Mazmur 88:1 - Eipomek

¹ Sik Korah yala nang arye deiamiknye arye, Mazmur mot yupu sekuk. Ara, Allah yupu mot nyana deiyoknye arenamika ati, amot ara, sekeibuk. Tonda, amot yupu ara, ‘Yuk Allah yupu mot, el si ‘Leanot mot’ nyanmakceba, el lelim nyalamle touk kibuka, amot babye atonun nyanamak’ tenen, sekuk. Tonda, Ezrahi yalanye, el si Herman birye, amot yupu sekdeibuk. Ara, ‘Israel yala nang nirya arye, aning ara kel bikinamake,’ tenebukce, sekuk. Herman birye sekuka nyabuk yupu ara, ani.

Mazmur 88:1 ပူးပေါင်းရင်းမြစ်များ

Kejadian 49:18

Nyabukopura, Allah morona ati nyabuk. “Se, na ni Allah, ‘an dem aryuk lopdeipnimince, melinamnilam’ tenen, dinauk ukunune,” nyabuk. Nyabukopura, ayupu ton nyabuk.

1 Raja-Raja 4:31

Salomo elda dipkoprob kele weiknye ulamuk bukni, Maol el mapu Etan, Ezrahi mutuku ulamuknye ap, Herman, Kalkol ap, Darda ap, sik anirya, Salomo ulamuk atonun kum bukni, Salomo bira pia kel weik kiamuk deice arye, amutuku ninye nirya arye, Salomo siuk bikamik.

1 Raja-Raja 5:11

Aryamuk bukni, Salomo birye el ka Hiram biti, din ning el si gandum pia weik arye arelamuk. Ara, Hiram el aik unyak ninye sik din ning ati, empat ribu empat ratus kilo (4,400 kg) din ning el si ara, gandum libuka arelamuk. Tonda, yuk ning ton tabakuka areamuk. Ara, zaitun yo duk teikuka purubikba, minyak mekintinibuk ning ara, 440 liter areamuk. Tonda, Raja Salomo birye aning-aning arelamuk touk, aketing tamun, aketing tamun nirya, Hiram biti pia tuba arelbalamuk. Ara, Allah el si eren aik dolamik talak arye, dukdongobuka tuba arelamuk.

1 Tawarikh 2:6

Tonda, Yehuda el mi Zerah birye mapu ara, pamubarye deiamuk. Sik si ara ani. Zimri ap, Etan ap, Heman ap, Kalkol ap, tonda Dara ap deiamuk. Elce deiamuk mapu ara, pamubarye ulamik.

1 Tawarikh 6:18

Kehat birye mapu ton deiamuk nang, sik si ara ani. Amran ap, Yisar ap, Hebron ap, tonda Uziel ap, sikda Kehat birye deiamuk nang ulamik.

Nehemia 1:6

Ati ara keting noutam babye, lukunyan babye, narye anti tuba morokunune. Nara an amu tam unirye, an piluk donune. Ara, an amu tam unyak ninye, Israel yala nang nirya ati morokunune. Na nio, ‘Anda adiparyuk kekena ap, dina ap umince nirya biknalam’ tenen, morokunune. Nun Israel nang nirya arye, anti malye unyabe. Ara, na ap, na ni yapu ap, na yala nang nirya ap arye, an dam nun malye wininyap ning atibuk, laka nyapne.

Mazmur 140:7

Winibuka unyak bukni, narye Yahweh ati, “Naio, anda na si erenun Allah, an tonok ulyame,” nyanune. “Ance aning-aning nirya talemince, mikip weiknye ulyame ati ara, an ara na deiyoknye ulyame,” nyakinune. Ati ara, na ni Yahweho, narye anti morokunun yupu nirya ara, ‘Kekepnimince, minop yanuka, melipnamnilam’ tenen, moropkine.

Mazmur 22:2

Na ni Allah, keting noutam talak nirya, narye anti weik arye malye nyanmane. Bukni, ance yupu ton tamubuka, kum nyapmanilamce, yupu tana kum upmanilame. Ati lukunyan talak babye, mambul kanye bobuka, narye anti, tuba-tuba morokunune. Tonda, na kanye teleb kum unmanilba, malye kanye bobuka, moronauk ukunune.

Mazmur 24:5

Aninye ara, sik dam ara, Allah awinilirye, Allah Yahweh arye sikti, pia teleb kibuka delinamle. El pin-pin ning sikti, arelule. Allah arye sik Lyena Deiyoknye ulula ati ara, dipkoproba, sikti, ‘Aninye ara, akunum teleb kipdeipsa ati, diksukumuk wininyaka ati ara, kum wenepnamsine,’ nyabuka, teleb kilinamsile.

Mazmur 27:1

Daud birye nyabuk. Allah ance na dirina kilina ap, na lyena ap, Deiyoknye ulyame. Ara, weik kat poka cang arye erebuka dolamak touk, Allah Yahweh ance erebuka uminyeba, nara an amu tam unune. Ati ara, yuk nang nirya ati, ton birbir apnilirye, ilil kum unamnile.

Mazmur 27:9

Ati ara, na batakanina meme. Narye moropkinye talak nirya ara, an urasin tamuna meme. Ance nati, yu upkiliba, urasin malye bonina meme. Aning ara, ancuk lyelonilyamnye ati, ‘Na batakniminyak’ tenen, moropkine. ‘Tonda nara, an amu tam pil donanye ununa anya arye, narye anti, nyapnamne ning ara, kekebuka namin kipniminyak’ tenen, nyapkine. Anda, na ni Allah, na Lyena Deiyoknye unilyama ati nyapkine.

Mazmur 42:1

Daud mot deice arye, sik Korah yala nang ati nyabuk.

Mazmur 51:14

Minop talak Allah ance nati, lyepromnulumba, na kanye deibuka winilamse touk, ‘Wini talak babye, ila tuba tonap, talima melipnimince, teleb kibuka deipnutumba, kanye deibuka unamne’ tenen, moropkine. Ance na pin-pin ning arepniminba, dopropnyopda, na kanye talima lamapdongobuka arye unirye, ‘Na ni Allah atibuk, talibuka unamne’ tenen, anti kum bataknamkine. Wininunce, an nyalinimin touk, dukdongobuka unamne.

Mazmur 53:1

Raja Daud birye, ‘Israel nang kel biknamak’ tenen, aMazmur mot sekeibuk. Sekukopura, ‘Allah yupu mot nyana deiyoknye arenamak’ tenen, sekeibuk. Tonda, ‘Yuk Allah yupu mot, el si ara Mahalat, amot lelim nyalamle touk, anye mot babye, alelim deice arye nyanamak,’ tenebukce, Daud birye sekeibuk yupu ara, ani.

Mazmur 62:7

Allah elcuk weik mutuku kon keil atonun ulula ati, elcuk nati, kaliknilirye, lyelonamnile. El Allah damuk unyopura, kalikiniliba, nara telebuk unamne. Ati, ilil kum unamnile.

Mazmur 65:5

Ati ara, Allah ance, ‘Na si eren aik dam yanganamak’ tenen, wipdeipsulum ninye nirya ara, pia weik arye, kanye deibuka unamake. ‘Na dam yakirye, na siuk erebuka unamak’ tenen, akunum welisilyam ninye nirya, nun an dam yabirye, aning-aning nirya, kintinip deipsulum ninguk, talibuka ubirye, weik kanye deibuka unamabe. Ara, Allah an si eren aik, an uminyak, pia teleb sukum yanuka unamabe. Ati nun nirya arye, pin-pin kanye bobuka unamabe.

Mazmur 68:19

Nun ni Allah, ance weik mutuku deice weleplum talak ara, ninye arye, yuk nang tomobuka, tapu koupdongobik nang weik, an Allah arye, anang dobuka, Yerusalem mutuku boyalume. Tonda, ninye arye anti, kanye deibikce, teleb karin ning weik tonun boyanuka, an si erebuka dona ati arepkik. Ton ning ara, min arye an Allah ati, ‘Allah ara, nun likeʼ tenen, an yupu yanilamik nang babye, atalak arye, an si erebuka dona ati, teleb karin ning dobuka, arepkik. Wini talak ara, an Allah Yahweh arye, Yerusalem mutuku noutam unamlume.

Mazmur 79:9

Ati ara, nun si erekinyab Allaho, anda nun Lyena Deiyoknye usilyama ati, ‘Ancuk yanuka melipnamsilam’ tenen, moropkiabe. Ara, talye ati kuma. Deiyok ara, ance lyepropsiminyopura, yuk nang nirya eibikirye, anti, ‘Se, Allah Yahweh ara, dipkoprob mikip weik ap, teleb ap ulule,’ nyabikirye, an siuk erenamkiak tenena ati moropkiabe. Tonda, nun Israel nang ara, ‘Nunce malye weik wininyap ning nirya ara, mangkau kipsimince, aning nirya, kum kipdeipsiminyopura, nun ikin usilye ning ara, melibuka lyepnamsilam’ tenen, moropkiabe na nio. Aning babye talye ati kume. Deiyok ara, ance akunum lyepropsiminyopura, yuk nang nirya eibikirye, anti, sikce, ‘Se, Allah Yahweh ara, dipkoprob pia telebnye ulule,’ nyabikirye, an siuk erenamkiake.

Mazmur 86:3

Na si erenun Allah ara, an tonoka! Ati, ‘Anda weik tonun bico tenepnimince, melipnamnilam’ tenen, moropkine na nio! Anda, aning-aning nirya talimince, deice tam erebuka, mikip weik deiyoknye ulyama ati, diba tenekunune. Anda, mikip weiknye ulyama ati, asum-asum nirya ara, narye, ‘Naio melibuka lyepdopnilyame!’ nyabuka, antibuk morokunune.

Yesaya 12:2

Dipkoprob, Allah elda nun Lyena Deiyoknye ulule. Nunce el tibuk, diba tenenamabe. Nunda, ilil kum unamsil bukni, wini talak ara, ‘Allah elcuk, nunti melibuka lyedopnamsilʼ tenen, diba tenenamabe. Aning ara, talye ati kum bukni, deiyok ara, nun ni koproba Allah, el si Yahweh, elce nun mikip kilisulule. Ati ara, mot sena deice nunda el siuk erenamabe. Tonda, “Nun Lyena Deiyoknye bira, Allah eluk ulule,” nyabuka, Allah el si erenamlulume.

Yesaya 62:6

Na Allah arye, Yerusalem mutuku weik asik warikdongobuka cang keil poka dobik deice, ‘Nun mal olan nang arye, yanuka opsicakʼ tenen ati, kalikna deiyok nang ton wipdeipniba, anggun amutuku noutam ululum ninye ati, kalikinamsiake. Sik anang ara, keting noutam babye, lukunyan babye, talye mangkau asa kibuka, tunim abuka kum unamake. Bukni, pia tuba-tuba, na Allah Yahweh atibuk tenebikirye, “Nun ni Allaho, ance nunti, nyalin yupu deice arye, ‘Winibuka teleb kipdeipnamsine,’ nyamsulum ning ara, tuba teninauk unamlulume,” nyabuka, unamake.

Lukas 1:47

Tonda, na kanye talima arye, na Lyena Deiyoknye Allah arye lyepmanila ati, na kanye pia deipne.

Lukas 18:7

Allah arye wibuka deiamuk ninye ati, yuk nang arye, sik nong deice ikin ning weik delilamikceura, sik yu nang ati, Allah el mapu arye, ‘Nun ni Allah arye, yupu lipsisikuka bokeipsilirye, telebuk keipnamsile’ tenen, keting noutam babye, lukunyan babye, tuba-tuba moronauk unyake. Allah el mapu arye wininyaka ati ara, Allah arye sik pirinamle do?

Lukas 2:30

Aning ara talya ati kum nyapne. Deiyok ara ninye lyena ati, Lyena Deiyoknye dopkwetepmasilamnye, tukwak lake yalyeura, ninye mutuku-mutuku elinnamake. Tonda na babye, akunum eipmana anya arye, wini talak ara, na dibina telebuka.

1 Tesalonika 3:10

Lukunyan babye, keting noutam babye, nunce Allah ati, ‘Se, nun kayapu nang Tesalonika mutuku ninye ap, ila tonap epdatibirye, sik diba tenenyak ning noutamak lo usilye ning do, sukmalye ning do, tabakuka petereptibyeba, sirya dakana ati, moubuka pil doptibye’ tenen, morosenyabe.

2 Timotius 1:3

Na apu yapu arye, Allah el si erebuka, el piluk dolamik touk, na babye atonun, na kanye talima noutam ara, malye ning duknuna pia kum arye, Allah el pil ati pia diksukumuk unirye, pil donune. Atalak noutamak nirya ara, keting noutam babye, lukunyan babye nirya, Allah ati moronye talak noutamak, anti tenekinirye, kanye deibuka Allah ati, “Telebe,” nyakunune.

Titus 2:10

Tonda, aurdemuk pil donyak nang arye, sik deiyok nang bona ubula dolona kume. Aning kum bukni, pil dona do, yo bok dolona do, yupu nyana do, anirya ara, pia telebuk winibice nang ara, sik deiyok nang arye, ‘E, anang ara, pia dipkoprop teneptibye. Sik tenepce arye winin ninye kume,’ tenenamsiyake. Anyapmasin touk winibikce nang ara, telebuk winibicopura, adeice arye sik deiyok nang arye, nun Lyena Deiyoknye Allah el yupu ati, ‘E, ayupu ara, pia teleb yupu,’ tenepnamake.

Titus 2:13

Aminyan yuk talak ara, nun ni Allah pia mambulnye, ara nun Lyena Deiyoknye Yesus Kristus, im deice arye tamubuka dolyanamsil. El dolyanamsila ara, pia teleb ubuka, dirina weik arye yanamle. Men kum dolyanmasilye talak noutamak nirya ara, nun kanye bokoltona kum aryuk, ‘El dipkoprop dolyanamsil’ tenen, kanye pia deibuka, dinauk ubirye unyabe. Ati ara, tukwak mutuku noutamak tuba kam unamap talak ara, pia diksukumuk unamabe.