Mazmur 42:5 - Eipomek

⁵ Na ikin unilye talak ara, engena deice arye tuba tenenune. Se, na ni Allah, na ap, ninye weik ap, an si eren aik dam bana ati, narye deiyok koubuka, ninye dobuka balamse. An si eren aik dam balamupu talak ara, na ap, aninye nirya ap, pin-pin kanye bobuka, mot deice arye anti, ‘Telebe,’ nyabuka, balamupu. Wini talak ara, ikin weik unulul bukni, minop talak ulamse ning ara, tuba tenenune.

Mazmur 42:5 ပူးပေါင်းရင်းမြစ်များ

Ayub 13:15

Anggun ap, na ap, neika uk eipnamabe. Na teninun unun ning ara, laka nyaptiniba, Allah kekepnilyopura, Allah el yu upliba, nati adiparyuk opnamnil do, kum do? Na walwal bukni, na kanye ara, elce opnamnil kum danya. Ati ara, ‘Elce lyepnetue,’ tuba kum tenenun bukni, opnilya babye, ‘Na teninye ning ara, el dam laka nyaptinyeʼ tenen, patapnile. Allah el dam, “Nara malye kum wininune,” nyabuka, laka nyanamne.

Mazmur 35:14

Ara, na kwit koproba do, na weit yapu koproba ap, na du yapu koproba do, akunum dipmatingba, narye malye kanye boptinirye, weik tonun engenauk upnamtinye touk, sik anang ati tenipsirye, bico upnukba, engepse. Atonun, na nin koproba diptuba, pia malye kanye bobuka, kisok kanupdongobuka banmatinirye, engebuka ngaluktinye touk, sik anang kanye imun nakina dilamuk talak ara, anang ati tenipsirye, pia bico upnukba, engenauk unmase.

Mazmur 37:7

Ati ara, malye wininyak ninye nirya, sikce pil dopra bakce talak arye, ‘Aning winipnamabe,’ tenelamik touk, nong akunum uplyopura, anggun diba tenelulum ninye arye, ‘Se, yata deiyok ati, sik tenenyak ning, nong upliba dolonyak do?’ tenen, malye kanye bobuka, kum unamlulume. Sik malye nang arye, ‘Malye winin ninguk talibuka unamabe,’ tenebikirye, yupu sisikinyak ning, akunum winibikcopura, anggun diba tenelulum ninye arye, ‘Se,’ tenen, malye kanye kum bonamlume. Aning kum wininamlum bukni, anggunce tuba diba tenemunce, ‘Allah ara, dan talak yanuka melipnamsil do?’ tenen, kanye talima lamapdongobuka arye, amu tamuk umunce, kintinibuka dinauk unamlume. Ulamunya ani, dipkoprob Allah el tenebuk sum, akunum uplyopura, el tenebuk touk, nong upnamle. Anggun diba tenelulum ninye arye, ‘Allah arye minopce melipsutuba, telebuk uptibye,’ tenena kume. ‘Allah el tenebuk talakuk, teleb kipdeipnamsile’ tenen, teleb kanye bobuka, unamlume.

Mazmur 38:6

Tonda na walwal arye winilamse ning ati, na dila babye, akunum lyubuka malye weik winipnin banmaniliba, tong weik nyalule.

Mazmur 42:11

Ara, talye ati kum nyapne. Na mal olan nang arye, “An ni Allah ara, dan ulul do?” nyabuka, nalininyaka ati ara, na yok ara, pun deipliba, ikin weik ulamle touk unulule.

Mazmur 43:5

Wini talak ara, na kanye talima, uk diniliba, ‘Yata ning ati unulul do?’ tenen, teniltonune. Bukni, narye na bidamang ati, utenelanune. Yata deiyok ati, na teniltonauk unamne do? Tonda, yata deiyok ati, kanye talima teniltonauk unamne do? Ati nara, Allah ninye lyena deiyoknye ati, diba tenepnirye moronamne. Moropneba lyepnilyopura, narye na ni koproba Allah, an siuk, pia erenamne. Ati ara, Allah antibuk, diba tenenauk unamne. Daud birye nyabuk.

Mazmur 44:3

Ara, nunti areamsulum mutuku noutam ara, an Allah ati, kum bikamik nang ulamikce, amutuku nirya talilamik bukni, yuk-yuk yala nang nirya ara, Allah an taruk koproba aryuk, anang yakuka dopkwetalamukba, sik nirya balolamik. Bukni, nun Israel yala nang nirya ara, nun apu yapu arye dobuka, amutuku noutam arye, mikip kipdomunce, asukum diamlume. ‘'Amutuku noutam ara, Allah ance, nun apu yapu teleb kibuka, asukum deiamlum bukni, sik yuk-yuk yala nang nirya ara, sik nong deice, weik imun ning delilamukba, sikda, ‘Se’ tenen, amutuku batakuka bindobik. Winilamlum bukni, nun Israel yala nang nirya ara, lobukapsulumce, lyepropsulume.

Mazmur 56:11

Allah arye nyalul yupu nirya ara, narye, ‘Ayupu ara pia telebe,’ nyabuka, elti, si pia erenune. Atonun, na ni Allah Yahweh arye, ‘Winipnamne,’ nyalul yupu nirya ara, ‘Aning ara, pia telebe,’ nyanune.

Mazmur 56:3

Diba na nio, asum-asum nirya ara, na mal olan nang arye, yaninikirye, ikin ning dobuka, na deice deilininyake. Ninye yupa weik tonun, ‘Anye bira opnuyap’ tenen, warikininyaka ati, anda, aning-aning nirya talibuka, deice tam umince, Pia Mikip Weiknye ulyama ati, an adiparyuk melibuka lyepnamnilam’ tenen, moropkine.

Mazmur 61:2

Na ni Allah na moronmakin ning nirya ara, ance moubuka kekepnilyame. Tonda ance eipnimince, moubuka kel kipnilyame.

Mazmur 71:14

Na mal olan nang ara, alye weik dakdanamak bukni, narye Allah anti, ‘Allah elcuk nati, melibuka lyelonamnil,’ tenen, tuba-tuba diba tenenamkine. Tonda, Allah anti, “Anda pia telebuk ulyame,” nyabuka, tuba-tuba tabakuka an siuk erenamkine, na nio!

Mazmur 77:3

Diba, na ikin unilye talak nirya ara, nun ni Allah arye, aning-aning nirya talibuka, deice tam erebuka, mikip weiknye ulula ati, ‘Elcuk lyepnutu’ tenen, el tibuk moronune. Lukunyan noutam nirya ara, didik sena kumce, na taruk erepnirye, ‘Na ni Allah arye melipnamnil’ tenen, batakna kumce, el tibuk moronune. Na talima daksaknuka ati, yuk nang arye, ‘Nun ka bira, ikin ulula ati, nunce el kanye kwa dipnamabe,’ tenen, piribuka melipniting bukni, nara kanye deibuka, pia kum uptinye. Tuba imun kanye bobuka unune.

Yesaya 30:29

Bukni, anggun Allah el mapu koprop, Yudea tam ululum nang ara, kanye deipmunce, kanye deilin mot uk nyapnamlume. Ara, winipmanto ara, ‘Allah el si erebibirye, el si erenak, mutuku kon deice binamapʼ tenen, teleb kanye deipmakirye, kwalina lukunyan talak kwalibikirye, kanye deilin mot nyabuka balamak touk, anggun Yudea tam nang babye, atalak ara kanye deipmunce, kanye deilin mot nyapnamlume. Tonda winipmanto ara, sik Israel nang arye, Allah el si eren aik bunukca ati, bung-bung nyan ning el si seruling bopnarye nyapnin balamak touk, anggun Yudea tam nang babye, atalak uk aning atonun ubuka kanye deilin mot nyapnin banamlume.

Yesaya 50:10

“Anggun noutamak noutam ara, yata nang arye Allah Yahweh ati, ‘Se el weik mambulnye’ tenen, el si erelulum do? Tonda Allah arye wipdeibukba, el pil dolulnye nyalul yupu ara, anggun noutamak arye, yata ninye arye ayupu kekebuka diksukumuk ululum do? Yata ninye do nirya, kunukna bisikuk bamunyeba, dirina kum usilye ninye ara, Allah el si Yahweh ati diba tenebuka unamlume. Tonda, ‘Nun ni koproba Allah elcuk melinamsil’ tenen, anggun kanye nirya el deice uk delinamlulume.

Bilangan 6:26

Tonda, Allah anggun dam ulirye, anggunti pia bico tenebuka melipsilirye, kanye dukulongon ning arepsiliba, anggun winin ning nirya pia telebuk unamlume. Anggun ap, Allah ap, yuk nang ap, teleb ubuka neika unamlume. Tonda, ‘Anggun ilil asa una kumce, kanye deibuka, teleb kebuka unamlumʼ tenen, Allah arye anggunti, melipsiliba, anggun kanye nirya dakeiyam asa telebuk unamlume. Israel kili sal dam ati ayupu nyapnamlyame,” Allah arye Musa biti nyabuk.

Matius 1:23

Yesaya arye nyalilamuk yupu ara ani. ‘Ninye dona kum kil arye, mi bomlya ani, sal mi deipnamle. Deiplyopura, el si ati Imanuel nyanamake. Imanuel nyanamaka ara, ‘Allah ap, nun ap, neika unyapnye’ tenen, nyanamake.’ (Yesaya 7:14)

Matius 26:38

“Na kanye talima ikin ubuka, pia ilil kanye bopmana ati, na kanye talima uk dimanilce, dipmanto upmane. Na talima uk pia dinmanila anya arye, na talima melildana ati, meneng dam asukumuk, mana kum, bunauk upnamalulume,” nyabuk.

Matius 28:20

Tonda, narye, ‘Wininamlulume,’ nyabuka peterelamsise yupu nirya, ‘Aninye babye, aning atonun winibuka unamak’ tenen, na yupu bobuka peterelbinamlume. Wininamlum talak nirya ara, na dipkoprop nyapsine, na ap, sik ap, neikak unamabe. Winibuka daulamibya ani, sirya talak babye, na ap, sik ap, pia neikauk unamabe.” Yesus arye nyabuk. Telebe, na Matius arye ayupu sekdeipsine.

1 Samuel 30:6

Aning nirya winipmekba, Daud el melina nang, sik yin talin nang ara, weik kanye ikin ubukce, ‘Se, nun kilapu ap, nun mapu kilmapu nirya ap, Amalek nang arye, akunum dobuka bobinmake. Winipmasiaka ati ara, nun deiyoknye Daud biti, keil dobuka, opnuyap do?’ teninmek. Utenebikba, Daud birye, ‘Se, yata wiriptinye do?’ tenen, tenipdeyukce, ikin kanye bobuk. Bukni, Allah el si Yahweh arye talima pum tam mikip arebuk deice arye, Daud el talima melibukba, Daud el mikip tuba ubuk.