Mazmur 78:6 - Eipomek

⁶ Ara, Allah arye amem yupu nyapdeibuk talak ara, kam ulamik Israel yala nang ara, sikce deipnamak mapu, min kum deiamika ati, Allah arye, “Anggun aminyan talak delinamlum mapu babye, ‘Ayupu biknamak,’ tenen ati, “Amem yupu dobuka, pia peterelbanamlume,” nyapdeibuk. Ara, atalak kam ulamik nang arye, min kum deiamik mapu bukni, ‘Sikce deibikiba, dadeipdanin banamak mapu ton biknamak’ tenen, nyabuk. Tonda, anang arye, aminyan talak delinamak mapu babye, ‘Sikce ton dadeipnin banamak mapu ati, ayupu laka nyabikiba, biknamak’ tenen, nyabuk.

Mazmur 78:6 ပူးပေါင်းရင်းမြစ်များ

Ester 9:28

Atalak ara, Mordekai birye, akunum kintinip deibuk ning ara, nyabuk. “Asum-asum nirya ara, akitineipmap wala akunum balyopura, ‘Purim sum ara, nun pia weik mambul sum,’ tenebuka, nun Yahudi yala ninye nirya dikdik sebuka, kwalya kwalibuka dibibirye, si erenmabe. Ara, dan mutuku do nirya, pia weik mutuku noutamak, unamak ninye ap, karin mutuku provinsi yuk datalibuka unamak ninye ap, mitik mutuku daunamak ninye ap, weik kota noutamak talibuka daunamak ninye nirya ap ara, ‘Asum ara, nun pia weik mambul sum,’ tenebuka si erenmabe. Anyapmasin ning ara, pia kum luba kinamlulume. Pia tenena uk unamlulume. Anggunce deipmunyeba, dadeipdanin, banamak Yahudi ninye babye, kum luba kinamake.” Mordekai birye nyabuk.

Mazmur 102:18

Allah Yahweh arye, sik bona talena kum ati, talye kankan nang arye, elti, moronyak yupu ara, kum kekebuka biknamle. Aminyan talak ara, sik imun kanye bobuka, ikin weik ualamikce nang arye, moronyak ning nirya ara, Allah Yahweh kekeplirye, sikti, melinamle. Sikce moronamak ning nirya ara, Allah arye, “Aning nirya ara, daupye,” pia kum nyanamle. Sikce moronamak ning nirya, akunum bikilula ati, aning kum bataknamle.

Mazmur 145:4

Aning ati ara, Allah ance kintinibuka deiplum ning nirya ap, weik mambul pil domlum ning ap, ninye arye eibuka ngalukikirye, antibuk kibuka, si erenamkiyake. Ati, ninye arye sik mapu deibikiba, dadeipdanin banamak ninye nirya ati, wisi nang arye, sik mapu nirya kel bikna ati, an siuk pia erenamkiyake. Erepkikirye, “Allah ara, mikip weik deice arye, ninye kum winipmanto mambul pil dolule,” nyabuka, nuknin bakiba, aminyan talak daunamak ninye nirya babye, kekenamake. Aning ara, pia laka nyabuka, nyapdanin banamake.

Mazmur 22:31

Dotalak unamak ninye arye, sikce deipnamak mapu ati, “Nun ni koproba Allah arye, pia diksukum ubuka, ninye winipmanto kum pil dolamsuk ning ara ani,” nyabuka, laka nyanamake. Winipnamaka deice arye, sikce deibikceba, dadeipdanin banamak mapu nirya babye, sik nirya arye, Allah el siuk erenamake.

Mazmur 48:13

Aning ati ara, anggun Israel yala nang nirya arye, Sion mutuku dana-dana nirya, eibuka binamlume! Yerusalem mutuku noutam domik cang keil aik nirya ara, ‘Yata wiribuka ulul do?’ tenen, nuknamlume.

Mazmur 71:18

Ati ara, na ni Allaho, na akunum wisi danirye, kul potong akunum tiknilya babye, ance nati, dipdebuka kum bataknamnilam’ tenen, moropkine. Tuba melinauk wininamnilyame na nio. Ara, na kam tuba unamne talak nirya ara, an weik mikip deice, pil dolyam ning ara, ‘Yuk nang arye aminyan talak deipnamak mapu babye, kekenamak’ tenen, tuba laka nyanauk wininamne!

Mazmur 90:16

Na ni Allah, ance ninye winipmanto kum pil dolyam ning ara, an amu tam pil donyap nang, nun damak winipsiminba, eibuka kel kipnamabe. Ance, ninye kum winipmanto pil, weik mambul pil ton, nunce deipnamap mapu ati, opminba eibuka, kel kipnamake.

Keluaran 10:2

Tonda, ‘Anggun Israel ninye eibuka kel kipmunce, anggun mapu ap, aminyan talak anggun mapu arye, deipra banamak mapu ap ati, na wininpse ning laka nyanamlum’ tenen, winipse. Anggunce anggun mapu nirya ati, na wininpse ning laka nyanamlume. Ara, Mesir mutuku ninye malye ubikba, na mikip arye, kanye imun ning weik, sik nong deice delilamsirye, ninye kum winipmanto ning, Mesir mutuku noutamak arye pil dolamse. Aning nirya laka nyapmunyeba, anggun mapu kekebikirye, na wininye ning kel kipnamake. Tonda, anggun nirya arye, ‘Se, Allah ara Weik Deiyoknye el tonok ulule’ tenen, kel biknamlume,” Allah arye, Musa biti nyabuk.

Yoel 1:3

Ati, awininmalba eipmalum ning ara, anggun mapu kekenak binuka nuknamlulume. Nukmunba, ‘Sikce deibiceba, dadeipdanin banamak mapu, kekenamak’ tenen, nukunamake. Winibikiba, sikce dodeipnamak mapu nirya ati, pia nukdeipdanin banamake.

Ulangan 4:10

“Nun ni koproba, Allah el si Yahweh arye, Sinai mutuku deice, el yupu nyapnuk talak ubuk ning ati ara, tonap tuba laka nyapnusine. Anggun kele, Sinai mutuku dam buluplum buk, Allah arye nyapnuke. ‘Ance nyapminba, sik Israel ninye nirya bulubikiba, na yupu nyapnamne. Deiyok ara, sik unamak mutuku noutamak, tonda sik kam unamak talak nirya ara, na ati biknikirye, na si diamuk erenamniyake. Tonda, sikce sik mapu nirya ati, ‘Allah arye el nyasilye yupu kekebuka talinamlulume,’ nyabuka peterelanamake.’ Allah arye nyapnuke,” Musa birye nyabuk.