Mazmur 45:7 - Eipomek

⁷ Se an ni Allah, an weik tonun, aning-aning nirya talibuka, nun ninye deiyoknye ulyam ning ara, pia aunalame. Aning ara, pia kum, kum datue. Ance ninye deiyoknye kina ati, emas kama dopmince, nun ninye tukwak nang ati, yupu lipsisikuka bokeipsimince, ‘Wininamlume,’ nyabuka, yupu nyasilyam ning ara, pia telebuk ulule. Ninye yupu lipsisikuka bokolina ati, ance, ‘Na kwit’ tenen, tenebuka arye, kum nyasilyame. Pia dipkoprob yupu uk nyapsimince, yupu lipsisikuka bokolisilyame.

Mazmur 45:7 ပူးပေါင်းရင်းမြစ်များ

1 Raja-Raja 19:16

Nyabukce ayupu ton nyabuk, “Aning atonun, ninye si Nimsi, el mi Yehu biti ara, Israel ninye sik deiyoknye kina ati, anye wipdeipnulyame. El babye lakina ati, tilil ulamle mek, el kisok deice dikeipnulyame. Tonda atalak aryuk, Abel-Mehola mutukunye, el si Safat, el mi Elisa bira, na yupu nyapdeipniba, lak nyalbananye, ‘Nabi upnamle’ tenen, wipdeipnulyame. Ara, an taliplum pil pununa ati nyapkine,” nyabuk.

Mazmur 101:8

Malye winin ninguk talibuka, pia malye-malye weik wininyak nang nirya ara, asum-asum nirya, beren tam talak arye ulamle touk, narye ninye yupu lipsisikuka bokeipnamne talak ara, ato nang ati, dobuka wenepnirye, obuka sirya daknamnamne! Diba, sik malye winin ninguk talibuka, malye weik wininyak nang nirya ara, nun ni Allah Yahweh arye, el kanye pia delilul mutuku, ‘Yerusalem mutuku noutam, anang pia kum unamak’ tenen, aning atonun wininyak nang ara, dobuka wenepnirye, obuka sirya daknamne!

Mazmur 11:7

Aning winipnala deiyok ara, talye ati kume. Deiyok ara, Yahweh el kanye talima noutam ara, pia diksukum winin ninguk winilula ati, ninye arye wininyak ning ereplirye, kanye delilula ati, elce, “Aning ara, wininamlume. Aning ara, pia kum wininamlume,” nyapdeipsuk yupu deice nyasilye touk, wininyak nang ati, el kanye pia delilule. Ati, diksukumuk wininyak nang ara, sirya talak ara, el dam yakirye, el urasin ton eipnamake. Allah arye, sik anang ati, bico teneplirye, kanye deipnamle.

Mazmur 2:2

Aning ara, sik ninye deiyok talibuka unyak nang ap, tonda mambul weik nang nirya ap, bulubuka wekikirye, Allah Yahweh ap, ‘Tukwak ninye lyepnamle’ tenen, wipdeibuknye ap ati, ‘Sik si yanipnamap’ tenen, yupu talinyake.

Mazmur 21:6

Allah an mikip arye, tuba melibuka lyenilyama deice arye, yuk nang nirya arye, nati, si erepnikirye, “Anda pia telebnye,” nyaninyake. Allah ance nati, pia teleb akunum kipdeipnuluma ati ara, yuk nang eipnikirye, nati, “Se, Raja bira, pia telebuk ulule. El urasin babye, pia telebnye ulule,” nyapnamniake.

Mazmur 33:5

Malye winina pia kum diparyuk, teleb winin ning nirya ara, Allah arye kanye delilule. Tonda, ninye yu kanye bolana kumce, ninye yupu lipsisikuka bokolina ati, ninye winilamice touk, pia diksukumuk bokuka lipsisikna ara, Allah arye kanye delilule. Tukwak mutuku-mutuku nirya ara, Allah arye nunti bico tenebuka, weika arye melisulul ning ara, pia langdibuka ulule. Allah arye bico tenesilirye, melisulul ning ara, pia kum batakalule. Pia ati bico tenesilirye, teleb winilisulule.

Mazmur 89:20

Minop talak an yupu lak lena deiyoknye tonok ati, lengdar mana deice arye, yanuka nyapdeiamlume. Ara, “Talye daunmace ninye kan-kan arye, tonoknye ton, narye wipdeipnirye, narye nyapniba, anda na yupu lak lenanye birye, el kisok deice minyak mek dikeipminba, Israel ninye sik deiyoknye Raja unamle,” nyapdeiamlume. “Anye Daud bira, ninye noutamak daulamlya ani, narye erepdeipniba, ninye deiyoknye kiplirye, Israel ninye talibuka unamle,” tenen, nyapdeiamlume.

Mazmur 89:26

Na Allah arye elti, mikip weika arye arepneba, Daud birye talinamle mutuku ara, keting kumulban tam deibuk. Pia weik laut mekwen arye dipdongobuka, keting yangan tam Efrat mek ap, Tigris mek ap, otam nirya ara, talinamle. Anyapman mutuku nirya ara, elti, arepneba, elcuk talinamle.

Mazmur 99:4

Tonda, Allah ara, Pia Mikip Weik Deiyoknye, Raja ulule. Tonda, el Allah arye, “Aning ara, wininamlume. Aning ara, pia kum wininamlume,” nyapdeiamsuk yupu nyasilye touk, ninye tukwak nang ati, yupu lipsisikuka bokeipsilirye, dengna aresulule. Elce nyapdeiamsuk yupu ati, kanye delilule. Allah elcuk, ninye yupu lipsisikuka bokolina ati, “Talye yupu ap, nong kum talye nyan yupu ap, minin yupu ap, nyana kumce, diksukumuk ubuka, yuk nang ati, ninye yupu lipsisikuka bokolinamlume,” nyapdeipsuke. Allah arye, “Aning ara wininamlume. Aning ara, pia kum wininamlume,” nyapdeiamsuk yupu nyasilye touk ubuka, nun Israel nang ati, diksukum kibuka, melibuka teleb kilisulule.

Yesaya 11:4

Aning kum bukni, elce bona utotoa talina kum ninye ap, mikip kum ninye ap ati, el diksukum ulye deice arye, yupu lipsisikuka bokolinamle. Bona weik talin nang arye, talye bona utotoa talina kum ninye ati, yaniltanyakba, bona kum ninye arye, ‘Se yata wiriptibye do?’ tenen, malye kanye bobuka moronyak ninye ati, pia telebuk ulinamle. Winipmanto ning ara, kama mikip asa arye, tuku deice olamak touk, sik malye wininyak ninye ati, weneplirye oplopnamle. Malye winibuka ulamikce ninye ara, el yupu nyanamla deice arye, wenebuka oplopnamle.

Yesaya 9:6

Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake.

Imamat 8:12

Apil akunum nirya winibukopura, Musa birye, Harun wibuka deibukce, ninye deiyok nang wibuka deimokce, kisok deice dikililamak minyak mek mitik tonun ton, Harun el kisok deice likdeibuk. Awinibuka deiyok ara, ‘Harun bira, Allah el si eren aik pum tam, pil dona deiyoknye unamle. Elda malye winin ning nirya bataklirye, elda telebuk unamleʼ tenen, minyak mek mitik tonun arye, Harun el kisok deice likdeibuk.

Matius 3:15

Nyabuk bukni, Yesus arye tamubuka nyabuk. “Kume, Allah arye nunti, ‘Winibuka diksukumuk unamake’ tenepsuk touk, diksukum ninguk wininuyaba ati, wini talak ance mek dongopnilyame,” nyabuk. Nyabukura, Yohanes arye telebe nyabuka Yesus mek dongobuk.

Matius 7:23

Bukni, narye aninye ati, adiparyuk laka kibuka nyapnamne. ‘Anggunda kanye talima pia malye ululum nang anya arye, na dam arye bindoplulume. Anggun winilamluma ara, na kum kel bikamsise. Anggunda na mapu koprop kume. Anggunda na walwale,’ nyapnamne,” Yesus arye nyabuk.

Lukas 13:27

Nyapnamlum bukni, adeiyoknye birye tamubuka nyapnamsile. “Anggun dan mutuku arye yanmalum nang do? Na ap neika kum ulamubu ati, anggunda na pia walwale. Na tam nang kum ululume. Anggunda, pia malye winilalum nang anya arye, anggun adiparyuk yuk-yukak bindoplulume. Na dam kum unamlume,” nyapnamsile.

Lukas 3:22

Mek dongobukba, lukuka tikukura, Yesus arye dinmok talak ara, adiparyuk Allah arye im deice pakibukce, Allah El Dib Kanye ara, yalma maka atonun dayukce, Yesus el nong deice bulyayuk. Bulyayukopura, Allah im deice arye ayupu nyabuk. “Anda na Mi Koprop ulyame. Narye anti pia bicoe tenekenuna anya arye, anti na kanye pia delikunune.” Allah arye Yesus ati nyabuk.

Yohanes 1:16

Anye bira, elce tukwak ninye ati, bico tenena deiyok ning ap, melina ap, lyena deiyok ning ap, weik arye kanye ulamuk deice arye, teleb ning weik areamsukce, teleb kililamsukba, nun nirya dololamubu deice arye telebuk unyabe. Elce pia teleb ning arilamsukce, teleb kililamsuk touk, wini talak babye, pia tuba aresulule.

Yohanes 20:17

Nyabukura, Yesus arye nyabuk. “Na ni Allah dam tamubuka min kum binmana anya arye, na nong kum talipnunilame. Ance tamubuka, na weit yapu nang nirya ati, ayupu laka nyalbinulyame. Ara, ‘Na Yesus ara, na ni dam, Allah el un dam tamubuka binirye unamne. Na ni bira, anggun ni uka. Na si erenun Allah ara, anggun si erelulum Allah uka. El tonoka,’ nyalbinulyame.” Yesus arye nyabuk.

Yohanes 3:34

Allah arye tukwak mutuku dopdeipsuknye, elce talye yupu kume. Allah el dipkoprop yupu nyasulule. Allah arye anye biti, el Dib Kanye weik arye arilule. Ara mitika arye bokuka arena kume. Kum nukmanto pia weik, Allah arye el mikip ariliba, im deice arye tukwak mutuku yayuknye birye amikip dololule.

Rasul 2:28

Pia kam una ati, “Abisik binalam ning ara, anye,” nyabuka laka nyapnulume. An dam unibuk, kanye deilin ning weika arye arenamnilame.’ (Mazmur 16:8-11) “Daud sekamuk yupu ara akunum nyapsine,” Peterus arye nyabuk.

Roma 8:29

Ayupu ara talye ati kum nyapsine. Deiyok ara ani. Ara, minop talak Allah arye akunum tenebuka kel bikamsukce, ‘Sikda, na mapu unamake anya arye, aninye teleb kipdeipniba, na Mi Kopropa el teleb kibuka ulul touk, sik babye atonun unamak’ tenen, akunum wibuka deiamsuke. ‘Unamake’ tenen, wipdeiyamsuka deiyok ara ani. Ara, Allah arye, ‘Na mi kopropa Yesus Kristus ara, minyuma du mi atonunye ulyopura, el weit yapu ara, noutam mapu atonun kibuka tabaknin bakirye, weik upra banamake,’ tenyamsukce, wipdeiyamsuka ati nyapsine.

Efesus 1:3

Nun Weik Deiyoknye Yesus Kristus, el li kopropba Allah ati, “Telebe,” nyabuka pia nyanamabe. Kristus ap, kanye talima dukdongopsuka deice arye, akunum teleb kipdeipsuke. Ara, nun kanye talima teleb kilina ati patasilye ning nirya ara, im deice arye, akunum kintinibuka deiamsuke.

Ibrani 1:9

Ance kanye delilyam ning ara, malye winina pia kum, diksukum un ning uka. Ance, lik tenepmince malye kanye bobuka uminye ning ara, malye un ning nirya atia. Winibuka uminya ati ara, ance na si erebuka kinilyamnye na Allah arye, anti wibuka erepdeipkise. Eripkisirye, an ap, neika unyak ninye nirya deice tam akunum erebuka deipkise. ‘Aning-aning nirya deice tam umince, aning-aning nirya talibuka, weik deiyoknye unamlam’ tenen, wibuka deipkise. Winibuka erepkisa deice arye, pia pin-pin kanye deibuka, ulyame.’ (Mazmur 45:6-7)

Ibrani 2:14

Elce, “Na mapu,” nyabuk ninye ara, tukwak ninye unyakba, nong kalina ap, ining ap, ululba unyaba anya arye, Yesus el babye, ninye nong atonun dayukce, nun kan-kan ulamuk. Ninye nong dayukce ulamuka deiyok ara ani. Ara, Yesus arye, ‘Ninye lyena ati, na dipnyopura, adeice arye, ninye dipna deiyok ning talibuka mikip ululnye, Isa Mutuku Dongonye biti, malye kipnirye oplopnamne’ tenen, Yesus arye ninye atonun dayuk.

Ibrani 7:26

Ura, nun malye winin ninye kum melipdanmanto unyaba ati, nun patasilye touk, anye birye melibuka lyesulule. Allah ap, ninye ap dana-dana ansinilina deiyoknye, nun deiyoknye Yesus ulul ning ara ani. Elda, pia malye una kumnye ulul ati, malye winin ning tonok babye kum winilule. Elda pia malye una kumnye ulya ati, sik malye winin ninye yuk, el pia yuk ulule. Aning-aning nirya outam aubuk bukni, Allah arye Yesus dobuka, im deice tam erebuka deibukba, weik mambulnye ulule.

Wahyu 21:27

Atalak nirya ara, malye ning tonok babye, Yerusalem Winiryuk mutuku noutamak pia kum boyanamake. Tonda, malye wininyak ninye ap, tilila ning wininyak ninye ap anyasik noutamak pia kum wekelyanamake. Amutuku noutamak ara, sik malye winin ninye kum yanmanto bukni, Domba Mi Atonye birye talilye buku, Kam Pia Unamak Ninye Si Sekna Buku, abuku noutamak sik si akunum sekiamuk ninyeuk ara, sikda Yerusalem Winiryuk mutuku wekelyakirye, anyasik noutamak pia unamake. Na Yohanes arye nyapne.

1 Samuel 16:13

Nyabuka ati ara, Samuel adiparyuk minopce minyak zaitun mek doprobukce, el du yapu wekmek kan-kan noutamak, Samuel birye, Daud wipdeibuk. Asum arye, deiyok koubuka, dor upra balamuk talak nirya ara, Allah el Dib Kanye, Daud deice yayukce, mikip deice arye meliamuk. Samuel birye, Daud akunum wipdeibukopura, adiparyuk Rama mutuku tamubuka biyuk.