Mazmur 97:6 - Eipomek

⁶ Tonda, Allah arye kwepdeibukba, im noutam ulye ning nirya, eipnamaka deice arye, Allah el pia teleb, diksukumuk ulul ning ara, moubuka tenebibirye, bikinyabe. Tonda, tukwak mutuku, im sirya, mutuku sirya nirya unyak nang, yuk-yuk nirya ara, elce kwepdeiamuk ning ebicopura, ‘E, Allah ara, dipkoprob pia mikip weik tonun una ap, pia teleb unanye ulule,’ tenen, moubuka bikinyake.

Mazmur 97:6 ပူးပေါင်းရင်းမြစ်များ

2 Samuel 22:47

Ati ara, na ni Allah, an si ara Yahweh, kamuk ulyamnye ati, telebe nyapkine! Tonda, anda mutuku yangan keil lelilamsil touk, ance melibuka lelildongolamsulume. Allah anda mutuku yangan keil atonun usimince, nun Lyena Deiyoknye, nun ni Allah, an si weik arye erenamabe.

Mazmur 19:1

Allah ance kwepdeipnulumba, im noutamak ulul ning nirya ara, tukwak ninye eibikirye, an pia teleb unyak ning ap, weik dirina unyak ning ap ati, kel kibikirye, an siuk erekinyake. Ninye arye, im ap, im noutamak ulul ning nirya ap, eibice deice arye, ‘Se, Allah arye, pia teleb kibuka mambul pil dolule. El dam pia telebuk ulirye, el mikip arye pil dolul ning nirya ara, pia telebuk ulule,’ tenen, moubuka kel kinyake.

Mazmur 50:6

Im noutam ap, im deice ap, ulye ning nirya arye, Allah ati laka nyanyake. Ara, “Allah elcuk ninye tukwak nang nirya ati, ‘Teleb wininyak nang ara, ani. Malye wininyak nang ara, ani,’ nyabuka, yupu bokuka, delin deiyoknye bira, el tonoka,” nyabuka, laka nyanyake.

Mazmur 67:4

Winibuka an mikip arye lyepsiminyeba, im sirya, mutuku sirya nirya unyak ninye eibuka, kel bikikirye, Allah anti, “Nun ni Allah, pia teleb ulule,” nyabuka, ‘An siuk erenamkiyake’ tenen, moronyabe. Diba, im sirya, mutuku sirya, daunyak ninye nirya arye, antibuk, “Nun ni Allah, pia telebuk ulule,” nyabuka, an si erenamkiyake.

Mazmur 89:2

Na ni Allah Yahweh, ance nunti bico tenesiminya ati, narye wini talak arye, doryanamle talak nirya, an siuk pia ati erenamkine. Ara, mot nyana deice aniryuk nyanamkine. Nyanamkina ara, talye ati kume. Ance nunti batakna pia kum diparyuk, pia weik arye bico tenesimince, pia moubuka teleb kilisiminya ati, nyanamne. Tonda, ayupu bobuka, nunce deibibyeba, dadeipdanin banamak ninye, sik dam laka nyabuka peterenamne.

Mazmur 89:5

Tonda, “Daud ance deipminba, dadeipdanin banamak nang arye, an taliplum ning nirya, sikce pia talinamake,” nyabuka, nyalin yupu ton nyapdeiamlume. Tonda, “Daud an ap, ance deipnalam nang ap nirya ara, ninye deiyok nang bun ning deice, bukikirye, amutuku ninye nirya, pia talinamake. Ara, doryanamle talak nirya ara, yuk yala nang arye, Israel yala ninye ara, kum talinamake. Akunuma nyana ati, Selah,” nyapne.

Mazmur 98:3

Tonda, Allah arye, “Anggun ti, bico weik tenesununa ati, pia melisinirye, pia teleb kilinamsine,” nyalin yupu deice arye, nyapdeipsuk ning ara, akunum lak kibuka peteresulule. Atonun, Allah arye nunti, “Winibuka melinamsine. Anggun ti wininamsine,” nyasilye yupu atonun, batakna kumce, aninguk dipkoprob, tuba wininamsile. Ati ara, mutuku sirya, im sirya daunyak nang nirya ara, Allah arye, lyelosulul ning ara, akunum laksukum arye elinyake. Diba, nun Israel nang arye, si erenyap Allah ara, elce melibuka lyelamsuk ning ara, yuk mutuku nang nirya elilamikce, akunum biknamike.

Yesaya 1:2

Nabi Yesaya birye nyabuk. Se, Allah Yahweh arye, mambul yupu akunum nyapmasila ati, anggun nirya kekenamlulume. Anggun tukwak mutuku umunce, malye winimunye ninye nirya ara, moubuka kekenamlulume. Anggunda pia bicoe. Im deice ululum ninye nirya ara, moubuka kekenamlulume. Se tukwak mutuku ululum ninye nirya ati, Allah el si Yahweh arye nyabuk yupu ara, ani. Se, sik Israel ninye ara, ‘Na tenen ninye unamak’ tenen, wipdeiamsirye, pia melinun bukni, mitik mapu arye, talye-talye yupu nyaltakalamak touk, sikce nati batakaninyake. Sikce nati yaniniyake.

Yesaya 40:5

Aning nirya akunum winipmunyopura, Allah el pia teleb ulya ap, el dirina weik ulye ning ap ara, lakak uplyopura, ninye tukwak nang nirya arye elinamake. Allah el dirina weik lakak kibuka yanamle talak ara, ninye mutuku-mutuku nirya arye, neika eipnamake. Aning ara ‘Winipnamle do, kum do?’ tenena kume. Allah el si Yahweh, elcuk, ‘Winipnamle,’ nyabuka, ayupu akunum nyapdeipmasila ati, ‘Aning nirya ara, dipkoprob winipnamle,’ tenenamlulume.

Yesaya 45:6

Winipniba, keting panalyangan tam arye, dipdongobuka keting kum ulamle tam nirya ara, sik ninye nirya arye, ‘Elda Allah Yahweh ulule’ tenen, kel biknikirye, na siuk erenamniyake. ‘Ara yuk Allah ton kume, el Allah Yahweh ulula atonunye ton kum ulule’ tenen, kel kipnamake,” Allah arye nyabuk.

Yesaya 6:3

Winibuka banmekce, tonye ap, ton yuknye ap, yupu nyalanmekba kekepse. Ara, sikce, sik bidamnye ati, lakuka balsusunmekce, nyanmek yupu ara, ani. “Allah Yahweh, aning-aning nirya taliplumce, im deice yin talin malaikat nirya, sik weik deiyoknye ulyame. Allah Yahweh, anda, malye ning tonok babye kum ukilya ati, anda Pia Telebnye, Pia Telebnye, Pia Telebnye ulyame. Anda dikdik senauk umince, aning-aning nirya talibuka deice tam, Weik Erenanye ulyame. Ati, an pia mambul ap, pia teleb ap, weik dirina ap, uminye ning ara, tukwak mutuku unyak ninye nirya arye elikinyake. Aning-aning nirya elinyaka deice arye, an pia mambul uminye ning nirya ara, laka ululba, eibuka kel bikinyake,” nyanmekba eipse.

Yesaya 66:18

Ura, na Allah arye, tukwak nang im sirya, mutuku sirya nirya ara, sik kanye tenelamice ning ap, sikce mem pil donyak ning ap, sikce wininyak ning nirya ap ara, na elilamsa ati na akunum bikinune. Aminyan talak ara, na tamubuka yanyeura, tukwak mutuku im sirya, mutuku sirya ap, ninye ayala-ayala nirya ap, yupu yuk-yuk nyalamice nang nirya ap, noutam arye sal ton, kilapu ton, bulupdeipnamne. Sik aninye akunum bulup deipnye ati, wekice talak ara, na pia teleb unye ning ap, na pia mikip weik unilye ning ap ati, dirina weik unilye ning ara, lake upliba, eipnikirye bita biknamake.

Habakuk 2:14

Ninye arye dololamak dekna weik ning, aning-aning nirya ara, kum upnamle bukni, tukwak mutuku im sirya, mutuku sirya noutamak ara, Allah el si Yahweh ati, kel bikikirye, Allah el dirina weik ulul ning ap, el pia teleb winilye ning ap ati, moubuka biknamake. Winipmanto ning ara, laut mekwen lyu weik uplirye, amekwen arye atam nirya singnilongolamle atonun, tukwak noutamak nirya ara, ninye pia weik arye, Allah ati, kel bikikirye, Allah el dirina ap, el pia teleb ulye ning ap ati, kel bikikirye, el siuk erenamake.

Bilangan 14:21

Winipnaman bukni, sik kan-kan arye, na weik dirina ap, narye pia weik mambul pil dolamse ning ap, elilamik bukni, nati dib kum teneninyak kili sal nirya ati, wenepnamne. Deiyok ara ani. Dipkoprop nara, Kam Una Deiyoknye unune. Tonda mutuku sirya, im sirya nirya dipkoprob na weik mambul pil donun deice arye, na weik dirina ap, mikip ap, lak kiliba ninye arye elinyake. Abitinye ning arye, dipkoprob nyapsine. Min arye Mesir mutuku noutamak ap, mok cena kum ati ninye kum ulamik mutuku noutamak, Israel kili sal balamik sukum, ninye winipmanto kum pil ap, pia mambul pil ap, dolamsibuk, elilamnik ninye ara, anang dipkoprob wenebuka opnamnarya, nyapkine.

Matius 6:9

Anggunce Allah moronamluma ara, ani. Nun ni Allah im deice ululye birye, ‘Nun babye, yuk nang nirya babye, an siuk erebuka unamap’ tenen, moropkiyabe. Tonda, ance mutuku-mutuku nirya ap, nun tukwak nang nirya ap, talisilyamce, ‘Nun Weik Deiyoknye, an tonok unamsilam’ tenen, moropmabe.

Wahyu 19:2

Allah arye yupu bokeipsilirye, usilye ning nirya ara, pia diksukumuk ulule. El nyalul yupu nirya ara dipkoprop ulule. Talye Yolana Deiyok Kil, el malye ulamuka deice yuk mutuku ninye im sirya, mutuku sirya nirya eibuka kel kiyamikce, sik babye malye winin ninguk talibuka ulamik. Ati ara, Allah arye akil ati wenebuka oplopmale. Allah el pil dolamik ninye ati, yu nang arye oltakalamikba, sik ining saklamuk ning nirya ati ara, aninye olamika deiyok ati, akil deice deipmalce, sik ining kwang dakna ati, akil wenebuka oplopmale,” nyanmekak kekepse.