Tonda, Allah elcuk nati, pia teleb kibuka melinulule. Winipmanto ara, domba basam weina deiyok nang arye, sik domba basam bobuka, maning pia teleb kibuka palulak, bobinuka deibikirye, kalikuka dilbalamak touk, Allah arye nati, na patan ning nirya melibuka arenulule. Tonda, domba basam weina deiyok nang arye, ‘Nun domba basam talye kanye bobuka, teleb mek dibikirye, kanye delinamak’ tenen, ona kum mek dam bobalamak touk, Allah elcuk, na bobuka, teleb sukumuk bobiniliba, ilil kum arye teleb kibuka unune.
Mazmur 46:4 - Eipomek4 Tonda, weik laut mekwen, lelim weik taplirye, mutuku dibuka sikniplya babye, ilil kum upnamsile. Tonda, weik mutuku lulukna doplirye, mutuku dup nirya long-long aplya babye, ilil kum upnamsile. Akunuma nyana ati, Sela nyapne. အခန်းကိုကြည့်ပါ။ |
Mazmur 46:4
24 ပူးပေါင်းရင်းမြစ်များ
Ikin asa ununa ati ara, na ni Allah an mikip ulin ning ap, ance diksukum yupu nyanilyam ning ap, arepniminba, adeice arye, ‘Teleb un bisik ani’ tenen, kel kiptinye. An dirina ap, an dipkoprob yupu ap, dopdeipniminba, nati melipniminba, diksukumuk winilamnya ani, ance wipdeiamlum mutuku, weik teleb mutuku, Allah an un dam yanamne.
Raja-Raja nang ap, sik yin talin nang arye, ‘Lyepdanamap’ tenen, bibik abuka, bindobik bukni, nun ni Allah, ance anang nirya ati, obuka sirya daklume. Winipmanto ning ara, ani. Ara, keting panalyangalamle tam arye, mikip weik kum yalirye, Tarsis mutuku, weik mek deice balamle ning, el si laut mekwen deice, mikip arye peiyang aplyeba, kapal nirya dakuka, sice bultakalamle touk, winiplume. Ara, sik yuk-yuk mutuku Raja nang ap, sik yin nang ap, obuka sirya dakupe.
Winibuka ance weik mambul pil dopminyeba, mutuku-mutuku daunyak ninye nirya arye, Allah antibuk ilil ululba, an siuk erenyakce, winilikinyake. Ara, ance sik dam ninye kum winipmanto ning winiminyeba, sik aninye nirya eibikirye, ‘Se,’ tenen, antibuk si erebuka winilikinyake. Tonda, mutuku-mutuku daunyak ninye nirya, ance weik mambul pil dopminyeba, eibikirye, Allah antibuk si erekinyake. Ara, keting yangalye tam ap, keting wekelbalye tam ap, mutuku-mutuku nirya, danoutam unyak ninye nirya arye, anti, ‘Se’ tenen, an kina ati, weik yupu nyabuka, an si erekinyake.
Allah ara, aning-aning deice tam talibuka weik erena ap, mikip weik ap ululnye birye, el amu tam unyak ninye nirya ati, kalikuka melipliba, aninye ara, imun kanye bona kum diparyuk, kanye deibuka telebuk unamake. Allah aning-aning nirya deice tam talibuka, Mikip Weik Deiyoknye ulule. Ati, yata ninye do nirya, Allah el amu tam unyak ninye arye, pia ilil asa kum diparyuk, kanye deibuka telebuk unyake.
Tonda, sik pia malye winin ninguk talibuka, yuk nang ati, yu arye onyak nang ara, weik daunyake. Winipmanto ara, dolkua, minopce talye bilikuka, palamle touk, sik yu nang ara, pia weika arye tabakanyake. Diba, tukwak mutuku noutam ara, talima pum tam arye, malye tenebuka wininyak nang ara, pia weik tabaknin bakirye, bona weik talin nanguk wininyake. Bukni, sik talima noutamuk, malye unyak nang ap, yuk nang ati, sik yu deice arye onyak nang ap, aminyan sirya talak ara, Allah arye anang nirya weneplirye, obuka sice buklopnamle!
Tonok mutuku noutam balamlumce, dipdebuka, mikip weik deiyoknye birye, sik talye bona utotoa kum nang nirya ati, sik nong deice ikin weik ning deiplirye, sik anang ati dopropnyopura, aning ara anggunce, ‘Seʼ tenen, Yata upmal do?’ tenen, kanye teniltona kume. Deiyok ara ani. Amalye ulamlye ninye deiyoknye, el deice tam ton, ninye deiyoknye yuknye ton aulule. Atonun, anye el deice tam babye, yuk deiyok nang ton daunyake. Sik nirya arye, amalye ulamlanye ulul ning nirya ara, elikirye akunum bikinyak bukni, sik nirya ara, ‘Yo dauplye,’ tenebikirye, luba kinyake. Ati, sik nirya ara malyeuk unyake.
Ati, nyapsine. Se, narye anggunti, ‘Aning winipnalmume, aning ara, pia kum winipnamlume,’ nyabuka akunum nyapdeiamse yupu uk moubuka bikamtumce, aninguk kekepmunce, talibuka akunum utumopura, anggun winin ning nirya, pil dopnin balamunyeba, aning nirya akunum pia telebuk upsutue. Winipmanto ara, weik mek cena kumce, tuba-tuba balamle touk akunum winipsutue. Tonda, anggun una ara pia pin-pin deice uk uptume. Tonda, weik laut mekwen, el mikip arye tuba-tuba batakana kumce, welebinmana ani, koulukuka balamle atonun, pia tuba yangalamle touk, anggun babye tuba telebuk uptume. Teleb ning ara, anggun dam tuba-tuba yanyana uk uptue.
Minop talak ara, anggun obuka sirya daksikce, anggun nong deice ikin ning delilamsik nang, sikce deibikba dadeipdanin yanganamak mapu nirya ara, anggun dam yakirye, anggun tibuk si erena ati, kisok kanupdongobuka kinamsiyake. Tonda anggunti malya nyabuka yep-yep alamsik nang nirya ara, anggun damuk yanuka kekebuka weknamake. Winipsikirye anggun mutuku Yerusalem mutuku ati nyanamake. “Se, amutuku ara dipkoprob Allah Yahweh elce wipdeiamuk mutuku, el ‘Naʼ tenen, mutuku ulule,” nyabuka nyanamkiyake. Tonda, “Se, Sion mutuku ara, malye ning tonok ning kum ulirye, Pia Lyena Deiyoknye Allah ara, Israel ninye kalikuka melilulnye, el amutuku ati kanye delilule,” nyabuka, Yerusalem mutuku ati nyanamake.
Allah Yahweh arye, Israel ninye sik wenena ati, pia asilena atonun nyabuk yupu ara, ani. Ati ara, nunce yata ning doprobibirye, Allah Yahweh el si erena ati, el dam boyanganamap do? Allah ara, el im deice tam ululnye biti, yatato ning dobuka, el arena ati yatibirye, el dam kisok kanupdongobuka, yanuka arenamap do? Ara, nun malye unyap ning ati, adiparyuk oplopsutu bukni, nun pununa ati, adiparyuk sapi basam yim dobuka obibirye, el si erena ati, uku dongolyanamap do? Aning areptibiba, kanye deipnamsil do? Aning atonun, sapi basam winiryuk ning, keting tamun tonok uk mabuk ning dobuka, Allah el si erena ati, yanuka areptibiba, kanye deipnamsil do?
Ura, na kayapo. Sik minop talak ulamik Israel ninye, asing eipmanto ning dam yangalamik bukni, anggun wini talak ululum ninye ara, pia yuk nang dam yanmalume. Anggunda, Sion mutuku, Pia Kam Una Deiyoknye Allah, el ulul mutuku, im deice Yerusalem asik dam yanganmalume. Anggunda, weik yupa weik kum nukmanto, im deice pil don nang teleb kanye deibuka, malaikat beribu-ribuan bulubuka, weklamak dam yanganmalume.
Allah El Dib Kanye talipnuka deice arye, amalaikat dobuka bobinukce, weik mutuku dup deipnuk. Weik mutuku dup deipnukba, Allah im deice tam arye dopkwetebukba, koluka yanganmok ara weik asik Yerusalem Winiryuk ning eipse. Anyasik noutamak nirya ara, malye ning tonok babye kum uamuk. Pia telebuk uamukak eipse.
ကြော်ငြာတွေ