Mazmur 37:31 - Eipomek

³¹ El anye bira, Allah arye, “Aning ara, wininamlulume, aning ara, pia kum wininamlulume,” nyapdeiamsuk yupu ara, pia moubuka, kanye talima pum tam deibukce ulule. Allah el dipkoprob yupu uk, tenebuka winilula ati ara, el winilul ning nirya, telebuk winilule. Winipmanto ara, alap arye pitikuka saknabuk, kum olamla atonun, telebuk ulule. Aning atonun, toupne dama arye, dongobikiba, kum kwirilsaklamle touk, ulule. Malye winin ning talibuka, kum winilula ati ara, elda mangkau kanye bobuka, malye kum winilule.

Mazmur 37:31 ပူးပေါင်းရင်းမြစ်များ

Ayub 23:11

Nara, Allah arye nyalul yupu moubuka talipnirye, pia kum batakanune. Allah elce, “Abisikuk binamlume,” nyapdeipsuk bisik ara, narye batakuka, yuk kwalin bisik kum banune.

Mazmur 1:2

Bukni, sik Allah ati dib tenenyak ninye ara, sik patalul ning ara, Allah Yahweh arye, ‘Wininamlulume, aning ara kum wininamlulume,’ nyabuk yupu nirya atibuk, kanye deibikirye, moubuka kekenyake. Ara, keting noutam talak babye, lukunyan talak babye, Allah Yahweh elce nyalilamsuk yupu nirya kekebikirye, ‘Deiyok ara, aning ati nyabuk do?’ tenen, moubuka tenebikirye, unamake. Aninye ara, Allah arye melilamliba, telebuk unamake.

Mazmur 119:11

Na ni Allah, ance peteresilyam yupu nirya ara, na kanye noutamakuk, pia moubuka deipnirye, aninguk tenebuka wininune. Winibuka unyopura, narye an dam ton, malye ubuka kum kilinamne.

Mazmur 119:98

Nara, Allah ance nyapdeiamsulum yupu moubuka tenepnirye, batakana kumce, pia talibuka wininuna anya arye, adeice arye, weik kel bikna deiyok ning, weik arye wininulule. Na oldan nang, sikce ayupu moubuka tenena kum deice, malye wininyake. Sikda mitika arye kel bikinyak bukni, narye an yupu kel bikinun deice arye, weik kel bikna deiyok ning wininulule. Ati, pia moubuka tenepnirye wininamne.

Mazmur 121:3

Tonda, elce nunti, kum bataknamsile. Teleb ubuka kaliksiliba, nun yan babye, ton alap pitikuka kum opnamsile. Allah arye, nun Israel ninye ati, pia kalikisululnye bira, ton pia kum malule. Elce tuba-tuba nun damak ulirye, kalikuka melinamsile.

Mazmur 17:5

Diba na ni, ance, ‘Aning ara, wininamlume. Aning ara, pia kum wininamlume,’ nyapdeipsulum yupu, pia moubuka talinirye, dipkoprob uk wininune. Winipmanto ara, ninye arye kat tuku deice arye, bisik talye mangkau asa banmakirye, yan dum dukliba, kum saklamaka atonun, kum wininune. Ance nyapdeiamsulum yupu ara, pia moubuka kekenuna ati, malye kum wininune.

Mazmur 37:23

Yata ninye do nirya, diksukum bisikuk banyak ninye ara, Allah arye aninye ati, melibuka kalikilule. Allah arye aninye ati melipliba, sik wininamak ning nirya ara, telebuk upliba, nong upnamle. Deiyok ara, Allah arye aninye pia moubuka talilirye, telebuk unamake.

Mazmur 40:8

Narye aning akunum kel kipsa ati, wini talak ara, na yanmance, an dam aunmane. Ance nyapdeiamlumba, an yupu buku noutamak, nati akunum sekeipnik ning ara, nyapnukine.

Mazmur 40:9

Ara, na ni Allah ance, ‘Aning ara wininamlulume. Aning ara, kum wininamlulume,’ nyapdeiamsulum yupu nirya ara, na kanye talima pum tam akunum deipse. Ati ara, ance, ‘Wininamle,’ tenelamnulum touk, aninguk pataniliba, ‘Ayupu uk talibuka, diksukumuk wininamne,’ tenenune.

Mazmur 44:18

Bukni, nun ni Allah, ance ikin ning nirya ara, nun deice akunum yanamsukba, imun kanye bobuka unyabe. Bukni, nunce nun ni Allah anti, kum lubakinyabe. Anti tuba kintinikinyabe. Tonda, an Allah arye nunti, “Aning ara, wininamlume, aning ara, pia kum wininamlume. Tonda, winibuka teleb upmunyeura, narye teleb kilinamsina,” nyabuka, nyalin yupu deice nyapdeiamsulum yupu nirya ara, nun Israel nang ara, aning nirya kum lubakinyabe.

Mazmur 73:2

Bukni, min talak ara, na kanye akunum teniltona upnuka deice, na dib tenelamse ning ara, walwalapmanto upnuk. Winipmanto ara, alap weik uplye bisik, ninye mangkau kanye bobuka bakibuk, alap arye opmanto ulamle touk, winilamse.

Amsal 14:15

Walwal ninguk tenebuka unyak ninye nirya ara, yuk nang arye talye yupu nyaltakakiba, moubuka tenena kumce, anyapmace yupu nirya talye lukparabuka, dib tenebuka kekena uk unyake. Bukni, diksukumuk unyak nang ara, kanye pia moubuka tenebikirye, ‘Aning winipnamne do, kum do? Aning akunum winipnyopura, aminyan talak, yata ning na dam yanganamnil do?’ tenen, moubuka unyake. Aninye ara, moubuka tenina kumce, talye lukparabuka malye un ning, pia kum unyake.

Amsal 4:4

Winibuka ulamse talak ara, na ni birye pia moubuka peterelamnuke. Na ni birye, pia moubuka peterelamnuk yupu ara, ani. Narye anti, nyakinye yupu ara, moubuka kekepmince, kanye talima pum tam deibuka, teninauk unamlame. Tonda, ance na nyakinye yupu nirya ara, tonok ning babye, pia kum luba kinamlyame. Narye anti, “Aning ara wininamlame,” nyabuka nyamkise yupu ara, ninye taruk deice arye, ‘Na tenen ning’ tenen, talibuka bolamak ning atonun, tenebuka unamlame. Winipminyopura, an pia kam unamlame.

Yesaya 51:7

“Anggunda moubuka kekepnululume! Anggunce, ‘Se, diksukum winina ara, weik tonun patasululeʼ tenen, moubuka kel biklum nang ati nyapsine. Ara, narye, ‘Aning ara wininamlume, aning ara pia kum wininamlume. Teleb una ara ani,’ nyabuka peterelamsise yupu akunum taliplumce, anggun kanye talima noutam boplumce, aninguk talibuka ululum nang ati nyapsine. Anggunce na yupu kekepnululume! Sik yuk talye unyak nang, tukwak mutuku unyak nang arye, talye-talye yupu nyabuka, nalisinyak yupu ap, nalibuka ik-ik nyasinyak yupu ap, minin yupu nyasinyaka ap nirya babye, ilil una pia kume. Tonda, talye nang arye anggunti ara, ‘Sikda malye unyake. Sikda talye ning ati, diba tenenyake,’ nyapsikirye, malye yupu anggun deice nyasinyak nang ati ara, anggunce, ilil una kumce, ‘Se, yata ning deiyok ati ayupu nyasinyak do?’ tenen, kanye teniltona pia kum unamlume. Atalye nang arye, anggunti, malye yupu nyapnamsiyak bukni, anggunda ilil una ap, mikip mitang una ap ara pia kum unamlume. Deiyok ara, ani.

Yeremia 31:33

Bukni, sik malye winilamice ning ati, wenen ning akunum arepnyopura, aminyan talak, narye winiryuk nyalin yupu, sik Israel ninye dam nyapdeipnamne ning ara, atia. Minop talak narye, ‘Aning wininamlulume. Aning ara, kum wininamlume,’ nyabuka, yupu deice nyaiamse ning ara, aminyan talak ara, ayupu moubuka tenenyak, ninye ara, yuk-yuk sik talima noutamak deipniba, moubuka tenenamake. Minop talak ara, keil deice sekuka arepse bukni, aminyan talak ara, sik talima pum tam sekuka deipnamne. Winipnirye, nara sik ni koprop Allah unamne. Sikda, na mapu koprop pia aunamake.

Yehezkiel 27:6

Amekwen deice balamuk kapal, el mek bukna ati yo ara, Basan mutuku noutam kat weik yo tikamuka deice arye, kintinibuka domik. Aning atouk, akapal el ninye tikinak ap, bunak ap, tikuka banak ati, lan yo ara, Siprus mutuku arye, keipyal yo boyanuka domik. Tonda, keipyal yo lamik deice ara, el urasin teleb una ati ara, gaja el yang arye, urasin teleb ning memebuka, aning dobuka, yo labik deice deibuka domik.

Ulangan 6:6

Ati, wini talak ap, doryanamle talak nirya ap, anyapmasin yupu ara, luba kina kume. Anggun kanye talima noutamak ara, pia teninauk unamlulume.

Ibrani 8:10

Minop nyalilamsisi ning atonun kum bukni, aminyan talak noutamak arye, ninye ap na ap neika una ati, “Wininamlulume. Winipmunyopura, narye winibuka melinamsine,” nyabuka, anggun Israel ninye ati, nyalinamsin yupu ara ani. Ninye teleb una ati, “Wininamlulume,” nyasinye yupu ara, anggun kanye noutamak dongopnamsine. Dongopsinirye, anggun kanye talima noutamak sekeipnamsine. Nara, sik weik Ninye Deiyoknye Allah unyeba, na siuk erenamniyake. Sikda, na mapu unamake.