Mazmur 7:10 - Eipomek

¹⁰ Bukni, sik kanye pum tam pia malye unyak nang arye, malye winin ning yuk-yuk nirya ara, na nio, ‘Ancuk aning nirya kum kipdeipsutum’ tenen, moropkine na nio. Malye wininyak nang ati, wenebuka kum kipdeipnalam bukni, ance, ‘Winipnamlume,’ nyapdeipsulum touk, dipkoprob ninguk wininyak nang ara, mikip kipdeipsiminba, pia aunamabe. Ara, anda ninye tukwak nang nirya ati, sik kanye tenen ning ap, sik talima noutam ulye ning nirya ara, moubuka dipdemince, ‘Teleb unyak do, kum do?’ tenen, pirisilyamnye bira, Allah an tonoka. Na ni Allah, ance nyapdeipsulum yupu nyasilye touk, ance pia diksukumuk ulyame. Malye winin ning ara, tonok babye, pia kum ukulule.

Mazmur 7:10 ပူးပေါင်းရင်းမြစ်များ

Kejadian 15:1

Aminyan talak ara, Allah arye, Abram wimabukba, lengdar deice arye, ayupu nyabukba kekebuk. Allah el si Yahweh arye nyapdeibukba, Abram kekebuk yupu ara, ani. “Abramo, an ilil una pia meme. Nara anti, weik deiyoknye ununa anya arye, pia kalikuka dinamkine. An bona pia weik talinanye ulalam ning ara, bona kume, ara natia. An menenga atonun dopropnalam ning ara, na uka.” Allah arye, Abram biti nyabuk.

1 Tawarikh 28:9

Tonda, na mi Salomo, narye el si erelamse Allah, na ni koproba Allah ati, an babye kel bikinamlame. Allah el siuk pia erenamlame. Ara, an kanye talima nirya moubuka tenepmince, ‘Winipnun do, kum do?’ tenen, teniltona pia kum unamlame. Pia pi dobuka, el tibuk, talipmince el siuk erenamlame. Ara talye ati kume. Deiyok ara, Allah Yahweh elda, ninye talima noutamuk ulul ning nirya weklirye dilule. Tonda, ninye kanye pum tam teninamak ning ap, ‘Winipnamabe tenen,’ teninamak ning ap nirya ara, kel bikilule. Ura, ance elti, ‘El kanye delilul ning eipnirye, kel biknamne. Aninguk talibuka unamne,’ tenepminyopura, dipkoprob adiparyuk el ulul ning ati eipmince, elti, bikinamlame. Bukni, aning winina kumce, el batakmince, kum dobolbiminyopura, elce, ‘Kume, anye na like,’ tenepkilirye, pia ati bataknamkile, kum melinamkile.

2 Tawarikh 6:30

Moropkipyopura, nun ni anda im deice mutuku unmamince kekenamsilyame. Kekepsimince, nun malye un ning ati namin kipsimince, lyelonamsilyame. Na ni ance tukwak mutuku noutam unyak nang nirya ati, nun talima noutam ulye ning ara, an kel ati, teleb do, malye do, ninye arye sik yuk-yuk malye winilamice touk, tonda teleb ulamikce touk, ance yupu bokeipnamsilame. Na ni ancuk ninye ap, sikce deibikce nang ap, tukwak nang nirya, sik talima noutam ulye ning nirya diminyakarye, bikisilyame. Aning ara, ninye yuk nang arye ton kum winiptinge. Aning ara, ancuk winiptume, ati moropkine.

Ayub 8:6

Diba, an talima noutam nirya ara, diksukum telebuk umince, tonda malye ning tonok babye kum winipmince, kum tenipminyopura, an ni Allah arye, pia minop aryuk, melibuka lyepropnamkile. Ara, ‘Minop talak teleb ubuka, pia ulamluma ani, aning nirya kum kipdeipkuk bukni, Allah arye tuba tamubuka teleb kipdeipkutuba, telebuk wininamlamʼ tenen, nyapne. An dengna aren ning atonun ara, arepnamkile. Winiplyopura, an neika unamlum nang nirya arye, anti, tuba tamubuka, si erebuka kinamkine tenepne.

Mazmur 112:2

Aning atonun wininyak nang ara, sikce deilinamak mapu nirya ara, nebikirye, mikip weik ukceura, yuk nang nirya arye sikti, ‘Sikda weik nang unyake’ tenen, si erenyake. Tonda, Allah arye nyasilye yupu, moubuka talikirye, diksukumuk wininyak nang ara, sikce mapu deibikceba, dadeipdanin banamak nang nirya babye, Allah arye dotam unamak nang nirya ati, pia teleb kipdeiplyeba, kanye deibuka, telebuk unamake.

Mazmur 125:4

Diba, nun ni koproba Allah Yahweh, anda sik diksukumuk wininyak nang ati, ance teleb kilinamlyame. ‘Winipnalam’ tenen, moropkiabe. Ara, sik kanye talima noutam ara, teleb winin ninguk tenibuka, diksukum wininyak nang ati, teleb kilinamlyame, nun nio.

Mazmur 3:3

Sik anang yupa weik arye, nati nyaninyake. “Nun kele, dipkoprob an ni Allah bira, anti pia kum melibuka lyepropnamkile. An mal olan nang arye yanuka opnamkiake,” nyabuka nyaninyake.

Mazmur 84:11

Teleb weik ning ara, tonok sum Allah an si eren aik dam yanuka eipkitinyeura, telebe teneptinye. Bukni, yupa weik seribu sum ara, talye yukak daunmatinye babye, telebe kume. Tonda, na ara, an si eren aik bublan dam kalikna pil doptinye babye, pia telebe. Bukni, malye wininyak nang, sik teleb aik binuka uptinye babye, aning telebe kume.

Mazmur 89:18

Ati, ance nun lyepsulumce, an pia weik dirina dobuka, nun deice delisilyame. Tonda, ance nunti, kanye deipsuluma deice aryuk, nun mikip arepsimince, teleb kibuka delisilyame.

Amsal 11:20

Ninye ton sik talima pum tam yu ning ap, malye winin ning ap uk, tenebuka unyak ninye ati, Allah Yahweh arye, ‘Aninye ara na like,’ tenelirye batakalule. Bukni, ninye ton sik kanye talima pum tam yu kum tenebikirye, malye winin ning talibuka winina kumce, diksukum bisikuk banyak ninye ara, Allah Yahweh arye, ‘Aninye ara, na kanye delinamne,’ tenelirye, pia melibuka lyelule. Aninye ap, Allah el ap dukdongobuka unamake.

Amsal 2:21

Anyapmasina deiyok ara ani. Ara, Allah arye nyapsuk touk, pil dobuka unyak ninye ap, sik kanye talima teleb kibuka unyak ninye ap, Allah arye areamsuk mutuku noutamakuk pia unamake. Malye una kumce, pia diksukum unyak ninye ara, amutuku noutamak, pia tuba aunamake.

Amsal 28:18

Diksukumuk ulirye, tilila yupu pia kum nyalulnye bira, Allah arye anye biti lyeplirye, teleb kipdeipnamle. Bukni, yata ninye do nirya, sik kam unyak talak noutamak arye kwalin bisikuk banyak ninye ara, aminyan talak Allah arye aninye ati, wenebuka oploplirye, sirya daknamle.

Yeremia 11:20

Nyalamikba, akunum bikseura, narye Allah ati moropse. “Na ni Allah Yahweh anda, im deice yin talin malaikat nirya ara, sik deiyoknye ulyama ati, anda mikip weiknye ulyame. Na bikse, anda yupu bokolina deiyoknye umince, ninye tukwak nang ati, diksukumuk yupu bokuka nyalilyame. Ancuk, nun tukwak nang, kanye talima noutam tenenyap ning babye, tukwak arye eibuka bikiselyame. Ati na nio, sikce nati, ‘Anye opnamap,’ nyanyak ning nirya ara, dobuka an deiceuk deipkine. Ati ara, ance tenepnimince, ‘Sik anang deice menenga dobuka, deipnalam ning ara, na ton eipnirye, biktinyeʼ tenen, moropkine.

Yeremia 17:10

Bukni, na Allah Yahweh aryuk, ninye sik talima pum ulul ning ap, ninye arye teninyak ning ap ara, tukwak arye eibuka bikne ning ara, narye sikti, ‘Teleb wininamak do, malyeuk wininamak do?’ tenen, sik nirya ati winilenune. Narye tukwak nang nirya ati, tonok-tonok nang arye, sik wininyak ning, dawinilamiceba, nong akunum uplyopura, narye eipnyopura, sik winilamikiba, duk mouplyopura, narye sikti, kwang dakanune. Ara, narye sik winilamice touk, deken ning arenune.