Na ni Allah, na ilil unilye talak nirya ara, keil deiya wekuka, dungnunye touk, ikin unilye talak nirya ara, ancuk melibuka lelildongonilyama anya arye, an aminyan tam dungnubuka banune. Yin talin nang arye, ‘Mal oldan talak ara, mal dobikceura, biklyak’ tenen, kelapye lilibuka winilamak touk, ance melibuka kalikinilyame. Na melina ati, kelapye atonun lelinilyame. Na lyena deiyoknye bira, an uka. Na ni Allah, anda keil bukamlye mutuku dup amu tam dungnul banun atonun, an mikip deice arye lelilamnilame. Pia yu nang arye, ‘Anye bira opnuyap,’ tenebikirye, mal wiyanganinyak bukni, na ni koprop ance lyenilyame.
Mazmur 46:2 - Eipomek2 Nun ikin usilye talak nirya ara, nun ni Allah ance melisimince, mikip arisilyame. Allah ance lelilongosilyame. Allah anda ninye kanye imun upsilye ning babye melisilyamnye. အခန်းကိုကြည့်ပါ။ |
Mazmur 46:2
22 ပူးပေါင်းရင်းမြစ်များ
Ati, na ni Yahweh anti, ‘Se, ancuk melibuka lyepnilyame!” nyabuka morokunune. Narye Allah anti, ‘Yu nang arye opnikcak’ tenen, na duknupmantoak ara, an dam uka. “Na melipnamnilam,” nyabuka, morokinirye, nyapnukine, na nio! Na kam tuba unun talak nirya ara, yuk nang arye kum bukni, Allah ancuk pia bico tenepnimince, melinilyame. Allah ancuk nati melinilyame.
‘Atalak ara, na mal olan nang arye, opnuniyak’ tenen, dipkoprob pia imun kanye bobuka ulamsa ati, narye anda Allah Yahweh ati, “Melibuka lyepnilyame!” nyabuka, moropkise. Diba, na si erekunun Allah ati, “Naio ancuk yanuka melipnilyame!” nyabuka moropkise. Anti moropkise talak ara, an si eren aik pum tam arye, na ngalukuka moropkise yupu kekepnulume. Ara, narye engebuka moropkise yupu akunum nyapsopura, an amul arye kunum kekepnulume.
Aning ati ara, na mal olan nang arye, na opmanto winipnamniak talak ara, nara imun kanye bobuka, kunukna atonun, mutuku binamne talak babye, na ton ilil kum unamnile. ‘Se, yata malye ning, na nong deice upniliba, ikin unamne do?’ tenen, pia kum tenenamne. Ara, talye ati kume. Deiyok ara, Allah ance na dam yanuka umince, nati tuba melinilyame. Na dam pia neika ulyame. Tonda, winipmanto ara, domba basam weina deiyok nang arye, sik domba ati, ‘Nun domba basam, yuk tam, opmanto mutuku bicak’ tenen, kama bobikirye, sik domba basam nong deice yakuka teleb bisik noutam kilamak touk, Allah ance nati, kalikuka melinilyamce, peterenilyame. Winibuka wininilyama ati ara, nara ilil asa una kumce, teleb kanye deibuka unune.
Nun ni Allah Yahweh ara, elce nati, tuba-tuba mikip kilinulule. Winipmanto ara, yin talin nang arye, yuk nang ati, ‘Sikce mal bobikirye opsicak’ tenen, sik nong lelilongona ati, kat ning, el si ara perisai, talibuka balamak touk, Allah arye nati, kalikinulule. Allah ati ara, ‘Dip,’ tenepnirye, na kanye talima nirya, el deiceuk delinune. Allah ati, mikip arye diba tenenuna ati, melinilya deice arye, na kanye talima noutam ara, pia kanye deibuka, mot nyana deice, kil-kil asa arye unune. Narye na ni Allah ati, “Naio, anda pia teleb ulyame,” nyanune.
‘Nun ni Allah ara, pia mambulnye ulule’ tenen, diksukumuk wininyak ninye ati, Allah el si Yahweh aniryuk lyesulule. Tonda, weik imun ning, sik dam yanamle talak ara, Allah arye sikti, melibuka lyepnamle. Winipmanto ara, ninye arye, ‘Nun mal olan nang arye opsicak’ tenen, keil aik pum tam duknubuka balamak touk, sik diksukumuk wininyak ninye arye, ikin ning, sik dam yalyopura, ‘Allah aniryuk melibuka lyepnamsil’ tenen, Allah el dam anyuk banyake. El amu tamuk ubicopura, Allah Yahweh arye, aninye ati pia melilule.
Malye unyak yu nang arye, winisinyak bukni, narye an pia mikip weik ulyamnye biti, mot deice arye nyanamne. Tonda, asum-asum nirya, akunum bereklyopura, an si erena ati, kanye kil-kil mot nyanamne. Ara, anda, weik tonun bico tenesimince, ance, ‘Winibuka pia telebuk kilinamsine,’ nyabuka, nyalin yupu deice arye, nyapdeiamsulum ning ara, aning tenebuka, mot deice arye nyanamne. Amot ara, talye ati kum nyanamne. Deiyok ara, an mikip weik deice arye akunum pia melibuka kaliklamnuluma ati, mot nyanamne. Winipmanto ara, ‘Nun mal olan nang arye opsikcak’ tenen, ninye arye weik keil arye, deibuka donyak keil aik atonun, akunum winilamnuluma ati, mot nyanamne. Tonda, ‘Yu nang arye opnikcak’ tenen, imun kanye bobuka, unmanye talak ara, duknuptiniba, yu nang arye, kum opnitinga atonun akunum winilyama ati, amot ara, nyanamne.
Ninye tukwak nang arye kum bukni, ikin upmanilibuk na ni Allah arye, lyepnilyopura, teleb kibuka erepdeipniliba, yuk nang arye, nati, si erebuka kininyake. Allah ara, elcuk melibuka kalikinulule. Yata ikin ning do nirya, el dam kum yanuka opnutua ati, el dam ara, na telebuk unune. Elda pia mikip weik keil aik atonun, tonda weik mutuku kon keil atonunye ulule.
Ati ara, anggun tukwak mutuku noutam ululum nang, mutuku sirya, im sirya nirya ara, Allah atibuk, diba tenebuka, el deiceuk anggun kanye talima delinamlume. Tonda, anggun kanye talima noutam, ikin usulul ning nirya ara, el tibuk laka nyanamlume. Diba, Allah ara, nun lyena deiyoknye usulule. Elce melibuka kalikinamsile.
Sik pia malye weik wininyak nang ara, weik arye kum kel bikamike. Tonda, ‘Teleb winin ning ara, ani’ tenen, dipkoprob moubuka kum tenenyake. Ati ara, talye-talye bakirye, malye winin ninguk talibuka, wininyak deice arye, sikda pia kunuknak noutamuk banyake. Sik adeiyok nang arye, pia malye weik wininyak deice arye, yuk-yuk nang nirya eibikirye, sik babye malye wininyake. Winipmanto ara, tukwak mutuku nirya amu tam bulul keil ara, long-long aplyeba, mutuku kon nirya, tokna pakuka sakalamle atonun, sik malye wininyaka deice arye, yuk-yuk nang nirya babye, eibikirye malye wininyake. Wininyak deice ara, Allah arye, ‘Aning ara, wininamlume. Aning ara, pia kum wininamlume,’ nyana yupu nirya ara, sikce kum kilisinyake.
Narye, na ni Allah el si Yahweh ati nyanune. Na ni Allah ance nati winipmanto, weik keil aik domica noutamak ulamak touk, nara an erebuka uminyeba, nara an amu tam unamne. Aning ara, talye ati kume, narye an Allah ati, ‘El bidamnye aryuk, melibuka kalikniliba, ikin ning na damak, kum yanamnila anya arye, elce pia lyelonamnile,’ tenebuka unune.
Diba, nun ni Allah, anda nun Israel ninye ati, pia melibuka kalikisilyamnye ulyame. Tonda, yu ninye arye nunti, opmanto usinyak talak ara, melibuka lyesilyame. ‘Allah elcuk winisulule,’ tenekinyabe. Bukni, yata deiyok ati, ance kum kekelamsiyak nang atonun upnamsilam do? Winipmanto ara, ninye asik nang, tia yanuka tonok lukunyan yanuka mapmaca, adiparyuk balamak nang atonun upnamsilam do? Tonda, yuk mutuku ninye asik nang arye, nun mutuku tikilyanabica ani, adiparyuk tamubuka, bisik balamak nang atonun upnamsilam do?
Bukni, Allah Yahweh elda pia teleb ulule. Winilirye, elda elti, diba tenenyak nang nirya ati, kanye imun upsilye talak ara, elce pia melisulule. Ninye arye, ‘Nun mal olan nang yanuka opsicakʼ tenen, kat keil arye dobuka, cang keil aik ap, poka ap dobikirye, akeil aik pum tam dungnubuka balamak touk, Allah Yahweh ara, ‘El dam ati, yanuka melibuka lyepropsutueʼ tenen, el dam yanganamak nang, sikti, kalekuka melinamle. Kanye imun ning, sik dam kum yanganamle. Weik mok ceplirye, weik mek deipturye, obuka tokna dobuka, ninye asik dam yatua babye, Allah arye elti, diba tenenyak nang ati, kalekuka melipliba, telebuk unamake.
Nyabikopura, Yesus arye tamubuka nyabuk. “Na dipkoprop nyapsine. Yatanye do nirya, kanye talima bokoltona kumce, Allah ati pia dib teneplirye, ‘Narye Allah ati moropne ning ara, Allah arye dipkoprop winipnamnile,’ tenebuka, Allah ati moroplyopura, weik mambul ning uptue. Ara, narye nyapmanuba, ara yo kolupmal touk uptue. Tonda, aninguk kume. Omutuku ati nyaptue. ‘An yuk aryuk erepdakuka, laut mekwen noutamak delilbilyame,’ nyaptuopura, el nyaplye yupu deice aryuk, amutuku el yuk aryuk erebuka, laut mekwen noutamak dopkwetepdatue.
Allah arye, ayupu nyapsuka ati, kanye teniltona kum arye, diba tenebuka, anyapnusin yupu talibuka unamabe. Ara, Mazmur noutam arye nyapdeiyamik yupu ani. ‘Na melinilinye ara, weik Ninye Deiyoknye Allah ulule. Ati, na ilil pia kum unamnile. Talye ninye arye, yata wiripnitingba, Allah arye kum melipnutu do? Kume, Allah arye nati, pia melinamnila anya arye, na ilil kum unamnile.’ (Mazmur 118:6-7)
ကြော်ငြာတွေ