Raja Daud birye, aning wibuka nyabuka ati ara, Allah Yahweh arye, weik kanye ikin uk yala deiyok ning dobuka, sik Israel yala nang ulamik mutuku noutam nirya, asum beren tam talak arye, bulu buka, Allah Yahweh arye tenyamuk talak atouk, dipkoprob winibuk. Aning winibuk talak ara, aweik kanye imun uk dilamuk bukni, sik Israel yala nang ulamik mutuku nang nirya, dibika yupa ara, tujuhpuluh ribu (70.000) nang dibik. Ara iknapye tam, Dan mutuku arye dukdongobuka, utam uamuk weik asik Beer-Sheba mutuku, danoutam nirya ara, ninye weik dibik.
Mazmur 91:3 - Eipomek3 Yata ninye do nirya, Allah ati, dib tenebiceura, aning-aning nirya ara, sik opmanto ning dungnubuka yanganamle ning babye, Allah arye yupu sekliba, aning arye kum opsutue. Winipmanto ara, ninye arye maka wena wemikiba, mangkau yo duk dobuka diliba, youlule. Youpliba, ninye arye doprobikirye, batakanyak atonun, Allah arye elti, dib tenenyak ninye ati, melibuka lyelonamsile. Tonda, weik kanye imun uk, ninye weik dilamliba, ninye mutuku-mutuku nirya yupa weik arye dibinyakuk, ayala-yala nirya, nun dam yanganamle ning babye, Allah arye, ‘Na tenena ninye auk diplyak’ tenen, kalikuka lyepdopsiliba, telebuk unamabe. အခန်းကိုကြည့်ပါ။ |
Mazmur 91:3
16 ပူးပေါင်းရင်းမြစ်များ
“Tonda winipmanto ning ara, amutuku din patana ap, weik mambul uk talibuka ninye dipna ap, tonda sik koun ning koubikiba lyulamle ning ap, tonda koun ning koluna ap, tonda weik sul kwising arye, weik yakirye nun koulamap ning nirya dibikce talak ap, tonda anggun oldan nang arye yanuka olyasice talak ap, tonda, yata kanye imun ning yanamle talak do nirya, Israel nang arye anti morobikcopura, ‘Ance kekenamsilam’ tenen, moropkine.
Aning atonun, winipmanto ara, maka wena wepmacak, maka mangkau arye wekelbiliba, yupliba, loplobuka balamle touk, Allah arye, nunti lyepdeiamsuke. Tonda, maka wemica pum bisik biliba youpli bukni, tapu seklobuka, kuplobalamle touk, nun ni Allah arye nunti, winibuka lyepdeipsuke. Ara, Allah arye, nun oldan nang kan-kan arye, lyepsuke.
Tonda, ‘Anye nun lik,’ teneninyak nang arye, ‘Anye tomobuka opnuyap’ tenen, akunum kintinibik ning aupmala ati, na nio, ‘Ancuk kalekuka melipnamnilam’ tenen, moropkine. Ara, sik malye winin ninguk talibuka, pia malye-malye wininyak nang arye, ‘Anye tomobuka, opnuyap’ tenen, kintinip deibik ning pum tam, ‘Mangkau asa binirye, aning pum tam sakuka weknyak’ tenen, ance kalekuka melinamnilame, na nio.
Akamnye bira, moubuka bita kel kum kibuka ati ara, winipmanto ara, rusa basam wena tapu wemikiba, youplirye tikamli bukni, binmanto kum ulamlopura, ninye arye mal marabikiba, nong noutamak wekliba dibilamak touk ubuk. Akamnye birye, ‘Ikin weik ning upnamne arya,’ tenena kum diparyuk, talye kanye bobuka, akil ap neika birik. Tonda ninye arye, ‘Maka mangkau arye balibuk, youpliba tomobibirye opnamap’ tenen, maka balamle bisik, maka youn ning deibikiba, mangkau arye abisik wekliba, youlamle atonun ubuk. Ara, maka arye, ‘Aning pum tam wekna arye, youpnilyopura, tomobuka opnicake,’ kum tenelamak touk, kamnye babye walwalto winibuk. Akamnye birye, ‘Ikin weik ning upnamne arya,’ tenena kum diparyuk, talye kanye bobuka, akil el aik birik.
Aning ara, talye ati kum nyapsine. Yata nang do nirya ara, ‘E, aminyan talak noutam, asum deice arye, ikin weik ning yanamle. Asum deice arye imun ning ton yanamsil,’ tenen, kum biktibya ati, kum laka nyaptibye. Winipmanto ara, talye lakuka balamle maka arye, kum tiniptu bukni, mangkau kanye bobuka banmalyeba, ninye arye maka wena wemikca pum bisik wekelbiliba youlamle touk, nun babye atonun wininamabe. Tonda ikan youn ning, el si ara jala, mek pum tam dongobuka kalikmakiba, ikan mangkau arye bilyeba, youlamle touk unamabe. Aning atonun, ninye arye, ‘Se, ikin ning ara, atalak arye nun dam yanamle,’ tenen, aning min kum yanamlye talak, adiparyuk kum biktibya ati, kum laka nyaptibye. Nun tukwak nang nirya ara, dibina uk unamaba ati, nun mangkau kanye bobuka unyap talak ara, minop aryuk, ikin ning yalyopura, imun kanye bobuka unyabe. Aning min kum winipsilye talak ara, kum biktibye.
Bukni, dipkoprob nyapsine. Allah arye wipdeipnukba, el yupu lak nyana deiyoknye, nabinye unune. Ati, anggunda el mapu koproba, anggun Israel yala nang ara, ‘Kanye mouplulume! Allah arye wenepnamsile,’ nyapsine. Ara, ‘Mangkau kanye bobuka, talye lukparabuka, tuba malye-malyeuk ubiceba, Allah arye kanye imun weik ning, anggun wenena ati arepsilyak,’ tenen ati, ‘Anggunda kanye mouplulume,’ nyapsine. Bukni, na banun mutuku nirya ara, sik Israel nang arye nati, ‘Anye nun likʼ tenen, ‘Opnuyabe,’ tenepnikirye, maka webuka youlamaka atouk, ubuka kirikininyake. Tonda, Allah el si eren aik pum tam babye, Israel nang arye, nati, ‘Nun like,’ tenepnikirye, ikin ning dobuka, na nong deice delininyake.
Winipmanto ning ton, nyapnusine. Ninye arye, wena min wepmatingba, maka arye, ‘Na youpnamil’ tenen, wepmangtinga dam bituba youptu do? Tonda, wena wepmatingba, kum youptopura, adiparyuk, wepmating yala ara, talye biliktu do? Kume wena arye, maka youpliba, adiparyuk, tukwak sakalule. Aning atonun, bai tam balamle kam ning, wena wepmacak, mangkau arye yaniplyopura, wena youlule.
Bukni, ‘Se, nunda bona weik talin nang mapu uptibye’ tenen, pia pataplye ninye ara, atenen deice arye, Isa Mutuku Dongonye arye, ‘Sik malye upting’ tenen, sik kanye talima lilolibuk, malye un ning patalulbuk, malye weik wininyake. Tonda, nong kum upnamle ning bukni, talye-talye ning patana weik ap, malye usilye ning patana ap, akunum winiplibuk, malye weik wininyake. Wininyakopura, winipmanto ara, anoutamak arye, ikne pum bisik kabang balyebuk youlamle atonun, weik ikin ning pia malye ulisulule. Aning ara, kum lipsisikmanto.
Tonda, Isa Mutuku Dongonye arye, ‘Na malye piluk donamniak,’ tenen, sik kanye talima tapu koubuka deibuka ati ara, el ikne pum bisik atonun unyake. Bukni, Allah el dipkoprop yupu kel kibting deice arye, ‘Se, nun mankau arye malye winilamubu bukni, winira, akunum kel bikmapa ati, aning bataknuyabe,’ tenebikirye, ‘Moubuka tenepnamak’ tenen, nimalye arye peterenamlyame.
ကြော်ငြာတွေ