Mazmur 69:33 - Eipomek

³³ Aning atonun, narye an si erenamkina deice arye, sik talye kankan daunyak ninye, aning eibikcopura, kanye deibuka, pin-pin asa arye unamake. Atonun, yata ninye do nirya, Allah an si erenyakce, ‘Elcuk lyelonamsile’ tenen, diba tenebuka, unyak ninye nirya ara, pia kamuk unamake.

Mazmur 69:33 ပူးပေါင်းရင်းမြစ်များ

Mazmur 10:17

Nun ni Allah Yahweh, nun kanye namin asa unyap nang arye, nun patapsiliba, anti morokinyap ning nirya ara, adiparyuk kekepsilyame. Tonda, nun kanye imun usulul ning nirya ati, melipsimince, nun talima kwa dinamsilame!

Mazmur 102:17

Sik ayala yuk-yuk mutuku nang nirya arye, an Allah ati, ilil unamla deiyok ara ani. Ara, anda Allah Yahweh arye, Sion mutuku ulultaklamik ning nirya ara, ila ton ap, tamubuka teleb kibuka dobikirye, pia telebuk unamle. Winipminyeba, eibikirye, ilil uplyeba, an siuk erenamkiake. Atalak ara, anda Allah Yahweh arye, an pia teleb winilyam ning ap, mikip weik winilyam ning ap ati, dirina pia weik upmince, tukwak yanuka unamlame.

Mazmur 102:20

Ayupu ara, ani. Allah Yahweh ara, im deice tam pia teleb lek mutuku noutam ulyak arye, tukwak mutuku eililule. Diba, Yahweh ara, im deice ulyak arye, utam tukwak mutuku nirya babye, elcuk eililule.

Mazmur 107:10

Ton ninye ara, yu nang arye, malye kibuka bisibikce, aninye tomobuka, wenena aik noutamak dabinuka deiamikce, weik kat tapu, rantai besi arye, tapu koupdongamikba, imun kanye bobuka daulamik. Aninye nirya ara, kuna noutamakuk daulamikce, pia ikin kanye bobuka ulamik.

Mazmur 12:5

Tonda, malye kanye bobikirye, anggunce, “Nun weik kel yupu arye nyapmunyeura, yuk nang nirya ati, malye kipnamabe. Sikda nun amu tamuk unamake,” nyabuka nyanyake. Tonda, sik kanye erepdakirye, “Nun kanye aryuk tenenyap yupu nirya ara, talye lukdanuka nyanamabe. Yata deiyoknye birye, ‘Ance aning ara, winiplyame, aning ara, pia kum winipnalame,’ nyabuka, yupu nyapdeipsutu do? Kume, nun kanye aryuk tenebupu touk unyabe,” nyabuka, maknya kintilanmakirye, nyanyake.

Mazmur 146:7

Malye nang arye, yuk nang ati, yanibikirye, ikin ning, sik nong deice delinyak ninye ati ara, Allah Yahweh arye, imun kanye bobuka, unyak nang ati, melibuka teleb kilinamle! Tonda, Allah elcuk sik din patalye ninye ati, din ning dobuka arelule. Tonda, ikin kanye bobuka unyak nang do, aning atouk ton deiyok kum wamlyebuk, wenen aik pum dongobiceba, unyak ninye do nirya ara, Yahweh birye loplobuka, lyelolule.

Mazmur 22:27

Tonda, doryanamle talak ara, ninye mutuku-mutuku nirya noutamak unyak ninye nirya ara, sik malye winin ning batakikirye, Allah Yahweh ati, ila tuba tonap tenebikirye, el dam tamubuka yakirye, el si erena ati, gutam tuku dipdongobuka, el siuk pia erenamake.

Mazmur 34:3

Na kanye talima pum tam nirya arye, na ni Allah Yahweh ati, ‘Elda pia telebuk winilule. El winilul ning atonun ning, yuk nang arye ton, pia kum wininyake. Elda tonoknye ulule,’ nyabuka, el si pia erenamne. Winipniba, ikin pil arukunyakba, imun kanye bobuka unyak ninye kekebikirye, sik babye, pin-pin kanye bobuka, unamake.”

Mazmur 34:6

Tonda, kanye imun deice daunyak ninye nirya ara, ‘Allah arye melipnamsilarya’ tenen, sik kanye nirya, el deiceuk deibikirye, elti, diba tenenyak ninye ara, pin-pin asa arye, kanye deibuka unamake ati ara, sik urasin ara, telebuk unamle. Tonda, sik aninye nirya arye, aminyan talak ilil upliba, alye pia kum dakaldanamake.

Mazmur 68:6

Sik nin yapu ap, sik ni yapu ap nirya, akunum diamik mapu, kwaknamne mapu nirya ara, Allah arye, ‘Amapu ara, na mapu koproba unyake. Nara, sik ni koproba unune,’ tenelule. Tonda, sik youak kilapu ati, Allah arye, ‘Sik ti, pia melibuka kalikinamne,’ tenelule. Allah elda pia teleb lekak, im deice tuba aulule.

Yesaya 66:2

Na Allah Yahweh arye nyapsine. “Tukwak mutuku noutam ulul ning nirya ap, im noutam ulul ning nirya ap ara, na taruk koproba arye, kwepdeipsiba ulule. Kanye talima erena kum, ‘Se nun malye unyabe’ tenen, ilil upliba, nimalyap asa unyak ninye ati, na kanye delinune. Tonda, sik malye unyak ning batakikirye, narye, ‘Aning ara wininamlulume, aning ara, kum wininamlulume,’ nyalisinye yupu nirya ara, moubuka kekebikirye, talibuka unyak ninye ati, na kanye delinune.” Allah arye, Israel ninye ati nyabuk.

Amos 5:4

Na Allah Yahweh arye nyapsine. Se na mapu, Israel yala nang, anggunda, ‘Naʼ tenen, ninye ululuma anya arye, anggun malye ululum ning batakmunce, anggun tamubuka, na damak yamunyeura, anggunda pia kam unamlume.

Amos 5:6

Ati ara, anggun Israel ninye nirya ara, tonap tuba tamubuka, na Allah Yahweh damuk yanamlulume. Yamunyopura, anggun pia tuba kamuk unamlum bukni, na dam tamubuka kum yamunyopura, Allah na yu ara, uku dilamle atonun unulula ati, anggun apu koprop, Yusup arye deiamukba, dadeipdanin yangalamik nang, anggun Israel yala ninye nirya, sirya daknamsine. Winipmanto ara, uku dibuka sirya daklamle touk, anggun wenena ati, kum daneipnamsine. Tonda, Betel mutuku unyak nang babye, auku arye diplirye, sirya daknamle. Adinamle uku ara, yatanye birye tangap dongopturye, aninye lyeptu do? Pia kuma ati, ‘Allah arye wenepsilyak’ tenen, nyapsine ati, anggun kanye mouplulume, nyapsine.

Lukas 4:18

Allah arye na laka teleb yupu dobuka, ‘Talya kankan ninye peterelbinamle’ tenen, akunum wipdeipnuka anya arye, Allah El Dib Kanye arye el mikip weik arepnukura, unune. ‘Tapu koubuka deiamik ninye lolongona yupu peterelbinamle’ tenen, dopkwetepnuke. Tonda, asing guna ninye asing lalina ap, yaniplobikirye ikin ning sik nong deice delilamak ninye, ‘Melibuka erelina ap, wininamle’ tenen, dopkwetepnuke.

Efesus 3:1

Na kayapu, arup nyapmasin touk, Allah arye, nun nirya ati, Kristus pil dopsuk deice arye, nong tonok atonun kibuka, kanye talima dukdongopsuka ati ara, narye anggun Yahudi yala kum ninye ati, Allah morosunune. Wini talak ara, narye anggunti, Yesus Kristus el yupu peterelamsise ati, yu nang arye, na tomobuka tapu koubuka wenena aik dongopnikba, unune.

Wahyu 2:10

Amenyan talak ikin ning weik, anggun nong deice upsilyeba, kanye imun kanye bonamluma ati ara, ilil una meme. Na dipkoprop nyapsine. Isa Mutuku Dongonye arye, anggunti, ‘Aninye malye winipting’ tenen, yupu nyapliba, malye nang anggun kan-kan arye, ton ninye dopdobikirye, wenena aik dongonamsika deice arye asilenamsile. Anggunce nati diba tenepnuluma ati ara, ikin ning weika arye anggun nong deice delinamsiake. Ara yupa weik 10 sum deice arye, ikin ning delinamsiake. Winipnamsiaka babye, natibuk diba tenebuka darapdongobuka umunyebuk, malye nang arye oplopsica babye, pia kum bataknamnulume. Pia kum bataknumunyopura, narye anggun dekna ning dolona ati, pia kam una deiyok ning arepsinyeura, pia kamuk unamlume.