Israel yala nang arye, aning-aning nirya ara, malye weik winilamika ati ara, Allah el yu weik ubukba, sik anang ati, wenebuk. Ara, Allah arye, sik Israel yala nang ati, ‘Pia, sikda ‘Naʼ tenen nang unamak’ tenen, akunum wipdeibukce, sikti, kanye deiamuk bukni, malye-malye weik winilamika ati, Allah arye, ‘Se, anang ara, na like,’ tenelamuk.
Mazmur 74:2 - Eipomek2 Kume na nio, ance kwepdeiamsulum nang, ‘Nun Israel yala nang ati, tonap tenepsimince, yanuka melinamsilam’ tenen, moropkiabe na nio! Ance nun Israel nang ati, ‘Anang ara, ‘Naʼ tenen nang unyaka ati, sikda pia talipnamne’ tenen, wiamsulumce, nun ikin weik ulamupu noutam arye, akunum melibuka lyepsulume na nio! Tonda, Sion mutuku ati, luba kina kum bukni, tonap tenenamlame! Ara, ance, “Amutuku ara, tia talak ati, na si eren aik aunamle,” nyapdeipsulumak ati, nyapne na nio. အခန်းကိုကြည့်ပါ။ |
Mazmur 74:2
27 ပူးပေါင်းရင်းမြစ်များ
Yata mutuku unyak ninye do nirya, ninye mutuku-mutuku nirya arye, “Nun ni Allah ara, Yahweh ulule. Elcuk talisiliba, nunda el amu tam unamabe,” nyabuka, unyak ninye nirya ara, Allah arye melilamliba, sikda kanye deibuka telebuk wininamake. Tonda, Allah arye, ‘Sikda ‘Naʼ tenen, ninye unamake’ tenen, wibuka delilul ninye ara, el mapu koproba unyaka ati ara, melipliba sikda telebuk wininamake.
Ninye nirya kekepnululume! Nun ni koproba Allah Yahweh ati, “Anda pia telebuk ulyame,” nyabuka, el si erelulumce, el si erebuka kina ati, kanye kil-kil mot ara, Sion mutuku deice arye, amot nyanamlume. Allah mikip deice arye pil dolul ning ara, tukwak nang mutuku sirya, im sirya nirya, unyak nang, sik kekenak nirya, lak nyalbinamlume.
Ance lyepropsiminba, talye kanye bobuka ulamepya ani, aminyan sirya talak ara, an yupu yanikinyakce, malye ninguk talibuka wininyak nang nirya ara, wenepmince, sikti, yupu lipsisikuka bokeipmince, ikin weik ning arenalyame. Diba nun ni Allah Yahweh, ance, ‘Israel yala nang ara, ‘Naʼ tenen nang pia unamak’ tenen, wiamsulum nang ara, pia kum bataknamsilame.
Ance, ‘Anang ara ‘Naʼ tenen, ninye’ tenen, wiamsulumce lyepsulum ninye pia bico tenebuka tuba melisilyame. Pia kum batakasilyame. Winimince, ‘Dipkoprop bisik ani,’ nyabuka bobuka yangasilyama ani, wini talak babye, bobinamsilame. Tonda aninye ara an mikip deice arye pia melipnamlyame. Ance aninye bobuka balaminya ani, ance sikti, kintinip deiamlum mutuku, an uminyak, malye ning pia kum ululak, pia teleb touk delilbinamsilyame.
Sik nirya arye, ‘Se yata wiripnamsil do?’ tenen, ilil weik upliba, imun kanye bobuka unamake. Allah an mikip weik deice arye, ilil upliba, keil talye darabuka bulamle touk, unamake. Ara, Allah arye meliamuk ninye sik bisibuka banmaca ani, amutuku noutam banamak talak, yan dobikce talak nirya ara, yuk malye nang nirya, olena kum bukni, keil ikin ulamle touk, talye tunim abuka unamake.
Ati ara, nun babye winibuka melisilyame. Minop talak weik mambul pil dolamlum touk, wini talak babye, melibuka lyepdopnamsilyame. Ara, an mapu koproba ara, yu nang arye yanuka, obuka sirya daksikce, sik pera mutuku bobinamsikce, ikin ning nun nong deice deiamsik bukni, Allah Yahweh ancuk, akunum lyepdomsulum nang nirya ara, tamubuka Sion mutuku yanamabe. Ara, ‘Pia telebuk unamap,’ tenebikirye, Yerusalem mutuku tamubuka yanamake! Tonda, tamubuka yanamak talak ara, sik asok deice, lang-lang nyapliba, kanye deibuka, weik yupu arye kanye deilin mot nyabikirye, sik adiparyuk tamubuka, Yerusalem mutuku yanamake. Tonda, sik anang ara, tia talak ati kum bukni, pia ati, kanye weik deibikirye, anti si erenamkiyake. Tonda, sik anang ikin-ikin ulamukba, kanye imun weik kanye bobuka ulamik ning nirya ara, akunum kum danamla ati, pin-pin asa tuba si erenamkiyake. Sik Israel nang arye, Allah ati, nyabik.
Na Allah arye nyapsine. Yerusalem mutuku tamubuka yanamak nang ara, narye winiryuk si arepniba, anang mutuku sirya, im sirya nirya ara, sik si ati nyanamake. “Allah arye akunum Lyepdobuk Nang, ‘Sikda ‘Naʼ tenen, nang unamakʼ tenen, akunum wipdeibuka ati, sikda, ‘Pia Lek Nang,’ nyabuka, si sinamsiake. Tonda, ‘Allah Yahweh arye, ikin noutam arye, Lobukabukce Lyepdobuk Nang,’ nyabuka, si kum sinamsiake. Dipkoprob, anggun Yudea tam nang ati nyapsine. Ninye mutuku sirya, im sirya nirya ara, anggun winiryuk si ati, ‘Anggunda, Allah arye pia epsukce, Eibuka Lyepdopsuk Nang,’ nyabuka, si kum sinamsiake. Tonda, Yerusalem mutuku ati ara, ninye nirya ara, amutuku ati, Allah arye, ‘Min batakuk mutuku,’ nyabuka, si sinamake. Allah arye, anggun Yudea tam Israel yala nang ati, aminyan winipnamuk ning ati, nyabuk.
Na Allah arye, Yerusalem mutuku weik asik warikdongobuka cang keil poka dobik deice, ‘Nun mal olan nang arye, yanuka opsicakʼ tenen ati, kalikna deiyok nang ton wipdeipniba, anggun amutuku noutam ululum ninye ati, kalikinamsiake. Sik anang ara, keting noutam babye, lukunyan babye, talye mangkau asa kibuka, tunim abuka kum unamake. Bukni, pia tuba-tuba, na Allah Yahweh atibuk tenebikirye, “Nun ni Allaho, ance nunti, nyalin yupu deice arye, ‘Winibuka teleb kipdeipnamsine,’ nyamsulum ning ara, tuba teninauk unamlulume,” nyabuka, unamake.
Diba, nun ni Allah Yahweh, anda yata ning ati nunti namin kipsulumba, bisik kirikuka banyap do? Tonda, ance nunti lik kanye bon ning arepsulumba, nunce anti, ilil kum upsiliba, anti tuba kum tenekibirye, yata deiyok ati kwanim bisikuk banyap do? Yata deiyok ati, ance bataksulumba, nun talima pum tam ara malye tenen kanye upsukba, anti nun kum ilil usulul do? Wininyaba ati, na nio, ance melipsilyame. Nunda an mapu koprop unyabe. Tonda, nun Israel ninye yala yuk-yuk unyap nang nirya ara, an ‘Naʼ tenen, ninye uk unyaba anya arye, ance tamubuka nunti lyepnamsilyame. Tonoknye birye deipliba, el min yuma deiamlye mi uk el talilamle ning dololamle touk, sirya talak ara nun Israel ninye dopropnamsilama ati, tamubuka melinamsilame. Na nio, nun talima pum tam pil dopsiminba, tuba tonap moubuka teninamabe.
Allah bico tenelamsukce, ‘Israel ninye lyenamne,’ tenelamsuka ati, Israel ninye nun dam ikin ning yangalamsukba, ikin weik ulamupu talak noutam nirya ara, el babye ikin kanye bolamuk. Winilamuka ati, ikin ulamsuk bukni, lyepsuk ning ara, ara el dam ulamuk malaikat dopdeipmokba, kum lyepropsuke. Tonda, yuk melin nang ton dolilamukba, kum lyepromsike. Aning kum bukni, nun ikin ulamsuk ning nirya ara, Allah elcuk lyelolamsuke. Allah arye, ‘Na mapu bicoe, minopce kum wenepnamne’ tenen, melibuka lyelolamsuke. Minop talak keting tamun yupa weik noutam nirya, Allah arye nun apu Yapu Israel ninye ati, melibuka bobalamsuke.
Allah el si Yahweh arye, aning-aning nirya kwepdeibuka Deirina Deiyoknye ulule. Allah arye sik Israel yala nang nirya ati, nyabuk. “Yakub birye deibukba, deipdanin balamik nang nirya ara, ‘Naʼ tenen, nanguk unamake. Na mapu koproba unamak tenen, wipdeiamse,” nyabuk. Allah Yahweh, el si ara, “Im deice unyak yin talin malaikat nirya ara, sik deiyoknye ulule,” nyabuka nyanyabe.
Bukni, nun Israel nang arye, si erenyap Allah ara, atalye ning atonun pia kum ulule. Allah Yahweh ara, pia dipkopropnye ulula ati, elce aning-aning nirya kwepdeiamukba aulule. Allah arye nun Israel nang ati, ‘Na mapu koproba unamlume,’ nyalin yupu deice arye nyalamsuke. Elda, Allah Yahweh, im deice unyak yin talin malaikat nirya, sik deiyoknye ulule. Elcuk, nun Israel yala nang nirya ati, akunum mince wibuka deiamsuke.
‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.
Aning nirya ara, talye ning ulul bukni, anggun Israel ninye tonok ara, Allah arye akunum wipdeipsukce, ‘Na tenena ninye’ nyabuka, akunum nyapsuke. Tonda, ninye arye besi do, emas do, ‘Malye ning kum dalirye, teleb ning pia upnamle’ tenen, uku dalamikiba, uku diplirye, malye ning kum danalule. Aning atonun, Mesir mutuku noutamak, Allah arye anggun Israel ninye malye winin ning ati, kilipsukce, ‘Winira, anggunda diksukum ninye unyake,’ nyapdeipsukce, teleb ninye uk kipdeipsuke. Teleb kipdeipsukce, Mesir mutuku noutamak arye, ikin weik ulamupu buk, dalubuka dobukapsukce, lyepsuke. Wini talak, anggunda, el ‘Naʼ tenen, ninye akunum ululume. Allah arye anggunti, ‘Na mapu’ tenen, melibuka pia talipnamsile.” Musa birye nyabuk.
Na Musa birye, Allah moropsi yupu ara, ani. “Se na ni Allah, anda Erebuka Weik Deiyoknye. Anuk ulyam anye arye, ance ‘Winipnamne,’ tenelyam touk ulyame. Aning-aning nirya, talibuka ulyam bukni, ance wipdeiamlum ninye, ‘Na tenena ninye,’ nyabuka, wipdeiamlum ninye, Israel ninye ati, moropkine. Ara, ‘Ance, anang kum opnamlyam’ tenen, moropkine. Ance, ‘Aninye ara, ‘Naʼ tenen, ninye unamak’ tenen, Mesir mutuku noutam arye dobuka, an mikip weik deice arye, lyebuka boyanamlum ninye ara, kum opnalyame, na nio.”
“Naio, Israel ninye ara, ance pia tenipnamlyame. Allah ance, ‘Na mapu unamake. Na tenen ninye pia unamak’ tenen, wiamsulumce, Mesir mutuku noutamak, an mikip deice arye bobuka yanamlume. Ati, ‘Anang pia kum opnamlyame’ tenen, moropkine. Na Musa birye Allah ati moropse. “Nyabuka moropsa ati ara, wini talak ara, na Musa birye, anggun Israel ninye ati, ayupu laka nyapsine. Ayupu nyabukapsirye, Allah ati morolamsise. Musa birye Israel ninye ati, laka nyabuk.
Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.
Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.
ကြော်ငြာတွေ