Nyabukura, el kil Seres ap, el kwit capu nirya ap arye, ayupu sikce kekebuka nyabik. “Nun tenepmap ning ara, ance nyapminba, ninye arye cang yo toubukabikirye, boyanunyake. ‘Ayo el cang ara 22 meter takubuka boyalulume,’ nyapminba, bobuka yanunyake. Winibicopura, ambusum pia beren tam talak koproba aniryuk ninye deiyoknye Raja ati, ‘Mordekai bira yo ikuka kitipdongop nirya, im dup deipnamabe. El ngang dam tapu arye kerekibirye, el nong dopkwetebibyopura, ngang yok cepliba dipnamle,’ nyabuka, moronulyame. Raja birye, ‘Telebe,’ nyapliba, anye Mordekai akunum obicopura, akunuma, talye kanye bobuka unamlame. Tonda, Ratu Ester birye kintinipnamkil kwalya dilbinmaninye talak arye, an talima namin kipnamakile,” nyabik. Nyabikba, Haman kekebukce, ‘Ayupu nyapnulum ning ara, telebe. Na tenepman touk nyabaka’ tenen, kanye deibuk. ‘Mordekai adiparyuk opnuyap’ tenen, el pil melin nang ati, “Wini talak minopce weik cang yo toulbilulume. Ninye on ning babye bopnululume,” nyabuk.
Mazmur 36:4 - Eipomek4 Sikce tilila yupu nyanyaka deice arye, yuk nang ati, ikin ning delinyake. Wininyaka deice arye, yuk nang ara, ikin kanye bobuka engenyake. Sik malye winin ninguk, talibuka wininyak nang arye, diksukum winin ning ap, weik bikuka wininyak ning ap nirya ara, akunum batakike. အခန်းကိုကြည့်ပါ။ |
Mazmur 36:4
24 ပူးပေါင်းရင်းမြစ်များ
Nyabikba, adiparyuk ninye deiyoknye Raja arye tamubuka asipdeyuk. “Yata nang do, na amu tam unyakce pil doninyak deiyok nang ara, wini talak na aik dam anyuk yatanye ton aunmal do?” nyabuka asipdeyuk. Raja Ahasyweros birye, ayupu nyabuk talak aryuk, el amu tam deiyoknye Haman birye, Raja aik dam yayuk. Ara, talye ati kume. Haman birye, ‘Mordekai optinye’ tenen, ‘Weik ninye deiyoknye Raja, el aik weknirye, moropnyopura, ‘Telebe,’ nyapnutopura, anye Mordekai tomobukapnirye, ninye on ning, tapu arye el ngang dam kerekibirye, yo deice kirikuka dopkwetebibyopura, opnamabe,’ tenebuka ati, Raja aik dam tikilyanmok. Yayukura, Raja birye, “Yatanye na dam yanmal do?” nyabuka asipdeyuk.
Malaikat babye, pia telebuk, lek nang kum unyaka ati, dipkoprob nun ninye koproba ara, Allah elce elisulula ara, ‘Sikda, pia diksukum teleb nang unyake,’ kum tenesulule. Tonda, kum winipnyabe. Malye winin ninguk wininyabe. Deiyok ara, nun ninye ara, malye winin nang unyabe. Tonda, nun ninye malye wininyap nang ara, winipmanto ara, talye mek kwebuka dilamak touk, malye winin ning ap, tenen ap ara, adiparyuk talye lubakibuka wininyabe. Anda atonun ulyama ati, nyapkine.
Ikin weik unulul talak ara, na kwit cayapu ap, na ap neika ulamupu nang nirya ara, na batakuka, na dam tuba kum unyake. Sik nirya arye, na batakuka yukak kisikdakuka, binuka unyake. Tonda, na unun asik dam ulamik nang babye, kisikdakuka yukak binuka, diba dinauk uninyake. Na dam ton, kum yanganyake.
Daud birye, ayupu nyabuk. “Se, anda mikip weik ulyamnye, anda yata ati maknya kintinip damince, yupu weik arye nyalilyam do?” Yata deiyok ati, diksukum ululnye biti, ‘Anye opnuyap,’ nyabuka warikinmalum do? Daud bira, Allah arye, ‘Aning ara, wininamlume, aning ara, pia kum wininamlume,’ nyapdeipsuk yupu, moubuka talilirye, pil moubuka dolule.
Ati ara, yata nang do nirya, sikce, Allah Yahweh ati, ‘Nun ni koproba ani’ tenen, diba tenebuka, elti, kanye deipmunce, bico tenelulum nang nirya ara, anggun nirya arye, malye un ning nirya ati, anggunce, ‘Nun like’ tenenamlume. Allah el tibuk, anggun kanye talima, el deiceuk delinamlume. Allah arye, ‘Naʼ tenen nang, ‘Winibuka wininamak’ tenen, akunum wipdeiamsuk nang ati, “Aning ara, wininamlume. Aning ara, pia kum wininamlume. Winipmunyopura, narye anggunti, pia teleb kilinamsine,” nyapdeiamsuk yupu, moubuka talinyak nang ara, Allah arye, pia melibuka kalikisulule. Winilula ati, anggun mal olan nang ap, sik pia malye ning talibuka, wininyak nang ap ati, obuka sirya daklyopura, el ‘Naʼ tenen nang anggunti dobuka, teleb kipdeipnamsile.
“Malye ulamice nang ap neika kum unamlulume,” nyapmasina ara, talye ati kume. Deiyok ara ani. Amalye winilamice nang arye, weik arye malye kanye bobikirye, ‘Malye winin ninguk winibibirye, yuk nang ati opnamabe,’ tenenyake. Aning atonun, sik si pum bisik arye pia malye yupu uk nyanamake. Anang sik ap neika umunyopura, ‘Sik malye ninguk talibuka ulamak touk, na mapu anggun babye atonun malye upmunyak’ tenen, nyapsine. Ati amalyeuk wininyak ninye ap neika una kume.
Aning atonun, weik kel bikna deiyok ning, akunum moubuka kel bikamik nang arye, nyalamkik yupu ton ani. Ninye yupu lipsisikuka bokolina talak ara, sik malye winipmace nang ati, ‘E, anye bira, malye upmal bukni, na kwit koprop ulula anya arye, kum wenepnamne,’ tenena kume. Aning atonun, ‘E, anye bira, na ka koprop pia kum ululnye anya arye, elce malye upmal ning ati, weik ikin ning deibuka wenepnamne,’ tenena kume.
Sik malye wininyak ninye ara, sik tenen ning, pia kum winipmacopura, sik aik pia moubuka kum manyake. Wininyaka deiyok ara, sik anang ara, lukunyan babye, keting noutam babye, beren tam babye nirya ara, sik kwit capu dib tenena nang ati, ‘Malye kipdeiptibye’ tenen, pia epra banyakce unyake. Ara, sik anang ara, yuk nang ati, malye kum kibuka deipmace talak ara, sik anang ara pia wi kum talilule.
Bukni, ‘Na tenena ninye unamak’ tenen, wiamse ninye, sik Israel ninye ati, ‘Narye sikti, melinamsine’ tenen, na taruk yangalilamseba, sikda talima kat ninye anya arye, na yupu kum kekepmanto ulamnike. Sikda, mandipna kanye bobuka malye-malyeuk unyakce, sikce ‘Wininamabe,’ tenenyak ninguk wininyaka anya arye, malye weik unyake.
Allah Yahweh arye ayupu ton nyabuk. “Na mapu Sikda, pia walwal nang unyake. Sikda nati, kum bikininyake. Sikda amul kunukne nang atonun unyake. Sikda mitik tonun babye, ton moubuka kum bikinyakce, malye un ning weik tonun bikinyak nang unyake. Adeice arye teleb kibuka una ara, kum bikinyakce, nong kum ulule.”
Aning ati ara, Allah el si Yahweh arye, el mapu koprop Israel yala ninye ati, nyabuk. “Anggunda bisik kwak tikmunce, asipdenamlume. ‘Abisik binuyab do? Abisik binuyab do?’ tenen, moubuka tenipmunyeura, ‘Min talak nun apu yapu arye, balamik teleb bisik dan do?’ tenen, moubuka asipdamunce, tenipnamlulume. Teleb bisik akunum eipmunyeura, abisikuk dobolbalulume. Winipmunyaura, anggun ikin kanye bona kum diparyuk, kanye deibuka, telebuk kam wininamlume. Na Allah arye, Israel ninye ati nyapse bukni, sikce, ‘Abisik teleb upmatu babye, abisik ara, pia kum banamabe,’ nyabuka, bataknik.
Anggunce nyanululum yupu ara, na akunum moubuka kekesunun bukni, anggunda teleb yupu ton, kum nyalulume. Anggun umunya kan-kan arye, tonoknye babye, ‘Se, na malye wininun ning ara dan do? Nara, yata ati, aning tuba wininun do? Aning nirya ara bataknirye, kanupdongobuka, Allah dam tamubuka binune,’ tenebuka, kum batakalulume. Anggun nirya ara, anggun kanye aryuk teneplum bisikuk balulume. Winipmanto ara, ninye olan talak ara, sik kuda basam arye, ‘Olanyak nang arye opsikcake,’ tenena kum aryuk, talye kanye boplirye, bikbik abuka olanmakce tam, talye balamle atonun, anggun babye, ‘Allah arye wenebuka opsilyak,’ tenena kum arye, tuba malye winilulume.
Aning atouk, ‘Malye winin ning ara, nun like’ tenen, pia diksukumuk unamlume. Yata malye winin ning do nirya, malye ning nirya batakmunce, ‘Aning ara, nun like’ tenen, malye ning pia kum wininamlulume. Winibuka umunyopura, dinamlume. Winipmunyopura, nara, Allah Yahweh, Pia Mikip Weik Deiyoknye unirye, im deice unyak yin talin nang nirya talinunye bira, dipkoprob anggunti, melinamsine. Telebuk winimunyopura, narye minopce wenebuka kum opsinirye, tuba tamubuka, tonap bico tenepsinyopura, Yusup el yala ninye ati, teleb updeipnamsine. Ara, anggun apu koproba, Yusup birye deiamukba, dadeipdanin yangalamika ani, wini talak babye ululum Israel ninye ati, na Allah Yahweh arye anggunti, bico tenesipnirye, melinamsine.
Yata ninye do nirya, sikce talye bona utotoa weik talina kum ninye ati, ikin ning dobuka, sik nong deiceuk, delilulum ninye nirya ati, sikda bicoe. Allah arye anggunti, weik tonun wenepnamsile. Lukunyan mapnukce talak arye, ‘Ninye yuk nang ati, ikin pil dipnamabe,’ nyabuka, yupu talenmaca ani, bereklyopura, beren tam talak ara, adiparyuk asisikmakce touk, ikin ning dobuka, sik bona utotoa kum ninye, nong deice delinyake. Ara, sik anang arye, deiyok koubuka, yupu mikip arye talipmaca deice arye, wininyake. Sikda weik deiyok nang unyaka anya arye, talye-talye daunyak ninye nirya ati, ikin ning weik, sik nong deice dobuka delinyake.
Kume, aning-aning nirya, akunum winiptibya babye, adeice arye, pia kum lyepnamsile. Bukni, nun ni Allah Yahweh arye, nun tukwak mutuku unyap ninye nirya ati tenesilya ara, ‘Na kanye delina ati ara, wininamake,’ tenesulule. Utenesilya ati, el minop talak akunum laka nyapdeiamsuk ara, ani. Yata ninye do nirya, pia diksukum teleb kibuka unyakce, yuk ninye nirya ati, bico tenelakirye, kanye talima, amu tam nimalyap asa kanye deibuka, telebuk unamake. Wininyakce, Allah el amu tamuk unyakce, kanye talima erena kumce, Allah ap, kanye talima dukdongobuka, neika ubicopura, Allah arye aninye ati, kanye delinamle. Aning ara, ‘Wininamake,’ tenesulule.
Yahudi yala nang Allah arena ati, weik deiyok nang ap, Musa sekamuk yupu peterena deiyok nang ap, Yahudi yala nang, yuk deiyok nang wisi nang ap, alukunyan noutam nirya ara, sik yupu weik arye talinmek. Anang nirya yupu weik talinmekopura, ‘Yesus ara opnamabe. Ara winipnamabe,’ tenebuka yupu talipmek.
Allah arye amalye winin ning talibuka unyak ninye nirya ati nyalamuk. “Aninye atonun ninye nirya ara, weik arye wenebuka opnamne. Winipnyopura, na ap neika pia kum unamabe. Batakniba, sik yuk dadepnamake. Aninye ara, weik arye wenepnamne,” nyapdeiyamsuk yupu ara, akunum kel kiyamik bukni, ‘Aning ara pia mambule,’ tenena kum diparyuk, tuba-tuba talye luparabuka pia malyeuk wininyake. Winikirye, sikce pia malye winilamik touk, aninguk talibuka unyakce, malye ninye ati, sikce “Aning ara telebe uka,” nyabuka si dolakirye erelilanyake.
Ura, anggunce, ‘Yuk ninye nirya ati, bico tenebuka melinamabe,’ nyabuka tenepce arye talye yupu nyabuka, kum wininamlum bukni, dipkoprop yuk ninye ati pia bico tenebuka melipnamlulume. Tonda, malye winin ning aning-aning nirya ati, ‘Aning ara pia nun like’ tenen, bataknamlume. Malye ning tonok babye talibuka kum unamlume. Teleb winin ning yala-yala nirya ati, aninguk talipmunce kanye deibuka diksukumuk unamlume.
Anggun ululum ning nirya ap, anggun ikin pil weika arye dolamlum ning ap ara, kel bikamsise. Anggun nong deice ikin ning awamukba, batakna kumce, pia pi dobuka, na pil tuba dolamlum ning ara, na kele. Anggunce, yuk pia malye wininyak ninye ati, ‘Nun like’ tenen, leibuka yuk ululuma ara, na kele. Tilila ninye arye, “Allah el yupu dobuka peterelbana ati, deiyok kouna deiyok nang, Rasul nang unyabe,” nyabuka talye nyaltakalamik bukni, anggun Efesus mutuku ninye arye, ‘Anang ara dib do, tilila do?’ tenen, asilelamlume, ‘Anang ara tilila nang uka,’ tenebuka kel kiyamlum ning ara, kel bikamsise.