Mazmur 61:4 - Eipomek

⁴ Aning ati ara, Allah an mikip arye, kalikuka meliniminba, an amu tam unune. Adeice arye, ‘Na mal olan nang arye opnikcak’ tenen, winipmanto ning ara, ance pia kat keil aik dobuka, kintinip deipnimince, lelipdongopnamnilyame. Winipniminba, kanye lamapdongobuka, dakeiyam asa, an amu tam unamne.

Mazmur 61:4 ပူးပေါင်းရင်းမြစ်များ

Mazmur 15:1

Na ni Allah Yahweh, ninye ara, yata wirilamtinga deice arye, an un dam yating do? Tonda an unak pia teleb mutuku dup, Yerusalem mutuku ara, yatato ninye yanuka upting do?

Mazmur 17:8

Na nio, ance nati, pia bicoe tenenilyama ati, ‘An asing koproba arye dimince, kalikinamlam touk, nati melibuka kaliknamnilam’ tenen, moropkine. Atonun, an dam ton deipnimince, kalekuka lyenamnilame na nio. Winipmanto ara, ayam arye, el mapu dobuka, el pol amu tam deiplirye, kalikuka irilamle touk, ‘Ance nati, an dam deipnimince, kalikinamnilam’ tenen, moropkine.

Mazmur 23:6

Pia weika arye melinilyama ati, na kele, anda pia telebuk kilinamnilama anya arye, pia telebuk unamne. Na kam unamne talak noutamak nirya ara, ance nati bico pia tenenamnilyame. Tonda, batakna kum aniryuk, pia teleb kibuka melinamnilame. Aning ati ara, na tukwak mutuku noutamak kam unamne talak nirya ap, doryanamle talak nirya ap, teleb aryuk pia darabuka, Allah Yahweh an aik dam pia unamne. Raja Daud arye, mot nyana deice arye, ayupu nyabuk.

Mazmur 27:4

Ati ara, na ni Allah Yahweh, elti, pia tuba-tuba moronun ning ara, tonok ning ara ani. Na kam unamne talak nirya ara, Allah Yahweh, el si eren aik dam anyuk unirye, ‘Na lyelonamnile,’ nyabuka moronune. Tonda, Allah Yahweh, el urasin pia teleb ulul ning ara, ‘Pia dinamne’ tenen, moronune. Tonda, el si eren aik dam unirye, tuba-tuba dinamna ati moronune.

Mazmur 57:1

Raja Daud birye, aMazmur mot yupu ara, sekuk. Ara, Israel nang peterena ati, sekukce, Allah yupu mot nyana deiyoknye biti, arebuk. Amazmur mot yupu, el lelim ara, yuk mot el si ara, ‘Obuka sirya dakana kume,’ akunum nyanyaba atonun kibuka, nyanamabe. Daud birye aMazmur mot yupu sekuk talak ara, ara Raja Saul birye, ‘Daud opnamne’ tenen, eibuka dobolamukba, Daud birye, bikbik abuka weik keil deiya pum tam wekukce, dungnubuka unmok talak arye amot sekuk.

Mazmur 61:7

Ati ara, nara Israel yala ninye ati, ninye deiyok talibuka, Raja ununye bira, na kam una ati, lo weika arye arepniminba, ‘Naryuk dordeipdanin, banamak ninye nirya talinamne’ tenen, moropkine.

Mazmur 62:7

Allah elcuk weik mutuku kon keil atonun ulula ati, elcuk nati, kaliknilirye, lyelonamnile. El Allah damuk unyopura, kalikiniliba, nara telebuk unamne. Ati, ilil kum unamnile.

Mazmur 63:7

Ara, Allah anda, na patanulul ning nirya ati ara, ance tuba melinilyama ati, an amu tamuk unamne. Winipmanto ara, maka arye el mi dobuka, el pol amu tam deiplirye, kalulongolamle touk, Allah an erebuka, im deice tam umince, an pol arye pakudongolamnulumce, kalikiniminba, an amu tam unirye, anti kanye lon mot nyanirye, si erenamkine.

Mazmur 90:1

Allah el pil donanye Musa arye, Allah ati morobukce, mot sebuk. Diba na ni Allah Yahweh, anda nun damak umince, minop arye melilyangalamsuluma ani, pia ati, melipnin banamsilame.

Mazmur 91:1

Allah ara, aning-aning deice tam talibuka weik erena ap, mikip weik ap ululnye birye, el amu tam unyak ninye nirya ati, kalikuka melipliba, aninye ara, imun kanye bona kum diparyuk, kanye deibuka telebuk unamake. Allah aning-aning nirya deice tam talibuka, Mikip Weik Deiyoknye ulule. Ati, yata ninye do nirya, Allah el amu tam unyak ninye arye, pia ilil asa kum diparyuk, kanye deibuka telebuk unyake.

Mazmur 91:4

Winipmanto ara, ayam mapu, sik nin birye dobuka, el pol amu deibuka irilamle tonun, Allah arye elti, dib tenenyak ninye nirya dobuka, el damak deilinamle. Tonda, sik nirya ara, Allah el mikip weik arye erebuka uliba, el amu tamuk unamlume. Winipmanto ara, el pol mikip arye, anggun nong iripdongopsiliba, kanye lamapdongobuka, nimalya asa arye, el amu tam unamlume. Winiminyeura, Allah arye, pia kum bataknamsile. Winipmanto ara, ninye arye mal oldan talak, ‘Mal biksilyak’ tenen, ting kinikikirye, kelapye dobuka, mal pibalamak touk, Allah el mikip arye, nunti, melibuka kaliksilibuk, opmanto ning, nun damak yalya babye, kum opnamsile. Aning atonun, Allah arye, ‘Ikin ning na amu tam unyak ninye damak yalyak’ tenen, el mikip arye nunti, pia melibuka kalikinamsile. Ati, el amu tamuk unamlume.

Mazmur 92:13

Diba, sik malye tuba wininyak nang ara, kum danamak bukni, ance nunti, “Aning ara, wininamlume. Aning ara, pia kum wininamlume,” nyapdeiamsulum yupu uk talikirye, diksukum telebuk wininyak nang nirya ara, pia telebuk wininamake. Sikce unamak ning nirya ara, telebuk unamle! Ara, pia teleb cang yo, el si ara kurma yo palamle touk, unamake. Ara, winipmanto, Libanon mutuku noutam ara, weik yo, el si aras yo mikip arye tiklirye, cang ap, urasin teleb ap, ulamle touk, ance sik diksukum wininyak nang ati, telebuk winiliminyeba, pia telebuk unamake!

Amsal 18:10

Ninye arye, ‘Yuk mutuku ninye ati yanuka opsicak’ tenen, weik cang keil aik dolamikak, pum tam dungnubuka wekelbalamak touk, Allah Yahweh elda, mikip weiknye ulula anya arye, elce elti, dib tenenyak ninye, pia melibuka kalikinamle. Yata ninye do nirya, sik malye unyak ning nirya batakikirye, ‘Allah el yupu nyasilye touk, aninguk talibuka diksukumuk unamabe’ tenen, teleb ubuka unyak ninye arye, Allah el damuk yanganamake. Allah el damak akunum yacopura, Allah arye sikti, pia melibuka kalikinamle.

Matius 23:37

Ura, anggun Yerusalem mutuku ululum ninyeo, Allah yupu laka nyabuka peterenyak nang, narye nabi-nabi weike anggun dam dolkwetelamsise bukni, anggunce anabi sik nong deice keil dobuka ona ap, tonda, talye oltakana ap ulalume. Narye anggun Yerusalem mutuku ululum ninye ati, ‘Ayam el mapu irilamle atonunuk, na wiamse ninye kalikuka melinamsin’ tenen, patanululba, anggunti tuba tenesunun bukni, anggunce, ‘Anye Yesus ara, nun like’ tenen, tuba batakanululume.

Ibrani 6:18

Allah arye, “Wininamsine,” nyabuka, nyalilamuk yupu ap, el si kopropa deice arye nyabuk yupu ap ara, urasin yuk pia kum tamupmanto, elce nyabuk touk dipkoprop unamle. Allah arye aning bitinye ati, tilila yupu kum nyaptua anya arye, dipkoprop wininamle. Allah arye, ayupu bitinye deice nyapsuk ning deiyok ara ani. Ara, sikce, ‘Allah dipkoprop lyepnamsil’ tenen, diba tenebuka dinauk unyak ninye ara, ayupu kekebikca deice arye, talima kwa dipsilyopura, kanye teniltona kum unamake. ‘Allah arepsiliba, dopronamak ning, batakna kumce pia moubuka talibikirye unamak’ tenen, nyapsine.

Wahyu 3:12

Malye winin ning ati, ‘Nun like’ tenen, malye kilamice ninye ati ara, pia teleb kipdeipniba, mikip weik ubikirye, darabuka unamake. Ara, na ni el si erena aik, weik arye domik aik ara, el ayukumna yo pia darabuka, kat asa tiklamle touk, aninye sik kanye talima nirya mikip kipniba, pia darabuka kat asa, telebuk unamake. Allah el ulya im deice ara, bikirye batakuka kum binamake. El ap pia neika unamake. Anggunce malye winin ning ati, malye kibuka bisinamlum ninye ati ara, narye winiryuk si winilye si nyabuka, anggun asok deice sekeipnamsine. Tonok ning ara, na ni Allah el si ap, bitinye ning el unamlak Yerusalem Winiryuk mutuku si ap, winilye ning ara, na si winiryuk si ap, anggun asok deice sekeipnamsine. Allah arye weik asik el si ara Yerusalem Winiryuk mutuku kintinipsilirye, im deice arye dopkwetepliba, yanamle.

Rut 2:12

Ati ara, an kanye lon pil dopnin yangalyam ning nirya ati ara, Allah el si Yahweh aryuk dekna weik ning arepnamkile. Ayam mapu ara ilil upliba, ‘Nun nin irinamsil’ tenen, el dam yakiba, kil ayam arye el mapu el pol amu tam irilamle touk, anda, ‘Allah arye kalikuka melinamnil’ tenen, amutuku yanmalame. Ara, ‘Israel ninye sik ni koprop Allah, el si Yahweh arye, melibuka kalikinamnile’ tenen, amutuku yanmalama anya arye, ‘Allah arye, dekna weik arye arenamkil’ tenen, nyapkine,” Boas birye nyabuk.