Mazmur 92:12 - Eipomek

¹² Tonda, nati, ‘Nun lik’ teneninyak nang ara, ance sikti, obuka amu tam akunum deiplum nang ara, na asing arye akunum eibuka bikamse. Tonda, yuk nang arye, na dam yanuka nyapnike. ‘An opnamap tenelamkik ati, Allah arye akunum wenebuka obukba, pia engebuka ngalukunyake,’ nyabuka, laka nyapnikba, akunum kekepse.

Mazmur 92:12 ပူးပေါင်းရင်းမြစ်များ

1 Raja-Raja 4:33

Winibukopura, koun ning ap, yo ap ati, ara Libanon mutuku palamle yo el si keipyal yo ap, keil poka tam palamle maning el si ara, Hisop ap, tonda maka ap, basam ap, tonda mek kin ulamak ning ap, tonda katoak ulamak ning ap nirya ati, nyabuk.

1 Raja-Raja 6:29

Allah el si eren aik pum tam abilinga urasin nirya ara, Kerub gambar puturubikce kweirya dopdeibik. Tonda korma yo ap, bunga urasin teleb ning ap, aning urasin atonun ning puturubik. Ara, abilinga urasin deice arye puturupdeibik.

Ester 9:5

Atalak noutamak ara, sik Yahudi yala ninye nirya arye, sik mal olan dam yayik ninye nirya ara, akunum obuka dakik. Yahudi yala nang arye bobuka, ya yu ning ap, si tace ning ap deice arye, sik yuk mutuku ninye ayala-ayala nirya, ‘Yahudi yala ninye nun like,’ tenelamik ninye nirya ati, obuka sirya dakik. Winibik ning ara, sik mal olan nang ati, sik Yahudi yala ninye arye, ‘Nun mal olan ninye ati, wininamabe,’ tenelamik touk winibik. Winibikce, aninye nirya obuka, sirya dakik.

Mazmur 1:3

Allah yupu moubuka tenelulnye bira, el wininamle ning nirya ara, telebuk wininamle. Anye el wininamle ning nirya ara, winipmanto ninye arye mek kup-kup ak yo koubikiba paplirye, bok teleb kibuka paplirye, duk moun talak li nirya ara, batakna kumce, teleb kibuka duk moulule. Tonda ayo bok kolubuka, kum saklamla atonun, Allah ati diba tenelulnye birye, wininamle ning nirya ara, telebuk wininamle. Deiyok ara, Allah arye diksukumuk wininyak ninye ati melilamliba, telebuk wininamake.

Mazmur 104:16

Allah Yahweh, elcuk Libanon mutuku wabum yo, el si ara, kepyal yo nyalamak yo kouamice dam ara, mok weik arye areliba, teleb ubuka palule.

Mazmur 148:9

Tonda, weik mutuku-mutuku nirya ap, mutuku dup nirya ap, yo duk moulul yo, ayala-yala nirya ap, aras yo ap, talye yo ayala-yala nirya ap arye, Allah el siuk erenamlume.

Mazmur 37:34

Ati ara, ‘Allah Yahweh elcuk melinamnile,’ tenepmunce, el nyapdeiamsuk yupu, anyuk moubuka talimunce, pia pi dobuka dukdongobuka wininamlulume. Winipmunyopura, Allah arye anggun erebuka deipsiliba, anggunce amutuku nirya talibuka unamlume. Tonda, aminyan talak, Allah arye, sik malye winin ninguk, talibuka wininyak ninye ati, weneplirye opliba, pia kum kipdeipnamle talak ara, anggun asing arye eipnamlume.

Mazmur 52:8

Allah arye anti, wenebuka opkilyeura, sik diksukum unyak nang arye eipkikirye, ‘Se’ tenen, mambul kanye bobuka, ilil pia weik unamle. Tonda, anda, malye winina deiyoknye biti, eipkikirye, akutubuka nalinamkiake.

Mazmur 72:7

Na ni Allah, ance elti, melipminya deice arye, elce talinamle ninye arye, diksukum teleb winin ninguk, pia ati upra banamake. Tonda, nun mutuku noutamak pil donamap ning nirya ara, ‘Awala-awala nirya mapbabiba, pia telebuk upra balamlya ani, sirya dakna talak babye, tuba telebuk unamsil’ tenen, moropkine.

Mazmur 92:7

Ance tenelyam ning nirya ara, sik walwal nang arye, aning ara anye tenebuka, pia kum biktinge. Diba, sik walwal nang ara, ance winilyam ning nirya ara, ‘Allah arye pil dolul deiyok ning ara, ani’ tenen, pia kum biktinge.

Yesaya 55:13

Parum tace atonun ulamle ning nirya ara, wa win dam yo atonun yo, el si ara kepyal yo uk punupnamle. Aning atonun kirikna tace atonun ulamle ning nirya ara, teleb keit ning el si murad yo palamle ninguk punupnamle. Aning nirya akunum winiplyopura, ninye nirya eibikirye, ‘Se nun ni koproba Allah, elcuk amalye ning punubukce, teleb ninguk deipmasile,’ tenen, kel kibikirye, na si Yahweh erebuka kinamniyake. Malye ning nirya kum kipdeipnirye, teleb ninguk punupdeipnyopura, ara pitin kilina ati winipniba pia unamle. Aning nirya ara, min kume kum danamle. Winipliba ninye mutuku-mutuku nirya arye, na Allah Yahweh ati, na siuk erenamniyake. Allah arye nyabuk.

Yesaya 65:22

Minop talak ara, anggunce domlum aik ara, yuk pera mutuku nang arye yanuka dalubuka dopromsik touk, pia kum wininamsiyake. Aning atonun, anggun wa wiamluma nirya, yuk pera mutuku nang arye yanuka dalubuka kipromsik touk, pia kum wininamsiyake. Amutuku ara, na wipdeiamse nang, sik unamaka ara, lo weik tonap, tabakuka arepneba unamake. Winipmanto ara, yo pia tiknamle atonun, ‘Naʼ tenen, ninye sikda keting tamun yupa pia weika arye kam uk unamake. Sik taruk deice arye, aning-aning nirya pil donamak nirya ara, sik dem aryuk talibikirye, kanye deibuka unamake.

Yeremia 17:8

Winipmanto ara, sik anang ara, ninye arye mitik yo dobuka, mek kup-kup ak donokikiba, ayo pabuka neplirye, el yating pur-purukuka, mek dongopliba, dou malamlya babye, bok teleb uplirye, kum koululamle atonun unamake. Amutuku noutam, dou man li upmalya babye, ayo kum koulupnamle bukni, el duk teleb kibuka tuba-tuba mounamle. Aning atonun, nati diba teneninyak nang ara, ikin unamle talak ara, ilil upliba, ‘Se yata winiptibye do?’ tenen, kanye teniltona, pia kum unamake. Sikce tuba teleb asa unamake.

Amos 2:9

Nyabukce, ayupu ton nyabuk. Se anggun Israel ninye arye, nati malye kilinululum bukni, tuba tonap tenipdelulume. Se, na mapu Israel nango. Sik Amori mutuku nang ara, pia weik nang ulamik. Sikda kepyal yo weik arye erebuka palamle atonun, ubuka nelamik nang bukni, narye meilyamsisa deice arye, sik Amori ninye ati, obisiplume. Tonda, pia kat yo, el si terpentin yo atonun ubuka, mikip pia weik ninye ulamik bukni, narye meilyamsisa deice, anggun Israel nang arye, Amori mutuku ninye nirya obisiplume. Aninye nirya obuka batakse ning ara, kum kel biklumce, luba kiplum do? Winipmanto ara, ninye arye, duk moulamle yo, duk nirya dakikirye, yo deiyok wepbikirye, el yating nirya bobikiba, ayo koululamle touk, Amori ninye ara, mikip weik ninye ulamik bukni, narye sik Amori yala ninye nirya oltaklamse. Ara, talye ati kum wamse. Anggun Israel ninye melina ati, winyamsik buk, kum kel bikamlume.

Mika 7:10

Minop talak ara, nun mal olan nang anggun taleamsikce, nyalamsike. “Anggun ni Allah ara, dan sukum ulul do? Allah arye melibuka kum lyepdopnamsil do?” nyabuka asilamsikce, nalilamsike. Bukni aminyan talak, Allah Yahweh arye nunti lyepsilirye, nunti teleb kipdeipnamle ning ara, sik eibikirye, alye dakdanamake. Tonda aminyan talak, Allah arye nun mal olan nang ati, yaniplirye, aninye obuka kum kipdeipnamle. Winiplyopura, winipmanto ara, ninye bisik balamicak, bental yanibuka balamak touk, Allah arye nun mal olan ninye nirya ati, yaniplirye, obuka sirya daknamlarya. Nun nirya aning eibibirye, biknamabe. Nabi Mika birye, Israel ninye nirya ati, aminyan winipnamuk ning tenebukce nyabuk.

Bilangan 24:6

Israel ninye nirya ara, sik yupa pia weika arye, unyake ati ara, sikda weik lyu mutuku lo weikak, pia telebak unamake. Ninye weik unyaka ati ara, doltakna aik weik delinyake. Tonda mek balamle mek kup-kup, ninye arye wa wibuka koubikiba, pia teleb ubuka moulamle touk, sik Israel ninye babye weik upre banamake. Sik kounamak ning nirya ara, telebuk kounamake. Allah arye mek kup-kup nintong teleb yo, el si ara gaharu yo atonun koupdeipliba, pia teleb moulamle touk pia telebuk unamake. Aning atonun, kat yo, el si ara aras yo, mek kup-kup koubikiba, pia teleb tiklamle atonun, Allah arye mikip arepliba, Israel ninye weik upre banamake. Winibikirye, mikip ap, teleb ap, unamake.