Mika 4:13 - Eipomek13 Na Allah Yahweh arye, anggun Yerusalem mutuku noutam ululum ninye nirya ati, nyapsinye. Yerusalem mutuku noutam ululum ninye, anggun adiparyuk bamunce, anggun mal olan ninye nirya ati, yaniplobuka binamlulume. Ara, na anggun ni koproba Allah arye, anggunti, mikip weika arye arepnamsine. Winipmanto ara, sapi basam kisok deice, yang belelamle kat ning ulamle touk, mikip weik kipdeipnamsine. Tonda, sapi basam el yan kala tace kat weik ulamle touk, anggun yan nirya babye, mikip weik kipdeipnamsine. Winipmanto ning ara, kat ning el si tembaga ap, tonda kat ning, el si besi ap, mikip weik ulamle touk, kipradeipnamsine. Winipsiniba, pera mutuku yuk daunyak ninye ayala-ayala nirya, anggunce aninye ati, malye kibuka yaniptapnamlume. Winibuka unamlum talak ara, anggun mal olan nang arye, ubula dalubuka dopdobikirye, talinyak bon-bona aning-aning nirya ara, anggunce dalubuka dopropmunce yamunyopura, na Allah Yahweh, si erena ati arenamnululume. Sik yuk mutuku ninye arye, koulamak ning nirya ubula libuka, na dam boyamunce, na si erena ati, arenamnululume. Na Allah Yahweh ara, im sirya, mutuku sirya nirya talibuka, deice tam unirye, weik eren mikipnye unune. အခန်းကိုကြည့်ပါ။ |
Mika 4:13
28 ပူးပေါင်းရင်းမြစ်များ
Winibuka, elce amutuku nirya talinamle talak noutamak ara, keting wekelban tam, mutuku si Tarsis mutuku noutamak, ninye deiyok talibuka unyak ninye ap, laut mekwen noutamak bukni, mekwen deibuka, sekdongobuk mutuku unyak ninye nirya, el dam yakirye, elda ninye deiyoknye Raja unamla ati, sik talibuka unyak teleb ning nirya dobuka, el dam yanuka arelyanganamake. Tonda, keting yangan tam, Arab mutuku ap, Etiopia mutuku ap, ninye deiyok kibuka, Raja talilamik nang nirya arye, nun mutuku talipnamsil Raja atibuk, si erekirye, teleb ning bobuka, el dam arelyanganamake.
“Atalak aryuk amutuku nang arye, pia teleb aren ning bobuka, Allah Yahweh ati arelyanganamake. Anang sik urasin ara, pia teleb bol bobuka unyak nang ap, tonda nong weik cang arye nebuka unyak nang ap, mikip weik ap, ninye onyak nang unyakak ati, ninye ona ati weik kel deice arye kama ap bonyaka deice arye, yuk mutuku nang nirya arye anggunti, ilil weik usululule. Sik anang unyak mutuku ara, mek arye wilipnin biyuka deice arye, sik mutuku yuk-yuk bokuka unyake. Sikce teleb aren ning bobuka boyanamak mutuku ara, Allah Yahweh aning-aning nirya deice tam, mikip weik arye erebuka ulula ati, elda im deice yin talin malaikat nirya talilule. El ti aning arenamake. Ara Sion mutuku, Allah Yahweh arye, Na si asukumuk deipnamne. Amutuku ara ‘Naʼ tenen, mutuku,’ nyapdeiamuk mutuku dam boyanamake. Allah Yahweh ara, aning-aning nirya deice tam mikip weik arye erebuka ulula ati, elda im deice yin talin malaikat nirya talilule. El Allah atibuk bobuka arelyanganamake,” nabi Yesaya birye nyabuk.
Kekepsirye, na Yesaya birye nyapse. “Se, na yala nang, anggun Yudea tam ululum Israel yala nango! Winipmanto ara, ‘Gandum duk saknamleʼ tenen, gandum palamle ning sekukabikirye, ketingak deibikceba, kouluplirye, kala kopsakleba, duk teleb ning ara saklamle touk, sik Babel mutuku nang, sik mal olan nang arye, anggunti ikin ning weik, anggun nong deice deibikce, akunum yanipdongamsike. Tonda, winipmanto ara, gandum duk el bama ara kumanya arye bobilyeba, duk teleb ning dopropnukca ati, ninye arye gandum duk ara erebuka dobikceba, kumanya arye pu abuka, ban ning yalirye, gandum duk welamle touk, Allah arye akunum winyamsuke. Wini talak ara, na Yesaya birye Israel nang anggun ni koproba Allah Yahweh arye laka nyapdeipmuk yupu nyapnusine. Allah Yahweh ara, aning-aning nirya erebuka deice tam ulul mikip weiknye birye, im deice yin talin malaikat nirya, sik deiyoknye ulule. Elce anggun Israel yala nang ati, pia kalikuka disilirye, melibuka lyelosulule. Ati, anggunti teleb yupu na deice akunum nyapnuk ning ara, laka nyapsine.
Bukni, atalak arye dipdongobuka, dowinipnamle talak nirya ara, Tirus mutuku nang arye, yo bok weik dekuka dolonamak ning nirya ara, sikce sik ning ton kum moubuka delinamake. Ayo bok wekenamle ning nirya ara, Allah Yahweh el ninguk upnamle ati, Allah el tibuk bobuka arelyanganamake. Tonda, Tirus mutuku nang arye yo bok dolonamak ning ara bobuka, Allah Yahweh el tenen nang, el dam tuba unamak nang ati sik ak arenamake. Winiceura, Allah el mapu koproba, sikda teleb din weik tonun ap, teleb ongon baju ap, tuba dolona uk unamake. Allah arye na Yesaya ati, aning nirya laka nyapnuke.
Anang sik mal ara, taca lubuka bopnamake. ‘Israel nang opnuyapʼ tenen, sik yin ara, ‘Mal dopnamapʼ tenen, yin tapu pina kum-kum dibuka kintinipnamake. Talya taruk aryuk, kum talipnamake. Sik yu uplya ati, tulum asa bikbik abuka, pola yanamaka ati, anang sik kuda basam yan kala mikip ara, pia kat keil uku seknak ati, memebuka delilamak keil atonun upnamle. Ati akuda arye, tuku deice balamle ning, el si kereta perang bobuka balibuk, kereta yan roda ara, min libuka binamle. Winiplyeura, winipmanto ara, mikip weik kum, sik mikip, kum arye bubatikuka balamak touk kibuka, sikda bikbik abuka yanganamake.
Allah Yahweh arye, sik Babel mutuku ulamik nang ati, ayupu nyabuk. Ara, Anggunda, Babel mutuku noutam ululum nang ara, winipmanto ara, kat besi ning pakudakan ning, el si palu atonun ning, akunum kipdeipsise. Tonda, ninye olbana ati, na yin ap, na mal ap, atonun updeipsise. Winibuka nyapmasina deiyok ara, anggunda mutuku sirya, im sirya nirya unyak nang ati, yo nia dobuka, mal olan nang atonun kipdeipsise. Tonda, yata mutuku nang do, sikda ninye deiyok nang nirya ap, sikce talinyak nang ap, sik ninye onanye kipdeipsisiba, anggunce anang nirya obuka, sice bukuka bataklume.
Allah arye ayupu ton nyabuk. Ati pia ouku una kumce, sik mal olan nang ara, minop yakirye, sik Babel mutuku nang nirya ara, adiparyuk obuka, sirya dakanamake. Tonda, sik mal olan nang aryuk, Babel nang obikirye, sik nong deice yanibuka sunuknamake. Winipmanto ara, gandum duk teikna sapi basam arye, yanibuka teiklamikiba, gandum bamadem, tukwak sakliba, talye daulamle touk, Babel mutuku nang nirya ati, obuka, sirya dakanamake. Ati ara, na Allah Yahweh, im deice unyak yin talin malaikat nirya, sik deiyoknye unune. Israel ninye ati melinun Allah ara, na ununa ati, sikce na si ereninyake. Nara, mikip weik ununye birye, ayupu akunum nyapdeipmasine.
Nyabukopura, ayupu ton dukdongobuka nyabuk. “Atalak ara, aweik deiyoknye birye, im sirya, mutuku sirya nirya talinamle bukni, atalak noutamak ara, Allah aning-aning nirya, pia talibuka im deice ululnye birye, yuk weik Deiyoknye erepdeipnamle. Anye birye talinamle ning nirya ara, el Kerajaan nyalamak ning, pia aupnamle. El ti ara, yuk mutuku ninye nirya arye, talibuka el obuka malye kum kiptinge. Tonda, elce talinamle mutuku ap, ninye ap, yuk deiyok nang arye kum taliptinge. Aweik Deiyoknye birye, yuk ninye deiyok nang ap, yuk mutuku nirya ap, malye kipnamle. Bukni, yuk mutuku nang arye, elti, kum malye kipnamake. Elda pia tuba unamle.”
Minop talak ara, sik Israel nang ara, winiryuk sapi basam neplopmalye atonun, moubuka biklirye, pia teleb kibuka, gandum duk yanibuka, el bol koulamlume. Ati, winipmanto ara, ‘Aning ara kum optume,’ nyapdeipsiba, yuk mutuku nang arye, Efraim yala nang obuka, sirya kum daklamik. Bukni, wini talak ara, sik deice ikin weik ning deipnamne. Winipmanto ara, sapi basam tapu kirikdongobikirye, ikin yo el kum deice deipnaba, asapi basam arye, aning libuka balirye, tuku palin pil, weik ikin pil dolamle touk, sik Efraim yala nang ati, atonun winipnamne. Ara, Efraim yala nang arye deiamikba, dadeipdanin yangalamika ani, sikce deiamik nang ati, pia ikin pil dipnamne. Aning atonun, Yakub yala nang arye deiamikba, dadeipdanin yangalammika ani, deiamik nang ati, ikin ning ton arepnyopura, sik babye, asapi basam tuku palin pil dolamle touk upnamake. Ara, Efraim yala nang ap, Yakub yala nang ap, yuk mutuku nang arye, tapu koupdongobuka, bobikiba, pia ikin piluk dibikiba donamake. Ara, anggun wenena ati, dengna arena ning ati nyapsine.
Tonda aminyan talak, Israel yala ninye mitik tonun dem, sirya tuba unmace ninye ara, yuk mutuku ninye kan-kan dabinuka unamak bukni, pia mikip weik ninye unamake. Winipmanto ara, weik yu kuse el si singa kus ara, mikip pia weik ulule. Bai tam noutamak ara, yuk kam ning ton, yala weik aulul bukni, sik mikip ara mitik uka. Singa kuse ara, el mikip pia weik. Singa kuse yu weik ning arye, domba basam weklamaka kan-kan binuka weklirye, talye lukparabuka domba basam obuka diplirye, el si arye, kalibuka bataklamle touk, sik Israel ninye arye, yuk mutuku ninye kan-kan bikirye onamake. Ninye arye, yu weik singa kuse ati, yupu kum seklamak touk, yuk mutuku ninye arye, Israel ninye ati, yupu sekmanto kum unamake. Singa kus arye domba basam olamle talak, domba basam arye lyepdanmanto kum ulamak touk, atalak ara Israel ninye arye olbinamak ninye, sik bidamang ati, kum lyepdanamake.
Bukni, atalak akunum dam uplyopura, Yerusalem mutuku nang ara, ‘Yuk mutuku nang arye amutuku nang obuka sice buklobikcakʼ tenen, narye kalikinamne. Winipyeura, yuk mutuku nang arye, ‘Yerusalem mutuku nang opnuyab,’ tenepnamaka babye, kum winipmanto upnamake. Winipmanto ara, ninye arye, weik ikin keil awamlye buk, sikce, ‘Akeil nun babye mikip aryuk erebuka yukak bobinamap,’ tenebikirye, tomoptinga babye, akeil kum tomopmanto unyake. Aning atonun, narye Yerusalem mutuku kaliklyeura, yuk mutuku nang arye, anang obuka kum sice bukloptinge. ‘Opnuyab,’ teneptinga babye, sikda olana uk upnamake. Bukni, ‘Yerusalem mutuku nirya, sice buklopnamabʼ tenen, mutuku sirya, im nirya daunyak nang nirya arye, Yerusalem mutuku dam yakirye, warikilyanamake.
Yuk mutuku yu nang arye, ‘Yerusalem mutuku yanuka olbinuyap,’ tenepnamak talak ara, sik Yehuda noutam unyak yala nang nirya ara, mikip weik arepnamne. Ara, winipmanto ning ara, uku sekna ati, asing tilibikceura, ‘Uku seknamakʼ tenen, yo bobuka, uku sekikceba, uku minopce dilamle atonun, sik Yehuda tam nang babye, sik dam winibuka deipnamne. Winipmanto ning ton, ninye arye upna ubikirye, gandum kouamikca eipnukca ati, uku minopce balamak touk, Yudea tam nang ati, winipdeipnamne. Winipnamne talak ara, sik Yudea tam nang nirya arye, sik dana-dana mutuku sirya, im sirya nirya daunyak nang ara, ‘Opnamabʼ tenen, yakceura, Yudea tam nang arye anang nirya obuka, kum kipdeipnamake. Ara, sirik tam bisik yanamak nang babye, kwanim tam bisik yanamak nang babye, sik nirya obuka, sirya daknamake. Bukni, sik Yerusalem mutuku arye weik asik domika nirya, yu nang arye obikceba, asik oldem upnamle bukni, atalak ara, sik Yehuda yala nang ara, tamubuka tonap, amutuku noutamuk unamake. Asukumuk sikda namin arye dakeiam asa, teleb deice aryuk unamake.
Nyapsiba, amalaikat arye nyapnuke. “Aning bitinye ara, Allah arye, aning-aning nirya talibuka, deice tam erebuka, Pia Mikip Weik Deiyoknye ululnye, tukwak mutuku im sirya, mutuku sirya talilirye, weik deiyoknye ulule. Elce, ‘Abitinye nang, na pil melibuka dopnamnirakʼ tenen, minyak mek kwebuka, sik kisok deice dikdeibukce, sik akunum wipdeiamukba, Allah el dam tuba-tuba tikidurake.” Malaikat arye, na Zekaria biti, laka nyapnukba, kekepse.
Nyabuka asipdesiba, amalaikat arye tamubuka nyapnuk. “Akereta perang dumbarye balamuk ning, el nong noutam deiyok ara, ani. Ara, sik adumbarye kereta perang nong noutam ara, mutuku sirya, im sirya balamle kumanya yuk-yuk dabinamake. Ara, sikce, Allah aning-aning nirya talibuka, deice tam erebuka, Pia Mikip Weik Deiyoknye ululnye, el dam binmangu bukni, wini talak ara, tamubuka yamakce, yuk-yuk mutuku ton binamake.
Winibuka wininamlume. Minggu-minggu nirya, anggun Allah yupu kekena ati bulubuka weknamlum talak deice arye, anggun yuk-yuk bukni, anggun nirya arye, yo bok awapsilye ning awapsilye touk, noutamak arye bokuka, ‘Yuk mutuku dib tenebik ninye ati melibuka arenamap’ tenen, delinamlulume. Weika arye dololulnye bira, weika arye delinamle. Mitika aryuk dololulnye bira, mitika aryuk delinamle. Anggun yo bok awapsilye touk delinamlulum ning ara batakna kumce, pia arenauk unamlulume. Ara, na Paulus arye, anggun dam yanyopura, anggunce, ‘Se, Paulus yanmala anya arye, nun adiparyuk yo bok yata wiribuka bulupnuyap do?’ tenen, ‘Kanye imun upsilyak,’ tenena ati, nyapsine.
Teleb ulamikiba, sik ninye asik domikirye, anyaik dana-dana tam poka domica ara, el bublan tirikilongon ning ara, kat ning besi ap, tembaga ap arye, memepnamake. Apoka bublan ara, sik mal olan nang arye, dakuka kum daluploptinge, pia aunamle. Asyer yala nang nirya ara, keting tamun weik kam unamak touk, sik mikip babye pia weik unamle. Yuk mutuku nang arye, Asyer yala nang ati, malye kibuka kum bisipnamake.” Musa birye Asyer yala nang ati nyabuk. Ara, ‘Allah arye sik Asyer yala nang melipnamleʼ tenen ati, morobuk.
Winipnamlum bukni, sik Yeriko mutuku ninye dekna weik, kat ning tonok ara, nun ni koprop Allah ati arepnamabe. Ara, sik dekna weik kat ning nirya, emas ap, perak ap, tembaga ap, besi ap, kat-kat ning nirya ara, Allah el si Yahweh ati arelbinamabe. Aning dobuka, Allah el si erena ati, el delin aik delinamlume. Ara, Allah el ning uka. Yosua birye, Israel ninye ati nyabuk.
ကြော်ငြာတွေ