Bukni, na ni Allaho, nun akunum biknuyape. Dipkoprop ning ara, ance tukwak nang wininyak ning nirya ara, ance akunum elisilyame. Ara talye ati kum bukni, ance, ‘Sik wininyak ning nirya ati, bita eipnirye, sik wenena ati, dengna arepnamne,’ tenelyame. Tonda atonun, ‘Sik ti, yupu bokeipnamne,’ tenelyame. Ati ara, sik namin asa uk unyak nang arye, ‘Kume, nun wininamap ning ap, nun nong nirya ara, Allah el taruk deice delinyabe,’ tenen, anti pia diba tenekinyake. Tonda, nun ni Allah, ance sik kwaknamne mapu ati, pia moubuka dimince, kalekuka melisilyame!
Mazmur 86:1 - Eipomek1 Daud birye, aMazmur mot yupu nyan ning ati sekuk. Daud birye nyabuk yupu ara, ani. Se, na ni Allah Yahweh, narye anti moropkin yupu ara, ‘Moubuka kekeptum’ tenen, moropkine. Deiyok ara, wini talak ara, narye bona yuk-yuk ning nirya ton, kum talinun talak buk, ikin weik unun ati, ‘Ance melipnutumce, na ikin kanye doubuka ununa noutamak arye, lyepropnutum’ tenen, moropkine. အခန်းကိုကြည့်ပါ။ |
Mazmur 86:1
19 ပူးပေါင်းရင်းမြစ်များ
Sik ayala yuk-yuk mutuku nang nirya arye, an Allah ati, ilil unamla deiyok ara ani. Ara, anda Allah Yahweh arye, Sion mutuku ulultaklamik ning nirya ara, ila ton ap, tamubuka teleb kibuka dobikirye, pia telebuk unamle. Winipminyeba, eibikirye, ilil uplyeba, an siuk erenamkiake. Atalak ara, anda Allah Yahweh arye, an pia teleb winilyam ning ap, mikip weik winilyam ning ap ati, dirina pia weik upmince, tukwak yanuka unamlame.
Ance nyasiminye yupu yaniltalamak ninye noutamak wininuna anya arye, sikce nati, “Elda walwalnye ulula anya arye, talye ninguk talibuka winilule,” nyabuka, nati, yep-yep aninyake. Sik aninye arye, malye winilamaka noutamak arye, na ni koprop ance lyenamnilyame. “Ance nyalilamsulum yupu uk, moubuka talinune anya arye, ancuk lyenamnilyame,” nyabuka, moropkine na ni Allah.
Tonda, na nio, sik yu ubikirye, nunti talye minin yupu weik nyakce nang ara, ‘Nun Israel yala nang unyap mutuku noutam ara, tuba kum unamak’ tenen, moropkine. Ati, ance anang ara, yupu pia sekenalame. Ati, sik anang arye, yuk nang ati, onyak nang nirya ara, ‘An Allah arye sikti, kanye imun weik ning, sik nong deice deipnalam’ tenen, moropkine na nio.
Narye anti, ‘Se, na ni koproba Allah melipnilyame,’ nyabuka morokunune. Ance, dipkoprob na moropkinye touk kekepnimince, melinamnilama ati, na kele, talye ati kum morokunun ning ara, ‘Melipnamnilamʼ tenen, morokunune. Ati ara, na nio na morokunun yupu ara, moubuka kekepnimince, melinamnilame na nio.
Se, na ni koproba Allah Yahweh, anda, ‘Ikin ning na dam yanilyak’ tenen, ‘Ancuk nati, melibuka kalikinamnilam’ tenen, morokunune. Tonda, ‘Yu nang arye do, yuk ikin ning arye do, ikin upnilya babye, melipnamnilamba, alye kum daknamne’ tenen, morokunune na nio. Alye kum daknamne bukni, anda diksukum ulyam ning ap, ance nyapdeiamsulum yupu ap deice arye, na ikin unilye noutam arye, ‘An Allah arye melibuka lyepnamnilam’ tenen, moropkine na nio.
Tonda, kanye imun deice daunyak ninye nirya ara, ‘Allah arye melipnamsilarya’ tenen, sik kanye nirya, el deiceuk deibikirye, elti, diba tenenyak ninye ara, pin-pin asa arye, kanye deibuka unamake ati ara, sik urasin ara, telebuk unamle. Tonda, sik aninye nirya arye, aminyan talak ilil upliba, alye pia kum dakaldanamake.
Bukni, yata ninye do nirya, Allah antibuk, tuba diba tenebuka unyak ninye nirya ara, ‘Ance teleb kibuka deipminba, sik nirya pin-pin kanye bobuka unamak’ tenen, moropkine. Tonda, ‘Allah el dem arye lyebuka dolyanamsile’ tenebuka wininyak ninye nirya ara, ‘Pin-pin kanye bobuka unamak’ tenen, moropkine. Tonda, aninye arye, ‘Ninye tukwak ninye mutuku-mutuku nirya unyak ninye nirya ati, nun ni Allah, el si Yahweh pia erenamake’ tenen, laka nyanamake. Sikce, “Allah Yahweh, aning-aning nirya, deice tam talibuka, Pia Mambul Weiknye ulule,” nyabuka, el siuk pia erenamake.
Ati nun ni, ance ebuka kel bikinamsilame. Nunce an morona ati, nyapnukiyap yupu nirya ara, ance moubuka kekepnusilyame. Tonda, yata un ning do nirya, nun dam unamsil ning ara, ance eipnulyame. Nun ni Allah anti, Raja Sanherib birye, anda Kam Una Deiyoknye ulyam bukni, elce, ‘Allah ati ara, malye-malye yupu nyapnirye, elti, nalipnamne,’ tenebukce, ninye dopdeibukba, sikce amalye yupu yanuka nyapsike.
Na Allah Yahweh arye nyapsine. “Tukwak mutuku noutam ulul ning nirya ap, im noutam ulul ning nirya ap ara, na taruk koproba arye, kwepdeipsiba ulule. Kanye talima erena kum, ‘Se nun malye unyabe’ tenen, ilil upliba, nimalyap asa unyak ninye ati, na kanye delinune. Tonda, sik malye unyak ning batakikirye, narye, ‘Aning ara wininamlulume, aning ara, kum wininamlulume,’ nyalisinye yupu nirya ara, moubuka kekebikirye, talibuka unyak ninye ati, na kanye delinune.” Allah arye, Israel ninye ati nyabuk.
Tonda, nun ni Allah, ance nun moropkiyap ning kekepsilyame. Nun ni Allah, nun aik dobuka ulamupu mutuku, yuk nang arye, binuka uluplopsikba, imun kanye uk bobuka, unyap ning ara, ance eipsimince, melipsilyame. Ara, Yerusalem mutuku ara, ance ‘Amutuku noutamak ara, na si deipniba, amutuku noutamak ara, na si erenamniake,’ nyapdeiamsulum mutuku ati, moropkine na nio. Tonda, nunce anti, moropmakiyap ning ara, nun kanye aryuk, ‘Nunda diksukum unyap nang anya arye, morobibyopura, dipkoprob Allah kekenamsile’ tenen, kum moropkiyabe. Aning kum bukni, nun wininyap ning ati, talye lukparabuka, wenebuka opsutum bukni, ance eipsimince, bico tenebuka, nunti melisilyame. Ance bico tenesilyama ati, ‘Allah el teleb ulye deice arye melipnamsil’ tenen, morokinyabe,” nyabuka, Daniel birye, Allah ati morobuk. Tonda ayupu ton morobuk.
Sik kanye deibuka, telebuk un nang ara, ani. Ara, sik kanye talima erena kum aryuk, Allah arye, “Etekdopuk unamlulume,” nyasilya ara, ‘Nunda talima malye ninguk winiyaba, ati, nun bidamnye aryuk kum winiptibye. Allah el melisilya deice aryuk teleb unamabe,’ tenebikce ninye ara, Allah lyeplirye, sik kanye talima talibuka, el mapu kipliba, el ap neika unamake. Allah arye sik kanye talima taliliba, el tam nang unyaka ati, sik kanye deibuka telebuk unyaka atonun, apia unamake.
Allah arye na laka teleb yupu dobuka, ‘Talya kankan ninye peterelbinamle’ tenen, akunum wipdeipnuka anya arye, Allah El Dib Kanye arye el mikip weik arepnukura, unune. ‘Tapu koubuka deiamik ninye lolongona yupu peterelbinamle’ tenen, dopkwetepnuke. Tonda, asing guna ninye asing lalina ap, yaniplobikirye ikin ning sik nong deice delilamak ninye, ‘Melibuka erelina ap, wininamle’ tenen, dopkwetepnuke.
Ura, na kayapu, na nyapnusin yupu moubuka kekeplulume. Aning kum tenipmalum do? Sik diba tenena kum arye, talye tukwak ninye nirya arye, ‘E, anang ara, pia talye kankan ninye anya arye, sikda mambul pia kume,’ tenelamsikce nang ara, Allah arye akankan unyak ninye ara, kunum wipbuke. Allah arye wipsuka ara, ‘Dib tenena deiyok ning ara weik arye arepnamne’ tenen, anang wibuk. Deiyok ara, anang ara na Allah ati, ‘Weik arye diba tenenamniyake,’ tenepsuke. Ura, yata winin ning do nirya, Allah elda ikin kum uptue. ‘Aning-aning nirya kanam aniryuk ulule’ tenen, Weika arye diba tenenyaba anya arye, bona weik kum talinyab bukni, bona weik talinan nye atonun akunum kipdeipsuke. Tonda, Allah arye, ‘Na ti, kanye deibuka ulamice nang ara, na im deice talibuka unye ning ara, sirya talak arepnamsine,’ nyapdeiamsuk touk, arepsilibuk dolonamabe. Ati, talye kankan ninye wipsuka ara, kum tenipmalum do?
ကြော်ငြာတွေ