Allah arye, nun tukwak mutuku unyap nang nirya ati, nyasulule. “Dipkoprob, weik kel bikna deiyok ning ara, ani. Ara, anggun ni koproba Allah, el si Yahweh ati, ‘Se, elda pia mambule,’ tenepnulumce, nati ilil unamsile. Tonda, Allah arye, “Teleb winin ning ara, aniʼ tenen, kel bikin ning bukni, el nong noutam ara, ani. Ara, yata malye winin ning do nirya, anggunce aning bataklumce, anang dam arye kisik dakuka, yukak bimunyopura, kel weik nang unamlulume,” nyapdeipsuke. Ayupu nirya ara, Ayub birye, el kwit capu sik winilye nang ati nyabuk.
Mazmur 34:14 - Eipomek14 Anggun sitang deice arye, ‘Malye yupu tabipyak’ tenen, pia moubuka kalikelanamlulume. Tonda, anggun sitang deice arye, tilila yupu ap, tenepce arye nyana yupu ap, pia kum nyanamlulume. အခန်းကိုကြည့်ပါ။ |
Mazmur 34:14
26 ပူးပေါင်းရင်းမြစ်များ
Ara narye, “Yuk ninye ap, neika talima dukdongobuka winin ning ara, teleb uka,” nyalamne talak nirya ara, na ap neika unyap ninye ara, yu weik ninye anya arye, sikce, “Kume, yuk ninye ap, kanye talima dukdongobuka namin asa arye, neika un ning ara, nun like. Teleb ning ara, nunda mal olanauk wininamabe,” nyanyake. Ati ara, na lik weik unulule. Daud arye nyabuk.
Narye nyapse. ‘Kume, ‘Mangkau arye malye winipnyakʼ tenen, narye wininamne ning nirya ati, ‘Aning ara teleb do, kum do?’ tenen, moubuka teninamne. Ara talye ati kum bukni, deiyok ara, ‘Mangkau arye malye yupu ton nyapnyak’ tenen, moubuka teninamne. Ati, talye lukdanuka talye-talye yupu pia kum nyanamne. Min yuma moubuka tenipnirye, teleb ninguk nyanamne. Winipmanto ara, kuda basam arye, mikip dobukaplirye, bikbik abuka bindoplyak’ tenen, el si bambol tapu koulongolamak touk, narye moubuka tenipdenirye, yupu nyanamne. Ara, sik malye winin ning talibuka wininyak nang ara, na dam unamak talak nirya ara, na nyanamne yupu ara, moubuka tenipnirye, teleb ninguk nyanamne.
Kel pia weik bikamik nang arye, “Winina ara telebe, aning ara malye,” nyabuka, lipsisikna yupu ap, wenen yupu ap nyasinyak yupu ara, pia telebuk ulinamsile. Winipmanto ara, pia teleb mek puak arye mek kwebuka dipmunce, telebuk ulamlum touk, aweik kel bikamik nang arye, nyasinyak yupu moubuka talimunce, upmunyopura, telebuk unamlulume. Sikce nyasinyak yupu moubuka kekebikirye, ayupu talibuka dobolbanyak ninye ara, malye un ning sik dam yalyopura, adiparyuk, ‘Kume, aning dobolbanyopura, aminyan talak opniliba dipnyake,’ tenebikirye, adiparyuk memelonyake.
Allah Yahweh ati, ilil upliba, el siuk erenyakce, el tam uk si erenyak ninye nirya ara, ‘Malye winin ning nirya ati, nun like,’ tenekirye, batakanyake. Nara pia weik kel bikna deiyok ning arena deiyoknye ununa ati ara, narye, ‘Aning ara na like,’ tenenun ning ara ani. Ara, malye winin ninguk, talibuka unyakce, sik talima erelanyak ninye ap, erepdanuka kwalibuka kwalina deice uk unyak ninye ap, tenen arye malye yupu nyaltakanyak ninye ap, malye ning ayala-ayala nirya, talibuka unyak ninye ap, sik nirya ati, yu uniliba, ‘Na pia like,’ tenenune.
Sik kanye deibuka telebuk un nang ara, ani. Ara, ninye olanmace talak, ‘Namin uptinge’ tenen, ‘Olana ap, walana ap ara, bataklulume,’ nyabuka, teleb ubuka bita dilamice nang ara, Allah diba tenebuka unyaka anya arye, aminyan talak ara, anang ati Allah arye nyapnamle. “Anang ara, na mapu unyake,” nyapnamle.
Allah arye Yesus Nasaret mutukunye, akunum wipdeibuka ati, ‘Na piluk donamle’ tenen, el mikip ap, Allah El Dib Kanye ap, Yesus nong deice deibukura, Yesus arye pia teleb piluk dopra balamuk. Dopra balamuk akarye, Isa Mutuku Dongonye kouke pum tam weklamukak ulamik ninye weik kwetelilamuk. Aninye weik kwetelilamuk deiyok ara, Allah ap, Yesus ap, sik neiktoto ulamrik arye, Allah el mikip el nong deice deiamuk arye aninye kwetelamuk.
Yuk nang arye, anggunti, ‘Nun ap, anggun ap neika teleb ubuka kum unamap’ tenen, malye kipdeipsicopura, anggun deiyok uka. Aning ara anang anggun deice aupnamle bukni, anggun diba tenelulum ninye, anggun bidamang deice aupnamle ning nirya ara, ‘Kume, derelana ap, olana ap kum diparyuk, nun ap, yuk ninye nirya ap, kanye talima dukdongobuka namin asa arye, teleb ubuka neikauk unamap’ tenen, pia pi dobuka pirilenamlulume.
Ura, anggunce, ‘Yuk ninye nirya ati, bico tenebuka melinamabe,’ nyabuka tenepce arye talye yupu nyabuka, kum wininamlum bukni, dipkoprop yuk ninye ati pia bico tenebuka melipnamlulume. Tonda, malye winin ning aning-aning nirya ati, ‘Aning ara pia nun like’ tenen, bataknamlume. Malye ning tonok babye talibuka kum unamlume. Teleb winin ning yala-yala nirya ati, aninguk talipmunce kanye deibuka diksukumuk unamlume.
Ayupu nyapmasina deiyok ara ani. Diba tenebibiba, Allah arye nun kanye talima talisiliba, el yupu kekebuka dobolbanyaba deice arye, weik mambul usilye ning ara, din ning ap, mek ap, talye luparabuka dina meme. Aning ara kum bukni, weik mambul ning ara, Allah El Dib Kanye melisilya deice arye, diksukum una ap, ninye yuk nang ati, bico tenena ap, tonda ninye ati pin-pin asa arye kanye deibuka kanye lamapdongobuka arye neika una ap, anirya ara weik mambule.
Anyapmasin yupu nirya ati ara, ayupu ton nyapnusine. Asum-asum nun nirya arye, ‘Yata teleb ning winiptibyeba, nun diba tenenyap nang nirya arye, kanye deibuka namin asa arye neika unamap do?’ tenen, pia pi dobuka pirilenamlulume. Tonda, anggun nirya arye, ‘Telebuk winibirye, nun kanye talima kwa dipdabiba, nun kanye talima ap, nong ap nirya ara, wisipnamsil’ tenen, pirilenamlulume.
Ara, Yesus dib teneluluma ati, nun du weit atonun ululum ninyeo, anggun sal babye, kilapu ababye kekepnululume. Narye anggunti, ‘Se, winibuka, winibuka winipting’ tenen, patapnil ning ara nyapsinibuk, anggun kekebuka wininamlulume. Ara, ‘Allah arye nun malye winin ning nirya kum daneipsuturye, pia diksukumuk updeipsilibuk, kanye talima wisipnamsile’ tenen, patasilibuk, unamlulume. Tonda, tonok kanyeuk tenebuka, teleb ubuka neika unamlulume. Walana ap, oldana ap, malye winilana ap kumce, nimalye arye teleb ubuka neika unamlulume. Aning-aning nirya akunum upmunyopura, nun Ni Koprop Allah ap, anggun ap kanye talima dukdongobuka unamlulume. Anggunti bataksilirye, el Allah yuk kum unamle. Allah elda, yuk nang ati bico tenebuka melildana deiyok ning aresulule. Tonda, nun ap, yuk nang ap, kanye talima namin ubuka teleb ubuka neika una ati, deiyok ning aresulule. ‘El ap, anggun ap neika unamlum’ tenen, Allah morosunune.
Aning ara, lo tuba upmasilye talak ara, yuk nang sik patan ning do, ikin uplye talak do, eibibyopura, aninye ati bico tenebuka melinamabe. Ninye nirya ati bico tenebuka melinamap bukni, pia weika arye bico tenebuka melinamap ninye ara, Yesus ati diba tenenyak ara, nun du weit atonun kipdeipsuk ninye ati, bico tenebuka melinamabe.
Nunce anggunti peterena deice arye, nyapsupu touk, anoutam talak nirya arye, anggunce yuk nang ati, “Anggunda yata ati aning wininmalum do? Winipnamlulum, winipnamlulum,” nyabuka nyalina kume. ‘Nun bidamnye taruk aniryuk pil dobibirye, kanye lamabuka ubibirye, kanye deibuka, nimalye arye unamap’ tenen, pia pi dobuka wininamlulume.
Aninye ara wininyak bukni, Allah arye nyapsuk yupu ara, min kum upsutue. Winipmanto ara, pia teleb ayukumna yo, gat yo iknabuk, pia gat ulamle atonun, Allah arye nyapsuk yupu ara, min kum kum datue. Allah el yupu noutamak sekamik yupu deice arye, lak kipdeipsuke. Ayupu ara, ani. ‘Allah arye, ‘Aninye na mapu unamake’ tenen, akunum wipdeiamsuk ninye ara, el akunum kel bikamsuke.’ (Bilangan 16:5) Tonda, ‘Yata nang do nirya, “Allah ati akunum diba tenepsa ati, el mi unune,” nyanyak nang nirya ara, adiparyuk malye winin ning nirya ara, batakikirye, balye tamubuka diksukum bisikuk banamake.’
Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.
Ura, na kayapo. Anggun nirya arye, ‘Yuk ninye nirya ap, kanye deibuka neika ubibirye, malye winina ap, olana ap, yupu deice walana ap, aning nirya pia kum diparyuk, diksukumuk unamap’ tenen, pia pi dobuka, pirilenamlulume. Malye winina ning nirya, kum batakikirye, diksukumuk kum unyak ninye ara, nun Weik Deiyoknye Allah, el ap neika ansinibuka kum unamake.
Na kwit Gaiuso, malye winin ning ara dipdemince, leibuka yukak unamlyame. Malye winin nang arye winilamak touk, anda pia kum wininamlyame. Malye winin ning kum bukni, teleb winin ninguk eibuka aninguk wininamlyame. Yata nang do nirya, teleb ubuka funguk wininyak ninye ara, Allah ap, ansinibuka unyakce, Allah el mapu unyake. Sik malye-malye wininyak ninye ara, Allah ati moubuka kum kel kiyamika ati, el winilul ning moubuka kum tenenyake. Tonda, diba kum tenenyake, nyapne.
ကြော်ငြာတွေ