Mazmur 73:3 - Eipomek

³ Winilamsa deiyok ara, ani. Narye, sik kanye talima erebuka, kwalinauk unyak ninye, pil dobuka, dolon ning weika dolokirye, kanye deibuka telebuk unyakba, elinunce, ‘Se, sik anang ara, kanam asa uk unyak bukni, nara yata deiyok ati, ikin asa uk unun do?’ tenelamsa deice arye, yu upnukce, na dib tenepse ning, walwalapmanto upnuke.

Mazmur 73:3 ပူးပေါင်းရင်းမြစ်များ

Ayub 12:6

Na kanye ara, ani. Sik ubula don nang ara, sik aik noutamuk bukikirye, kanye deibuka, talye tunim abuka unyake. Tonda, ton nang arye, malye weik winikiba, Allah arye, sik wininyak ning ati, yu weik ulul bukni, sikda, ‘Kume ikin ning nun deice yasilyeba, kum dolonamapʼ tenen, ilil pia kum ulule. Tonda, yuk nang arye, amalye wininyak nang ati, “Wininmaluma ara meme,” nyabuka, pia kum wenenyake. Amalye wininyak nang arye, ‘Anye biryuk melibuka lyepnamsilʼ tenen, sikcuk memebuka delinyak ning, el si ara patung, memebuka kintinibikirye, aning dobuka, sik aik noutam boyanuka deibikirye, aning eibuka, isa si erenyake. Tonda, sikce, ‘Nun mikip deice aryuk wininyaba,’ tenenyake.

Ayub 17:8

Sik diksukum teleb unyak nang arye, na ikin unilye ning eipnikceura, ‘Se, elda malye kum winilamuk bukni, aning ara, yata ati do?’ tenen, ilil uplyeba, lukdanuka ngaluknauk uninyake. Tonda, sik malye winina kum, dipkoprob diksukum wininyak nang arye, nati tenepnikirye, sik malye wininyak nang, Allah ati, ‘Nun lik,’ tenenyak nang ati, malye kanye bobuka, wana dem unyake.

Ayub 21:7

Tonda, aning tenenune. ‘Se, Allah arye yata deiyok ati, sik pia malye-malyeuk unyak nang ara, kam una ati lo tonap tabakuka tuba arelulba, wisi delinyak do? Tonda yata deiyok ati, sik malye un nang, mikip weik nang kipnin bakirye, sik bona ara weik arelulba, bona weik talin nang unyak do?

Ayub 24:23

Anang sikce, ‘Nun tuba teleb kibuka unamapʼ tenena deiyok ning ara, Allah arye tia ati arelul bukni, elce, ‘Amalye wininyak nang ara, yata wininamak do? Teleb ninguk wininamak do, malye ninguk wininamak do?’ tenen, anang nirya ati, tuba-tuba kalikuka dinauk ulule.

Mazmur 10:5

Tonda, sikce, ‘Yo bok weik tonun dopropnamab’ tenen, pil donyak ning nirya ara, teleb kibuka winikiba, nong ara, pia weik tonun upnin balule. Nun ni koproba Allah, ance, ‘Winipnamne ning ara, ani. ‘Aning ara, pia malye, aning ara, pia telebe,’ tenepmince, yupu nyalisilyam yupu nirya ara, pia telebe. Ara, im tam atonun ulula ati, anang arye, pia moubuka kum biktinge. Tonda, ance yupu bokolisilyam ning ara, sikce moubuka kum tenenyake. Tonda, yuk nang arye, sik maknya kintininyak nang ati, ‘Anggun malye ululum ning ara bataklulume, malye winina meme!’ nyabikiba sik kwalinyak nang arye, ‘Anang ara, nun like. Dupmalye’ tenen talak dobuka, malye yupu uk nyasinyake.

Mazmur 37:1

Raja Daud arye nyabuk. Sik malye winin ninguk, talibuka wininyak ninye arye, malye winibikiba eipmunyopura, anggunce, ‘Se, yata wiripnamap do?’ tenen, malye kanye bobuka, kum unamlulume. Aning atonun, sik malye ninguk talibuka, malye weik wininyak ninye, eipmunce, ‘Se, sik malye wininyaka deice arye, talinyak ning ara, nun babye ton taleptibye’ tenen, ‘Seʼ tenen, mambul kirikna meme. Sik malye wininyak ninye arye, wininyak ning nirya ap, talinyak ning nirya ap ati, ‘Se, na babye ton doproptinye,’ tenena pia meme.

Mazmur 37:7

Ati ara, malye wininyak ninye nirya, sikce pil dopra bakce talak arye, ‘Aning winipnamabe,’ tenelamik touk, nong akunum uplyopura, anggun diba tenelulum ninye arye, ‘Se, yata deiyok ati, sik tenenyak ning, nong upliba dolonyak do?’ tenen, malye kanye bobuka, kum unamlulume. Sik malye nang arye, ‘Malye winin ninguk talibuka unamabe,’ tenebikirye, yupu sisikinyak ning, akunum winibikcopura, anggun diba tenelulum ninye arye, ‘Se,’ tenen, malye kanye kum bonamlume. Aning kum wininamlum bukni, anggunce tuba diba tenemunce, ‘Allah ara, dan talak yanuka melipnamsil do?’ tenen, kanye talima lamapdongobuka arye, amu tamuk umunce, kintinibuka dinauk unamlume. Ulamunya ani, dipkoprob Allah el tenebuk sum, akunum uplyopura, el tenebuk touk, nong upnamle. Anggun diba tenelulum ninye arye, ‘Allah arye minopce melipsutuba, telebuk uptibye,’ tenena kume. ‘Allah el tenebuk talakuk, teleb kipdeipnamsile’ tenen, teleb kanye bobuka, unamlume.

Amsal 23:17

Tonda, anggunce yuk ning pia malye-malye unyak ninye ati, ‘Se, sik aninye wininyak ning ap, sikce talinyak ning nirya ara, na ton taliptinirye, sik wininyak atonun winiptinye,’ tenena pia meme. Aning ara kum wininamlum bukni, anggun na mapu nirya arye, nun ni Allah Yahweh ati, ‘Elda weik telebnye ulule’ tenen, el tibuk ilil tenebuka umunce, el siuk pia erenamlume.

Amsal 24:1

Tonda malye ulamlanye biti, ‘Se, el winilul ning ap, elce talilye ning ap ati, na babye talibuka uptinye’ tenen, kanye kum delinamlume. Aning atonun, ‘Anye ap neika utinimnye,’ kum tenenamlulume.

Amsal 3:31

Atonun, talima pum tam yu kanye bobuka, yu yupu nyanmalinye biti, ‘Se, el unmal touk, nun babye atonun unamabe’ tenen, tenena meme. Anggunce tonap tamubuka yu kilina kumce, batakuka namin kinamlulume. Tonda, aninye yu kanye bobuka unyak touk, anggun babye atonun, kum wininamlulume.

Penghotbah 7:15

Nara, Peterena Deiyoknye birye nyapsine. Na kam ulamse talak nirya ara, nong kum upnamle ning ati dobolbalamse bukni, wini talak ara, pia mambul weik ning, nirya akunum elilamse. Ara ton tam ning ara, Allah arye, Aning ara wininamlume, aning ara pia kum wininamlume,’ nyapdeipsuk yupu, pia moubuka talilamikce, daulamikani aminyan talak, dipkoprob pia telebuk tuba unmek ani dibike. Tonda, yuk nang, sik cang arye kam ulamik bukni, pia malye un ning talibuka ulamik nang ara, malyeuk ulamika ani, sik tuba malyeuk ulamik talak ara, sik adiparyuk dibike.

Yeremia 12:1

Na Yeremia birye, tenenun ning nyapnukine. Na ni Allah Yahweh, narye anti, ‘Aning ara, yata deiyok ati uple do?’ tenen, na malye kanye bopnyopura, anti morokiniba, ance tuba-tuba teleb ubuka, diksukum ning nyanilyame. Bukni, na kum bikinun ning ara, anti asipdenukine. Ara, yata deiyok ati, sik malye wininyak nang ara, sik wininyak ning nirya ara, nong tuba kiliba, telebuk unyak do? Tonda, yata ati, diksukum koprop kum wininyakce, malye ninguk talibuka wininyak nang ara, sik dam ikin ning yalyeba, kum dolonyak do?

Maleaki 3:15

Tonda nyanululume. “Nun bidamnye asing arye akunum elinyabe. Ara, sik kanye talima pum tam erelana deice arye karye dobuka, kwalinyak ninye babye ara, ikin ning ton sik nong deice kum yangalule. Teleb aryuk ukirye, teleb kanye bobuka, kil-kil asa aryuk unyake. Tonda, sik malye wininyak nang nirya babye, dekna weik ning dopdobikirye, bona weik talin nang unyake.” Tonda, malye unyakce, “Malye winin ninguk winibirye, Allah ati winipdenuyabe,” nyalulume. ‘Allah arye, nunti wenebuka kum opnamsile,’ tenekirye, “Pia mandipna kanye bobuka, kum kekamna atonun malye-malyeuk wininyak nang ara, tuba telebuk unyake. Allah arye sikti, kum oplirye, ikin ning sik dam kum yangalule. Ati, anang malye wininyak touk, nun babye atonun wininamabe,” nyanululume. Allah arye Israel ninye ati, nyabuka wenebuke.

Yakobus 4:5

Allah el yupu deice arye nyasulule. “Allah arye arepsukbuk nun talima ak Dib Kanye usilya arye, ‘Anang ara na’ tenen, tenepsilirye, ‘Yuk ning pataplibuk na bataknicak’ tenen, pia kalikisulule.” Ayupu nyapsuka ara, talye yupu uk nyapsuka tenelulum do? Kume, Allah El Dib Kanye arye, ‘Yuk malye ning talibuka bicak’ tenen, pia kalikisulul ati, Allah arye, ‘Sik malye ubicak’ tenen, el mikip arisilya deice arye, pia tuba-tuba talibuka melisulule.