ning nirya deice tam ulirye, sik deiyoknye atonun ulule. Yuk bai tam kam ulamle ning ayala-yala nirya ara, el amu tam unyake.
Sik pera mutuku arye yanamak yin talin nang ara, sik yupu weik arye, nyapnamaka ara, yu gus atonun ning, singa kus, el dina oplirye, yupu weik kamulamle touk, yupu weik nyapnamake. Sik aninye arye, ninye tomopnamak ning ara, singa kus arye, el dina obuka dipnulye ning, oplirye weik yupu nyalamle atonun ubuka, anang arye Israel nang bobikirye, sikce abatakikce nang, adiparyuk bobuka bindopnamake. Winipnamak talak ara, yuk mutukunye tonoknye babye, sik Israel yala nang ati, yanuka kum lyepnamle. Ayu nang arye, tonoknye ton kum batakuka binamak. Sik nirya bobuka binamak.
Ati ara, sik Israel nang arye uku dongona ati yo ara, bai kum dolbinmake. Tonda, ‘Nun aik yo patapsilʼ tenen, yo kan-kan ton kum wepnamake. Tonda, sik wa win dam kum bol banamake. Sik mal olan nang arye, ninye ona ati bomikce ning nirya, pia weik aupnamla ati, Israel nang arye, aninguk bulubuka, deibikca deice aryuk, sik asik yo ati, uku donamake. Tonda, God mutuku nang ap, sik melilamik nang ap arye, Israel nang, sik ning nirya alubuka dololamik ning, ara Israel nang, sik bona nirya ubula dopromik ning ati, kwang daknamsiyake. Ara, Gog ap, el yin nang ap, sik ning nirya ara doropnamak bukni, atalak ara, Israel nang arye, sik Gog tam nang taleamik ning nirya, tamubuka alubikirye dopropnamake. Na Allah Yahweh, aning-aning nirya talibuka, deice tam erebuka, pia mikip weik ununye birye, akunum nyapdeiamsa ati, aning nirya dipkoprob nong upnamlarya!
Aning ara, urdem ati kum nyapsine. Winipmanto ara, bai tam nong weik ulul kuse, yu kuse el si ara, singa kuse arye, kam ulamle ning oploplirye, dilamle atonun, narye anggun nirya ati, wenebuka opsinirye, sirya daknamsine. Winipsinya deice arye, lo arepneba, yuk pera mutuku ninye, yu ninye arye, anggun dam yakirye, malye kibikirye, tapu koubuka, sik mutuku tamubuka bobinamsiake. ‘Winipnamak’ tenen, na Allah arye, lo akunum arepneba, yuk mutuku ninye nirya arye, anggunti kum lyepsitinge. Narye akunum bataksinirye, pia memepdopniba, nara anggun dam kum unamne.”
Allah Yahweh arye, ayupu tonap dukdongobuka nyabuk. Se, na mapu koproba Israel ninye, anggunda weika arye wenebuka opsiniba, ninye weika arye dipnamlum bukni, anggun kan-kan ara, ninye mitik tonunuk batakdongopsiniba, kam tuba unamlum ninye ara, narye lyepsinirye, bulubuka tonok mutuku noutam deipnamsine. Winipmanto ara, domba basam weina deiyok nang arye, sik domba basam dobuka, tonokak bulubuka deibikirye, poka pum tam dobuka dongolamak touk, narye anggunti, aning atonun winipnamsine. Winipsinyopura, winipmanto ning ara, domba basam ara, teleb maning palamlyak binuka deibikiba, kanye deibikirye, maning dilamak touk, narye lyepdopsinyopura, teleb kipdeipsiniba, unamlume. Aminyan talak ara, anggun unamlum mutuku tam ara, ninye yala weik kipdeipsiniba, yupa pia weik upra banamake. Yupa weik ubikirye, amutuku noutamuk, kanye deibuka, pin-pin asa arye unamake.
Na Allah Yahweh arye, anggun Yerusalem mutuku noutam ululum ninye nirya ati, nyapsinye. Yerusalem mutuku noutam ululum ninye, anggun adiparyuk bamunce, anggun mal olan ninye nirya ati, yaniplobuka binamlulume. Ara, na anggun ni koproba Allah arye, anggunti, mikip weika arye arepnamsine. Winipmanto ara, sapi basam kisok deice, yang belelamle kat ning ulamle touk, mikip weik kipdeipnamsine. Tonda, sapi basam el yan kala tace kat weik ulamle touk, anggun yan nirya babye, mikip weik kipdeipnamsine. Winipmanto ning ara, kat ning el si tembaga ap, tonda kat ning, el si besi ap, mikip weik ulamle touk, kipradeipnamsine. Winipsiniba, pera mutuku yuk daunyak ninye ayala-ayala nirya, anggunce aninye ati, malye kibuka yaniptapnamlume. Winibuka unamlum talak ara, anggun mal olan nang arye, ubula dalubuka dopdobikirye, talinyak bon-bona aning-aning nirya ara, anggunce dalubuka dopropmunce yamunyopura, na Allah Yahweh, si erena ati arenamnululume. Sik yuk mutuku ninye arye, koulamak ning nirya ubula libuka, na dam boyamunce, na si erena ati, arenamnululume. Na Allah Yahweh ara, im sirya, mutuku sirya nirya talibuka, deice tam unirye, weik eren mikipnye unune.
Na mapu koprop ara, yuk mutuku ninye arye obuka dopropsikce, sik mutuku koproba bobiyikba, pera mutuku noutam binuka daulamika ani, wini tuba daunyakce, wini talak ara, mikip pia kumce, mitang asa unyak bukni, daulamik ninye nirya ara, mitik tonun dem tuba daunyak bukni, narye ila tamubuka weik kipdeipsiniba, anggunce deipmunyeba, dadeipdanin banamak nang nirya ara, pia weik upra banamake. Winipsinye talak ara, mikip weik ninye unamlume. Winipnamsen talak ara, na anggun ni koproba Allah ara, Sion mutuku deice unirye, anggun talinamsine. Narye anggunti, “Winibuka unamlume,” nyasiniba, pia aunamlume. Tonap tuba pia kum bataknamsine.
Aninye lyena deiyoknye, akunum yanuka kutukuka tiklyopura, Allah Yahweh el mikip weik anye el nong deice deipliba, el mapu nirya ati taliplirye, kalikuka meliliba, teleb ubuka unamake. Allah Yahweh el si ara, weik mambul si ulule. Ati, atalak ara, aweik ninye lyena deiyoknye birye, Allah el si mikip deice arye, Israel yala ninye nirya melinamle. Winipmanto ara, domba basam weina deiyok nang arye, sik domba basam ati, teleb din ning arebikirye, teleb arye weilamak touk, anye birye Israel ninye nirya ati, pia teleb kibuka mikip arye, kalikuka melinamle. Winiplyopura, sik nirya kanye lamapdongobuka ubikirye, teleb kanye bobuka unamake. Ara, urdem ati kume. Deiyok ara, aninye deiyoknye bira pia mikip weik unamla ati, im sirya, mutuku sirya ap, tukwak mutuku, im sirya, mutuku sirya nirya unyak ninye, anye eibikirye kibikcopura, el anye biti, ‘Se, elda dipkoprob mambul weiknye ulule’ tenen, elti, si erenamake. Ati, elce talinamle Israel ninye nirya ara, teleb kanye bobuka, pia lamapdongobuka unamake. Deiyok ara, elce talinamsila atia.
Nabi Mika birye, Allah ati nyabuk. Se, na ni Allah. An uminye Allah atonun, ton pia kum ulule. An tonok ulyame. Ati, Allah Yahweh ance wipdeiamsulum ninye, mitik anun sirya tuba aunmab ninye ara, nun malye wininyap ning nirya, namin kipsimince, lyepsilyame. Anda ninye tukwak nang ati, pia ton kum deresilyame. Nun malye wininyap ning dekna ati, adiparyuk wenebuka opsutum bukni, aning kum winimince, nunti tamubuka bico tenesimince, melibuka lyesilyame. Ance ninye ati, weik arye bico tenesilyame. Ance nun tukwak ninye ati, kanye delisilyame. Winibuka ulyamnye ati, moropkine.
Yehuda yala nang wipdeipnirye, mikip arepneba, sikda mal olan deiyoknye birye deiyok kiplirye, yuk nang ap mal olalamica ani, ninye nirya obuka, sirya daknamake. Aoplobice nang, sik nong deice ara, talye bental deice yanibuka balamak touk wininamake. Ara, na Allah Yahweh arye sik Yehuda yala nang ati melipniba, sik mal olan nang ati, nirya obuka sirya dakanamake. Aning atonun, yuk mutuku ninye, sik yin talin nang arye, kuda basam balye deice bukuka yanganmace nang babye, ayin talin nang ara, nirya obuka, sirya dakanamake.
Narye, ‘Anda sik domba basam weina deiyoknye atonun upnamlame,’ nyapmakina deiyok ara, ani. Narye amutuku, Yudea noutam unyak nang nirya ati, na bico tenen ning ton pia kum deipnamne. Na babye amutuku unyak nang, sik talima noutam, ‘Nun dam unyak nang ara, nun like,’ tenelana deiyok ning arepniba, sik nirya arye, ‘Anang ara, nun like,’ tenelanamake. Tonye birye, el dam ululnye biti, olana ap, walana apuk unamnyake. Winibibcopura, narye arepniba, sik tam talibuka unyaka deiyok nang arye, amutuku nang nirya ati, ikin ning deipnamake. Sik amu tamuk ukirye, imun kanye bobuka unamake. Winipnyopura, sik amutuku deiyok-deiyok nang malye upnamaka deice arye, sik mutuku nirya, malye dem kipdeibikirye, amutuku ning nirya, sikce malye kibuka bataknamake. Amutuku nirya malye kibuka sice buklopnamake. Winipnamak bukni, na Allah arye, amutuku nang nirya ati, bico tenepnirye, lobuka kum lyepnamsine. Sik ti ‘Lik,’ tenenuna ati, batakana uk unamne.
Bukni, atalak akunum dam uplyopura, Yerusalem mutuku nang ara, ‘Yuk mutuku nang arye amutuku nang obuka sice buklobikcakʼ tenen, narye kalikinamne. Winipyeura, yuk mutuku nang arye, ‘Yerusalem mutuku nang opnuyab,’ tenepnamaka babye, kum winipmanto upnamake. Winipmanto ara, ninye arye, weik ikin keil awamlye buk, sikce, ‘Akeil nun babye mikip aryuk erebuka yukak bobinamap,’ tenebikirye, tomoptinga babye, akeil kum tomopmanto unyake. Aning atonun, narye Yerusalem mutuku kaliklyeura, yuk mutuku nang arye, anang obuka kum sice bukloptinge. ‘Opnuyab,’ teneptinga babye, sikda olana uk upnamake. Bukni, ‘Yerusalem mutuku nirya, sice buklopnamabʼ tenen, mutuku sirya, im nirya daunyak nang nirya arye, Yerusalem mutuku dam yakirye, warikilyanamake.
Aning atonun tonda, atalak ara, sik Mesir mutuku nang arye, na Allah Yahweh dam kum yakirye, na si kum erepnikceura, aning winilamaka ara, anggun dam weik imun nakina yala arepnyeba, sik dam yanamle. Ara, sik yuk mutuku nang babye, weik kwalin talak, el si ‘Mitik Bai Aik Kwalyaʼ, na Allah Yahweh, na si eren ati, kum yanganamak nang, sik wenena ati, weik nakina yala arenamne ning ara, sik deice poupnamle. Mutuku sirya, im sirya nirya yanuka, na si kum erenamniak mutuku nang nirya ara, sik deice anakina yala arepnamne.
Winipnamle talak ara, dipkoprob aning-aning nirya deice tam talibuka, mikip weik talibuka ululnye Allah Yahweh, im deice unyak malaikat nirya, sik weik deiyoknye ulula anya arye, el wibuka deiamuk ninye ara, el mikipnye amu tam ulamikiba, el nong arye lelildongonamle. Adeice arye, sikce sik mal olan nang nirya obuka, sirya daknamake. Ara, ‘Ninye opnun,’ tenepne talak ara, tapu arye keil kirikdongobuka, bobanmana ani, akeil mikip upnopura, ninye nong deice dobuka opdandenamak bukni, Allah el ‘Naʼ tenen, ninye ara, melipliba, amal olan ninye malye kibikirye, obuka sirya daknamake. Winipmanto ara, ninye arye yu lelamle mek dibikiba kanye teleb ning wangabikiba, malye kibuka, lukparabuka ninye talye olamak touk upnamake. Winipmaka deice arye, obice nang, sik ining ara, pia weik binamle. Winipmanto ara, Allah arena ati, kam ning obikirye, Allah si eren aik pum tam deiamice, marikna deice ining likililamak atonun, ining weik binamle. Tonda, yangalin makau pum tam, ining dikdongobikiba, langdilamle touk, sik mal olan nang arye, omice nang ining ara, weika arye binamle.
Winipnamsen talak ara, narye tenepse touk, dipkoprob winipnamne. Adeice narye sik malye wininyak ninye nirya obuka sirya daknamne. Sik amalye winina ninye nirya obuka batakniba, sik anang deice ara, tuku butbuta deice yanibuka balamlum touk ubuka, sik nong deice arye, yanibuka banamlume. Nara Allah Yahweh, im deice yin talin malaikat nirya, sik weik deiyoknye birye nyapsina ati ara, aning nirya dipkoprob winipnamle.
Israel ninye ara, yim bai kam ap, kil bai kam ap arye, yu weik ulamrak atonun unamake. Ara, winipmanto, ‘Yuk kam ning obuka dipnuname’ tenen, duknubuka bulamdaka atonun unyake. Ati yata ninye arye, sikti, binuka duptinge do? Kume, opsicak ati, sik dam bana pia meme. Israel ninye babye, aning atonun unyaka ati, yuk mutuku nang arye Israel ninye ati, obuka sirya kum daktinge. Aning ati ara, yata mutuku ninye do nirya, sikce Israel ninye ati, ‘Teleb unamak’ tenen, teleb yupu nyabikcopura, Allah arye ayuk mutuku nang ati, teleb ubuka delinamle. Aning atonun, Israel ninye ati, ‘Ikin uptuba, malye upnamak’ tenen, malye yupu nyabuka, sun ninye ara, Allah arye ayuk mutuku nang ati, supliba ikin weik unamake. Bileam birye ayupu nirya ara, Israel ninye unamik ning ati nyabuk.
Yata asik nang do, yata mutuku nang do nirya, anggunti nong kanye deibuka kum melipsikirye, tonda anggun yupu kum kekepsikirye bataksikcopura, ‘Amutuku batakuka yuk mutuku binuyap’ tenen, tenepmunce binumunye talak ara, amutuku dupmasilye tuku ara, kilibuka batakmunce, yuk mutuku banamlume. Wininamlum ara, amutuku ninye arye, ‘Allah yupu batakmaba ati, nun yan tuku yanibuka, batakmasika atonun, ayupu nyalyanmasiak nang akunum batakmasiake. Se, sikce batakmasiak touk, Allah arye nun tibuk wenebuka bataknamsile,’ tenepnamake. ‘Aning tenepnamak’ tenen, narye nyapdeipmasin touk winibuka wininamlulume.” Yesus arye nyabuk.
Peterelamuk bukni, sik Yahudi yala deiyok nang arye, Paulus peterelamuk yupu yanibuka batakikce, elti, lulubikura, Paulus arye anang sik wenena ati, el baju juba deice palyamuk butbuta, bukwetebukce, anang ati ayupu nyabuk. “Allah arye wenebuka opsilyopura, sik ining anggun taruk tatang deiceuk upnamsile. Aning ara, na deiyok kume. Wini talak aryuk, talye kanye bobuka, Yahudi yala kum nang ati, peterelbinamne.” Paulus arye, sik Yahudi nang ati nyabuk.
Na kayapo, anggun kan-kan bukni, ton ninye arye, wini talak mambul yupu nyasilinye ati, ‘Nun like’ tenen, el ap, el nyasilye yupu ap, ati batakuka, ‘Kum kekebicak’ tenen, moubuka kalekelanamlulume. Ura, teneipdelulume. Minop talak ara, sik deiyoknye, talye tukwaknye birye, “Winina meme. Anggun kanye mouplulume,” nyalamukba, sik kum kekelamik ninye ara, kum lyepdanmanto ulamikba, Allah arye sik kum kekelamik ninye wenebuka oltakalamuk. Wini talak ara, im deice ululnye birye, nun nirya ati, “Winina meme. Anggun kanye mouplulume,” nyabuka wenesulula anya arye, sik minop talak ulamik ninye kum lyepdanmanto ulamika ati, wini talak arye mambul yupu nyasilinye batakipyopura, nun yata wiriptibya deice arye, lyepdatibye do? Kume, aning ara, kum winipmanto. Wini talak im deice arye nyasilinye batakipyopura, dipkoprop Allah arye aninye wenebuka oplopnamle. Aning ara, kum namin kipnamle.
Malaikat arye, nyalamik yupu mitik mambul bukni, ayupu yanilamik ninye ati, ‘Dauplye,’ tenena kum arye, wenebuka olamuk. Anang olamuka anya arye, wini talak weik mambul lyena ning kintinipsuk ning ara, ‘Mambul kume’ tenen, batakipyopura, Allah arye nunti, ‘Dawaplye. Sikti kum wenepnamne,’ tenepnamsil do, kum do? Kume, aning kum winipmanto ati, Allah arye ninye lyena ati kintinipsuk ning batakipyopura, dipkoprop opnamsile. Ayupu nyapmasina ara, nun Deiyoknye Yesus arye, ninye lyena ati, kai teleb yupu deiyok koubuka minyuma arye laka nyalamukba, el yupu kekelamik nang arye, nun dam yangalamikce nunti, “Yesus arye nyalamuk yupu ara, ani-ani,” nyabuka, nun dam laka nyabuka lak koprop peterelamsike.
ကြော်ငြာတွေ