Morobukce ayupu ton dukgobuka nyabuk. “Bukni, Allah anda atukwak mutuku noutamuk ninye ap neika uptum do? Kume, im ap, im deice bukni, pia eitam im alip tam bukni, eitam deice tam babye, pala weik mutuku ulul bukni, aning noutam babye, kum uptume. Anda pia weik mambulnye ulyama ati im tam babye, tukwak tam babye, dipkoprob suktaleptue. Ati ara, atonun narye dopkise aik babye, pia mitik aikuk dopsa ati, anyaik noutam babye, dipkoprob suktaleptuba, asukum pia kum uptume. Ara an tonok kum ulyamnye biti nyapkine.
Mazmur 68:18 - Eipomek18 Allah el pia mikip weik ulula ati, winipmanto ara, ninye olyangana ati, kuda basam arye libuka, tuku deice balamle ning, el si ara kereta perang, yupa pia weik ribuan aulula ati, nunce kum nuktibye. Akereta perang ap, Allah ap, Sinai mutuku arye batakuka, Yerusalem mutuku noutam bukni, el pia teleb lek unamle aik dam ara, akunum yanmale. Allah bira aning-aning nirya talibuka, mikip weik ulya deiyoknye ulule. အခန်းကိုကြည့်ပါ။ |
Mazmur 68:18
47 ပူးပေါင်းရင်းမြစ်များ
Allah Yahweh arye, na ninye deiyoknye ati nyabuk. “Anda na sirik tam yanuka bukminba, narye an oldan ninye nirya obuka bisipnirye, aninye nirya dobuka, an yan amu tamuk deipnamkine. An oldan ninye nirya dobuka, an yan amu tam deipkiniba, aninye sik nong deice yanipdongopnalame.” Allah arye nyapdeibuk.
Yata wiribuka ululnye birye, Allah Yahweh el ulul mutuku deice welepting do? Yata wiribuka ululnye birye, Allah el pia teleb aik pum tam binuka tiktu do? Allah ulul sukum ara, malye ning tonok ning babye, pia kum ulul mutuku ulula anya arye, talye ninye arye anyaik dam talye mangkau asa kum bitinge.
Allah arye, ‘Israel ninye, ‘Naʼ tenen, ninye unamak’ tenen, el mapu kipsukce, nun unamap mutuku babye, kintinip deipsuke. Nun apu koproba Yakub birye, deibukba, dadeipdanin yangalamik ninye nirya ara, Allah arye kintinip deipsuk mutuku, tuba talibuka unyabe. Amutuku noutamak ara, kanye deibuka unyabe. Akunuma tenena ati, Sela nyapne.
Ati ara, se na ni Allah Yahweh, an yu upkiliba, tikmince kintinipnulyame! Na mal olan nang ara, yu weik ubukba, nati, ‘Anye bira nun pia lik,’ teneninyakce, olyanamniake. Ati na ni Allah, anda minop tikuka kintinipmince, nati melibuka kalikinamnilyame. Ance, ‘Aning ara, wininamlume, aning ara, pia kum winipnamlume,’ nyapdeipsulum yupu deice arye, na ikin unilye ning ati, yupu lipsisikuka bokeipnamnilame.
Tonda, Allah arye tia ati, Silo mutuku noutam ulamuka ara, amutuku batakuka bindobuk. Ara, Allah el yu weik ubuka ati, tia talak arye, ‘Na ap, Israel nang ap, neika unamap’ tenen, el si eren aik ati, terpal arye, domik aik, el si ara, Ansinilin Tenda Aik, Silo mutuku noutam, tia ati dobik ning babye, Allah arye anyaik batakuka bindobuk.
Anggun malye winin ninguk tenebuka ululum nang ara, ‘Nun malye unyabe,’ tenepmunce bataknamlulume. Aning atonun anggun diksukum un ning bataklum nang ara, anggun malye tenelulum ning nirya batakuka teleb ninguk tenenamlume. Winipmunyopura, anggun ni Allah, el si Yahweh dam tamubuka yanamlulume. Ara, ‘Nun malye wininyap ning ati, talye opsutu bukni, el kanye aryuk bico tenesilirye lyepnamsil’ tenen, unamlume. Anggun ni koproba Allah el dam tamubuka yamunyeba, weik tonun bico tenepsilirye, anggun malye ning weik aupmalya babye, namin kipnamsile. Anggun talima mitang usilirye, anggun malye winilulum ning batakmunba, kum kipdeipsilirye namin kipnamsile. Ati, anggun malye winimunye nang ara, tamubuka Allah el dam yanganamlulume.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Akat keil arye, cang poka dopnamlum ning ara, kota Yerusalem antanap dongobuka dana-dana tam nirya nukmunyopura, el cang nirya ara, 9 kilometer deice kiklibuka dopnamlume. Tonda, kota Yerusalem dona ati, anggun deiyok koupnamlum talak arye dipdongobuka, keting tamun oyanamle talak nirya ara, akota si ton si sinamak nang ara, ani. Akota el si ara, ‘Allah Yahweh, amutuku noutam tuba aulule,’ nyabuka, kota si ati sisinamlume.
Atalak, Allah Yahweh el yupu ara, liman oplirye, lelim lelamle atonun, lelim weik leplirye, el mapu mal olbanuce nang ati, ‘Winiplulume,’ nyabuka, yupu arepnamle. Ninye olbinamak nang ara, yupa pia weik, nukmanto kum upnamaka anya arye, sik anang ara, Allah elce nyaplye touk, ubuka mal olbinamake. Dipkoprop nyapne. Allah Yahweh arye, ‘Yehuda tam ninye malye ulamik ning dekna ati wenepnamne,’ tenebuk sum, akunum uplyopura, tonoknye babye, kum darapdongobuka dakeiyam asa, kum uptinge. Ara, pia kanye imun sum kipnamla ati, nyapsine. Nabi Yoel birye nyabuk.
Aning ati ara, na nyapnusin yupu ara ‘Deiyok ani’ tenen, anggun aik tamubuka bimunce, pia tenepmunce, kel bikinamlulume. Ara, Allah yupu nyalamuknye, nabi Hosea arye sekamuk yupu nyasilye touk, ‘Allah el kanye ara, Allah arena ati, kam ning obuka arilamak ning ara, na patana kume. Weik mambul ning ara, yuk ninye nirya ati bico tenebuka melilana ara, aninguk ara, weik telebe tenenune.’ (Hosea 6:6) Allah arye nyapdeibukba, Hosea sekamuk yupu ati nyapsine. Aning atonun, mitik pung uk ulamice bukni, sik talimak malye ning tuba aupmalibuk, aning tenena kumce, ‘Kume, nunda teleb nanguk unyabe,’ tenelanyak ninye ati, ‘Aninye ara dobuka lyepnamne’ tenen, kum yase. Sik malye winilamikce bukni, talima noutamak ara, ‘Se, nunda malye nanguk unyabe,’ tenenyakce, malye kanye bobuka unyak ninye ara, ‘Sik malye winilamikce ning batakikcopura, atouk ninye dobuka, lyepnamne’ tenen, yase. Yesus arye sik Farisi nang ati nyabuk.
Ura, Minggu sum beren tam berekel takne talak ara, Yesus talye karin arye, tonok kil el si ara, Maria Magdalena, akil damak panabuka tikilyayuk. Yesus kam bukmokbuk, yuk nang nirya arye min kum eipmek talak ara, minopce Maria Magdalena dam, Yesus talye karin arye tikilyayukura, eibuk. Akil Maria ara, minop talak tekbarye isa arye, el talima noutam talyamikba, atalak kum bukni, Yesus min arye aisa akunum yakuka dopkwecamuk.
Kam buklyopura, el si deice arye ayupu bitinye laka nyabuka peterepra banamake. Ara, ninye nirya sik malye tenenyak ning ap, malye wininyak ning ap batakuka, kanye danguna ap, tonda, Allah arye ninye, sik malye un ning namin kiplirye, kum danipnamle ning ap ara, ayupu bobuka ninye mutuku-mutuku nirya ati peterepra banamake. Ara, Yerusalem mutuku arye deiyok koubuka dana-dana mutuku nirya peterepra banamake. Ayupu nirya ara, na si Yesus deice arye peterelbinamake.”
Na ni Allah arye, ‘Na Dib Kanye arepnamsine,’ nyalilamuk touk, na im deice arye dopkwetepnamsine. Dopkwetepsinyeura, anggun kanye talima noutamak weksilirye, mikip weik upnamsil bukni, Allah El Dib Kanye arye min kum weik mikip kum upmasilye talak ara, Yerusalem asik noutamuk unamlume.” Yesus arye nyabuk.
Asipdeyukura, Yesus arye nyabuk. “Na ti diba tenebikirye, kanye talima deipnikcopura, aninye dipkoprop na yupu kekepnikirye, anyuk talibuka dobolbanamake. Na yupu pia talibuka diksukumuk unyak talak noutamak nirya ara, na Ni Koprop Allah arye sikti, bico tenebuka melinamle. Winiplirye, na ni Allah ap, na ap, aninye sik un dam yanimirye, aninye ap kanye talima dukdongobuka neika unamabe.
Winilulum bukni, na dipkoprop nyapsine. Na yukak binamna ara, anggun teleb kilina ap, anggun melina ap ati benamne. Na kum bitinyopura, min nyapmasinanye, anggun Melinanye bira, anggun talima melina ati, anggun dam kum yatue. Bukni, na akunum binyopura, Allah El Dib Kanye, narye dopkwetepnibuk, anggun dam melilyanamsile.
Ura, minop talak Allah arye, ‘Sikce Yesus ati winipnamake,’ akunum tenyamuk ati, min kum winipmok talak ara, el akunum tenyamukce, kel bikamuka anya arye, ‘Yuk nang arye, Yesus dobuka, sikce opnamak’ tenen, malye nang arye, Yesus dobuka anggunti arepsike. Aripsikura, sik yuk pia malye ulamik nang meilyamika arye, Yesus dobuka, wanwanun yo deice deibikce, paku dakuka, Yesus obikura, dibuke.
Sik nong deice bukukura, Allah El Dib Kanye sik talima wekuka langdibukura, talibuka arye, sik nirya ara, yuk-yuk mutuku nang yupu arye nyanmek. Ara, Allah El Pia Teleb Dib Kanye arye yupu nyana deiyok ning aribuka atonun, sik yuk-yuk mutuku nang yupu nyanmek. Sik nyanmek yupu ara, kum kel kiyamik yupu bukni, yuk-yuk mutuku kili sal yupu nyanmek.
Yesus arye nyabukura, Ananias kekebuk akarye, Saulus el aik ulamukak binuka wekuk. Anyaik wekukura, el taruk tatang Saulus nong deice deibuk akarye nyabuk. “Na weit Sauluso, amutuku yanamluma ati, bisik yanganmumak panalyayuknye bira, nun ni kopropa Yesus. Elce, ‘Nara, an asing lapdeipnamkil’ tenen, tonda, Allah El Dib Kanye dopkweteplibuk, ‘Kanye pum tam wekilirye, langdipnamkil’ tenen, dopdeipmanile,” nyabuk.
Tonda, Allah el si erena ati, weik mambul aik ap, talye ning isa si erenyak aik ap, neika atonun ning do? Kume. Nun kanye talima ap, nong ap ara, Allah el wekna aik atonun unyabe. Allah arye nyabuk. ‘Na ap, anggun ap neika ubirye, anggun ap neika banamnyabe. Nara, sik Ni Koprop Allah unamne. Sikda na mapu unamniyake.’ (Imamat 26:12) Allah arye nyabuk yupu nyapsine. Tonda, Allah yupu noutamak sekik yupu ton ani.
Allah arye, Sinai mutuku dup yayukce, Seir mutuku deice keting sinarya kutukuka, pata tikilamle atonun yayukba, sik eibikba, sikti yanuka melibuk. Tonda, elda Paran mutuku dup, dirin weik arebukba eibik. Allah el yayuk talak ara, Allah el im deici pil don nang malaikat ara, yupa sepuluh ribu (10.000) malaikat nang ap, weik nukmanto kum arye, neika yayikce, el sirik taruk tam ara, uku buk paklamle atonun, ubukba eibik.
Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.
Allah dan tam, ninye dan tam ansinilina deiyoknye bira, Yesus eluk ulule. Weik mambulnye Yesus ara, Allah el Mi Kopropa ulule. Elda Allah el ulyak im deice noutamak akunum biyuk. Aning ati ara, nunce diba tenebuka, ninye kekenyakak arye, laka nyanyap yupu nirya ati, batakna kumce, pia talibuka unamabe. Batakna kum diparyuk, diba tenebuka unamabe.
Yesus ara, Pia Teleb Aik menekuka biyuk ning ara, nun lyena ati wekuk. Ura, Yesus ara, Allah dantam, ninye dantam, ansinilina weik deiyoknye akunum upsuke. Ara, Melkisedek arye apil dolamuk touk, Yesus ara, Melkisedek el yala atonunye ubukce, Allah ap, nun ap, teleb kibuka neika una ati, ansinilina deiyoknye pia unamsile.
Ura, na kayapo, arup nyapmasin yupu nirya, deiyok ara nyapnusine. Allah ap, ninye ap dana-dana Ansinilina Deiyoknye, weik mambulnye akunum usulule. Anye bira, Allah el Mi Kopropa Yesus eluk ulule. Aning-aning nirya deice tam, im deice ululnye, Allah el weik deiyoknye bunak sirik tam, Yesus bulbiyuk.
Allah arye, Yesus Kristus kam bukeibukura, ila tamubuka im deice welebukce, Allah el sirik taruk tam bukukce ulule. Bukukce eitamuk uplibuk, Allah el im deice pil don ninye, malaikat ap, tukwak ninye deice tam unyakce weik deiyok nang atouk, im deice unyak ninye ap, tonda tukwak mutuku noutamak unyak isa mer nirya ap, yata mikip ning do nirya, Yesus el amutamuk unyake. Yesus ara, weik mikip weik ulirye, aning yala-yala nirya deice tamuk ulula atia.
Na sirik taruk talipman kurya tekbarye ap, atekbarye weisa dirina kin ning emas ning ap ara, ‘Deiyok ani’ tenen, moubuka kum tenepmalam bukni, ‘Aning nong ani’ tenen, kel kipnulama ati, laka nyapnukine. Ara, tekbarye weisa dirina ning el nong ara, Asia tam noutamak, Allah diba tenebuka unyak ninye, mutuku si tekbarye jemaat ati ulule. Tek barye talipman kurya sik nong ara, Allah diba tenenyak ninye tekbarye mutuku jemaat, sik melina malaikat unyake. Anye birye, na Yohanes ati nyapnuke.
Eipsiba, Allah el weik bun ning dam, tonoknye birye ayupu nyabuk. “Wini talak ara, Allah el pia unamlak ara, el ap, ninye ap neika pia unamake. Kam tuba unyak ninye nirya ara, Allah el mapu kopropa unamake. Allah arye aninye nirya ati talipliba, sikce, ‘Nun Ni’ tenen, Allah el siuk pia erenamake. Allah elda, sik ap neika unamake.
“Deborao, kintiniplyame! Allah el si erena ati, mot weika arye nyapnamlyame. Tonda Barako, kintiniplyame! An teklumce, nun mal olan nang obuka sirya daklum nang ara, amalye nang bobuka wenena aik deiplum nang ara, dopmince, ninye urasin dam bobiminyeba, eibikcopura, ‘E amalye nang akunum malye kibupe’ tenen, kel kipnamake. Ninye si Abinoam mi Barako, nun mal olan nang, yu nang akunum obuka sirya daklum nang ara, tapu koubuka bulubuka wenena aik pum bisik akunum dongoplum nang ara, anang nirya dobuka, laka deipsiminyeba dinamabe,” nyapkiyabe. Anang eibibirye, ‘E, anang ara Barak ap, Debora ap arye, akunum obuka sirya dakrik nang atia’ tenen, kel kipnamabe.
ကြော်ငြာတွေ