Mazmur 5:4 - Eipomek

⁴ Se na ni Allah Yahweh, beren tam talak arye, na morokunun yupu ara, ance tuba kekenilyame. Beren tam talak nirya ara, an morona ati, teleb ning kintinip deipnirye, anti arelyanganune. Aning akunum arepkinyopura, ‘Allah Yahweh arye yata yupu nyapnunil do?’ tenen, dina ap, moubuka kekena ap unune.

Mazmur 5:4 ပူးပေါင်းရင်းမြစ်များ

1 Tawarikh 29:17

Na Daud birye akunum kele bikamse. Na ni koproba Allah, ninye nirya sik kanye noutamuk deipmince, asilelyame. Tonda, el talima noutam pia teleb ulamlanye bira, diksukum ulamlanye biti, kanye pia delilyame. Ati, narye aning nirya ara, na kanye pia teleb deice aryuk talye arepkine. Tonda wini talak ara, narye an mapu koproba, abulupmak Israel nang babye, akunum eipmane. Ara, asukum yanmakce, aning nirya, sik kanye talima noutam arye, ‘Se, nun ni Allah ara pia telebeʼ tenen, teleb kanye bobuka, pin-pin deice arye, aning boyanuka arepmak nang ara, akunum eipmane.

Mazmur 101:7

Bukni, yata nang do nirya, sikce talye tenebuka arye nyan ning ap, talye-talye yupu nyan ning ap wininyak nang nirya ara, na ap neika kum unamabe. Aning atonun wininyak nang ara, yakuka dokwetepnamna ati, na amu tam ukirye, na pil melibuka kum donamniake. Diba, ‘Aning atonun wininyak nang ara, ‘Na pia lik,’ tenenuna ati, sik tilila yupu nyace nang nirya ara, na dam pia kum unamake.

Mazmur 11:5

Allah Yahweh arye, malye winin ninguk, talibuka wininyak nang babye, teleb ning talibuka, diksukumuk wininyak nang babye, ‘Teleb wininamak do, kum do?’ tenen, asilelule. Bukni, Allah el talima noutam ara, ‘Sik malye winin ninguk, talibuka wininyak nang nirya, sik anang ara, pia na like,’ tenelule.

Mazmur 140:13

Nara dipkoprob akunum bikinune. Nun ni Yahweh, elce sik talye bona uto-toa talina kum nang, aning-aning nirya, kum talinyak nang ati, pia bico tenelirye, ‘Ikin ning, sik nong deice yalyak’ tenen, sikti, pia kalekuka melilule. Tonda, sik talye bona uto-toa talina kum nang ati, yupu teleb kibuka, lipsisikuka bokeiplirye, sikti, tuba-tuba teleb diksukumuk kilule.

Mazmur 50:21

Anggunce amalye-malye winin ning ara, talye lubakibuka winilulum talak ara, narye sikti, wenen yupu tonap tabakuka kum nyapsise. Anggunce nati utenenululume. ‘Kume, Allah ara, nun winilamap atonun ning ap, nun tenenyap atonun ning tenelulnye ulula ati, kum wenepnamsile,’ tenenululume. Winibuka tenenululum bukni, wini talak ara, narye weik wenepnamsine. Tonda, anggunce malye weik winilulum ning ati, akunum lakak aryuk, laka nyapmasine.

Mazmur 63:2

Na ni Allah, an si eren aik pum tam, binuka ulamse talak ara, an mikip weik ap, weik erebuka, pia teleb ulyam ning ap, peterelamnulumba, eibuka kel bikamse.

Mazmur 88:14

Sik akunum diamik nang ara, an winilyam ning, pia kum laka nyapting bukni, na ni Allah Yahweh, narye antibuk, “Se, na melibuka lyepnilyame,” nyabuka, engena deice arye, morokunune. Ara, beren tam talak nirya ara, na adiparyuk mapmanya ani, bukuka, anti, “Naio, ancuk melibuka lyepnilyame!” nyabuka, moropnyeura, narye morokinye yupu ara, an dam yangalule.

Mazmur 92:15

Sik diksukum wininyak nang ara, wisi akunum dayikce, telebuk winikirye, sikce talibuka dolamak pil nirya babye, nong upnamle. Winipmanto ara, teleb yo koubikiba, teleb kibuka palamle touk, yo imbik ulamle touk, anang babye, tuba teleb winina ap, mikip una ap, unyake.

Mazmur 94:20

Ninye deiyok nang arye, pia malye winin ninguk talibuka wininyak nang ara, Allah an ap neika, pia kum uptinge. Sik anang ara, ninye deiyok pil talibuka donyak bukni, sikce, ‘Aning wininamlume. Winibuka unamlume,’ nyabikirye, ayupu sekuka, aresinyak bukni, sikce nyasinyak yupu ara, dipkoprob malye yupu uk ulule.

Habakuk 1:13

Wininalam bukni, na nio, anda malye winin ning ayala-yala nirya ap, malye unyak nang ap ara, kanye deibuka kum elilyame. Anda, pia Teleb koprop, uk ubuka, pung ulyamnye binya arye, an pia teleb asing arye, malye ning ati, kanye deibuka kum elilyame. Aning atonun, malye wininyak nang ara, ance aninye eibuka, ‘Dauplye’ tenen, kum batakalongolyame. Na nio, anyapman touk ulyamnye bukni, yata deiyok ati, wini talak ara, anda malye wininyak nang, sik Kasdim nang ati, kum wenepmalam do? Tuba dinmasemince, bico tenesilyam bukni, yata deiyok ati, sik malye wininyak nang, Kasdim yala nang arye, nun Israel ninye teleb ubuka unyap nang ati, olyanganamsiak do? Habakuk birye Allah ati, malye nyabuka morobuk.

Maleaki 2:17

Tonda, na nabi Maleaki birye ayupu nyapsine. Anggun malye ululum diparyuk, Allah el dam yupu nyalulum ning ara, ‘Na pia like weike,’ tenesulule. Utenesulul bukni, anggun malye umunye diparyuk, Allah Yahweh ati tamubuka asiltolulume. “Nunda yata ning winibibya deice arye, Allah ati lik kilinyap do?” Ati, na Maleaki birye laka nyapnusine. Anggunce, Allah ati lik kililulum ning ara, ani. Ara, anggunce nyalulume. “Malye wininyak ninye nirya ati ara, Allah elce teleb uka tenesulule. Tonda, diksukum telebuk ulul Allah ara, dan sukum ulul do?” nyabuka asiltolulume. Winimunya deice arye Allah ati lik kililulume. Maleaki birye Israel ninye ati nyabuk.

Yohanes 14:23

Asipdeyukura, Yesus arye nyabuk. “Na ti diba tenebikirye, kanye talima deipnikcopura, aninye dipkoprop na yupu kekepnikirye, anyuk talibuka dobolbanamake. Na yupu pia talibuka diksukumuk unyak talak noutamak nirya ara, na Ni Koprop Allah arye sikti, bico tenebuka melinamle. Winiplirye, na ni Allah ap, na ap, aninye sik un dam yanimirye, aninye ap kanye talima dukdongobuka neika unamabe.

Ibrani 12:14

Ura, na kayapo. Anggun nirya arye, ‘Yuk ninye nirya ap, kanye deibuka neika ubibirye, malye winina ap, olana ap, yupu deice walana ap, aning nirya pia kum diparyuk, diksukumuk unamap’ tenen, pia pi dobuka, pirilenamlulume. Malye winina ning nirya, kum batakikirye, diksukumuk kum unyak ninye ara, nun Weik Deiyoknye Allah, el ap neika ansinibuka kum unamake.

2 Peterus 3:13

Anyapmasin touk, anirya ara, winipnamle bukni, Allah arye, “Im deice winibuk ning ap, im noutamak winibuk ning ap, tukwak winibuk ning ap kwepdeipnamsine,” nyabuka, nyapdeiamsuk touk, ‘Winipnamsil’ tenen, kintinibuka dinauk unyabe. Im deice winibuk ning ap, tukwak mutuku winibuk ning ap, kwepdeipnamsil noutamak ara, malye una kum arye, diksukum unyak ninyeuk unamake. Yuk malye winin ninye nirya ara, pia kume.

Wahyu 21:23

Aning atonun, keting dirin ap, wala dirin ap, ‘Adirina lapsutuba eiptibye’ tenen, patalyeba, pia kum tenenyake. Allah el bidamang dirina ara, pia weik ulula ati ara, im deice unamak ninye ara, yuk dirin ning ton kum patalule. Tonda, Domba Mi Atonye birye, el bidamang dirin weik ululba, anyasik noutamak weik dirin atonun unamla ati ara, keting ap, wala ap ara, winiryuk im deice mutuku kum ulule.

Wahyu 21:27

Atalak nirya ara, malye ning tonok babye, Yerusalem Winiryuk mutuku noutamak pia kum boyanamake. Tonda, malye wininyak ninye ap, tilila ning wininyak ninye ap anyasik noutamak pia kum wekelyanamake. Amutuku noutamak ara, sik malye winin ninye kum yanmanto bukni, Domba Mi Atonye birye talilye buku, Kam Pia Unamak Ninye Si Sekna Buku, abuku noutamak sik si akunum sekiamuk ninyeuk ara, sikda Yerusalem Winiryuk mutuku wekelyakirye, anyasik noutamak pia unamake. Na Yohanes arye nyapne.