Mazmur 36:3 - Eipomek

³ Wininyaka deiyok ara, sik bidamnye ati, ‘Nunda pia teleb nanguk unyabe,’ tenelanyake. Tonda, sikda, ‘Kume, nunce malye-malye winin ning, pia weik arye wininyap ning ara, yatanye birye biksuturye, wenepsiting do? Ton kum disinyakeʼ tenen, talye luparabuka, malye-malyeuk wininyake.

Mazmur 36:3 ပူးပေါင်းရင်းမြစ်များ

2 Samuel 22:22

Aning ara, urdem ati kum nyapne. Na ni koprop Allah, el si Yahweh arye, ‘Wininalyame,’ nyapdeiamsuk yupu moubuka kekelamsirye, el yupu talibuka ulamse. Nara, binan arye ulamsirye, Allah elce, ‘Wininamlume, aning ara, kum wininamlume,’ nyamsuk yupu uk, kekebuka dobolbalamsirye, Allah batakuka, malye kum winilamse. Ati ara, dekna weik ning arepnuke.

2 Tawarikh 20:32

Raja Yosafat ara, el li koproba, Asa ulamuk atonun, Yosafat babye, batakna kumce, teleb pil dobuka ulamuka ati, Allah Yahweh arye, ‘Aning ara telebe tenelamlum ninguk talebuka, diksukum piluk dolamuk.

Mazmur 10:7

Sik anang ara, ninye sulongon yupu ap, talye yupu nyana ap, weik tonun nyanyake. Tonda, yuk nang ati, ‘Sik nong deice ikin weik tonun delinamabe,’ tenenauk unyake. Atonun, yuk nang nirya ati, ‘Anang ara, nun pia like,’ tenebikirye, pia malye winin ninguk talibuka, talye unamabe!’ tenenyake.

Mazmur 125:5

Bukni, yuk nang arye, sik kanye deice aryuk, ‘Malye winin ninguk talibuka wininamap’ tenen, teleb winin bisik ara, batakikirye, kwalin bisikuk banyak nang ara, Allah Yahweh arye, anang nirya ara, dobukaplirye, pia malye-malye ning weik wininyak nang ap, tabaklirye, pia yukak, pera mutuku bobinamle! Bukni, nun Israel yala nang ara, ‘Allah arye pia teleb kipdeipsilirye, ansinip deipsiliba, pia kanye deibuka, telebuk wininamap’ tenen, Allah ati moronyabe.

Mazmur 140:3

Ayu nang arye yuk nang ati, ‘Amutuku nang ton olbinamabe,’ nyabuka, sik kweit cayapu ap, yupu talinyake. Kanye pum noutam arye, aninguk pia teninyake. Sik ayu nang arye, asum-asum nirya arye, ‘E, amutuku-amutuku nirya, dana-dana tam nirya unyak nang ati, yu kilam yupu nyabibiba, kekepsikcopura, ninye olbanauk pia unamake,’ tenebikirye, malye wininyake.

Mazmur 5:9

Na ni Allah Yahweh, ance, ‘Diksukum bisikuk binuka unamle,’ tenepniminyopura, nara, ‘Abisikuk binamne,’ tenen, pia patanulula ati, ance nyapdeipnulum yupu deice arye, abisik peterepnamnilame. Ara, nati, ‘Anye bira nun lik,’ tenen, na mal olan nang unyaka ati, ‘Diksukum un bisikuk peterepnamnilamʼ tenen, moropkine na nio. Winipmanto ara, ninye arye teleb bisik yabukabikirye, pia punguk ulamle touk, nara, ‘Ance melipniminya deice arye, dipkoprob bisik diksukum arye unamne’ tenen, morokunune.

Mazmur 55:21

Na kwit koproba ara, na ap, el ap, yuk nang ap arye, ‘Olana kumce, talye kanye bobuka, telebuk neika unamabe,’ nyabuka, nyalin yupu deice arye nyapdanamupu. Bukni, elce nati, ‘Deiyok winipnamname,’ nyabuka, nyalin yupu deice arye, nyapdanumu ning ara, akunum batakukce, malye kilinulule.

Mazmur 58:3

Kume, na kele. Anggunda, Allah arye nyasilye yupu ara, yanibukapmunce, anggun kanye talima noutam, malye tenelulum touk ubuka, yupu bokolimunce, malye winilulume. Anggunda, nun Israel nang unyap mutuku noutam nirya ara, ikin ning deipsumunce, malye kilisululume.

Mazmur 94:8

Sikce winibuka nyanyak bukni, na aMazmur yupu sekenanye bira, ayupu nyapsine. “Tukwak nang kan-kan noutam ara, mitik tonun walwal nang unyak bukni, anggun amutuku ululum nang ara, pia wal-waluk ululume. Ati, narye nyapnusin yupu ara, moubuka kekepnamnulume! Anggun pia wal-waluk ululum nang nirya ara, dan talak arye, teleb yupu kekepmunce, etekdop nang ton unamlum do?

Amsal 4:16

Sik malye wininyak ninye ara, sik tenen ning, pia kum winipmacopura, sik aik pia moubuka kum manyake. Wininyaka deiyok ara, sik anang ara, lukunyan babye, keting noutam babye, beren tam babye nirya ara, sik kwit capu dib tenena nang ati, ‘Malye kipdeiptibye’ tenen, pia epra banyakce unyake. Ara, sik anang ara, yuk nang ati, malye kum kibuka deipmace talak ara, sik anang ara pia wi kum talilule.

Yeremia 4:22

Allah Yahweh arye ayupu ton nyabuk. “Na mapu Sikda, pia walwal nang unyake. Sikda nati, kum bikininyake. Sikda amul kunukne nang atonun unyake. Sikda mitik tonun babye, ton moubuka kum bikinyakce, malye un ning weik tonun bikinyak nang unyake. Adeice arye teleb kibuka una ara, kum bikinyakce, nong kum ulule.”

Hosea 8:3

Bukni, na kele. Sik Israel nang nirya arye, “Teleb winin ning ap, diksukum winina ap ara, nun like,” nyabuka, batalamik. Ati, sik anang nirya ara, sik mal olana ati, yu nang arye dobolbinamake.

Zefanya 1:6

Tonda yata nang do nirya, sikce, ‘Se, nun ni Allah arye, yata yupu nyapnamsil do?’ Tonda, ‘Nai ance nunti, kalikuka melinamsilamʼ tenen, na dam ton yanuka, kum moroninyake. Tonda, sik anang arye, ‘Se, nun yata wiripnamap do? Teleb ning ara, aning do, aning do?’ tenen, na Allah ati, tuba kum asininyak nang nirya babye, wenebuka opnirye, sirya dakuka, kum daneipnamne. Ara, sik anang nirya ara, na Allah ati, melibuka kum dobolyanganinyakce, akunum bataknika ati, opnirye pia kum daneipnamne. Tonda, ‘Allah arye, yata yupu nyapsiliryeba, aninguk talebuka dobolyanganamap do?’ tenen, na dam yanuka, na yupu kum kekenenyake. Wininyaka ati, anang nirya opnirye, pia kum kipdeipnamne.

Matius 22:35

Asinmek talak ara, tonoknye ton, Musa sekamuk yupu, mem yupu peterena deiyoknye ulamuka anya arye, weik kelnye ulamuk. Winibuka ulamukce, Yesus dam yayuk. Anye yayukce, ‘Yesus malye yupu nyaptue’ tenen, winildena ati, Yesus ati ayupu talya tenepce asipdeyuk.

Lukas 11:25

Yanuka dinmalirye, el min arye ulamlye aik noutamak ara, amsuna ap, delin ning nirya ap, teleb wamlirye, ninye ton una kum ati, ‘E, anyaik ara lo tuba upmala ati, anyakuk unamne,’ tenebuka ulule.

Ibrani 10:39

Ayupu aupmal bukni, na kayapo, nun nirya ara, ilil arye ila tuba tonap batakikiba, Allah arye wenebuka oplopnamle ninye atonun kum unyabe. Nunda, diba tenenauk ubikiba, Allah arye lyenamsil ninye unyabe.

1 Yohanes 2:19

Anang ara, nun batakuka nun kan-kan arye yukak bindobik bukni, nun kanye ap, sik kanye ap neiktoto kume. Nun diba tenebuka, nun kanye tenenyap atouk nang ulamtingtoura, nun batakna kumce, nun ap neika ulamtibye. Bukni, sikce nun batakuka bindobikce, yuk tam kipdobikbuk, eibupurye, sik ulamik ning kel kibupe. Ara, ‘Aning sik kan-kan danerye, tonoknye babye ton, nun diba tenebuka kanye tenenyap touk, sik babye, diba kum tenenyaka’ tenen, kel bikamubu.

1 Samuel 15:26

Saul birye nyabukura, Samuel birye tamubuka nyabuk. “Kume, an ap tamubuka kum binaname. Deiyok ara, Allah arye, ‘Wininamlyame,’ nyapdeipkuk yupu yanipluma ati, Allah el si Yahweh arye, anti akunum batakile. Ati, na ap kum binamaname,” nyabuk.

1 Samuel 16:14

Saul bira, Allah el Dib Kanye melibuka ulamuk ning nirya, lopdeibukba, atalak ara, ‘Isa el kanye uk, Saul talima pum tam weknamle’ tenen, Allah arye dopdeibukba, el talima pum tam wekukce, malye updeibukba, kanye malye bobuka ulamuk.

1 Samuel 18:21

Ati ara, Saul birye, Daud biti, ‘Na lik,’ tenebuka ati, el Saul birye, aning ton tenebuk. ‘Wini talak ara, na kilmu Mikhal bobinuka, Daud biti arepnyopura, akil doptopura, Daud el ikin ning dopropnamle. Ura, na kanye ara, winipnya deice arye, sik Pilistin yala yin nang arye, Daud opnamakeʼ, tenebuk. El kanye teninmok noutam arye, aning tenebuk bukni, Saul birye Daud biti, aning laka kum nyabuk. Saul birye, like bitinye talak arye, Daud biti nyabuk, “Wini talak ara, na kilmu arepkiniba, dopminyopura, anda na yamal unalame,” nyabuk.

1 Samuel 26:21

Daud birye, ayupu nirya, akunum nyabukopura, Saul birye tamubuka nyabuk, “Se, winira na bikmakine. Narye, akunum malye upse. Na ni mi Daudo, an adiparyuk tamubuka, na dam yanulyame. Ara, narye ton, tuba tamubuka, an dam malye kum kipdeipnamkine. Ara, arup lukunyan ara, ance akunum opmanutum bukni, ance nati ‘Bico,’ tenepmanumce, kum opmanilame. Narye anti, malye upse ning ara, walwal arye upse. Ara, dipkoprob na kanye walwal upmanua deice arye, malye upse,” Saul arye nyabuk.