Mazmur 56:2 - Eipomek

² Atalak ara, Daud birye nyabuk yupu ara, ani. “Se, na ni koproba Allah, ‘Bico tenepnutumce, melipnutum’ tenen, moropkine.” Deiyok ara, ninye yata wiribuka do, nati, yaninikirye, ikin ning na nong deice deilininyake. Beren tam talak arye dipdongobuka, kiting noutam ap, beren tam ap anoutam nirya ara, yaninikirye, ikin ning na deice deilininyake.

Mazmur 56:2 ပူးပေါင်းရင်းမြစ်များ

Mazmur 3:1

Raja Daud elce deibuknye, Absalom birye, ‘Na ni koproba opnamneʼ tenebuk talak ara, Daud ilil ubuk ati, bikbik abuka bindobuk talak arye, aMazmur yupu sekuk. Daud birye nyabuk yupu ara, ani.

Mazmur 35:1

Raja Daud birye, Mazmur yupu mot sekuk. Daud birye nyabuk yupu ara, ani. Se na ni koproba Allah, ance na olyanganinyak nang arye, mal olyanganinyaka ati, ‘Ance sik anang ati, tamubuka optume’ tenen, moropkine. Yu nang arye nati, ‘Anye opnuyap,’ teneninyak nang ara, ‘An Allah arye anang ati, wenebuka opnamlam’ tenen, moropkine na nio.

Mazmur 41:5

Na Raja Daud bira, Allah anti, “Se, na ni Allah Yahweh, an kanye aryuk, bico tenepnutumce, teleb kipdeipnamnilame,” nyabuka moropkise. Tonda, “Dipkoprop, narye anti, malye winipse bukni, ‘Ance kwetepnimince, lyepnamnilam’ tenen, moropkine,” nyapse.

Mazmur 54:5

Deiyok ara, sik mandipna kanye weik bonyakce, maknya kintininyak nang arye, nati, ‘Anye opnuyabe,’ tenepnikirye, na dam yanuka wariknamniaka ati, nyabuka moropkine. Diba, yu weik upliba, pia mikip arye, ninye on nang arye, ‘Anye Daud bira, adiparyuk opnuyap’ tenen, enmaniake na nio. Sik ato nang ara, an Allah ati, pia bita kum bikikinyake. An Allah arye, ‘Wininamlume,’ nyasilyam yupu nirya ara, yaniltaknauk wininyaka ati, nyapne.

Mazmur 57:3

Narye nyakunune. Allah anda, aning-aning nirya talibuka, deice tam ulyamce, Pia Mikip Weiknye ulyama ati, narye anti, ‘Se, bico tenepnimince, melibuka lyepdopnilyame!’ nyabuka morokunune. Anda Allah arye nati, ‘Anye bira, winibuka melipnamne,’ tenenilyame. Melipniminba, ance aning ton, aning ton, winipnamne,’ teneniminye atonun ubuka, dipkoprob winipnilyame. Ance, ‘Winipnamne,’ teneminye ning nirya ara, aning atonun, dipkoprob winilyame.

Mazmur 9:2

Na kanye talima pum tam nirya ara, na ni Allah Yahweh ati, “Pia telebe,” nyapkine. Allah ance aning-aning nirya talemince, pia deice tam ulumince, Pia Mikip Weiknye ulyame. Ance, pia ninye dopman kum pil ap, pia mikip teleb pil ap dolyam ning ara, ‘Yuk nang ton kekenamak’ tenen, lak nyanamne.

Mazmur 91:1

Allah ara, aning-aning deice tam talibuka weik erena ap, mikip weik ap ululnye birye, el amu tam unyak ninye nirya ati, kalikuka melipliba, aninye ara, imun kanye bona kum diparyuk, kanye deibuka telebuk unamake. Allah aning-aning nirya deice tam talibuka, Mikip Weik Deiyoknye ulule. Ati, yata ninye do nirya, Allah el amu tam unyak ninye arye, pia ilil asa kum diparyuk, kanye deibuka telebuk unyake.

Mazmur 92:1

Allah ati, teleb nyan mot sekuk Mazmur yupu. Aning ara, Sabat sum deice arye, mot nyanamika ati sekuka, arebuk.

Mazmur 92:8

Tonda, sik pia malye winin ninguk talibuka, yuk nang ati, yu arye onyak nang ara, weik daunyake. Winipmanto ara, dolkua, minopce talye bilikuka, palamle touk, sik yu nang ara, pia weika arye tabakanyake. Diba, tukwak mutuku noutam ara, talima pum tam arye, malye tenebuka wininyak nang ara, pia weik tabaknin bakirye, bona weik talin nanguk wininyake. Bukni, sik talima noutamuk, malye unyak nang ap, yuk nang ati, sik yu deice arye onyak nang ap, aminyan sirya talak ara, Allah arye anang nirya weneplirye, obuka sice buklopnamle!

Mazmur 93:4

Mek oplirye banmalya ani, lelim weik nyalirye banmaleba, ninye kekebikirye, ‘Se, amek uanmal ning ara, mikip weik onmale,’ tenenyake. Bukni, dipkoprob olamle mek ara, mikip mitik uka. An mikip arye winilyam ning nirya ara, mikip pia weik arye ulyame. Nun ni Allah Yahweh, anuk im deice umince, aning-aning nirya, mikip arye talimince, Weik Erenanye ulyame.

Yesaya 57:15

Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.

Daniel 5:18

Tonda, Allah aning-aning nirya talibuka deice tam, Pia Mikip Weik erena deiyoknye birye, an ni koproba Nebukadnesar biti, ‘Ninye deiyoknye unamle’ tenen, erepdeiamuke. Erepdeiamukce, an ni koproba Nebukadnesar biti, ninye deiyok nang nirya, aulamika deice tam deiamukba, ulamuk. Tonda, an ni koproba si ara, yuk mutuku nang nirya arye, kel bikamik. Tonda, el tibuk si erebuka, kilamikce winilamik.”

Mika 6:6

Allah Yahweh arye, Israel ninye sik wenena ati, pia asilena atonun nyabuk yupu ara, ani. Ati ara, nunce yata ning doprobibirye, Allah Yahweh el si erena ati, el dam boyanganamap do? Allah ara, el im deice tam ululnye biti, yatato ning dobuka, el arena ati yatibirye, el dam kisok kanupdongobuka, yanuka arenamap do? Ara, nun malye unyap ning ati, adiparyuk oplopsutu bukni, nun pununa ati, adiparyuk sapi basam yim dobuka obibirye, el si erena ati, uku dongolyanamap do? Aning areptibiba, kanye deipnamsil do? Aning atonun, sapi basam winiryuk ning, keting tamun tonok uk mabuk ning dobuka, Allah el si erena ati, yanuka areptibiba, kanye deipnamsil do?

Wahyu 16:14

Aisa winilye, tukwak mutuku tuba ulamik ninye deiyok nang dam balamikce, ninye kum winipmanto ning mambul pil weik dopra balamik. Tonda, awinilinye isa arye, tukwak mutuku ninye deiyok nang nirya bulubuka kintinipmeka deiyok ara, ‘Anang ap, sik mapu silip ap nirya arye, Allah el tam nang obuka sirya dakdenamak’ tenen, bulunmek. Aning ara, weik mikip ululnye, Allah arye ninye nirya ati yupu lipsisikuka, wenebuka opnamle sum ara, ‘Atukwak mutuku deiyok nang arye, Allah el yupu yanipdenamak’ tenen, bulupmekce ninye winipmanto kum pil donmekak, eipse.