Mazmur 71:5 - Eipomek

⁵ Allah antibuk morokununa deiyok ara, ani. Narye, ‘Aning-aning nirya talibuka Pia Mikip Weik ulya Deiyoknye Allah ara, ancuk nati lyepropnamnilam,’ tenen, antibuk diba tenekunune. Diba na ni Allah Yahweh, nara mitik mi ulamse talak arye, dipdongobuka, na kam unye talak nirya ara, antibuk diba tenekunune. Yuknye biti, ton pia diba kum tenenune.

Mazmur 71:5 ပူးပေါင်းရင်းမြစ်များ

1 Raja-Raja 18:12

Nyabukce ayupu ton dukdongobuka nyabuk. “Naie, winipmanto ‘Ninye deiyoknye dam nyapnun’ tenen, bisik tuba banmanye talak arye, Allah el si Yahweh, el Dib Kanye arye bobuka yuk mutuku delilbikiliba, ‘Tuba atikmala’ tenen, ninye deiyoknye Ahab dam binuka nyapniba, yalirye, yanuka dipdelamkiliba, kum eipkilyopura, ‘Ahab birye, ‘Tilila nyapmanilama,’ nyabuka na opnilyak’ tenen, nyapkine. Bukni na nio, na mitik talak arye Allah el si Yahweh ati, el siuk erepnin yangalamse, ani wini talak babye tuba si erenune. Ati biknilyame na nio. Nara an amu tam atonunye unye bukni, anyapmanilam ning ara, na ilile.

2 Tawarikh 34:3

Yosia el wel winiryuk nepmok talak aryuk, ninye deiyoknye Raja tikamukce, el umur keting tamun delapan (8) tahun kibuk talak ara, el apu koproba Raja Daud si erelamuk Allah ati, el babye atonun, ‘Allah arye yata nyapnunil do?’ tenen, Allah ati si erena deiyok koubukce, moubuka kekelamuk. Winibuka ulamuka ani, keting tamun dumbarye ton mabukopura, sik Israel nang arye, minop talak isa si erena ati, kintinibuka delilamik ning nirya ara, ‘Amalye ning kum kipdeipnamne,’ tenebukce, deiyok koubuk. Ara, isa si erena ati, mutuku kon deice kintinibuka dolamikak ap, isa Asyera nyabuka, el si erena ati, cang yo iklamik ning ap, yuk-yuk talye ning ati, si erelamik ning, ninye urasin atonun ubuka memebuka, deiamik ning nirya ara, ulubuka dakukce, kum kipdeibuk.

Mazmur 119:166

Na ni koprop Allah Yahweh, ‘Anda ninye weik arye lyenamlam sum ara, yata sum do?’ tenen, nara kintinibuka dinauk unune. Winibuka kintinibuka, dinauk unamne talak noutamak ara, ance, “Aninguk wininamlulume. Aning ara, kum wininamlulume,” nyapdeiamsulum yupu uk, moubuka tenepnirye, talibuka unamne.

Mazmur 119:81

Se, ‘Na ni Allah arye na damak yaturye, nati lyepropnamnil talak ara, dan talak arye yanuka lyelonamnil do?’ tenen, na kanye talima noutamak pia pataniliba, na mikip ara, mitanguk akunum upmanile. Bukni, ance, “Wininamlulume, teleb winin ning ara, ani,” nyabuka nyapdeiamsulum touk, ‘Ayupu talibuka unirye, an amu tamuk, teleb ubuka winipnin banyopura, ayupu arye, teleb ulinamnil’ tenen, dib tenenune.

Mazmur 13:5

Na nio, na mal olan nang arye, ‘E, anye nunce akunum obuka malya kiplopnamabe,’ nyapnikcak tenen, na nio anti moropkine. Tonda, ‘Sikce na opnikirye, sik amu tam deipnikiba, ikin weik upnicak’ tenen, ‘Ance moubuka lyepnutume’ tenen, moropkine na nio.

Mazmur 39:7

Dipkoprob nun tukwak nang nirya ara, ouku mitik tonunuk unyabe. Winipmanto ara, minop kum danin balamle touk, nunda kam ulamepya ani, adiparyuk minop dibinyabe. Dipkoprob nun tukwak nang nirya ara, ouku mitik tonunuk unyabe. Winipmanto ara, minop kum danin balamle touk, nunda kam ulamepya ani, adiparyuk minop dibinyabe. Ninye tukwak nang nirya ara, ‘Aning-aning weik tonun bulubuka dopropnirye, aning nirya talipnamne’ tenen, pil weik tonun donyap bukni, dipkoprob ning ara, ‘Aminyan talak yatanye birye, na taleamse ning nirya dopropnamle do?’ tenen, pia kum teninyabe. Aning ara, nun walwale.

Mazmur 42:11

Ara, talye ati kum nyapne. Na mal olan nang arye, “An ni Allah ara, dan ulul do?” nyabuka, nalininyaka ati ara, na yok ara, pun deipliba, ikin weik ulamle touk unulule.

Mazmur 71:17

Se na ni Allah, na mitik mi tuba ulamse talak arye, dipdongobuka wini talak nirya ara, ance, ‘Winipnamlyame,’ nyabuka, peteranauk winilamnulumba, bikamse. Tonda, yuk nang kekena ati, wini talak babye, ance pia teleb kibuka pil dominye ning ara, tuba laka nyanune.

Penghotbah 12:1

Ura, an kam unalam talak, ikin ning an dam kum upmakilye, keting tamun aniryuk, an kwepdeipkuknye Allah atibuk tenenamlyame. Ara, an akunum wisi daminye talak ara, ‘Kam una na like,’ tenepmince nyanamlama ati, nyapkine. Ati Allah atibuk pia tenenamlyame.

Yeremia 14:8

Diba, nun ni Allah, anda nun Israel ninye ati, pia melibuka kalikisilyamnye ulyame. Tonda, yu ninye arye nunti, opmanto usinyak talak ara, melibuka lyesilyame. ‘Allah elcuk winisulule,’ tenekinyabe. Bukni, yata deiyok ati, ance kum kekelamsiyak nang atonun upnamsilam do? Winipmanto ara, ninye asik nang, tia yanuka tonok lukunyan yanuka mapmaca, adiparyuk balamak nang atonun upnamsilam do? Tonda, yuk mutuku ninye asik nang arye, nun mutuku tikilyanabica ani, adiparyuk tamubuka, bisik balamak nang atonun upnamsilam do?

Yeremia 17:13

Se, Allah anti, an mapu Israel nang, nun nirya arye, ‘Nun ni Allah Yahweh el dem melibuka lyepropnamsile,’ tuba tenenamabe. Nun kanye pum tam nirya ara, an deiceuk deilinyabe. Ton nang ara, anti, batakanamkiak nang ara, ikin ning, sik dam yalyeba, dipkoprob alye upnamle. An Allah ati, ‘Nun likʼ tenen, batakikirye, yuk bisikuk banamak nang nirya ara, dibikcopura, sik akunum dibikce, unyak nang unyak mutuku uk, tuku amu tam, sik dam wekelbinamake. Ara, talye ati kum bukni, sik anang arye, an Allah ati akunum batakikce, donga tam kilongokinyaka ati, dibikcopura, akunum diamik nang dam binuka unamake. Na nio, anda Allah Yahweh, Kam Una Deiyoknye ulyame. Winipmanto ara, anda tukwak mutuku nang nirya ati, kam mek pu atonunye, Allah Yahweh ulyame. Bukni, sik malye wininyak nang arye anti, batakinyake.

Yeremia 17:17

Na ni Allah, ance nati, ‘Ilil weik uptuba, talima uk diptueʼ tenen ning ara, na dam ton una meme. Dan talak do nirya, kanye imun ning, na dam yalyopura, nara an damuk, yanuka duknupnirye, namin asa arye, teleb kibuka unune. Anda erebuka ulyamce, na melibuka kalikiniminba, nara an amu tam yanuka, telebuk unune. Nabi Yeremia birye, Allah ati nyabuka morobuk.

Yeremia 17:7

Bukni, natibuk diba teneninyak nang arye, nati, ‘Allah Yahweh, elcuk melibuka lyepdopnamsilʼ tenen, sik kanye talima, na deice deipnikirye, tuba diba teneninyak nang ara, narye pia teleb kipdeipnamsine. Teleb ning ara, sik deice dobuka delinamna ati, anang ara, tuba-tuba teleb asa unamake.

Yeremia 50:7

Winilamika ani, sik ona ati, sik dana-dana tam ulamik yuk mutuku nang arye, Israel nang ati, olyangalamik. Tonda, ikin ning weik, sik nong deice delilamik. Ara, Israel yala nang ap, neika ulamik nang nirya arye, ikin ning dobuka, sik nong deice delilamik. Winilamikce, nyalamik. “Kume, Israel nang yanuka, talye onmaba ara, moubuka onmaba adano! Deiyok ara, sik ni koproba Allah Yahweh ati, ‘Nun like,’ tenelamikce, el yupu nirya, yanilamik. Allah elda, anggun ni koproba ulule. Allah Yahweh aryuk, anggunti lyepsutue! Tonda, anggun apu yapu nirya, diba tenyamikce, ‘Allah Yahweh, elcuk lyepsutue. Yuknye birye kumeʼ tenen, el deiceuk sik kanye delilamikce, el siuk erelamik. Ati ara, nun malye kuma. Deiyok ara, sik Israel nang nirya ara, Allah Yahweh ati, akunum batakamika arye, nyalamik.

Lukas 2:40

Birikce, sik daulamika ani, Allah arye Yesus ati, kanye deililamukce melilamukura, weik arye nepnin balamukce, el nong mikip ap, Allah winin ning kel bikna deiyok ning ap, el kanye talima noutamak, weik upnin balamuk.

Roma 15:13

Ura, na Paulus arye anggun Roma mutuku noutamak diba tenebuka ululum ninye nirya ati nyapsine. Allah el melisilya deice arye, nunce elti, ‘Dipkoprop teleb kipdeipsilirye, lyepsilyopura, pia melinamsile’ tenen, kintinibuka dinauk unyabe. Anggun Roma mutuku ninye ati, Allah morosunun ning ara nyapnusine. Ara, anggunce anggun kanye talima el deiceuk deipmunce, diba tenelulumopura, atalak Allah arye anggunti, mambul kanye bona kumce, kanye deibuka teleb winina deiyok ning ap, pin-pin una deiyok ning ap, ‘Weika arye arisiliba, anggun talima pum tam langdinamsil’ tenen, na Paulus arye anggun Roma mutuku ululum ninye ati Allah morosunune. Tonda, anyapmasin ning ara, Allah arye el Dib Kanye arisiliba, el mikip deice arye melisilyeba, anggun Roma mutuku tam ninye nirya ara, ‘Dipkoprop Allah elcuk, teleb kipdeipsilirye, lyepsilyopura, pia ati melinamsile’ tenemunce, ‘Kintinibuka dinauk unamlum’ tenen, Allah morosunune. Na Paulus arye nyapsine.

2 Timotius 3:15

Tonda, an mitik mi ulamlum talak arye dipdongobuka, anoutam talak nirya, Allah el pia diksukum yupu peterelamkikbuk, akunum kel bikamlume. Allah yupu peterelamsiaka deice arye Allah, ninye ati lyesulul yupu ap, lyen ning ap, nirya ara, kel bikinyabe. Nunce Yesus Kristus ati, dib tenenyap deice arye, Allah lyesulule. Aning nirya ara, Allah el yupu deice arye kel bikinyabe.

1 Samuel 16:13

Nyabuka ati ara, Samuel adiparyuk minopce minyak zaitun mek doprobukce, el du yapu wekmek kan-kan noutamak, Samuel birye, Daud wipdeibuk. Asum arye, deiyok koubuka, dor upra balamuk talak nirya ara, Allah el Dib Kanye, Daud deice yayukce, mikip deice arye meliamuk. Samuel birye, Daud akunum wipdeibukopura, adiparyuk Rama mutuku tamubuka biyuk.