Mazmur 59:16 - Eipomek

¹⁶ Sik amalye unyak nang arye, ‘Yata kwaning ton ubula doproptibirye, din diptibye,’ tenen, nun mutuku noutam dana-dana tam nirya epra banyake. Din ning eibikirye, dobuka dinyak bukni, pia kum bouplirye, tuba pataplyopura, yu yupu deice arye, mur-mur abikirye dinyake.

Mazmur 59:16 ပူးပေါင်းရင်းမြစ်များ

2 Samuel 22:3

Na ni Allah, na ilil unilye talak nirya ara, keil deiya wekuka, dungnunye touk, ikin unilye talak nirya ara, ancuk melibuka lelildongonilyama anya arye, an aminyan tam dungnubuka banune. Yin talin nang arye, ‘Mal oldan talak ara, mal dobikceura, biklyak’ tenen, kelapye lilibuka winilamak touk, ance melibuka kalikinilyame. Na melina ati, kelapye atonun lelinilyame. Na lyena deiyoknye bira, an uka. Na ni Allah, anda keil bukamlye mutuku dup amu tam dungnul banun atonun, an mikip deice arye lelilamnilame. Pia yu nang arye, ‘Anye bira opnuyap,’ tenebikirye, mal wiyanganinyak bukni, na ni koprop ance lyenilyame.

Ayub 15:23

Tonda, sik amalye unyak nang ara, ‘Se, nun dipnamap talak ara, yata talak do?’ tenenyake. Tonda, ‘Se, yu nang arye, parang ya arye opsikceba, dibibyeura, talye bai im tam lakuka balamle maka arye, akunum kintinibuka disulula ati, opsikceura, nun dibibyeba, amaka arye dipnamsil’ tenen, ilil weik usulule. Akunum kintinibuka disinyake. Diba, amalye wininyak nang ara, ‘Se, dipkoprob pia kuna upnamsile. Ara, kanye imun nun dam yanuka upsilyeura, ikin weik unamabe!’ teninauk unyake.

Ayub 37:23

Dipkoprob nun ni Allah elda, pia deice tam erebuka, aning-aning nirya talibuka, mikip weiknye ulule. Nun tukwak mutuku nang arye, ‘Se, Allah el weiknye ululak binuka eiptinyeʼ tenen, pia eptibya babye, Allah el dam ara, nunce binmanto kum usulule. Allah elda pia diksukum telebuk ulule. Elda mikip weiknye ulirye, ninye tukwak nang ati, yupu bokosulul bukni, talye yupu nyaltakana kum bukni, pia diksukum kibuka yupu nyasulule. Allah elce nun tukwak mutuku unyap nang ati, deiyok kum upmalye ning ati, ton ikin ning ara, nun deice ton pia kum delisulule. Diksukum un ning ara, pia kum batakalule.

Mazmur 101:1

Raja Daud birye, Mazmur mot yupu sekuk. Daud birye nyabuk yupu ara, ani. Narye, na kwitcapu ap, na neika pil donyap nang ap ati, pia kum bataknamne. Tonda, narye Israel nang talibuka, ninye yupu lipsisikuka bokeipnamne talak nirya ara, talye yupu nyana kumce, pia diksukum ubuka, yupu lipsisikuka bokeipnamne. Ati, narye, na ni Allah, ‘Ance kekepnamnilam’ tenen, Mazmur yupu mot ara, anti nyanamkine.

Mazmur 106:8

Diba, nun apu yapu arye, pia malye weik winilamik bukni, Allah arye, ‘Yuk nang arye, na si ati, malye yupu nyapnikcak’ tenen, sik Israel nang lyepdobukce, lopdeibuk. Allah arye, Israel yala nang lyepdobuka deiyok ara, ‘Ninye nirya arye, na pia mikip weik ununa ara, bita biknamak’ tenen, Israel nang lobuka lyeprobuk.

Mazmur 138:7

Na kele, pia ikin uniliba, imun kanye bobuka, unye talak babye, ance nati kalekuka melinilyame. Melinilyama deice arye, na mal olan nang arye, yu weik upliba, ‘Anye nun lik ati, opnuyabe,’ tenepnitinga babye, sikce kum opnamniake. Deiyok ara ani. Allah an sirik tam mikip weik ukulul taruk arye, lopdeipnimince, lyelonilyame. Ati, na mal olan nang arye, kum opnitinge.

Mazmur 143:8

Ati na nio, na patapnil ning ara, ani. Ara, ance nunti, “Weik tonun bico tenepsinirye, pia teleb kilinamsine,” nyapdeiamsulum ning ara, dipkoprob aning nirya, tuba wininamsilame. Ati ara, narye beren tam talak nirya ara, aninguk tuba-tuba tenenune. Ara talye ati kume. Deiyok ara, ani. Ara, narye anti, ‘Allah aryuk, pia melinamnil’ tenen, pia diba tenekunune. Na talima nirya ap, na kanye ap, nong ap, ‘Na ni Allah, ancuk melinamnilam’ tenen, an deiceuk delikunune. Ati ara, ance nati, “Teleb bisik asukumuk binalame. Teleb winin ning ara, ani,” nyabuka, peterepniminba, dipkoprob teleb bisik biktinyopura, abisikuk binamne na nio!

Mazmur 145:11

Sik aninye nirya arye yuk ninye ati, “Nun ni Allah, el mikip deice arye, aning-aning nirya talibuka, Weik Erenanye ulya ara, pia telebuk ulule,” nyanamake. Tonda, “An tibuk, nun ninye deiyoknye, Sisinanye Raja usulule,” nyabuka, teleb yupu nyakirye, an siuk erenamkiyake. Wininyakce, “Allah anda, mikip weik deice arye, ninye kum winipmanto mambul pil dolyamnye,” nyabuka, asum-asum nirya nukunmakirye, an siuk erenamkiyake.

Mazmur 21:13

Deiyok ara, an Allah arye, anang sikti, yakuka donoknalame! An Allah arye, sik malye wininyak nang ati, wenebuka oplopnalyame. Winipmanto ning ara, an mal ap, yin ap arye, sik malye wininyak nang nirya ati, adiparyuk obuka, sirya daknalame.

Mazmur 30:5

Amapo, Allah ati, batakna kumce, pia diba tenebuka, eluk tuba talilum nang nirya ara, nun ni koproba Allah Yahweh ati, kanye delin mot nyapmunyakarye, el siuk erenamlume. Tonda, nun ni Allah ara, malye un ning tonok babye kum ulirye, pia teleb, Leknye ulula ati ara, elti, ‘Telebe,’ nyabuka, si erebuka kinamlume.

Mazmur 31:7

Na ni Allaho, an kele, yuk nang arye, ‘Nun ni koproba ani,’ tenebikirye, isa si erena ati, talye ning memebuka deibikirye, aning ati si erenyake. Aning wininyak ning nirya ara, narye, ‘Na pia lik,’ tenenune. Ara, talye isa ati, talibuka kum wininun bukni, nara an Allah Yahweh atibuk, pia dib tenekinirye, an deiceuk, na kanye talima nirya ara, delikunune.

Mazmur 36:5

Sikce, ‘Wini talak mapnuyap’ tenen, amsuna deice mabikce talak ara, sikce, ‘E, yata ning malye winiptibye do?’ tenen, pia teninauk unyake. Wininyaka ati, sikce akunum mania kanye bobuka ukirye, banyak bisik ara, malye bisikuk ebuka bakirye unyake. Tonda, Allah arye, ‘Aning ara, wininamlume, aning ara, pia kum wininamlume,’ nyapdeiamsuk yupu nirya ara, sikce tuba batakanyake. Bukni, malye winin ning ara, pia kum batakanyake.

Mazmur 4:1

Allah el si erena ati, mot nyan nang arenamaka ati, sekuk. Amot nyalamuk talak ara, kitar urasin atonun ning, el si ara kecapi, talipnarye mot senamlume nyalamuk. Raja Daud birye amot yupu sekuk.

Mazmur 46:1

Mot nyana ati deiyoknye bira, Daud deiyok kipnaba, sik Korah mutuku deipkirikdop nang nirya ara, Allah ati mot nyabuka, si erelamik.

Mazmur 5:3

Na ni Allah, narye engebuka moronun yupu ara, ‘Moubuka kekepnamnilam’ tenen, moropkine. Anda, na deiyoknye Raja unilyame. Tonda, anda na si erenun Allah ulyame. Ati ara, narye, ‘Melipnilyame,’ nyabuka, morokununye bira, an uka.

Mazmur 77:2

Ikin weik unulul talak ara, Na ni Allah, ‘Ancuk yanuka melipnutumce, lyepnutume’ weik yupu deice arye moronune. Ara, “Na ni Allaho, ‘Ancuk yanuka melipnutum’ tenen, moropkine,” nyabuka moronune.

Mazmur 86:13

An siuk erenamkina deiyok ara, ani. Ara, ance nati, ‘Pia weik tonun bico tenekinirye, pia teleb kibuka winilinamkine’ nyapdeiamnulum ning ara, nukman kumto ulule. Tonda, minop talak akunum dipmanto ulamse talak ara, dipmatinirye, akunum diamik nang unyakak, amutuku si ara, Sheol mutuku, akunum binuka unmatinye bukni, wini talak ara, ancuk kwetepnulumba, kum dipsa ati, kam tuba unune.

Mazmur 88:13

Tonda, akunum diamik nang unyakak, pia unyak noutam arye, “Allah arye, el pil dolul ning ara, pia telebe,” nyabuka, an si ton erekinyak do? Kume, aning babye, pia kum wininyake na nio. Tonda, ance pia diksukum kibuka, telebuk pil dolyam ning nirya ara, akunum diamikba, aning-aning nirya ara, lubakikirye, pia kum tenipmanto ulamak nang arye, laka nyanamak do? Kume, aning babye, kum winipmanto.

Mazmur 89:1

Amot ara, ninye ton el si Etan, Ezrahi yalanye birye nyabuk mot ara, ani.

Keluaran 15:6

Nun ni Yahweh, anang opmom tam ara, an taruk sirik tam pia mikip weik ubuka anya arye, telebuk ulyame. Allah an taruk sirik tam arye mal olan nang ati oplopmalam ning ara, weik mambule.

Yeremia 30:7

Se, sikda bicoe! Dipkoprop kanye imun weik sum kipnamle ning ara, ato sum ara, min ton pia kum winilule. Asum noutam ara, na mapu koproba, anggun Israel nang ara, imun kanye bonamaka ati, ilil weik unamak bukni, narye anggunda, atalak noutam arye lyepropnamsine.

Roma 15:9

Tonda, Kristus tukwak mutuku yanuka ulamuk ning deiyok ara, ani. Ara, sik Yahudi yala kum ninye arye, “Se, Allah talye luparabuka wenepsuturye oplopsutu bukni, bico tenyamsukce, lyen ning akunum kintinipdeiamsuke,” nyabuka, ‘Yahudi yala kum ninye nirya arye, Allah el siuk erenamak’ tenen, Kristus yayuke. Kristus arye, Yahudi yala kum ninye ati tenebuka, pil dolamuk ning ara, minop talak Allah el yupu deice seklamik yupu atonun winilule. Ayupu ara ani. “Na ni Allah, Yahudi yala kum ninye kan-kan unamne talak noutamak nirya ara, narye Allah an si ati, pia erenamne. An si erena ati, mot nyanamne,” nyabuk. (2 Samuel 22:50)

2 Korintus 1:10

Ara, nun ikin weik ulamsukba, dipmanto wamnumu bukni, Allah arye lyebuka lopdeipsukce, teleb kipdeipsuke. Tonda, aminyan talak babye ara, pia lyepnamsile. ‘Allah aryuk pia lyepnamsil’ tenen, nun kanye ara, el deiceuk deibuka, elti, dib tenebuka dinyame.

Efesus 3:20

Nunce Allah ati, ‘Winipsutue’ tenen, yupu deice moronyap ning ap, nun kanye talima noutamak tenenyap ning ap ati, ‘Anirya ara, pia weik,’ tenenyap bukni, nun ni Allah ara, weik mambulnye, mikip pia weiknye ulula anya arye, nun morolamap ning ap, tenelamap ning ara, mitik tonunuk ulule. Elce nun kanye talima noutamak pil dosilye mikip deice arye, nun kum tenelamap ning ara, pia mambul weik ning, pil dopsutue.

Ibrani 5:7

Yesus ara, tukwak mutuku noutamak ulamuk talak ara, elce el dipnamuk ning ati tenebukce, el lyepmantonye Allah ati morobuke. Elce morobuka ara, “Naie, ance melipnilyame,” nyabuka, asing maka deice ap, weik malye nyana ap deice arye morobuke. Morobukce, el Yesus ara, ‘Allah ara, weik mambule anya arye, elti, si kipnirye, el amutamuk pia unamne,’ tenelamukce, talima naminye ulamuka ati, Allah arye, Yesus morobuk yupu kekebukce melilamuk.

1 Samuel 17:37

Ara, urdem ati kum nyapne. Kume, Allah el si Yahweh arye, nati lopdeipmanukba, weik yu kuse singa kus ap, bai ulamle kam ap, opse touk, Allah arye melipnilaba anye, Goliat babye, talye parapkabuka, oplopnamane. Daud birye nyabukopura, Saul birye, “Telebe, aning ati, Allah arye pia melinamkile anya arye, anye olbilyame,” nyabuk.