Mazmur 65:4 - Eipomek

⁴ Nun malye ulamupu ning nirya ara, pia weik ulamsuk buk, nun imun kanye bobuka ulamuburye, ‘Se, yata wiriptibye do? Yatanye birye, melibuka lyepsutu do?’ tenelamupu bukni, Allah ance nun malye winilamupu ning nirya, namin kibuka lyesilyame.

Mazmur 65:4 ပူးပေါင်းရင်းမြစ်များ

2 Tawarikh 6:39

Dipkoprop Sik adiparyuk, ‘Nun ni Allah arye melipsutueʼ tenen, antibuk moropnamkiak ning ap, ‘Nun kayapu nang ton melipsitingʼ tenen, moronamkiak ning ap, moropkicopura, anda im deice ulyamak arye an tenen nang yupu kekepminyak arye, ‘Sik morobikce touk, arenalamʼ tenen, moropkine na nie. Ara, An mapu Israel nang arye, sik mal olan dam binukcakarye, anti moropkicopura, an adiparyuk kekenamlyame. ‘Kekepmince, sik morobice touk melinamlyameʼ tenen, moropkine na nie.” Salomo birye nyabuka morobuk.

Mazmur 135:4

Ara, Yakub birye deiamukba, dadeipdanin yanganyap nang nirya ara, Yahweh arye, ‘Ayala nang ara, ‘Naʼ tenen nang unamake,’ tenepsukce, wibuka deipsuke. Diba, nun Israel yala nang nirya ara, akunum wibuka erepdeipsuka ati, “Anggun nirya ara, na ninguk ululuma ati, pia ati talipnamsine,” nyasulule.

Mazmur 15:1

Na ni Allah Yahweh, ninye ara, yata wirilamtinga deice arye, an un dam yating do? Tonda an unak pia teleb mutuku dup, Yerusalem mutuku ara, yatato ninye yanuka upting do?

Mazmur 17:15

Bukni, na ati ara, malye winin ning talibuka kum wininuna ati, pia diksukumuk wininmanya ani, akunum winipnyopura, aminyan talak Allah, an urasin ton eipnamne. Tonda, aminyan akunum dipnyopura, daunmanya ani, tonap kam buknyak arye, an urasin ap, nong ap, eipnyopura, pia kanye deibuka unamne.

Mazmur 23:6

Pia weika arye melinilyama ati, na kele, anda pia telebuk kilinamnilama anya arye, pia telebuk unamne. Na kam unamne talak noutamak nirya ara, ance nati bico pia tenenamnilyame. Tonda, batakna kum aniryuk, pia teleb kibuka melinamnilame. Aning ati ara, na tukwak mutuku noutamak kam unamne talak nirya ap, doryanamle talak nirya ap, teleb aryuk pia darabuka, Allah Yahweh an aik dam pia unamne. Raja Daud arye, mot nyana deice arye, ayupu nyabuk.

Mazmur 24:7

Allah el si eren aik pum tam pil dona deiyok nang arye, anyaik weik cang poka bublan, minop talak domik ning ara, pala kibuka kukeipsulumba, weik pala bisik laka uplyopura, nun Ninye Deiyoknye, Raja yalirye, el si eren anyaik weknamle. ARaja ara, el mikip ap, el dirin ap, pia weik ulula anya arye, elda pia mambulnye winilule. Acang poka bublan kukeipsulumba, nun pia teleb Rajanye birye, anyaik weknamle.

Mazmur 33:12

Yata mutuku unyak ninye do nirya, ninye mutuku-mutuku nirya arye, “Nun ni Allah ara, Yahweh ulule. Elcuk talisiliba, nunda el amu tam unamabe,” nyabuka, unyak ninye nirya ara, Allah arye melilamliba, sikda kanye deibuka telebuk wininamake. Tonda, Allah arye, ‘Sikda ‘Naʼ tenen, ninye unamake’ tenen, wibuka delilul ninye ara, el mapu koproba unyaka ati ara, melipliba sikda telebuk wininamake.

Mazmur 36:8

Na ni Allaho, ance nunti, weik tonun bico tenesimince, “Winibuka teleb kipdeipnamsine,” nyabuka, nyalin yupu deice arye nyapsiminye ning ara, pia batakna kum aryuk, tuba-tuba melisilyame. Narye, ‘Se, aning ara, pia telebe,’ tenenune. Winipmanto ara, kil ayam arye, el mapu nirya, el pol amu tam deiplirye, irilamle atonun kibuka, ninye nirya arye, an dam yanuka ukcopura, ance pia melibuka kalikinamsilame.

Mazmur 38:5

Aning nyapmana deiyok ara, talye ati kume. Deiyok ara, na malye weik winilamse ning ara, weik ulula ati, pia ikin weik akunum unulule. Winipmanto ara, na kisok tam akunum langdipnuka ati, pia imun kanye bobuka unune.

Mazmur 4:3

Se anggun mikip pia weik ululum nango, dan talak tonap na ni Allah ati, yep-yep abuka nalinamlum do? Winipmunyeura, yuk nang arye ton, kekebikirye, malye yupu nyakiba, alye weik unululule. Anggun ninye deiyok nang ululum nang ara, ouku weik arye ton, nong kum upnamle yupu nyakiba, ance kanye deibuka kekenamlum do? Tonda, ouku weikto arye, tilila yupu kekepmunce, dobonmanulum do?

Mazmur 63:5

An tibuk weik kanye deipnirye, pin-pin upniliba, si erenamkine. Ara, ance na kanye talima pum tam tenen ning ara, pia teleb un ninguk arepniminba, teleb ninguk tenenuna ati, nyapne. Winipmanto ara, ninye arye, pia teleb din ning kwalibuka dibikirye, din boupliba batakikca deice arye, pia kanye deibuka, teleb ualamak touk, ance meliniminya deice arye, pia kanye delikunune.

Mazmur 84:4

Allah ance kukalima maka, ‘Talye balamle,’ tenenyap maka babye, ance elti, aik kintinilyame. Tonda kukalima maka, ‘Im deice talye lakalul,’ tenenyap maka babye, Allah ance sik manak kintinilyame. Tonda, sik aik donak ara, anti ining ning obuka, uku dongolyangan aik dam, sik mi deilinyake. Na ni Allah Yahweh anda, aning-aning nirya talimince, im deice yin talin malaikat nirya, sik weik deiyoknye ulyame. Tonda, “Allah anda, na weik ninye deiyoknye Raja ulyame,” nyabuka, moropkine.

Yeremia 31:25

Sik aninye noutamak, yata ninye do nirya, sikce, ‘Se, nun kum winiptibye,’ tenen, mikip kum mitang uple ninye nirya ara, narye mikip kilinamne. Tonda din patapliba, kisok biribiri alamle ninye ara, din ning arepneba, tuba tonap mikip unamake.” Allah arye nyapdeibukba, Yeremia kekebuk.

Mika 7:18

Nabi Mika birye, Allah ati nyabuk. Se, na ni Allah. An uminye Allah atonun, ton pia kum ulule. An tonok ulyame. Ati, Allah Yahweh ance wipdeiamsulum ninye, mitik anun sirya tuba aunmab ninye ara, nun malye wininyap ning nirya, namin kipsimince, lyepsilyame. Anda ninye tukwak nang ati, pia ton kum deresilyame. Nun malye wininyap ning dekna ati, adiparyuk wenebuka opsutum bukni, aning kum winimince, nunti tamubuka bico tenesimince, melibuka lyesilyame. Ance ninye ati, weik arye bico tenesilyame. Ance nun tukwak ninye ati, kanye delisilyame. Winibuka ulyamnye ati, moropkine.

Efesus 1:4

Anyapmasin yupu ara, talye ati kum nyapne. Deiyok ara, Allah arye, aning-aning nirya, min kum kwepdeiamuk talak ara, nunti wepdeipsukce, winibuka tenyamsuke. Ara, ‘Anang ara, Kristus ap, kanye talima dukdongopniba, el deiceuk ucopura, na Allah arye, sikti, tenenamne talak nirya ara, anang ara malye winina kumce pia diksukum nang unyak,’ tenenamsine. Ara, Kristus arye, pil dopsuk deice aryuk tenenamsila ati, ‘Anang ara, pia diksukum un ninyeuk unyake,’ tenenamsile. Tonda, yata nang arye do, nunti, “Anang ara, sik malye winin ning ani, ani,” nyabuka, Allah ati kum nyapsitinge. Aning nyapmasin touk, Allah arye nunti, ‘Wininamake,’ tenyamsukce wipdeiyamsuke.

2 Tesalonika 2:13

Sik malye nang ati ara, winipnamle bukni, anggun Tesalonika ninye ati ara, nun adiparyuk, “Telebe,” nyabuka, Allah moronamsinyabe. Na weit yapu atonun nang, na Paulus arye nyapsine. Allah arye anggunti, el kanye deipsukce, aning-aning nirya kweipdeibuk talak danerye, ‘Aninye ara, na ning,’ tenyamsukce wipdeiamsuke. Wipdeiamsuk deiyok ara, talye ati kume. Ara, ‘Allah, na Dib Kanye arye, anggun talima noutamak pil dopsilirye, teleb kilisulul ning ap, sikce na dipkoprop yupu ati, dib tenenyak ning ap, deice arye, lyepnamne’ tenen, wipdeiamsuke.

Wahyu 3:12

Malye winin ning ati, ‘Nun like’ tenen, malye kilamice ninye ati ara, pia teleb kipdeipniba, mikip weik ubikirye, darabuka unamake. Ara, na ni el si erena aik, weik arye domik aik ara, el ayukumna yo pia darabuka, kat asa tiklamle touk, aninye sik kanye talima nirya mikip kipniba, pia darabuka kat asa, telebuk unamake. Allah el ulya im deice ara, bikirye batakuka kum binamake. El ap pia neika unamake. Anggunce malye winin ning ati, malye kibuka bisinamlum ninye ati ara, narye winiryuk si winilye si nyabuka, anggun asok deice sekeipnamsine. Tonok ning ara, na ni Allah el si ap, bitinye ning el unamlak Yerusalem Winiryuk mutuku si ap, winilye ning ara, na si winiryuk si ap, anggun asok deice sekeipnamsine. Allah arye weik asik el si ara Yerusalem Winiryuk mutuku kintinipsilirye, im deice arye dopkwetepliba, yanamle.