Mazmur 85:11 - Eipomek

¹¹ Allah arye nunti, bico weik tenesilirye, “Aning ara, winibukapnirye, pia teleb kilinamsine,” nyabuka, nyalin yupu deice arye nyapdeipsuk ning nirya ara, pia kum bataknamle. Aning nirya ara, pia arenamsile. Tonda, elce, ‘Wininamne,’ nyalul yupu nirya ara, dipkoprob aning atouk winilule. Aning nirya ara, min kum uptue. Aning atonun, tonda elce nun tukwak mutuku nang ati, “Aning ara, wininamlume. Aning ara, pia kum wininamlume,” nyapdeiamsuk yupu nyamuk touk, aning tuba ulule. Tonda, aning-aning nirya ati, teleb kipdeipsilirye, olana kumce, pia telebuk unamabe. Teleb yupu nyasulul ning ap, telebuk kilisilyam ning ap, kikliman unamle.

Mazmur 85:11 ပူးပေါင်းရင်းမြစ်များ

Mazmur 72:3

Pia diksukumuk upra banmalya ani, adeice arye, nun unamap mutuku ap, nun talibuka wininamap ning ap, wa wibuka kounamap ning nirya ap ara, paplirye moulamlya ani, nong pia telebuk upra balyopura, amutuku noutamak unamak ninye nirya babye, telebuk unamake. Tonda, elce ninye deiyok talibuka unamle ning nirya, telebuk upra banmalyopura, ‘Elce talinamle ninye nirya babye, pia telebuk unamak’ tenen, moropkine.

Yesaya 4:2

Allah arye tenyamuk talak akunum kiplyeura, Allah arye, Yerusalem mutuku noutam winipnamle ning nirya ara, tuba tamubuka, pia teleb kipdeipnamlarya! Tonda, sikce kouamik ning yala-yala nirya ap, yo duk moulamle ning yala nirya ap ara, weik arye paplirye, pia teleb uplye ning ara, duk weik moupnamle. Atalak ara, sik Israel yala nang lyepdoplirye, amutuku noutam kam unamak nang ara, kanye teleb kipnamle. Tonda, sik koun ning weik nong uplyeba, libuka dikirye, ‘Se, wini talak ara, aning nirya ara, pia telebuk usulule,’ tenen, kanye dipnamake.

Yesaya 42:21

Na Allah Yahweh unune. Nara malye winin ning tonok babye, kum unirye, pia diksukumuk unune. Diksukumuk ununa anya arye, narye Israel ninye ati, ‘Aning wininamlulume, aning ara kum wininamlulume,’ nyapdeiamsise ning ara, pia teleb kibuka nyalamsise. Ayupu ara, pia teleb dirina weik kililamle yupu ulule. Winipsa ati, na kanye deiamse.

Yesaya 45:8

Na Allah arye, teleb winina ati deiyok ning nirya ara, im deice arye dopkwetepniba, tukwak mutuku noutam mok celamle atonun uplirye, diksukum una deiyok ning tukwak mutuku saklirye, ninye nirya sik talima wekliba, diksukumuk unamake. Aning ati, na Allah arye, akunum kintineipse. Tukwak mutuku, mutuku-mutuku nirya ninye lyen ning arepneba dopdobikirye, diksukum un ninguk weik upra banamle. Na Allah Yahweh arye, akunum keteneipsa ati wininamle.

Yesaya 53:2

Allah el si Yahweh arye tenelamuk touk, el pil dolamuknye bira, miklamle tukwak arye duk teleb ning betekuka palamle atonun ulamuk. Anye bira, urasin telebnye kum ulamuka anya arye, elilamuburye, elti, ‘Anye bira urasin telebnye,’ kum tenelamupu. Anye el nong urasin ara, liknye ulamuka ati, nunce elti, kum dildelamuburye, ‘Se, anye bira, nun kanye deibabe,’ kum tenelamupu.

Matius 17:5

Peterus arye ayupu tuba nyanmok talak ara, sik amutuku dup unmek bukni, dua arye siktikmek mutuku nirya palibuka lelipdongobukura, adua kan-kan arye, Allah arye ayupu nyabuk. “Aunmalanye bira, na Mi Koprop ulula ati, elti, na kanye pia delinune. Anggun nirya ara el yupu pia moubuka kekenamlulume,” Allah arye nyabuk.

Matius 3:17

Bulyayukopura, Allah im deice arye ayupu nyapdeibuk. “Anye bira, na Mi Koprop ulule. Narye elti, pia bico tenenuna anya arye, elti, na kanye pia deilinune,” Allah arye nyabuk. Nyabukopura, Allah El Dib Kanye arye, Yesus talima noutam nyapdeibukba, Yesus ara ninye pia kum ulamik mutuku, pata mutuku noutamak biyuk.

Lukas 2:14

“Allah weiknye im deice ululnye bira, pia telebe. Yata ninye do nirya, Allah arye kanye deilinamle ninye nirya ara, teleb updeiplibuk, mambul kanye bona kum arye, kanam kanye bobuka telebuk unamake,” nyabik.

Yohanes 14:6

Tomas arye nyabukba, Yesus arye tamubuka nyabuk. “Diksukum Bisik ara, nauk unune. Tonda, Dib Koprop Yupu Nyananye unune. Tonda, Kam Una Deiyoknye bira, na tonok unune. Yata nang do nirya, na Ni koprop el dam bana ati, na deice aryuk binamake. Yuk bisik ton pia kum ulule. Yata ninye do nirya, na deice kum yaicopura, na ni Allah un dam kum binamake.

2 Korintus 5:21

Ara, Allah arye nun lyena ap, yok pununa ap ati, malye winin ning tonok ning babye kum ulamukce, pia diksukum ululnye Yesus ara, Allah arye dobuka, tukwak ninye nun malye winin ning nirya el nong deice deibukba, nun malye ning nirya dobuka kum kipdeipsuke. Ara, nun malye winin ning pununa ati, winipsuke. Winibuka deiyok ara ani. Allah arye utenyamuk, ‘Tukwak ninye nirya, malye winin nang unyak bukni, nara Allah pia diksukum unye touk, Kristus ap aninye ap talima dukdongopniba, Kristus deice arye, aninye diksukum kipdeipnamne,’ tenebukce, Allah arye apil dopsuke. Na Paulus arye nyapsine.

Efesus 1:6

Aning nirya akunum winipsuka ati ara, ninye nirya kel kibicopura, “Se, Allah bico tenepsilirye, el kanye aniryuk melibuka arisilye ning ara, weik mambule. Allah ara, pia teleb ulule,” nyabuka, el si weik arye, erenamake. Allah bico tenepsukce, talyeuk arisilye ning nirya ara, el mi koprop deice arye, arepsuke. Allah arye, el Mi Koprop Yesus ati ara, kanye talima aribuka pia kanye delilule.