Mazmur 82:5 - Eipomek

⁵ Sik pia malye weik wininyak nang ara, weik arye kum kel bikamike. Tonda, ‘Teleb winin ning ara, ani’ tenen, dipkoprob moubuka kum tenenyake. Ati ara, talye-talye bakirye, malye winin ninguk talibuka, wininyak deice arye, sikda pia kunuknak noutamuk banyake. Sik adeiyok nang arye, pia malye weik wininyak deice arye, yuk-yuk nang nirya eibikirye, sik babye malye wininyake. Winipmanto ara, tukwak mutuku nirya amu tam bulul keil ara, long-long aplyeba, mutuku kon nirya, tokna pakuka sakalamle atonun, sik malye wininyaka deice arye, yuk-yuk nang nirya babye, eibikirye malye wininyake. Wininyak deice ara, Allah arye, ‘Aning ara, wininamlume. Aning ara, pia kum wininamlume,’ nyana yupu nirya ara, sikce kum kilisinyake.

Mazmur 82:5 ပူးပေါင်းရင်းမြစ်များ

Ayub 8:9

Deiyok ara ani. Ara, nun atalak kam unyap nang nirya ara, nun ni yapu arye, winiryuk talak deipsikba, unamabe. Tonda, nunda tukwak mutuku unamap talak ara, kanya like tonok talak arye yanaplya ani, adiparyuk tuba tunim nyalamla atonun unyabe. Ara, nun kam una ara, lo pia weik tonun kum unamabe. Ati ara, aning-aning weik tonun, moubuka kel kum bikinyabe.

Mazmur 11:3

Se, Allah arye, ‘Aning winina ara, pia telebe, aning winina ara, pia malyeuka,’ nyapdeiamsuk yupu nirya ara, malye nang arye, ayupu nirya yanibibirye, nun malye kipdeipsikcopura, nun diksukumuk wininyap nang arye, yata wiriptibye do? Kume, aning ara, yupu kum lipsisitibye!

Mazmur 14:4

Ninye malye ning wininyak nang nirya ara, bita kel kum kipnamak do? Malye ninguk talibuka, wininyak nang arye, din ning el si roti dilamak touk, na mapu nirya ara, onyake. Tonda, Allah el si Yahweh ati, ‘Naio melibuka lyesilyame,’ nyabuka, elti, kum moronyake.

Mazmur 53:4

Bukni, mutuku sirya, im sirya nirya, unyak nang nirya ara, pia moubuka, teleb ton kum unyake. Allah arye nyasulul yupu nirya ara, akunum yaniltanauk wininyakce, yuk talye ninguk talibuka dobolbanyake. Tukwak mutuku unyak nang nirya ara, sik talima noutam nirya, pia malye weik ulule. Ninye kum winipting ning bukni, talye lukparabuka, pia malye ning wininyake. Tonoknye babye, teleb pia kum wininyake. Ninye nirya ara, malye ninguk tenebuka, winiyake.

Mazmur 75:3

Allah arye nyabuk. “Narye akunum tenyamse talak yalyeura, narye anggun dam yanuka, anggun nirya ati, ninye yupu lipsisibuka bokeipnamsine. Ara, narye, ‘Aning wininamlume. Aning ara, pia kum wininamlume,’ nyapdeipsise yupu nyalul touk, diksukum ubuka, yupu bokeipsinirye, wenepnamsine.

Mazmur 99:1

Allah Yahweh arye aning-aning nirya talibuka, weik deiyoknye ulule. Ati ara, ninye tukwak mutuku noutam unyak yala nang nirya ara, ilil upliba, sik nong nirya sirim talinauk unamle. Malaikat sik si ara, Kerub unyaka deice tam ara, Allah bukukce, aning-aning nirya talibuka, weik deiyoknye ulule. Allah el mikip weiknye ulula ati, tukwak mutuku im sirya, mutuku sirya nirya lulukuna uk unamle.

Amsal 1:29

Ara, talye ati kume. Deiyok ara ani. Anggunce, ‘Pia weik kel bikna deiyok ning ara, talye yupu ati ara, nun like’ tenen, mangkau kanye bomluma dekna deice arye winipnamlume. Tonda, anggun nirya arye, ‘Nun ni koproba Allah Yahweh, elda pia weik mambulnye’ tenen, elti, ilil kum tenyamlumce, el si kum erelalume. Ati ara, anggun malye ulamluma dekna ati winipnamsile.

Amsal 2:13

Diksukum bisikuk bamunyopura, malye unyak ninye ap neika kum unamlume. Ara, sik anang ara, teleb un ning ati, ‘Nun like’ tenen, nang ara, wininyake. Sikda, ‘Diksukum bisik ara, nun like’ tenen, kuna bisikuk patalule. Apatalul nang ara, sik kanye talima noutam ara, malye winin ninguk langdibukba unyake.

Amsal 4:19

Unyak bukni, sik amalye yu kanye bonyak ninye, sik banyak bisik ara, lukunyan bisikuk banyake. Ati, sik anang ara, ninye mangkau bisik bakiba, yan dum dukliba kote sakikirye, sik kel kum kilamak touk unyake. Aninye ara, ‘Nun yan dum dukusila ara, ani,’ kum tenenyake.

Penghotbah 2:14

Ara, weik arye kel biklinye bira, elce, Teleb un ning ara, abisik binune,’ teneplye bisik ara eibuka kel biklirye balule. Bukni, walwalnye bira kuna bisikuk balamle atonun ulule. Bukni, aning babye na kele. Weik kelnye babye, walwalnye babye, nun nirya babye, sirya ara, atonun upnamsile. Ara, weik kel arye winilamak nang babye, walwal aryuk ulamak nang babye, daulamepya ani, sirya ara ato ninguk kibuka, adiparyuk dibina uk unyabe.

Penghotbah 3:16

Na kam ulamse talak noutamak ara, dilamsirye na bikamse ning ton ani. Na kele, tukwak mutuku noutamak, keting amu tam mutuku-mutuku nirya ara, ninye yupu lipsisikuka bokolinak ara, Allah arye ‘Diksukumuk unyakce, teleb unamak,’ tenepsuk bukni, ninye tukwak mutuku nang arye, aning batakuka, tilila yupu nyana ap, malye un ning winina ap, aninguk pia unyabe. Aning atonun, Allah arye, ‘Pia diksukumuk unamak,’ tenelamsuk ning nirya ara, ninye tukwak nang arye, malye winin ninguk unyabe.

Yesaya 5:7

Adomon yupu nyapmasina deiyok ara ani. Anggur wa deiyoknye bira, Allah aning-aning nirya talibuka ulye deiyoknye, Allah Yahweh ulule. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. El anggur wa ara, Israel yala ninye unyake. Tonda, teleb wa tuku ati kanye delilul ning ara, sik Yehuda yala ninye unyake. Israel ninye ap, Yehuda yala ninye ap, ‘Teleb kibuka unyak do?’ tenen, dililamuk bukni, aninye nirya ara, olanauk ulamik. ‘Diksukumuk unyak do?’ tenen, dililamuk bukni, ton nang arye, ton tam nang ati, ikin ning weik, sik nong deice delilamikce, malye nyabuka, ngaluklamikba, kekelamuk. Ati, Allah arye aninye nirya ati, malye kanye bolamuk.

Yesaya 59:9

Sik Yudea nang arye, Allah ati nyabik. Winida, an Yesaya birye lak nyapdeiamsuk ning arye, nun akunum kel bikmabe. Allah ara, nunti kum lopdeipsukce, bataksukba, nun deice arye, ikin ning deilisiliba tuba dolonyabe. Tonda, Allah arye, nun mal olan nang dam arye, kum lobuka lyepdopsuka ara, nun malye un ning atia. Lyen ning ara, nun dam kanam kum yayuke. Wini talak ara, winipmanto ara, nunda, ‘Beren tam dirina yangalamliba, keting delilamle touk, weik tonun patasiliba, dan talak yanamsil doʼ tenen, pia dinauk unyabe. Bukni, nun dam ara, dirina kumce, pia kunukulongauk upsukba, kunuknauk unyabe. ‘Dirina arye bisik eibuka teleb kibuka banamapʼ tenen, dinauk unyap bukni, tuba kunukunauk usulule.

Mika 3:1

Nabi Mika birye nyabuk. Se, anggun ninye deiyok nang kibuka ululumce, Israel yala ninye talilulum nang nirya ara, anyapnusin yupu moubuka kekeplulume. Anggunda, ninye deiyok nang ululuma anya arye, dipkoprob anggunda pia diksukum ubuka winilamtumce, teleb pil dolamtumopura. ‘Dipkoprop teleb winin ning ara, ani, malye winina ning ara, ani’ tenen, anggunce akunum moubuka bikamtum bukni, anggunda tuba pia malyeuk winilulume.

Yohanes 12:35

Nyabikura, Yesus arye domon yupu deice arye tamubuka nyabuk. “Wini talak ninye moubuka kel bikna ati, dirina upsil ning ara, anggun ap mitik anunuk, anggun neika unamsile. Dirina tuba wapsilye talak ara, teleb bisik adiparyuk banamlulume. Aminyan talak ara, kunuknauk unamsila ati nyapsine. Kunuknak balinye bira, el bisik banmalya ara, moubuka kel kum biktue.

Yohanes 3:19

Allah arye tukwak ninye ati, yupu bokeipnamla deiyok ara nyapnusine. Ara, dirina deiyoknye birye, tukwak ninye dam akunum yayuk bukni, tukwak ninye ara, sik winilamak ning ara, pia malye ulula anya arye, sikda, ‘Dirina ara nun lik bukni, nunda kunuknak ning tonok kanye delinyabe,’ tenebuka unyake.

Roma 1:28

Aninguk kum bukni, amalye winilamik ninye arye, ‘Allah ap, el ulul ning nirya ap ati, tonap kum tenenamabe. Aning nirya ara nong kum danamle. Allah el ulul ning yala-yala nirya ara, tuba kum tenenamabe. Elda nun like,’ tenyamika ati, Allah arye aninye nirya ati, lik ubukba, ‘Sik aninye daulamica ani, dipnamake’ tenen, batakukba, sik pia malye tenelamik ning deice arye tapu koupdongamukba ulamik. Winilamikba, Allah arye, “Winina meme,” nyasilye ning nirya talibuka winilamik dib arye, pia malyeuk upra balamik.

2 Timotius 2:19

Aninye ara wininyak bukni, Allah arye nyapsuk yupu ara, min kum upsutue. Winipmanto ara, pia teleb ayukumna yo, gat yo iknabuk, pia gat ulamle atonun, Allah arye nyapsuk yupu ara, min kum kum datue. Allah el yupu noutamak sekamik yupu deice arye, lak kipdeipsuke. Ayupu ara, ani. ‘Allah arye, ‘Aninye na mapu unamake’ tenen, akunum wipdeiamsuk ninye ara, el akunum kel bikamsuke.’ (Bilangan 16:5) Tonda, ‘Yata nang do nirya, “Allah ati akunum diba tenepsa ati, el mi unune,” nyanyak nang nirya ara, adiparyuk malye winin ning nirya ara, batakikirye, balye tamubuka diksukum bisikuk banamake.’

1 Yohanes 2:11

Aning ato kum bukni, yata nang do nirya, sikce yuk nang ati, ‘Aning ara nun like,’ tenebuka, malye unyak ninye ara, kuna akuk tuba unyake. Ara dipkoprop winina ning kum kel kibika ati, walwal atouk wininyakce, aminyan unamle ning nirya kum tenenyake. Ara asing pun nang arye, bisik balamakak kum dikirye, yukak balamak touk, anang ara malye ubuka walwal wininyaka deice arye, sik ban bisik kum tenenyaka ati nyapne. Ara, sik kanye tenena kumce, asing kun nang winilamak touk unyake.