Mazmur 97:10 - Eipomek

¹⁰ Ati ara, yata nang do nirya, sikce, Allah Yahweh ati, ‘Nun ni koproba ani’ tenen, diba tenebuka, elti, kanye deipmunce, bico tenelulum nang nirya ara, anggun nirya arye, malye un ning nirya ati, anggunce, ‘Nun like’ tenenamlume. Allah el tibuk, anggun kanye talima, el deiceuk delinamlume. Allah arye, ‘Naʼ tenen nang, ‘Winibuka wininamak’ tenen, akunum wipdeiamsuk nang ati, “Aning ara, wininamlume. Aning ara, pia kum wininamlume. Winipmunyopura, narye anggunti, pia teleb kilinamsine,” nyapdeiamsuk yupu, moubuka talinyak nang ara, Allah arye, pia melibuka kalikisulule. Winilula ati, anggun mal olan nang ap, sik pia malye ning talibuka, wininyak nang ap ati, obuka sirya daklyopura, el ‘Naʼ tenen nang anggunti dobuka, teleb kipdeipnamsile.

Mazmur 97:10 ပူးပေါင်းရင်းမြစ်များ

Mazmur 101:3

Narye talye-talye ning ap, nong kum upnamle ning ap, malye winin ning ap, yuk-yuk ning nirya ara, pia kum elinamne. Aning nirya ara, narye ton, pia kum teninamne. Yuk nang do nirya, Allah arye, “Aning ara, telebe, aning ara, pia malye,” nyapdeiamsuk yupu nirya ara, sikce aning yanibikirye, malye winin ninguk talibuka, pia malye wininyak ning nirya ara, nara ‘Pia likʼ tenenuna ati, aning nirya ara, pia kum elinamne.

Mazmur 119:104

Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu nirya ara, moubuka kekenye deice arye, moubuka tenepnirye, moubuka bikinune. Ati, an yupu nyasilye touk kum bukni, yuk kirikuka malye bisikuk balamak nang ara, na like. Yuk ninye arye, “Nun telebuk wininmabe,” nyaplobuka, malye ning wininyak ning nirya ati ara, na yu unulule.

Mazmur 119:163

Nara, tilila yupu nyana ap, tenepce nyana ap, lululina yupu ap, nirya ati ara, narye, ‘Aning ara, na like’ tenen, pia like unulule. Bukni, na ni Allah ance, “Aning ara, winina telebe, aning ara winina meme,” nyapdeiamsulum yupu ati, narye pia kanye delinune.

Mazmur 121:7

Allah Yahweh arye, nun nirya ati, kalikuka melisilya deice arye, nun opmanto ning nirya ara, nun damak ton pia kum unamsile. Elce teleb ubuka melisilyeba, kamuk unamabe.

Mazmur 125:3

Tonda, anggun ninye deiyok nang ara, sik pia malye wininyak Raja-Raja nang nirya babye, pia asukumuk, sik kama talibuka, kum unamake. Ara, Allah arye, “Na yupu uk talibikirye, pia diksukumuk wininyak nang ati, ‘Amutuku tuku ara, arenamsine,’ nyabuka, nyalin yupu deice arye, akunum nyabuka arepsuka atia. Ati ara, nuncuk, amutuku tuku pia talinamabe. Amutuku arepnamsila deiyok ara, ‘Amutuku dobuka, sik diksukum wininyak nang, kum areplyopura, sikce teleb winin ning ap, na yupu ap yanipnikirye, ‘Malye winin ninguk wininamap’ tenen, sik taruk bibikikirye, ‘Malye winin ninguk, talibuka wininamabe,’ tenenyaka ati, nyapne.

Mazmur 145:20

Allah ati dib tenebikirye, elti, kanye deibuka wininyak ninye nirya ati ara, Allah Yahweh ance melipminba, an amu tamuk, kanye namin asa aryuk wininamake. Bukni, malye winin ninguk, talibuka wininyak ninye nirya ara, wenebuka oplopmince, sirya daknamlyame.

Mazmur 31:23

Atalak ara, na kanye ara, ilil weik upnuk talak ara, narye ayupu nyapse. Ara, “Se, nara Allah dam kum unune. Na on nang arye, pia yuk mutuku noutam bobinamnikba, asukumuk ununa ati, Allah arye eibuka, pia kum melipnutue,” nyabuka, malye nyabuka engepse. Bukni, narye Allah anti, moropkise ning nirya ara, ance akunum kekepnulume. Ara, narye anti, ‘Naio, ancuk na melipnilyame!’ nyabuka, moropkise yupu ara, ance akunum kekepnulumce, melipnulume.

Mazmur 34:14

Anggun sitang deice arye, ‘Malye yupu tabipyak’ tenen, pia moubuka kalikelanamlulume. Tonda, anggun sitang deice arye, tilila yupu ap, tenepce arye nyana yupu ap, pia kum nyanamlulume.

Mazmur 36:4

Sikce tilila yupu nyanyaka deice arye, yuk nang ati, ikin ning delinyake. Wininyaka deice arye, yuk nang ara, ikin kanye bobuka engenyake. Sik malye winin ninguk, talibuka wininyak nang arye, diksukum winin ning ap, weik bikuka wininyak ning ap nirya ara, akunum batakike.

Mazmur 91:14

Allah el si Yahweh arye nyabuk. Dipkoprop, na wipdeiamsinye birye, natibuk kanye deilinulula ati, narye el anye bira, lyelonamne. Lyepropniba, elda na amu tamuk uliba, nara el damuk, pia unamne. Ara, el anye birye, na siuk erenulula anya arye, narye elti, pia melibuka kalikinamne.

Amsal 2:8

Tonda, sik diksukum telebuk unyak ninye ati, Allah Yahweh arye melilule. Winibuka melilya ati, sik anang arye el tibuk, asum-asum nirya tenekirye, kanye deibuka unyake. Winibuka unyak ninye ati ara, elcuk melibuka kalikilule.

Amsal 3:7

Angguncuk tenebuka, kel bikamlum ning atibuk, ‘Nunda pia weik kel nang’ tenen, kwalina meme. Ati ara, malye winin ning nirya ara batakmumce, anggun ni koproba Allah Yahweh ati, ‘Elda pia weik mambulnye,’ tenebuka ilil unamsile.

Amsal 8:13

Allah Yahweh ati, ilil upliba, el siuk erenyakce, el tam uk si erenyak ninye nirya ara, ‘Malye winin ning nirya ati, nun like,’ tenekirye, batakanyake. Nara pia weik kel bikna deiyok ning arena deiyoknye ununa ati ara, narye, ‘Aning ara na like,’ tenenun ning ara ani. Ara, malye winin ninguk, talibuka unyakce, sik talima erelanyak ninye ap, erepdanuka kwalibuka kwalina deice uk unyak ninye ap, tenen arye malye yupu nyaltakanyak ninye ap, malye ning ayala-ayala nirya, talibuka unyak ninye ap, sik nirya ati, yu uniliba, ‘Na pia like,’ tenenune.

Yesaya 45:17

Bukni, Israel ninye nirya ara, Allah Yahweh arye lyepnamle. Winipliba pia kam uk unamake. Tonda yuk mutuku ninye arye, anggun Israel ninye ati, malye yupu nyabuka anggun deice kum lululinamsiake. Ati, pia alye kum dakdanamake.”

Yeremia 15:21

Wini talak anda pia malye weik wininyakce, pia yu weik unyak ninye, sik noutamak ulaminba, narye dipkoprob melibuka lyenamkine. Ara, deiyok kum upmalibuk, yu weik ukirye, yuk ninye ati, talye mania kanye bobuka, olonyak ninye noutamak unalam bukni, na Allah Yahweh arye, dipkoprob lyepropnamkine, nyapne.” Allah arye Yeremia ati nyabuk.

Daniel 3:28

Winibukopura, Raja Nebukadnesar birye nyabuk. “Sadrak ap, Mesak ap, Abednego ap, sikce si erenyak Allah ati, ‘Telebe,’ nyabuka, si erepne. Sikce si erenyak Allah arye, el malaikat dopkwetepmalba, el pil don nang Sadrak ap, Mesak ap, Abednego ap lyepmala ati bikne. Sikda na nyapse yupu yanipnikce, sik tenepmeka ara, ‘Nun opsitinga babye, teleb uka. Ara, nun si erenyap Allah arye lyepnamsila atia,’ tenebik. Utenebika ati, na yupu yanibuka, sik Allah ati, diba tenebik.

Daniel 6:22

Daniel birye, ayupu ton nyabuk. “Na si erenun Allah arye, el im deice pil don nang, malaikat dopdeipmanilba, yu singa kuse nirya sik si yanuka, lipdongobuka talipmanguba, sikce na nong kum dipmaniake. Na telebuk unmane. Aning ara, na si erenun Allah ara, el kele. Ara, malye un ning, el dam ton kum wininune. Tonda, na deiyoknye an dam ton, malye kum wininune. Ati, Allah arye lyepdopmanile,” nyabuk.

Daniel 6:27

“Allah aniryuk lyepsilirye, melinamsile. Ikin upsilye ning lyebuka, kanam asa ulisulule. Tonda, ninye arye kum winipmanto ning ap, laka kilin ning ap, pil dosulule. Ara, im deice ap, tukwak mutuku ap nirya, elce ulisulule. Ara, dipkoprob Daniel, singa kuse ulamika pum tam, dobuka dopkwetepsiba, Allah arye melibukba, singa arye, el nong ton dila si kum tobikak, dila kum eipse. Aning ati nyapsine.”

Amos 5:14

‘Kam uptibye,’ tenelulum nang ara, pia teleb unauk, pi dobuka unamlulume. Malye winin ning nirya batakmunce, ton pia kum wininamlulume. Adeice arye kamuk unamlulume. Winipmunyopura, nara Allah Yahweh, Pia Mikip Weik Deiyoknye unirye, im deice unyak yin talin nang nirya talinunye bira, dipkoprob anggun kan-kan unamne. Ara, anggunce, “Allah Yahweh arye, kalikuka melisulule,” nyabuka, laka nyalamlum touk, dipkoprob wininamsina ati nyapsine.

Amos 5:15

Aning atouk, ‘Malye winin ning ara, nun like’ tenen, pia diksukumuk unamlume. Yata malye winin ning do nirya, malye ning nirya batakmunce, ‘Aning ara, nun like’ tenen, malye ning pia kum wininamlulume. Winibuka umunyopura, dinamlume. Winipmunyopura, nara, Allah Yahweh, Pia Mikip Weik Deiyoknye unirye, im deice unyak yin talin nang nirya talinunye bira, dipkoprob anggunti, melinamsine. Telebuk winimunyopura, narye minopce wenebuka kum opsinirye, tuba tamubuka, tonap bico tenepsinyopura, Yusup el yala ninye ati, teleb updeipnamsine. Ara, anggun apu koproba, Yusup birye deiamukba, dadeipdanin yangalamika ani, wini talak babye ululum Israel ninye ati, na Allah Yahweh arye anggunti, bico tenesipnirye, melinamsine.

Roma 12:9

Ura, anggunce, ‘Yuk ninye nirya ati, bico tenebuka melinamabe,’ nyabuka tenepce arye talye yupu nyabuka, kum wininamlum bukni, dipkoprop yuk ninye ati pia bico tenebuka melipnamlulume. Tonda, malye winin ning aning-aning nirya ati, ‘Aning ara pia nun like’ tenen, bataknamlume. Malye ning tonok babye talibuka kum unamlume. Teleb winin ning yala-yala nirya ati, aninguk talipmunce kanye deibuka diksukumuk unamlume.

Roma 7:15

Tuba-tuba aninguk winuna deice arye, na kanye pia walwal unulule. Aning ara laka nyapnusine. Ara, na kanye talima pum tam arye, ‘Se, ateleb un ninguk wininamne’ tenen, patanulul bukni, dipkoprop teleb ning ara, tuba-tuba kum unune. Na talima pum tam arye, ‘Aning ara malye winin ning ati na like,’ tenenun ning uk, tuba malye upra banune.

Roma 7:24

Wininuna ati, nara pia imun kanye bobuka unune. Nara, weik malye wininanye bira, nauk unune. Na talye tukwak mutuku unun talak ara na nong yokuk unamne. Unmanya ani, aminyan talak dipkoprop dipnamana anya arye, yatanye birye lobuka lyepdopnutu do? Aning atonun, yatanye birye, teleb kipdeipnutu do?

1 Korintus 8:3

Bukni, yata ninye do nirya, Allah ati sik kanye talima, el deiceuk delilamak ninye ara, Allah arye aninye, el kele.

2 Tesalonika 3:2

Tonda, ninye mutuku sirya, im sirya nirya arye, dib kum tenenyaka anya arye, sik pia malye winin nang arye, Paulus ap, el neika pil donyak nang ap ati, ‘Malye ubikirye, obicak’ tenen, Allah moronamsululume.

Yakobus 1:12

Kanye imun ning uplirye, winilelye talak kum batakalirye, pia palibuka pil dolamlenye bira, kanye deibuka telebuk unamle. Ara winildena talak noutam nirya arye, ikin ning weik ulamlye bukni, elda pia darapdongobuka ulamlyopura, el dekna ning dopropnamle atia. Amenenga ning dopropnamle ara, Allah arye, “Na ti kanye deipnice nang ara, winibuka arepnamsine,” nyapdeibuk touk, pia kam una deiyok ning dopropnamle.

Yakobus 2:5

Ura, na kayapu, na nyapnusin yupu moubuka kekeplulume. Aning kum tenipmalum do? Sik diba tenena kum arye, talye tukwak ninye nirya arye, ‘E, anang ara, pia talye kankan ninye anya arye, sikda mambul pia kume,’ tenelamsikce nang ara, Allah arye akankan unyak ninye ara, kunum wipbuke. Allah arye wipsuka ara, ‘Dib tenena deiyok ning ara weik arye arepnamne’ tenen, anang wibuk. Deiyok ara, anang ara na Allah ati, ‘Weik arye diba tenenamniyake,’ tenepsuke. Ura, yata winin ning do nirya, Allah elda ikin kum uptue. ‘Aning-aning nirya kanam aniryuk ulule’ tenen, Weika arye diba tenenyaba anya arye, bona weik kum talinyab bukni, bona weik talinan nye atonun akunum kipdeipsuke. Tonda, Allah arye, ‘Na ti, kanye deibuka ulamice nang ara, na im deice talibuka unye ning ara, sirya talak arepnamsine,’ nyapdeiamsuk touk, arepsilibuk dolonamabe. Ati, talye kankan ninye wipsuka ara, kum tenipmalum do?

1 Peterus 1:5

Anggunda, Allah ati diba teneluluma ati, Allah arye, ‘Na mapu malye ubicak’ tenen, el mikip deice arye kalekuka lelilongosulule. Wini talak arye dipdongobuka, dotalak yanamle talak nirya ara, el mikip arye kalekuka lelisilyebuk, sirya daknamle talak akunum uplyopura, Allah arye lyen ning akunum kintiniyeiamsuk ati, Yesus aminyan talak tamubuka yalyopura, lyepnamsile. Atalak ara alyen ning nirya laka daneipnamsile.

1 Peterus 1:8

Yesus Kristus ara, minop talak kum elilamlum bukni, elti, kanye arepbuka, anggun kanye talima el deice deililulume. Wini talak babye, el nong kum elilulum bukni, elti, diba tenebuka, eluk talibuka umunyeura, elce anggun talima noutam, kanye deibuka pin-pin kilisulule. Kanye deibuka pin-pin kilisulul ning ara, talye ninye yupu deice arye, nun kum laka nyaptibye.

1 Yohanes 4:19

Allah arye nunti, minpola bico tenebukce melipsuke ati, nun babye aminyan uk, Allah el deice kanye deibibirye, yuk nang ati, bico tenebuka melilanyabe.

1 Yohanes 5:18

Nun kele, Allah arye sik talima kam bukeibuk ninye nirya ara, tuba-tuba malye kum wininyake. Allah el Mi Koprop wibuka deibuknye bira, Yesus, elce aninye ati, ‘Malye winibicak’ tenen, pia melibuka kalikilule. Yesus arye sikti, winiplyopura, pia Malye Deiyoknye, Isa Mutuku Dongonye, malye kum kipdeipsutue. Ton, dalubuka kum dopropsutue.

Wahyu 13:8

Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.