Mazmur 85:6 - Eipomek

⁶ Se, nun ni Allah, atalak arye dipdongobuka doyanamle talak nirya ara, tuba yu kanye uk bonamsilam do?’ Aning atonun, nunce deibibyeba, dadeipdanin banamak nang arye, aminyan dotalak dadeilinamak mapu nirya babye ati, ance sikti, yu tenebuka malye kanye bobuka unamlam do?

Mazmur 85:6 ပူးပေါင်းရင်းမြစ်များ

Mazmur 138:7

Na kele, pia ikin uniliba, imun kanye bobuka, unye talak babye, ance nati kalekuka melinilyame. Melinilyama deice arye, na mal olan nang arye, yu weik upliba, ‘Anye nun lik ati, opnuyabe,’ tenepnitinga babye, sikce kum opnamniake. Deiyok ara ani. Allah an sirik tam mikip weik ukulul taruk arye, lopdeipnimince, lyelonilyame. Ati, na mal olan nang arye, kum opnitinge.

Mazmur 149:2

Nun Israel nang yuk-yuk nang nirya ara, Allah arye kwepdeiamsuka deiyoknye bira, aulirye talisulula ati, kil-kil kanye bobibirye, Allah el siuk erenamabe. Ara, Sion mutuku noutam unyap nang nirya ara, nun ninye deiyoknye, Allah arye nun talisulula ati, nun deiyoknye Raja usulule. Tonda, Allah ap, neika unyaba ati, kanye deibuka unamabe.

Mazmur 53:6

Malye ninguk talibuka wininyak nang nirya ara, aminyan talak, pia weik tonun ilil weik unamake. Lyepliba, sik kan-kan uk unamle bukni, Allah ati diba kum tenenyak nang ara, ilil weik unamle. Ara, minop talak ara, mitik tonun ilil ulamik bukni, aminyan unamle talak ara, weik tonun pia ilil weik, kum tenepmanto ning unamle. Deiyok ara, Allah ati diba tenebuka diksukum kum unyak nang ati, Allah arye, anang nirya obuka, sice bukloplyopura, sik nong pum tam, yok nirya dobuka, yuk-yuk mutuku dana-dana tam dopkwetepnamle. Allah arye, amalye wininyak nang wenebuka oplyopura, alye weik tonun daknamake. Ara, talye ati kum bukni, Allah arye amalye wininyak nang nirya, obuka bataknamle. Elce sikti, ‘Na dam ton, pia kum yanuka unamake,’ akunum tenebuk atia.

Mazmur 71:20

Na kel bikna ati, ance ikin ning ap, imun kanye bona ati ap, pia weik arye areamnulumba, mitang ulamnukba, kum winipmanto ulamse. Bukni, wini talak ara, ance nati, kanye tamubuka teleb kipdeipnimince, mikip kipdeipnamnilame. Dipkoprop akunum dipmanto ulamsebuk, wini talak ara na kele, ance nati, ila ton ap, teleb kipdeipnamnilame.

Mazmur 74:1

Mazmur yupu mot sekenanye, el si Asaf birye, ayupu sekuk. Elce nyabuk yupu ara, ani. Se, nun ni koproba Allah, yata ati ance akunum bataksulumba, nun tuba ikin asa unyap do? Pia, bataknamsi ulum do na nio? Winipmanto ara, nun Israel ninye ara, ance weilyam domba basam atonun nang unyabe. Bukni, an yu pia weik upkiliba, nun Israel nang ati, tuba-tuba wanauk wininamsilam do?

Mazmur 77:8

Na ni Allah arye nati, pia biknuk ati, elce winipnilirye, kum melipnamnil do?’ Aning-aning nirya talibuka, deice tam erebuka, mikip weiknye, ‘Allah arye nati, bico tenebuka, kanye kum deilinamnil do?’ tenenune.

Mazmur 80:18

Ance wibuka, an sirik taruk tam deiamsulum nang ara, ance pia ati melinamsilame. Nunda, Allah ance deibuka, kwaknalamsulumba, nebupu nang ati ara, ‘Ance tonap mikip arepnamsilyame’ tenen, moropkine.

Mazmur 90:14

Na ni Allah, ‘Ance nunti, bico tenepsimince, an teleb winin ning, asum-asum lukunyan nirya, weik arye arenamsilam’ tenen, moropkine. Winipsiminba, nun kam unamap talak nirya ara, antibuk si erebuka ubirye, pin-pin asa, mot senamabe. Bico tenepsimince, melipsiminyeura, kil-kil kanye bobuka, telebuk unamabe.

Yesaya 57:15

Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.

Yeremia 3:5

Ance nati nyanilyame, “Atalak nirya pia yu tenebuka kum wenepnamnilame,” nyalyame. Ayupu ara ance nyalyame. “Se, Israelo ance ayupu nyaplyame.” Nyaminye bukni, wini talak ara, pia malye un ning weik winilyame.

Yeremia 33:11

Bukni, aminyan doyanamle talak ara, amutuku noutam nirya, tuba tonap teleb kipdeipyopura, weik kwalya kwalibuka dinmakirye, kanye deibuka, yupu ding weik nyanmakiba, yuk mutuku nang arye kekepnamake. Tonda, wel nang arye, dopdakirye, sik kilapu donamak nang ap, sik sal donamak kilapu ap ara, kanye deibuka, pin-pin kanye arye nyanamak yupu ara, yuk mutuku nang arye kekepnamake. Tonda, yuk nang babye, na Allah ati, telebe nyana ati, arin ning, sikce boyanuka, na si eren aik dam boyangakirye, kanye lon mot nyanmakiba, yuk mutuku nang arye kekepnamake. Sik amutuku unamak nang arye nyanamak yupu ara ani. “Se, nun ni koproba Allah Yahweh ara, pia telebnye ulule! Elda, im deice yin talin malaikat nirya ara, sik deiyoknye ulula ati, el mikip pia weik aulule. El ti, nunce ‘Pia telebe,’ nyanyabe. Allah ara, nunti, pia bico tenesulula ati, elce nunti, ‘Wininamsine,’ nyalin yupu deice nyapdeiamsuk yupu nirya ara, pia melibuka arenamsile. Elce bico tenesilye ning ara, pia min kume kum danamle!” Anang arye, ayupu nyanamake. Sikce, na Allah ati ayupu nyanamniaka ara, talye ati kume. Deiyok ara, ani. Anggun mal olan nang arye, malye weik kipdeibik bukni, narye tonap, pia teleb kipdeipniba, minop talak, pia teleb ulamuk touk upnamle. Narye winipnamsina ati, na si erena ati, ayupu nyapmakine. Na Allah Yahweh arye nyapmasina ati, aning nirya ara, dipkoprob nong upnamlarya!

Hosea 6:2

Winipsilyopura, like bitinye sum do, winilye sum do, mabipyopura, adiparyuk nipdopsilirye, teleb upnamsile. Allah arye, teleb kibuka kwetepsilyopura, elcuk nunti, teleb kilinamsile. Like winilye sum deice arye, pia teleb kipdeipsiliba, nunda el dam ton, tuba tamubuka tonap unamabe. Ara, elcuk, nun malye wininyap ning nirya, kum daneipsiliba, tuba tonap el damuk unamabe.

Habakuk 3:2

Habakuk birye nyabuk. “Se, na ni Allah, ninye weik arye, an si ap, ance weik mambul pil dolamlum ning ap ara, nyalamikba, na akunum kekelamse. Tonda, an Allah Yahweh arye, weik mambul pil, minop talak dolalum ning ara, kekepse ati, ilil unulule. Aning nirya ara, keting tamun, keting tamun nirya weik, mambul pil dolamlum ati, ‘Wini talak babye, aning tuba lak kibuka, pil dopsutum’ tenen, moropkine na nio. Wini talak ara, nun Israel ninye, pia malye weik winilamupu ati, ance yu kanye bosimince, wenenamsilam bukni, wini talak noutamak ara, pia tuba bico ukilye ning ara, luba kina kume. Nun malye winina ati, adiparyuk obuka, sirya daksutum bukni, ‘Nun ti bico tenebuka melinamsilam’ tenen, moropkine na nio.” Habakuk birye, Allah Yahweh ati, nyabuka morobuk.