Mazmur 51:1 - Eipomek

¹ Raja Daud birye, mot nyana deiyoknye, Kor ati, mot nyabuk.

Mazmur 51:1 ပူးပေါင်းရင်းမြစ်များ

2 Samuel 11:2

El yin talin nang yukak, tuba oldanmek talak ara, like tonok sum, Daud mapmoka bukukce, sintam keting ara, el aik deice, kat ning arye amsuna, teleb ubuka domik deice arye, bayukce dinmokba, pia urasin teleb kil tonok, mek kekenmokba eibuk.

Nehemia 4:5

Ati, ance sik malye unyak ning ara, luba kipmince batakana kume. Tuba tenibuka wenenalyame. Tonda, sik malye wininyak ning ara, lyena kume. Sik malye wininyak ning ara tuba eibuka teninamlyame. Deiyok ara, an aik dam poka donyak nang ati, malye yupu nyaldongosinyak ati nyapne. Ati ance anang sik malye wininyak ning ara, kum namin kipnalyame, na nio,” Nehemia birye Allah ati nyabuka morobuk.

Mazmur 106:45

Tonda, Allah arye, ‘Se, ‘Naʼ tenen nang, kum ubikcak’ tenen, elce sikti, “Sikda wininamlume. Winipmunyopura, narye pia teleb kipdeipsiniba, telebuk unamlume,” nyapdeiamuk nyalin yupu ara, tonap bikuke. Aning tuba tenenauk ulamuka ati, sikti, bico tenebukce, sik dam yanuka lyeprobuk. Deiyok ara, Allah arye, “Anggun ti, weik tonun bico tenesinirye, pia teleb kipdeipsiniba, pia telebuk unamlume,” nyapdeiamuk yupu, akunum nyabuka ati, adeice arye, tamubuka Israel nang lyeprobuk.

Mazmur 106:7

Nun apu yapu ara, Mesir mutuku noutam ulamik talak ara, ance pia mambul ning, mikip weik ninye dopman kum pil dolalum ning ara, teleb ubuka kum tenyamika ati, ‘Aning ara, deiyok noutam ara ani,’ tenen, moubuka kum bikamik. Aning kum bukni, tonda ance nyalin yupu deice nyapdeiamsulum yupu babye, luba kibik. Ara, ance, “Anggunda wininamlume, wininamlume. Winipmunyopura, narye anggunti, weik tonun bico tenesinirye, pia teleb kilinamsine,” nyabuka, nyalin yupu deice arye, nyapdeipsulum yupu ara, sik nirya arye, luba kiamik. Aning nirya tenena kumce, tuba talibuka, kum winilamika ati, nun apu yapu arye, Allah anti batakike. Anda, aning-aning nirya deice tam erebuka, Pia Mikip Weik Deiyoknye ulyam bukni, sikce anti batakikce, ‘Allah arye nyasilye yupu ara, kekebuka kum, aning nirya kum talipnamabe, nun yuka!” nyabuka, an dam arye kisikdakuka, yukak bindobike.

Mazmur 109:21

Sik ayu nang arye nati, pia malye yupu nyaninyak bukni, na kele. Anda Yahweh, aning-aning nirya talibuka, Pia Mikip Weik Deiyoknye ulyama ati, ance nati, talibuka umince, kalikinilyame. Ati, anda na deiyoknye ulyame. Ati ara, Allah ance, na Daud biti, melibuka lyepropniminyeura, yuk nang nirya eibikirye, ‘An si moubuka kel biknamak’ tenen, moropkine, na nio. Na ni Allah, na kele. Ance, “Bico tenesimince, pia ati teleb kilinamsilame,” nyabuka, nyalin yupu deice arye nyapdeiamsulum ning ara, aning atonun, tuba-tuba winisilyama ati, aning ara, pia telebe. Ati ara, narye anti, ‘Melibuka lyepropnilyame!’ nyabuka, morokunune.

Mazmur 119:124

Na ni koprop Allah, ance, “Wininamlulume. Aning ara, kum wininamlulume. Teleb winina ara, ani,” nyalisilyam yupu dobuka, nati peterenamnilyame. Tonda, na an amu tam unirye, an piluk donanye ununa anya arye, ‘An weik arye bico teneniminya deice arye, teleb ubuka melinamnilam’ tenen, moropkine.

Mazmur 145:9

Allah Yahweh, ance ninye nirya ati, kanye talima arekulule. Tonda, Allah arye kwepdeiamuk ning nirya ati, ‘Na tenen ninguk ulule’ tenen, an talima namin ubuka bico tenesimince, pia moubuka kalikisilyame.

Mazmur 4:1

Allah el si erena ati, mot nyan nang arenamaka ati, sekuk. Amot nyalamuk talak ara, kitar urasin atonun ning, el si ara kecapi, talipnarye mot senamlume nyalamuk. Raja Daud birye amot yupu sekuk.

Mazmur 40:11

Allah ance nunti, diksukum ubuka telebuk winin ning ap, tonda ninye ati bico tenebuka, lyen yupu nyapdeiamsulum ning ap ara, ‘Narye kum nyanamne’ tenen, na kanye talima noutamakuk kum duknune. Yuk nang kekenmace arye, ayupu nirya lakoprop kibuka, laka nyanune. Ance, ‘Wininamne,’ nyapsulum yupu nirya ara, dipkoprob winilyame. Tonok ning babye, kum batakalyame. Apil nirya, sirya dakalyame. Tonda, ‘Ninye tukwak ninye weik lyepnamne’ tenen, kintinipsulum ning babye, ayupu ton kum batakanune. Ance bico tenesimince, pia dipkoprob yupu nyasiminye ning nirya ara, lakak aryuk, laka nyaniba, an si eren ati, bulubuka yangan ninye, yuk ninye weika arye kekenyake.

Mazmur 5:7

Sik tilila yupu nyakce nang ara, ance wenebuka opminyakarye, sirya daknulyame. Allah Yahweh, anda sik yuk nang olamak nang ap, talye yupu nyakce nang ap ara, ance, ‘Anang ara, na pia like,’ tenelyame.

Mazmur 51:9

Tonda na malye wininun ning nirya ara, Allah ance hisop yo taruk, mitik ning dobuka, lyebuka kilipniminyeba, pia diksukumuk unamne. Winipniminyopura, na nong ara, pia malye unilye ning nirya ara, teleb kipdeipnamnilame. Winipmanto ara, pia kurun ning, el si kapas kurulamle touk, na malye wininun ning nirya kum kibuka deipniminyeba, na pia telebuk unamnile.

Mazmur 69:13

Sik weik kota kibuka asik domikce, bublan wekelbana ati, potokeiamik bisik bublan dam bunyak nang arye nati, yap-yap abuka nalininyake. Tonda, sik ninye kanye wangalamak mek din nang nirya arye, sik mot nyana deice arye, nati malye nyabuka nalininyake.

Mazmur 69:16

Winipmanto ara, ‘Mok ceplirye, mek deibuka obukaplirye, siknibuka bobalamle touk, na babye atonun, winibuka opnilyak’ tenen, moropkine. Na batakniminyeba, weik mek oplya mikip weleplirye, na bobuka, weik laut mekwen deibuka, kum-kuma noutamak dongopniliba, ‘Amekwen amu dadipnyak’ tenen, moropkine. Tonda, ‘Ninye yuk nang arye, weik karu tuku pum tam palibuka, na dopkwetepnikirye, na deice tuku arye siknipnicak’ tenen, na ni koproba Allah anti moropkine.

Mazmur 77:9

Allah ance nunti, ‘Weik arye, bico tenepsinirye, pia teleb kilinamsine,’ nyabuka, nyalin yupu deice arye, nyadeipyamsuk ning ara, akunum bataksuka ati, aminyan talak babye, pia kum melinamsil do?’ tenenune. Ara, Allah arye nunti, ‘Winibuka-winibuka teleb kilinamsina,’ nyabuka, nyalin yupu deice arye, nyapdeiamsuk ning nirya ara, akunum bataksuka ati, ‘Dolyanamsil talak nirya babye, pia kum melinamsil do?’ tenenune.

Yesaya 43:25

Nyabukce ayupu ton dukdongobuka nyabuk. “Yatanye birye, anggun malye winilulum ning namin kipsilirye, aning kum kilisulul do? Na Allah aniryuk, anggun malye umunye ning nirya ara, kilibuka namin kisunune. Wininuna deiyok ara, ‘Sik malye wininyak ning deice arye, na si malye kipdeipnicak’ tenen, namin kisunune. Narye anggun malye winilulum ning nirya ara, tuba kum teninune. Akunum namin kipnirye, kum kilinuna ati, aning tuba kum teninune.

Yesaya 44:22

Ati anggun malye ululum ning nirya yamubuka dopropniba, dua balamle atonun upnamle. Tonda, kumanya mikip arye pubuka dopliba, dua yukak bobalamle touk, anggun malye winilulum ning nirya yukupdopnirye, kum kipdeipniba, anggun dam kum unamle. Anggun malye winilamlum noutam arye, dekuka lopdeipsisirye, lyepsisa ati, na dam tamubuka yanganamnulume.” Allah arye Israel ninye ati nyabuk.

Yesaya 63:15

Diba nun ni Allah Yahweh, anda im deice alip tam pia telebak umince disilyame. Anda pia mikip weiknye ulyame. Malye ning tonok babye kum winiminya ati, weik erebuka eitam umince, im deice pia teleb mutuku ulyame. ‘Ance bico tenesimince, ilil kumce malya kibuka, nunti melisilyam ning ara, wini talak dan sukum ulul do? Tonda ance talye lukparabuka opsutum bukni, lyelosilyam ning ara, dan sukum ulul do?’ tenekinyabe. ‘Anda yata ning ati, nunti yukuna atonun winilisilyam do?’ tenekinyabe.

Yesaya 63:7

Allah Yahweh, el kanye aryuk, Israel ninye ati teleb kibuka melilamuk ning ara, ‘Ninye nirya kekenamak’ tenen, laka nyanamne. Amambul pil dolamuk ning nirya ati, ninye nirya arye, Allah ati, el si erebuka kinamake. Nun ni koprop Yahweh arye meliamsuk ning ara, kum nukmanto ulul touk pia weik tonun laka nyanamne. Yuk yala ninye ara, pia kum meilyamuk bukni, nun Israel yala ninye ati, weik tonun melilamsuke. Nun malye ulamupu ning ati, talye lukparabuka opsutu bukni, bico tenelamsukce, lyelolamsuke. Allah arye nun Israel ninye ati, batakna pia kumce, weik tonun bico tenesilirye, melisulula deice arye, lyesulule.

Yeremia 18:23

Bukni, na ni Allah, an si Yahweh ara, aning-aning nirya, bikilyamnye binya arye, na kele. Ance sik anang teneninyak kanye nirya ap, ‘Anye bira obibirye, kum daneiptibye’ tenen, yupu taleninyak ara, an akunum kel biklume. Ati ara, sikti, bico tenena ap, sik malye wininyak ning kilina ap ara, kume. Sik malye wininyak ning luba kina kumce, ‘Sik aninye ara, ance wenebuka opnalam’ tenen, moropkine. Winipmince, an tuba yu weik ukilye talak ara, ance tenepminye touk, sik dam malye kipdeipnulyame. Na ni Allah, anti moropkine. Yeremia birye, Allah ati nyabuk.

Ratapan 3:32

Allah elce, nun dam tiya talak ati, kanye ikin ning aresilyeba, nunda ikin kanye bobuka unamap bukni, elce tenelu touk deipsilyeba, akunum winibibyeura, elcuk nunti tamubuka tenepsilirye, melibuka lyepnamsilarya. Ara, ‘Allah elce nunti, weik arye bico tenesilirye, anggunti winibuka melina teleb kilinamsile,’ tenebuka, nyalin yupu deice arye nyasilye touk, tuba melinamsile. Dipkoprop pia ati, kum bataknamsile. Elda weik arye bico tenesulula ati, tamubuka pia ati bico tenepsilirye, weika arye melinamsilarya.

Daniel 9:18

Tonda, nun ni Allah, ance nun moropkiyap ning kekepsilyame. Nun ni Allah, nun aik dobuka ulamupu mutuku, yuk nang arye, binuka uluplopsikba, imun kanye uk bobuka, unyap ning ara, ance eipsimince, melipsilyame. Ara, Yerusalem mutuku ara, ance ‘Amutuku noutamak ara, na si deipniba, amutuku noutamak ara, na si erenamniake,’ nyapdeiamsulum mutuku ati, moropkine na nio. Tonda, nunce anti, moropmakiyap ning ara, nun kanye aryuk, ‘Nunda diksukum unyap nang anya arye, morobibyopura, dipkoprob Allah kekenamsile’ tenen, kum moropkiyabe. Aning kum bukni, nun wininyap ning ati, talye lukparabuka, wenebuka opsutum bukni, ance eipsimince, bico tenebuka, nunti melisilyame. Ance bico tenesilyama ati, ‘Allah el teleb ulye deice arye melipnamsil’ tenen, morokinyabe,” nyabuka, Daniel birye, Allah ati morobuk. Tonda ayupu ton morobuk.

Daniel 9:9

Winibiba, nun ni Allah, nun malye winina ati ara, ance talye lukparabuka, wenebuka opsutum bukni, ance dipkoprob nunti, bico tuba tenesimince, kanye teleb arepkiliba, nun malye winin ning ati, kum kipdeipsimince, nunti namin kibuka, melisilyame. Dipkoprop nunda, pia weik malye winibirye, an nyapdeiamsulum yupu yaninyap nang bukni, bico tenebuka melisilyame.

Rasul 3:19

Aning ati ara, anggun malye ulamlum ning ap, anggun kanye talima malye tenelulum ning ap, batakmunye akarye, Allah el tam kipropmunyeura, elce anggun malye winilamlum ning nirya kum daneipnamsile.

Kolose 2:14

Allah arye, “Aning ara, wininamlume. Aning ton kum wininamlulume,” nyapdeibukura, Musa arye sekeiyamsuk yupu ara, yaniplobuka kum dobolbanyabe. Ati, ayupu kum dobolbanyap ati ara, Allah arye talye luba kibuka wenebuka oplopsutue. Allah arye ayupu deice wenebuka opsutu bukni, nun diba tenenyap nang, nun lyena ati, Yesus arye amem yupu atonun yupu nirya dobuka, el opnuyik talak ara, Yesus el nong deice deipdayukce, wanwanun yo deice deibukura, obik. Yesus obika deice arye, awenena yupu kum kipdeipsukura, wini talak ara, ayupu amu tam tuba kum unyabe.